ຊາວບ້ານນາຜາບ່ອງ ບໍ່ຂັດຂ້ອງຕໍ່ການພັດທະນາ

ຊາວບ້ານນາຜາບ່ອງ ບໍ່ໄດ້ມີຄວາມຂັດຂ້ອງຕໍ່ການພັດທະນາຕາມທິດທາງລວມ, ໂດຍສະເພາະ ບັນຫາທີ່ມີຫາງສຽງສັງຄົມ ກ່ຽວກັບຂຸດຄົ້ນຫີນ ຢູ່ເຂດໃກ້ບ້ານ ເພື່ອຮັບໃຊ້ໃຫ້ແກ່ການພັດທະນາ ເປັນຕົ້ນກຳເນີດກິດຈະການຂອງໂຮງງານຊີມັງໃນເຂດເມືອງຫີນເຫີບ ກໍຄື ຮັບໃຊ້ເຂົ້າໃນການພັດທະນາພື້ນຖານໂຄງລ່າງຕ່າງໆ.

ທ່ານ ຊຽງສິງ ພົມມະສີ ອາຍຸ 55 ປີ ຄົນພື້ນຖານຂອງບ້ານນາຜາບ່ອງ ເມືອງຫີນເຫີບ ແຂວງວຽງຈັນ ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວ ວ່າ: ໂດຍສ່ວນຕົວທີ່ເປັນຄົນພື້ນຖານຂອງບ້ານນາຜາບ່ອງນີ້ ບໍ່ໄດ້ມີຄວາມຂັດຂ້ອງຫຍັງຕໍ່ການພັດທະນາ, ໂດຍສະເພາະ ແມ່ນການຂຸດຄົ້ນຫີນ ເພື່ອຮັບໃຊ້ໃຫ້ແກ່ການພັດທະນາດ້ານຕ່າງໆ ເພາະສຳນຶກເຫັນສະພາບກ່ອນນີ້ ຫຼາຍສີບປີໃນເວລາອາຍຸ 14-15 ປີ ເສັ້ນທາງທາງຈາກບ້ານໄປຫາຫີນເຫີບແມ່ນລຳບາກຫຼາຍ, ໃຊ້ເວລາໄປມາເປັນມື້, ຕ້ອງໄດ້ລຸຍຂ້າມນ້ຳລີກເພາະບໍ່ມີຂົວ. 

ໃນໄລຍະ 40 ກວ່າປີມານີ້ ລັດໄດ້ຟື້ນຟູບູລະນະເສັ້ນທາງນ້ອຍໆ ເປັນເສັ້ນທາງ ໄປ-ມາ ສະດວກ ແລະ ໃນໄລຍະປີມໍ່ໆມານີ້ ເສັ້ນທາງກໍໄດ້ຮັບການປັບປຸງຕື່ມ, ມີຂົວໃໝ໋ ໄປ-ມາ ຍິ່ງສະດວກກວ່າເກົ່າ ຍ້ອນມີໂຄງການພັດທະນາມາເຖິງ, ໂດຍສະເພາະໂຮງງານຊີມັງ ຫົງຊື ຊຶ່ງເປັນການລົງທຶນຂອງຕ່າງປະເທດຢູ່ບໍລິເວນໃກ້ນີ້ ແລະ ຊາວບ້ານຈຳນວນໜຶ່ງກໍໄດ້ມີວຽກເຮັດງານທຳປະກອບອາຊີບຢູ່ໃນໂຮງງານຊີມັງດັ່ງກ່າວ, ມີລາຍຮັບມາພັດທະນາຊີວິດການເປັນຢູ່.

ຕາມຄຳເຫັນຂອງທ່ານ ຊຽງສິງ ພົມມະສີແລ້ວ ການພັດທະນາບໍ່ອາດປາສະຈາກ ຫຼື ຜົນລົບ, ໂດຍສະເພາະການຂຸດຄົ້ນຫີນ ຢູ່ຜາບ່ອງ ເພື່ອນຳໄປຮັບໃຊ້ໃນການຜະລິດຂອງໂຮງງານຊີມັງຫົງຊື ແລະ ໂຄງການພັດທະນາພື້ນຖານໂຄງລ່າງຢູ່ເຂດເມືອງຫີນເຫີບ, ເຖິງວ່າບໍລິສັດກ່ຽວຂ້ອງໄດ້ມີການຫົດນ້ຳເສັ້ນທາງ ແຕ່ກໍຍັງເຮັດບໍ່ປົກກະຕິເທົ່າທີ່ຄວນ. ສ່ວນຝຸ່ນຈາກການຂຸດຄົ້ນຫີນ ເປັນຕົ້ນໃນເວລາຈູດລະເບີດຫີນນັ້ນ ຮັບຊາບວ່າທາງອຳນາດການປົກຄອງບ້ານ ແລະ ເຂດໄດ້ນຳເອົາຄຳສະເໜີຂອງປະຊາຊົນທີ່ສຳປະທານຂຸດຄົ້ນແລ້ວ ເພື່ອຊອກຫາວິທີແກ້ໄຂໃຫ້ໄວ.

