ຢືນຢັນລາວຍັງບໍ່ມີຜູ້ຕິດພະຍາດ ໂຄວິດ-19

ກະຊວງສາທາລະນະສຸກ ໄດ້ອອກມາແຈ້ງຂ່າວເພື່ອສະແດງຄວາມເປັນຫ່ວງເປັນໄຍຕໍ່ປະຊາຊົນລາວ ກ່ຽວກັບພະຍາດອັກເສບປອດໄວຣັດສາຍພັນໃໝ່ ຫຼື ໂຄວິດ -19 ໃນວັນທີ 26 ກຸມພານີ້ ທີ່ກະຊວງດັ່ງກ່າວ, ທ່ານ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ແລະ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ອອກມາແຈ້ງຂ່າວກ່ຽວກັບພະຍາດອັກເສບປອດໄວຣັດສາຍພັນໃໝ່ ຫຼື ໂຄວິດ -19 ຂ້າພະເຈົ້າ ຂໍໃຫ້ຂໍ້ມູນຕື່ມໃນວັນທີ 25 ກຸມພາຜ່ານມາ ສະພາບພະຍາດອັກເສບປອດໄວຣັດສາຍ ພັນໃໝ່ ຫຼື ໂຄວິດ -19 ສະເພາະຢູ່ ສປ ຈີນ ມີທ່ວງທ່າຫຼຸດຜ່ອນລົງສັງລວມແລ້ວສາມາດຄວບຄຸມສະຖານະການໄດ້  ຊຶ່ງໂຕເລກຫຼ້າສຸດຮອດວັນທີ 25 ກຸມພາ ມີຜູ້ຕິດເຊື້ອກໍລະນີໃໝ່ ລວມທັງໝົດແມ່ນ 78.064 ກໍລະນີ, ກໍລະນີໃໝ່ 406 ຄົນ, ກໍລະນີເສຍຊີວິດມາຮອດປັດ ຈຸບັນ 2.715 ກໍລະນີ ຫຼຸດລົງຈາກມື້ຜ່ານມາ, ໂຕເລກມີການປ່ຽນແປງໄປແຕ່ລະຊົ່ວໂມງ, ສະເພາະບັນຫາໃໝ່ທີ່ເກີດຂຶ້ນ ຊຶ່ງພວກເຮົາຈະຕ້ອງໄດ້ເອົາໃຈໃສ່ແມ່ນຢູ່ສາທາລະນະລັດເກົາຫຼີ ກໍລະນີການຕິດເຊື້ອຢູ່ເມືອງແດກູ ແມ່ນໄດ້ເພີ່ມຂຶ້ນຢ່າງໄວເຊື້ອພະຍາດໂຄວິດ -19 ມີການແຜ່ຂະຫຍາຍຕົວໄວເປັນວົງກວ້າງ ມາຮອດປັດ ຈຸບັນຂໍ້ມູນຫຼ້າສຸດມີເຖິງ 977 ກໍລະນີ, ເສຍຊີວິດແລ້ວ 10 ກໍລະນີ. ນອກຈາກນັ້ນ, ຢູ່ໃນເຂດຢູໂຣບ ເປັນຕົ້ນປະເທດ ອີຕາລີ ມີອັດຕາການຕິດເຊື້ອມີເຖິງ 322 ກໍລະນີ, ເສຍຊີວິດ 10 ກໍລະນີ ໂດຍລວມແລ້ວ ພະຍາດໄດ້ແຜ່ຂະຫຍາຍ.   ນອກຈາກຢູ່ ສປ ຈີນ ຍັງຂະ ຫຍາຍໄປປະເທດອື່ນໆ ໃນທົ່ວໂລກກວມ ເອົາ 37 ປະເທດ.

ສະນັ້ນ, ດ້ວຍຄວາມເປັນ ຫ່ວງເປັນໄຍຂອງພັກ-ລັດຖະ ບານ ຢູ່ ສປປ ລາວ ເຖິງວ່າບໍ່ທັນມີກໍລະນີພົບຄົນຕິດເຊື້ອດັ່ງກ່າວ,  ມີກໍລະນີສົງໄສທັງໝົດ 43 ກໍລະນີ ພວກເຮົາໄດ້ເກັບຕົວຢ່າງໄປກວດທັງ 43 ກໍລະນີເຫັນວ່າບໍ່ພົບເຊື້ອ ຂໍຢືນຢັນອີກເທື່ອໜຶ່ງວ່າພວກເຮົາບໍ່ພົບເຊື້ອຢູ່ໃນ ສປປ ລາວ ຕໍ່ສະພາບການດັ່ງກ່າວພວກ ເຮົາກໍ່ໄດ້ເອົາໃຈໃສ່ຕິດຕາມ ເຝົ້າລະວັງຢ່າງເຂັ້ມງວດ, ເຖິງວ່າ ສປປ ລາວ ພວກເຮົາບໍ່ມີຜູ້ ຕິດເຊື້ອກໍ່ຕາມທາງກະຊວງ ສາທາລະນະສຸກ ກໍໄດ້ເອົາໃຈ ໃສ່ຕິດຕາມຢ່າງເຄັ່ງຄັດທີ່ສຸດ ໂດຍມີມາດຕະການເຂັ້ມງວດ ໃນການເຝົ້າລະວັງ ຊຶ່ງໄດ້ສະເໜີໃຫ້ປະເທດທີ່ມີການລະບາດກ່ອນທີ່ຈະເດີນທາງເຂົ້າມາ ສປປ ລາວ ໃຫ້ມີການກວດເຊັກ, ສະແກນ, ກວດອຸນຫະພູມໃຫ້ປະຕິບັດຢ່າງເຂັ້ມງວດຕາມມາດຕະຖານສາກົນ, ດັ່ງນັ້ນ ດ້ວຍຄວາມເອົາໃຈໃສ່ ແລະ  ພະຍາຍາມມາຮອດປັດ ຈຸບັນຢືນຢັນວ່າ ສປປ ລາວ ຍັງບໍ່ທັນມີຜູ້ຕິດເຊື້ອ.

ນອກຈາກນັ້ນ, ພວກເຮົາຍັງໄດ້ເຮັດແຈ້ງການຂອງຄະນະສະເພາະກິດເຖິງໂຮງຈັກ, ໂຮງງານ, ເຂດການລົງທຶນໃຫຍ່ແຕ່ລະບ່ອນທີ່ມີກຳມະກອນແຮງງານຈາກ ສປ ຈີນ ແຈ້ງການໃຫ້ເອົາໃຈໃສ່ຕິດຕາມອຸນຫະພູມຂອງພະ ນັກງານ-ກຳມະກອນຂອງຕົນເອງ, ປະກອບເຄື່ອງອຸປະກອນວິເຄາະຫາເຊື້ອໃຫ້ແຂວງທີ່ມີຜູ້ເດີນທາງທີ່ມີການລະບາດຫຼາຍ, ໂຄສະນາເຜີຍແຜ່ໃຫ້ມວນຊົນຮັບຊາບເຖິງຄວາມອັນຕະລາຍ, ວິທີປ້ອງກັນຕົນເອງ ແລະ ມາດຕະການຕ່າງ ໆໃຫ້ຮັບຮູ້ຂໍ້ມູນຂ່າວສານເພື່ອປ້ອງກັນຕອບໂຕ້ພະຍາດໂຄວິດ -19, ສຳລັບບໍລິສັດທ່ອງທ່ຽວ ແລະ ສາຍການບິນ ໄດ້ອອກແຈ້ງການໃຫ້ເລື່ອນໃນການເດີນທາງໄປເຂດທີ່ມີຄວາມສ່ຽງການລະບາດໃນໄລຍະນີ້.

Medialaos MMD

ກອງປະຊຸມໃຫຍ່ ຄັ້ງທີ III ໜ່ວຍພັກກົມກວດກາ ກະຊວງ ຖວທ

ກົມກວດກາ ກະຊວງຖະແຫຼງ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມ ໃຫຍ່ຄັ້ງທີ III ຂອງໜ່ວຍພັກກົມກວດກາ  ຂຶ້ນໃນວັນທີ  26  ກຸມພານີ້ ທີ່ກະຊວງດັ່ງກ່າວໂດຍພາຍໃຕ້ ການເປັນປະທານ ຂອງສະຫາຍ ກິແກ້ວ ໄຂຄໍາພິທູນ ເລຂາຄະນະພັກ  ລັດຖະມົນຕີກະຊວງ ຖວທ, ມີໜ່ວຍພັກກວດກາ  ແລະ ຄະນະພັກກວດກາຮາກຖານເຂົ້າຮ່ວມ.

ໃນກອງປະຊຸມ ສະຫາຍ ນາງ  ສຸພະລັກ ທິລະວົງ ປະທານກວດກາ   ຄະນະພັກ  ຫົວໜ້າກົມກວດກາ ກະຊວງ ຖວທ ໄດ້ຜ່ານບົດສະຫຼຸບການເຄື່ອນໄຫວຊີ້ນໍາ-ນໍາພາວຽກງານ ຂອງຄະນະໜ່ວຍພັກໃນໄລຍະຜ່ານມາ(2016-2020) ແລະ ທິດທາງແຜນການຕໍ່ໜ້າ (2020-2025) ປັດຈຸບັນໜ່ວຍພັກກົມກວດກາມີສະມາຊິກພັກທັງໝົດ 15 ສະຫາຍ, ຍິງ  7 ສະຫາຍ, ເພີ່ມຂຶ້ນ 4 ສະຫາຍ, ຍິງ 1 ສະຫາຍ; ໃນນັ້ນສະມາຊິກພັກອາວຸໂສບໍານານ 2 ສະຫາຍ ຍິງ 1 ສະຫາຍ. ໜ່ວຍພັກກົມກວດກາໄດ້ຖືວຽກງານສຶກສາອົບຮົມການເມືອງ-ແນວຄິດ ສະມາຊິກພັກ, ພະ ນັກງານ-ລັດຖະກອນ ພາຍໃນກົມເປັນຕົ້ນຕໍ; ໜ່ວຍພັກກົມກວດກາໄດ້ປັບປຸງການກໍ່ສ້າງພັກ ແລະ ຂະຫຍາຍຕາມກົດລະບຽບພັກ; ສ້າງໜ່ວຍພັກ, ສະມາຊິກພັກໃຫ້ປອດໃສ ເຂັ້ມແຂງ ໜັກແໜ້ນທາງ ດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນວິທີນໍາພາ. ພ້ອມນັ້ນ, ໃນກອງປະຊຸມໄດ້ປ່ອນບັດເລືອກເອົາຄະນະພັກຊຸດໃໝ່ ໂດຍມີຜູ້ສະໝັກ 5 ສະຫາຍ ເລືອກເອົາ 3 ສະຫາຍ; ເລືອກໄດ້ ສະຫາຍ ນາງ ບົວມະນີ ໄຊທິລາດ ເປັນເລຂາໜ່ວຍພັກ, ສະຫາຍ ລໍາທອງ ແກ້ວມະຫານິນ ຮອງເລຂາໜ່ວຍພັກ ແລະ ສະຫາຍ ຫຼຽນຄໍາ ບົວລະວົງ ເປັນຄະນະ; 