Medialaos

ຮອງ​ນາຍົກລັດຖະມົນຕີ ລົງຊຸກຍູ້ ການກະກຽມກອງປະຊຸມ 3 ຂັ້ນ ແລະ ຊຸກຍູ້ ການກໍ່ສ້າງທາງລົດໄຟຢູ່ແຂວງວຽງຈັນ

ປະທານຄະນະກວດກາສູນກາງພັກ ປະທານອົງການກວດກາລັດຖະບານ ແລະ ຫົວໜ້າອົງ ການຕ້ານການສໍ້ລາດບັງຫຼວງ ຂັ້ນສູນກາງ  ຫົວໜ້າຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ ພ້ອມຄະນະ ໄດ້ໄປຢ້ຽມຢາມ ແລະ ຊຸກຍູ້ວຽກງານ ການກະກຽມກອງປະຊຸມໃຫຍ່ 3 ຂັ້ນຂອງພັກ ແລະ ຊຸກຍູ້ໂຄງການກໍ່ສ້າງທາງລົດໄຟ ລາວ-ຈີນ ຢູ່ແຂວງວຽງຈັນ ຊຶ່ງມີສະຫາຍ ບຸນຈັນ ສິນທະວົງ ກຳມະການສູນກາງພັກ ລັດຖະມົນຕີກະຊວງໂຍທາທິການ  ແລະ  ຂົນສົ່ງ ຮ່ວມລົງເຄື່ອນໄຫວຄັ້ງນີ້. ສະຫາຍ  ຄໍາພັນ ສິດທິດຳພາ  ກໍາມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ, ມີຄະນະປະຈໍາ, ຄະນະພັກ, ພະນັກງານຫຼັກແຫຼ່ງ, ພະນັກງານທີ່ກ່ຽວຂ້ອງຕ້ອນຮັບ ແລະ ຮ່ວມເຮັດວຽກນຳ.

ໄດ້ຮັບຟັງການລາຍງານ ສະພາບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງແຂວງ ຈາກສະຫາຍ  ຄໍາພັນ ສິດທິດໍາພາ ເປັນຕົ້ນການກະກຽມດ້ານເນື້ອໃນ, ດ້ານບຸກຄະລາກອນ, ດ້ານຂະບວນການ, ດ້ານເສດຖະກິດ, ການປ້ອງກັນຊາດ-ປ້ອງກັນຄວາມສະຫງົບ. ປັດຈຸບັນທົ່ວແຂວງວຽງຈັນມີ 120 ຄະນະພັກຮາກຖານ; ສໍາເລັດກອງປະຊຸມໃຫຍ່ 87 ຄະນະພັກຮາກຖານ, ມີໜ່ວຍພັກທັງໝົດ 1.256 ໜ່ວຍພັກ ໃນນີ້ ຢູ່ສໍານັກງານອົງການມີ 18 ຄະນະພັກ ແລະ 105 ໜ່ວຍພັກ.

ສຳເລັດກອງປະຊຸມໃຫຍ່ອົງຄະນະພັກເມືອງ 4 ເມືອງ ຄື: ເມືອງໝື່ນ, ເມືອງແມດ, ເມືອງກາສີ, ເມືອງຊະນະຄາມ ແລະ ຄະນະພັກກອງບັນຊາການ ທະຫານແຂວງ. ສໍາເລັດການທາບທາມບຸກຄະລາກອນ ແລະ ດໍາເນີນຊີວິດການເມືອງ ຮອບທີ III ມີ 2. ເມືອງຄື: ເມືອງເຟືອງ ແລະ ເມືອງວັງວຽງ. ສໍາເລັດການທາບທາມບຸກຄະລາກອນ ຮອບທີ II ມີ 4 ເມືອງຄື: ເມືອງຫີນເຫີບ, ເມືອງແກ້ວອຸດົມ, ເມືອງທຸລະຄົມ, ເມືອງວຽງຄໍາ ແລະ ກອງບັນຊາການ ປກສ ແຂວງ. ສຳເລັດການທາບທາມບຸກຄະລາກອນ ຮອບທີ I  ມີ ເມືອງໂພນໂຮງ ແລະ 17 ຄະນະພັກຮາກຖານ, 20 ໜ່ວຍພັກເອກະລາດ ຂອງພະແນກການອ້ອມຂ້າງແຂວງ.