ໃນໂອກາດດັ່ງກ່າວ ສະຫາຍ ກິແກ້ວ ໄຂຄໍາພິທູນ ໄດ້ໃຫ້ກຽດໂອ້ລົມຕໍ່ກອງປະຊຸມ ແລະ ຍ້ອງຍໍຊົມເຊີຍຜົນງານທີ່ຜ່ານມາ ສະແດງເຖິງຄວາມຮັບຜິດຊອບໃນການຊີ້ນໍາ-ນໍາພາ  ແລະ  ຄວາມເອົາໃຈໃສ່ຂອງ ຄະນະໜ່ວຍພັກ, ສະມາຊິກພັກໃນການປະຕິບັດພາລະບົດບາດ, ໜ້າທີ່, ສິດຄວາມຮັບ ຜິດຊອບຂອງຄະນະໜ່ວຍພັກ, ສະມາຊິກພັກທີ່ເປັນຫົວຈັກຫຼັກແຫຼ່ງໃນການນໍາພາຈັດຕັ້ງ ປະຕິບັດໜ້າທີ່ການເມືອງທີ່ພັກ-ລັດ ມອບໝາຍກໍຄື:  ວຽກງານຕິດຕາມ, ກວດກາພັກ, ລັດ, ຕ້ານ ແລະ ສະກັດກັ້ນ ການສໍ້ລາດບັງຫຼວງພາຍ ໃນກະຊວງ ຖວທ ແລະ ທ່ານໄດ້ ເນັ້ນໃຫ້ຄະນະໜ່ວຍພັກຊຸດ ໃໝ່ຈົ່ງພ້ອມກັນສືບຕໍ່ປະຕິບັດບາງບັນຫາສຳຄັນເປັນ ຕົ້ນແມ່ນໃຫ້ສືບຕໍ່ຄົ້ນຄວ້າ, ເຊື່ອມຊຶມ, ກໍາແໜ້ນ ແລະ ຈັດຕັ້ງປະຕິບັດບັນດາມະຕິ ກອງປະຊຸມຄົບຄະນະບໍລິຫານ ງານສູນກາງພັກ, ເນື້ອໃນກອງປະຊຸມກວດກາທົ່ວປະເທດ; ບັນດາມະຕິ, ຄໍາສັ່ງ, ຂໍ້ກໍານົດຕ່າງໆຂອງພັກ, ກົດໝາຍ ແລະ ລະບຽບການຕ່າງໆ ຂອງລັດ ເວົ້າ ລວມ ໂດຍສະເພາະມະຕິ, ຄໍາສັ່ງ ແລະ ນິຕິກໍາຕ່າງໆກ່ຽວກັບວຽກງານຕິດຕາມກວດກາ, ການສະກັດກັ້ນ ແລະ ຕ້ານການສໍ້ລາດບັງຫຼວງທີ່ເປັນໄພຂົ່ມຂູ່ຕໍ່ສະຖຽນລະພາບຂອງການຈັດຕັ້ງ ກໍຄືປະເທດຊາດຂອງພວກເຮົາ.

Medialaos MMD

ເຜີຍແຜ່ຄວາມຮູ້ກ່ຽວກັບວັກຊິນ ກັນມະເຮັງປາກມົດລູກ

ກະຊວງຖະແຫຼງຂ່າວ,ວັດ ທະນະທໍາ ແລະ ທ່ອງທ່ຽວ (ຖວທ)ຮ່ວມກັບກະຊວງສາທາ ລະນະສຸກ ຈັດກອງປະຊຸມ ເຜີຍແຜ່ຄວາມຮູ້ກ່ຽວກັບວັກ ຊິນກັນມະເຮັງປາກມົດລູກ ຂຶ້ນ ໃນວັນທີ25 ກຸມພານີ້ທີ່ຫໍວັດ ທະນະທໍາແຫ່ງຊາດ ໂດຍໄດ້ ຮັບການສະໜັບສະໜູນຈາກ ອົງການອຸຍນີເຊັບ (Unicef) ໂດຍການເປັນປະທານຂອງ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖວທ;

ອ່ານເພີ່ມເຕີມ...

ນາຍົກ ຕ້ອນຮັບທີ່ປຶກສາແຫ່ງລັດ ລັດຖະມົນຕີ ຕ່າງປະເທດ ສປ ຈີນ

   

   ໃນວັນທີ 21 ກຸມພາຜ່ານມາ  ທີ່ສຳນັກງານນາຍົກລັດ ຖະມົນຕີ, ສະຫາຍ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ຫວາງ ອີ້ ທີ່ປຶກສາແຫ່ງລັດ ລັດຖະມົນຕີກະຊວງການຕ່າງ ປະເທດ ແຫ່ງ ສປ ຈີນ ແລະ ຄະນະ, ໃນໂອກາດທີ່ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນຳ້ຂອງ-ແມ່ນຳ້ລ້ານຊ້າງ ຄັ້ງທີ 5 ແລະ ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ສະໄໝພິເສດກ່ຽວກັບການລະບາດຂອງພະຍາດ ອັກເສບປອດຈາກເຊື້ອຈຸລະໂຣກສາຍພັນໃໝ່ (Covid-19) ໃນລະຫວ່າງວັນທີ 19-20 ກຸມພາ ທີ່ນະຄອນຫຼວງວຽງຈັນ.

   ໃນໂອກາດນີ້, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ສະຫາຍ  ຫວາງ ອີ້ ແລະ ຄະນະທີ່ເດີນທາງມາຢ້ຽມຢາມທາງການ ແລະ ເຂົ້າຮ່ວມກອງປະຊຸມສຳຄັນຢູ່ ສປປ ລາວ ໃນຄັ້ງນີ້ ຊຶ່ງຈະເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການເປັນຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານລະຫວ່າງລາວ-ຈີນ ຕາມທິດ 4 ດີ ກໍຄື ການເປັນຄູ່ຮ່ວມຊາຕາກຳລາວ-ຈີນ, ຈີນ-ລາວ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດໃຫ້ໄດ້ຮັບການເພີ່ມພູນຄູນສ້າງ ແລະ ເກີດດອກອອກຜົນຂຶ້ນໄປເລື້ອຍໆ ຊຶ່ງ ພັກ-ລັດຖະບານລາວ ໄດ້ຖືຄວາມສໍາຄັນເປັນຢ່າງຍິ່ງຕໍ່ການຈັດຕັ້ງປະຕິບັດແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ, ຈີນ-ລາວ ທີ່ສະຫາຍປະທານ ບຸນຍັງ ວໍລະຈິດ ແລະ ສະຫາຍປະທານ ສີຈິ້ນຜິງ ໄດ້ຮ່ວມກັນລົງນາມໃນເດືອນເມສາ 2019 ຜ່ານມາ.

  ພ້ອມນີ້, ສະຫາຍນາຍົກລັດຖະມົນຕີ  ໄດ້ຕີລາຄາສູງຕໍ່ຜົນສຳເລັດຂອງການພົບປະສອງຝ່າຍລະຫວ່າງສະຫາຍ ຫວາງ ອີ້ ກັບ ສະຫາຍ ສະເຫຼີມໄຊ ກົມມະສິດ, ທີ່ໄດ້ ມີການແລກປ່ຽນຄໍາຄິດຄໍາເຫັນໃນຫຼາຍບັນຫາແບບກົງໄປກົງມາກ່ຽວກັບການຮ່ວມມືສອງຝ່າຍ ແລະ  ຫຼາຍຝ່າຍ ບົນຈິດໃຈການເປັນຄູ່ຮ່ວມຊາ ຕາກຳຮ່ວມກັນ ໂດຍສະເພາະ ກ່ຽວກັບການກະກຽມຈັດກອງປະຊຸມສຸດຍອດແມ່ນຳ້ຂອງ-ແມ່ນຳ້ລ້ານຊ້າງ ຄັ້ງທີ 3 ທີ່ຈະຈັດຂຶ້ນໃນເດືອນມີນາ 2020 ໃຫ້ໄດ້ຮັບຜົນສໍາເລັດຢ່າງຈົບງາມ ກໍຄືການກະກຽມຕ້ອນຮັບສະຫາຍ ຫຼີເຄີ້ສຽງ ນາຍົກລັດຖະມົນຕີ ແຫ່ງ ສປ ຈີນ  ທີ່ຈະມາຢ້ຽມຢາມຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດດັ່ງກ່າວ ຢູ່ສປປ ລາວ ໃນທ້າຍເດືອນ ມີນາທີ່ຈະມາເຖິງນີ້, ສະຫາຍ ນາຍົກ ທອງລຸນ ສີສຸລິດ ໄດ້ສະແດງຄວາມຊົມເຊີຍຜົນສຳ ເລັດກອງປະຊຸມລັດຖະມົນຕີຕ່າງປະເທດຂອບການຮ່ວມມື ແມ່ນຳ້ຂອງ-ແມ່ນຳ້ລ້ານຊ້າງ  ຄັ້ງທີ 5 ແລະ ການຈັດກອງປະ ຊຸມລັດຖະມົນຕີຕ່າງປະເທດອາຊຽນ-ຈີນ ສະໄໝພິເສດກ່ຽວກັບການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່  (Covid-19) ແລະ ສະແດງຄວາມເຫັນໃຈຢ່າງສຸດຊຶ້ງຕໍ່ລັດຖະບານ ແລະ ປະຊາຊົນຈີນ ໂດຍສະເພາະຕໍ່ຍາດພີ່ນ້ອງຜູ້ໄດ້ຮັບເຄາະຮ້າຍຈາກການແຜ່ລະບາດຂອງເຊື້ອພະຍາດດັ່ງກ່າວ  ແລະ ສະແດງຄວາມເຊື່ອໝັ້ນວ່າ ພາຍໃຕ້ການຊີ້ນໍາ-ນໍາພາຂອງລັດຖະບານ ແລະ ຄວາມມຸ້ງໝັ້ນຂອງປະຊາຊົນ, ສປ ຈີນ ຈະສາມາດຄວບຄຸມ ແລະ ແກ້ໄຂການແຜ່ລະບາດຂອງພະຍາດດັ່ງກ່າວ. ພິເສດໃນປີ 2021 ທີ່ຈະມາເຖິງນີ້ ສອງປະເທດ ຈະຮ່ວມກັນປຶກສາຫາ ລືເພື່ອຈັດກິດຈະກຳສະເຫຼີມ ສະຫຼອງປີມິດຕະພາບ ແລະ ຄົບຮອບ 60 ປີ ແຫ່ງການສ້າງ ຕັ້ງສາຍພົວພັນການທູດນຳກັນຂອງສອງປະເທດໃຫ້ມີຄວາມໝາຍສຳຄັນ ແລະ ມີບັນຍາກາດອັນຟົດຟື້ນ.

   ໃນໂອກາດດຽວກັນ, ສະຫາຍ ຫວາງ ອີ້ ໄດ້ສະແດງຄວາມຂອບໃຈເປັນຢ່າງສູງຕໍ່ການຕ້ອນຮັບອັນອົບອຸ່ນຂອງ ສະຫາຍນາຍົກລັດຖະມົນຕີ ທອງລຸນ ສີສຸລິດ ໃນຄັ້ງນີ້, ຢືນ ຢັນຈະສືບຕໍ່ໃຫ້ການຮ່ວມມືກັບ ສປປ ລາວ ກໍຄືການ ຮ່ວມມືຂອງສອງກະຊວງການຕ່າງປະເທດ ທີ່ມີໜ້າທີ່ໂດຍກົງໃນການ ຊຸກຍູ້ໃຫ້ແກ່ການຕົກລົງຂອງການນຳສອງປະເທດໃຫ້ຖືກຈັດຕັ້ງປະຕິບັດຢ່າງມີປະສິດທິຜົນ, ບົນພື້ນຖານການເປັນຄູ່ຮ່ວມຍຸດທະສາດຮອບດ້ານໝັ້ນຄົງ ຍາວນານ ແລະ ການເປັນຄູ່ຮ່ວມຊາຕາກຳລະຫວ່າງ ສປປ ລາວ ແລະ ສປ ຈີນ.

   ຫຼັງຈາກນັ້ນ, ສະຫາຍ ທອງລຸນ ສີສຸລິດ ແລະ ສະຫາຍ ຫວາງ ອີ້ ໄດ້ເຂົ້າຮ່ວມເປັນສັກຂີພິຍານໃນພິທີມອບ-ຮັບ ເຄື່ອງຊ່ວຍເຫຼືອ ເພື່ອນຳໃຊ້ເຂົ້າໃນການຕ້ານກັບພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ ຫຼື ໂຄວິດ-19 ໃຫ້ແກ່ ສປ ຈີນ ຊຶ່ງກ່າວມອບໂດຍສະມາຄົມມິດຕະພາບລາວ-ຈີນ ໂດຍແມ່ນ ສະຫາຍ ຄຳມະນີ  ອິນທິລາດ ລັດຖະ ມົນຕີກະຊວງພະລັງງານ ແລະ ບໍ່ແຮ່ ແລະ ກ່າວຮັບໂດຍ ສະຫາຍ ຈ້າຍ ຈຽງ ຕົງ ເອກອັກຄະລັດຖະທູດວິສາມັນຜູ້ມີອຳ ນາດເຕັມແຫ່ງ ສປ ຈີນ ປະຈຳ ສປປ ລາວ, ເຄື່ອງທີ່ນຳມາມອບໃນຄັ້ງນີ້ ມີມູນຄ່າ 5 ແສນໂດລາ,  ໃນນັ້ນເປັນເງິນສົດ 4 ແສນໂດລາ ແລະ ອຸປະກອນການແພດມອບໃຫ້ນະຄອນຄຸນໝິງ, ຫູໜານ, ກວາງຕຸງ.ນອກຈາກນີ້ ເມືອງຈັນທະບູລີ ນະຄອນຫຼວງ ວຽງຈັນ ຍັງມອບເງິນໃຫ້ເມືອງຊາວຢາງ ນະຄອນ ຫຼວງປັກກິ່ງຈຳນວນ  1 ແສນໂດລາ.

Medialaos

ສະຖາບັນສື່ມວນຊົນລາວ-ສະຖາບັນວັດທະນະທຳຫວຽດນາມ ເຊັນບົດບັນທຶກຄວາມເຂົ້າໃຈ

ສະຖາບັນສື່ມວນຊົນ, ວັດທະ­ນະ­ທຳ ແລະ ທ່ອງທ່ຽວ ກະຊວງຖະ­ແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ແລະ ສະຖາບັນວັດທະ­ນະ­ທຳ ແລະ ສິລະປະກຳແຫ່ງຊາດ ກະ­ຊວງວັດທະນະທຳ, ກິ­ລາ ແລະ ທ່ອງທ່ຽວ ສສ ຫວຽດ­ນາມໄດ້ພົບປະເສີມຂະຫຍາຍການຮ່ວມມືສອງຝ່າຍໃນວັນທີ 13 ກຸມພາ ຜ່ານມາ ທີ່ຫໍວັດ­ທະນະທຳແຫ່ງຊາດ. ຝ່າຍລາວນຳໂດຍ ທ່ານ ວິ­ໄລທອງ ສີຊານົນ ຫົວ­ໜ້າສະຖາບັນສື່ມວນຊົນ ວັດ­ທະ­ນະທຳ ແລະ ທ່ອງທ່ຽວ, ຝ່າຍຫວຽດ­ນາມນຳໂດຍທ່ານ ບຸ່ຍຮວາຍເຊີນ ຫົວ­ໜ້າສະຖາ ບັນວັດ­ທະ­ນະ­ທຳ ແລະ ສິ­ລະປະ­ກຳແຫ່ງຊາດ.

ໃນການພົບປະຄັ້ງນີ້ທັງ ສອງຝ່າຍໄດ້ລາຍງານສະພາບ ການຮ່ວມມືໃນໄລ­ຍະຜ່ານມາໃຫ້ກັນ ແລະ ກັນຊາບ ແລະ ພ້ອມນີ້ຍັງໄດ້ຕົກ ລົງເຫັນດີເປັນເອ­ກະພາບເຊັນບົດບັນທຶກຄວາມເຂົ້າ­ໃຈທາງດ້ານ ວັດທະ­ນະ­ທຳ ແລະ ສິ­ລະປະ­ກຳໄລ­ຍະປີ 2020-2025 ສອງຝ່າຍຈະຮ່ວມມືໃນຂົງ­ເຂດກໍ່­ສ້າງ ແລະ ບຳ­ລຸງບຸກຄະ­ລາກອນໃຫ້ແກ່ພະ­ນັກ­ງານຄຸ້ມຄອງວັດທະນະທຳ, ສິ­ລະປະກຳ ແລະ ການຄົ້ນ­ຄວ້າວິທະ ຍາສາດ ເພື່ອຜົນປະ­ໂຫຍດທັງສອງຝ່າຍເພື່ອເປັນພື້ນ­ຖານອັນໝັ້ນ­ຄົງຂອງການຮ່ວມມືໃນປັດ­ຈຸ­ບັນ ແລະ ອະ­ນາ­ຄົດຂອງທັງສອງຝ່າຍ, ເພີ່ມທະ­ວີຄວາມຮູ້ຄວາມສາ­ມາດ, ເພີ່ມທະ­ວີທ່າ­ແຮງໃຫ້ທັງສອງຝ່າຍ ແລະ ແຕ່ລະປີສອງຝ່າຍຈະແລກ­ປ່ຽນຄະ­ນະຜູ້ແທນນຳກັນ, ແລກ­ປ່ຽນເອກະສານຄົ້ນ­ຄວ້າທາງດ້ານວັດທະ­ນະ­ທຳ ລາວ-ຫວຽດນາມ, ຫວຽດ­ນາມ - ລາວ ພິ­ເສດ ແມ່ນເອ­ກະ­ສານທາງດ້ານມໍ­ລະ­ດົກວັດ­ທະ­ນະ­ທຳທີ່ເປັນວັດ­ຖຸ ແລະ ບໍ່ເປັນວັດ­ຖຸຂອງຫວຽດນາມທີ່ອົງ­ການ UNESCO ໄດ້ຮັບຮູ້, ຮ່ວມມືຄົ້ນ­ຄວ້າ ແລະ ແລກ­ປ່ຽນການຄົ້ນຄ້ວາວິ­ທະຍາ­ສາດ, ວັດ­ທະ­ນະ­ທຳສິ­ລະປະ­ກຳຂອງຫວຽດ­ນາມຢູ່ ສປປ ລາວ, ສະຖາບັນວັດ­ທະ­ນະທຳ ແລະ ສິ­ລະປະ­ກຳແຫ່ງຊາດຫວຽດ­ນາມຮັບກໍ່­ສ້າງນັກຄົ້ນຄວ້າຂັ້ນປະ­ລິນ­ຍາໂທ, ປະລິນຍາເອກໃຫ້ແກ່ພະ­ນັກ­ງານໃນຂົງ­ເຂດວັດ­ທະ­ນະ­ທຳ ແລະ ສິ­ລະປະ­ກຳຂອງລາວປີລະ 2 ທຶນ, ສະຖາບັນວັດ­ທະ­ນະ­ທຳ ແລະ ສິ­ລະປະ­ກຳແຫ່ງຊາດຫວຽດ­ນາມ ຮັບຈັດຊຸດຝຶກອົບຮົມໃຫ້ແກ່ພະນັກ­ງານໃນຂົງເຂດວັດ­ທະ­ນະ­ທຳ ແລະ ສິ­ລະປະ­ກຳຂອງກະ­ຊວງຖະ­ແຫຼງຂ່າວ, ວັດ­ທະ­ນະ­ທຳ ແລະ ທ່ອງທ່ຽວຂອງ ສປປ ລາວ.

ຈາກນັ້ນ ກໍໄດ້ມີພິ­ທີເຊັນບົດບັນ­ທຶກຄວາມເຂົ້າ­ໃຈ ຝ່າຍລາວເຊັນໂດຍທ່ານ ວິ­ໄລທອງ ສີຊານົນ ຫົວ­ໜ້າສະຖາບັນສື່ມວນຊົນ ວັດ­ທະ­ນະ­ທຳ ແລະ ທ່ອງທ່ຽວ ແລະ ຝ່າຍຫວຽດ ນາມເຊັນໂດຍ ທ່ານ ບຸ່ຍຮວາຍເຊີນ ຫົວ­ໜ້າສະຖາບັນວັດ­ທະ ນະ­ທຳ ແລະ ສິ­ລະປະ­ກຳແຫ່ງຊາດໂດຍຊ້ອງໜ້າພະ­ນັກ­ງານທັງສອງຝ່າຍ.

Medialaos

ສະຫາຍ ພັນຄຳ ວິພາວັນ ຕ້ອນຮັບທູດ ສປ ຈີນ

ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມ ຂໍ່ານັບ ຂອງ ສະຫາຍ ຈ່ຽງຈ້າຍຕົງ, ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ທີ່ສຳນັກງານສູນກາງພັກ ເມື່ອ ວັນທີ 12 ກຸມພາຜ່ານມາ.

ສະຫາຍ ຈ່ຽງຈ້າຍຕົງ  ໄດ້ແຈ້ງສະພາບການລະບາດ ແລະ ການນໍາໃຊ້ມາດຕະການ ທີ່ມີປະສິດທິຜົນ ແລະ ທັນການຂອງພັກ ແລະ ລັດຖະບານຈີນ ໃນການສະກັດກັ້ນ, ປ້ອງກັນ, ຄວບຄຸມ ແລະ ຮັບມືກັບເຊື້ອພະຍາດຈຸລະໂຣກປອດອັກເສບສາຍພັນໃໝ່ ທີ່ເກີດຂຶ້ນຢູ່ນະຄອນອູຮັ້ນ ແຂວງຫູເປີຍ ສປ ຈີນ ກໍຄື ບັນດາແຂວງພາຍໃນປະເທດຈີນ ທັງໄດ້ສະແດງຄວາມຂອບໃຈມາຍັງພັກ, ລັດຖະບານ ແລະ ປະຊາຊົນລາວທີ່ມີຄວາມເປັນຫ່ວງເປັນໃຍ ແລະ ໄດ້ຈັດຫຼາຍກິດຈະກຳເພື່ອສະໜັບສະໜູນຊ່ວຍເຫຼືອການຮັບມືກັບສະພາບການດັ່ງກ່າວຂອງຝ່າຍຈີນ ນັບແຕ່ພະຍາດດັ່ງກ່າວເກີດຂຶ້ນເປັນຕົ້ນມາ. ສະຫາຍ ຈ່ຽງຈ້າຍຕົງ ຍັງໄດ້ຖືໂອກາດດັ່ງກ່າວແຈ້ງແຜນການຮ່ວມມືລະຫວ່າງສອງພັກ, ສອງປະເທດໃນຕໍ່ໜ້າອີກດ້ວຍ.

ສະຫາຍ ພັນຄຳ ວິພາວັນ ໄດ້ສະແດງຄວາມຂອບໃຈຕໍ່ສະຫາຍທູດຈີນ ທີ່ໄດ້ມາລາຍງານກ່ຽວກັບສະພາບການແຜ່ລະບາດຂອງພະຍາດປອດອັກເສບສາຍພັນໃໝ່ດັ່ງກ່າວ ໂດຍເຫັນວ່າ ການແຜ່ລະບາດຂອງເຊື້ອພະຍາດນີ້ໄດ້ສົ່ງຜົນກະທົບຕໍ່ການດຳລົງຊີວິດ, ເສດຖະກິດ-ສັງຄົມ ແລະ ສ້າງຄວາມສູນເສຍດ້ານຊີວິດ ກໍຄື ກະທົບຕໍ່ການພັດທະນາເສດຖະກິດ-ສັງຄົມຂອງປະຊາຊົນຈີນຢ່າງຫຼວງຫຼາຍ. ຕໍ່ບັນຫາດັ່ງກ່າວ ພັກ, ລັດຖະບານລາວ ກໍໄດ້ຕິດຕາມສະພາບການຢ່າງໃກ້ຊິດ ແລະ ເຊື່ອໝັ້ນວ່າພາຍໃຕ້ການຊີ້ນໍາ-ນໍາພາຢ່າງໃກ້ຊິດ, ເດັດດ່ຽວໜັກແໜ້ນ ແລະ ຜ່ານການນໍາໃຊ້ມາດຕະການສະກັດກັ້ນ, ຄວບຄຸມປ້ອງກັນຢ່າງຖືກຕ້ອງ ແລະ ທັນການຂອງພັກ, ລັດຖະບານ ກໍຄືຄວາມເປັນຈິດໜຶ່ງໃຈດຽວຂອງປະຊາຊົນຈີນ ໃນຂອບເຂດທົ່ວປະເທດ ແລະ ການສະໜັບສະໜູນຈາກປະຊາຄົມສາກົນ ສປ ຈີນ ຈະສາມາດໄດ້ຮັບຜົນສຳເລັດ ໃນການຮັບມືກັບພະຍາດທີ່ຮ້າຍແຮງດັ່ງກ່າວ ພັກ, ລັດຖະບານ ແລະ ປະຊາຊົນລາວ ໃນຖານະທີ່ເປັນເພື່ອນມິດບ້ານໃກ້ເຮືອນຄຽງທີ່ມີມູນເຊື້ອ ແລະ ເປັນຄູ່ຮ່ວມຊາຕາກຳທີ່ມີຄວາມໝາຍຍຸດທະສາດກັບສະຫາຍຈີນ ຍາມໃດກໍຈະຢູ່ຄຽງບ່າຄຽງ ໄຫຼ່, ເປັນກຳລັງໃຈ ແລະ ສະ ໜັບສະໜູນຕໍ່ນະໂຍບາຍ, ມາດຕະການໃນການຮັບມືຕໍ່ສູ້ກັບເຊື້ອພະຍາດດັ່ງກ່າວ, ທັງເຊື່ອໝັ້ນຢ່າງໜັກແໜ້ນວ່າພັກ, ລັດຖະບານ ແລະ ປະຊາຊົນຈີນຈະສາມາດຄວບຄຸມເຊື້ອພະຍາດດັ່ງກ່າວໄດ້ຢ່າງສຳເລັດຜົນ, ປະຊາຊົນຈີນຈະສາມາດກັບມາດຳລົງຊີວິດ ແລະ ດຳເນີນການຜະລິດໄດ້ຕາມປົກກະຕິໂດຍໄວ, ເສດຖະກິດຂອງຈີນຈະສືບຕໍ່ຮັກສາທ່າອ່ຽງການຂະຫຍາຍທີ່ໝັ້ນທ່ຽງຕໍ່ໄປ.

ການເຂົ້າຢ້ຽມຂໍ່ານັບຄັ້ງນີ້, ຍັງມີສະຫາຍການນຳທີ່ຕາງໜ້າຈາກຫ້ອງວ່າການສູນກາງພັກ, ຄະນະພົວພັນຕ່າງປະເທດສູນກາງພັກ, ກະຊວງການຕ່າງປະເທດ, ກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງຈຳນວນໜຶ່ງເຂົ້າຮ່ວມ.

Medialaos

ກອງປະຊຸມໂຄສະນາອົບຮົມທົ່ວປະເທດ ປະຈຳປີ

ກອງປະຊຸມວຽກງານໂຄສະນາອົບຮົມທົ່ວປະເທດປະຈຳປີ 2019 ໄດ້ຈັດຂຶ້ນໃນວັນທີ 12 ກຸມພານີ້ ທີ່ສະໂມສອນຄະນະໂຄສະນາອົບຮົມສູນກາງພັກ, ນະຄອນຫຼວງວຽງຈັນ ໂດຍການເປັນປະທານຂອງທ່ານ ຄຳພັນ ພົມມະທັດ ຫົວໜ້າຄະນະໂຄສະນາອົບຮົມສູນກາງພັກ, ມີບັນດາຄະນະໂຄສະນາອົບຮົມສູນກາງພັກຈາກທ້ອງຖິ່ນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີທ່ານ ຄຳເຈນ ວົງໂພສີ ຮອງຫົວໜ້າຄະນະໂຄສະນາອົບຮົມສູນກາງພັກໄດ້ກ່າວບາງຕອນສຳຄັນໃຫ້ຮູ້ວ່າ: ໃນໄລຍະ 2 ປີຜ່ານມາວຽກງານໂຄສະນາສຶກສາອົບຮົມ, ການຊຸກຍູ້, ປຸກລະດົມຂະບວນການຈັດ ຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII ເຂົ້າສູ່ຊີວິດຕົວຈິງຍັງບໍ່ທັນແຂງແຮງ, ເລິກເຊິ່ງ ແລະ ທົ່ວເຖິງ, ກຳລັງຄວາມສາມາດ ແລະ ຄຸນນະພາບຂອງວຽກງານໂຄສະນາອົບຮົມບໍ່ທັນໄດ້ຍົກລະດັບໃຫ້ສູງຂຶ້ນ, ຈຸດອ່ອນ-ຂໍ້ຄົງຄ້າງຈຳນວນໜຶ່ງ ຂອງວຽກງານໂຄສະນາອົບຮົມໃນຊຸມປີຜ່ານມາບໍ່ທັນໄດ້ຮັບການແກ້ໄຂຢ່າງເຖິງຖອງ.

ກອງປະຊຸມຄັ້ງນີ້ພວກເຮົາຈະໄດ້ພ້ອມກັນຄົ້ນຄວ້າຕີລາຄາບັນດາປັດໄຈຕັ້ງໜ້າ ແລະ ຫຍໍ້ທໍ້ທີ່ສົ່ງຜົນກະທົບຕໍ່ແນວຄິດ ແລະ ການເຄື່ອນໄຫວວຽກງານໂຄສະນາອົບຮົມ, ບັນຫາທີ່ພົ້ນເດັ່ນທາງດ້ານແນວຄິດໃນປີ 2018-2019 ໃນນັ້ນຕ້ອງຍົກໃຫ້ເຫັນບັນຫາທີ່ຕ້ອງໄດ້ເສີມຂະຫຍາຍ ແລະ ຊອກໃຫ້ເຫັນດ້ານອ່ອນ-ຂໍ້ຄົງຄ້າງຢ່າງຈະແຈ້ງ, ພວກເຮົາຈະໄດ້ພ້ອມກັນປຶກສາຫາລືວິທີການປັບປຸງແກ້ໄຂ ແລະ ວາງທິດທາງ, ໜ້າທີ່ຈຸດສຸມວຽກງານໂຄສະນາອົບຮົມໃນປີ 2020 ໃຫ້ມີເນື້ອໃນເລິກເຊິ່ງ, ແທດຕົວຈິງ ແລະ ສາມາດປະຕິບັດໄດ້ເພື່ອປະກອບສ່ວນອັນສຳຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ບັນລຸຕາມລະດັບຄາດໝາຍທີ່ພັກເຮົາໄດ້ວາງໄວ້ໂດຍສະເພາະແມ່ນເຮັດໃຫ້ການກໍ່ສ້າງພັກ-ພະນັກງານມີຄວາມປອດໃສ, ເຂັ້ມແຂງ ແລະ ໜັກແໜ້ນທາງດ້ານການເມືອງ-ແນວຄິດເພື່ອກຽມໃຫ້ແກ່ກອງປະຊຸມໃຫຍ່ຄັ້ງທີ XI ຂອງພັກ.

Medialaos

ສປປ ລາວ ໄດ້ຮັບລາງວັນຊະນະເລີດອັນດັບທີ 3 ປະເທດຍອດນິຍົມແຫ່ງການທ່ອງທ່ຽວ ປະຈຳປີ 2020

ໃນວັນທີ 30 ມັງກອນ 2020 ທີ່ຜ່ານມານີ້ ທ່ານ ພົງສະຫວັນ ສີສຸລາດ, ເອກອັກຄະລະຖະທູດ ໄດ້ຕາງໜ້າ ສປປ ລາວ ເຂົ້າຮ່ວມງານປະກາດລາງວັນຂອງ ວາລະສານການທ່ອງທ່ຽວ Wanderlust ຂອງປະເທດອັງກິດ ປະຈຳປີ 2020 (Wanderlust Reader Travel Award 2020).

ເຄື່ອງໝາຍລາງວັນ Top Country

ຊຶ່ງຄັ້ງໃນນີ້ ສປປ ລາວ ໄດ້ຮັບລາງວັນຊະນະເລີດອັນດັບທີ 3 ໂດຍໄດ້ຮັບຄະແນນສຽງ (96.25%) ປະເທດຍອດນິຍົມ ແຫ່ງການທ່ອງທ່ຽວຂອງໂລກ (Top Country) ຈາກຜົນການລົງຄະແນນສຽງຄວາມພໍໃຈຂອງຜູ້ອ່ານວາລະສານຜ່ານທາງອອນລາຍ 8,500 ກວ່າຄົນ.

ສຳລັບຜົນການປະກາດລາງວັນອັນດັບທີ 1 ຂອງ Top Country ແມ່ນປະເທດ ນາມີເບຍ ດ້ວຍຄະແນນ (96.77%), ອັນດັບທີ 2 ແມ່ນປະເທດ ເປຣູ ດ້ວຍຄະແນນ (96.33%) ແລະ ອັນດັບທີ 3 ແມ່ນ ສປປ ລາວ ດ້ວຍຄະແນນ (96.25%). ສ່ວນອັນດັບທີ 4 ເຖິງ 10 (ແມ່ນບໍ່ໄດ້ຮັບລາງວັນ) ຄື: ນິວຊີແລນ, ຍີ່ປຸ່ນ, ທານຊາເນຍ, ການາດາ, ເຄນຢາ, ຫວຽດນາມ ແລະ ອິນເດຍ ລຽງຕາມລຳດັບ.

ການຮັບລາງວັນຄັ້ງນີ້ ຖືເປັນຄັ້ງທຳອິດທີ່ ສປປ ລາວ ໄດ້ຮັບລາງວັນປະເພດ Top Country ຜ່ານມາ ມີພຽງແຕ່ ຫຼວງພະບາງ ທີ່ໄດ້ຮັບລາງວັນອັນດັບທີ 1 ປະເພດເມືອງຍອດນິຍົມແຫ່ງການທ່ອງທ່ຽວຂອງໂລກ (Best City ຫຼື Top City) ຊຶ່ງໄດ້ຮັບມາແລ້ວ 8 ຄັ້ງ ແລະ ກໍຕິດ 1 ໃນ 10 ເມືອງຍອດນິຍົມແຫ່ງການທ່ອງທ່ຽວຂອງໂລກມາຫຼາຍຄັ້ງ ຕັ້ງແຕ່ປີ 2006.

ການໄດ້ຮັບລາງວັນໃນຄັ້ງນີ້ ຖືເປັນຂີດໝາຍທີ່ສຳຄັນ ທີ່ເຮັດໃຫ້ຊື່ “Laos” ປະກົດຕົວໃນສື່ອອນລາຍຂອງວົງການທ່ອງທ່ຽວໂລກເປັນຄັ້ງທຳອິດ ແລະ ຍັງສະແດງໃຫ້ເຫັນວ່າ ບໍ່ສະເພາະແຕ່ ຫຼວງພະບາງ ເທົ່ານັ້ນ ແຕ່ຍັງມີຫຼາຍຂົງເຂດອື່ນໆອີກຂອງ ສປປ ລາວ ທີ່ເປັນໜ້າທ່ອງທ່ຽວຢ່າງປະທັບໃຈເຊັ່ນກັນ.

Medialaos