ສ່ວນໂຄງການກໍ່ສ້າງທາງລົດໄຟລາວ-ຈີນ ສະຫາຍ ດາວເຮືອງ ນັນທະວົງ ຄະນະປະຈໍາພັກແຂວງ ຮອງເຈົ້າແຂວງ  ຫົວໜ້າຄະນະກໍາມະການໄກ່ເກ່ຍສິ່ງກີດຂວາງ ແລະ ປ້ອງກັນຄວາມສະຫງົບ ໂຄງການທາງລົດໄຟລາວ-ຈີນ ແລະ ທາງດ່ວນນະຄອນຫຼວງວຽງຈັນ ຫາ ວັງວຽງ ໄລຍະຜ່ານແຂວງ ວຽງຈັນ ລາຍງານໃຫ້ຮູ້ວ່າ: ທາງລົດໄຟຜ່ານແຂວງວຽງຈັນມີ ຄວາມຍາວ ທັງໝົດ145,69 ກມ ຜ່ານ 4 ເມືອງ 60 ບ້ານຄື: ເມືອງກາສີ 9 ບ້ານ, ເມືອງວັງວຽງ 16 ບ້ານ, ເມືອງຫີນເຫີບ 11 ບ້ານ ແລະ ເມືອງໂພນໂຮງ 24 ບ້ານ, ມີຄອບຄົບທີ່ໄດ້ຮັບຜົນກະທົບ1.589 ຄ/ຄ ລວມມູນຄ່າຊົດເຊີຍທັງໝົດ 290 ຕື້ກວ່າກີບ. ການໄກ່ເກ່ຍສິ່ງກີດຂວາງ ໃຫ້ແກ່ໂຄງການ ມາຮອດຕົ້ນເດືອນມັງກອນ 2020 ນີ້ປະຕິບັດໄດ້ 145,06 ກິໂລ ແມັດ ຂອງຄວາມຍາວທັງໝົດ 145,69 ກມ ເທົ່າກັບ 99,58%, ແຕ່ພາຍຫຼັງການລົງຕິດຕາມ, ກວດກາ ແລະ ຊຸກຍູ້ໂຄງການກໍ່ສ້າງທາງລົດໄຟລາວ-ຈີນ ໄລຍະຜ່ານແຂວງວຽງຈັນ ຂອງສະຫາຍຮອງນາຍົກລັດຖະມົນຕີຄັ້ງນີ້ ສາມາດເວົ້າໄດ້ວ່າການໄກ່ເກ່ຍ ແລະ ມອບພື້ນທີ່ໃຫ້ແກ່ໂຄງການສໍາເລັດ 100%.

ພາຍຫຼັງທີ່ໄດ້ຮັບຟັງການລາຍງານສະພາບການຕ່າງໆແລ້ວ ສະຫາຍຮອງນາຍົກລັດຖະມົນຕີ ກໍໄດ້ໃຫ້ກຽດໂອ້ລົມ ແລະ ມີທິດຊີ້ນຳຕໍ່ຄະນະພັກ-ຄະນະນໍາ ຂອງແຂວງ ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ, ຄະນະນຳແຂວງ ທີ່ໄດ້ມີຄວາມຕັດສິນໃຈສູງໃນການຊີ້ນຳ-ນຳພາວຽກງານຮອບດ້ານ, ໂດຍສະເພາະແມ່ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການກະກຽມກອງປະຊຸມໃຫຍ່ 3 ຂັ້ນ.

Medialaos

ສື່ມວນຊົນ ລົງພື້ນທີ່ສືບຕໍ່ໂຄສະນາການທ່ອງທ່ຽວວັງວຽງ

ຂປລ. ທ້າຍອາທິດຜ່ານມາ, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃນນາມຜູ້ຊີ້ນຳວຽກງານຖະແຫລງຂ່າວ ສືມວນຊົນ ໄດ້ນໍາພາຄະນະສ່ືມວນຊົນຫລັກຈຳນວນໜ່ຶງລົງຕິດຕາມບັນຍາກາດການທ່ອງທ່ຽວຢູ່ເມືອງວັງວຽງ ແຂວງວຽງຈັນຊ່ຶງເປັນເຂດທ່ອງທ່ຽວຍອດນິຍົມສຳລັບຄົນລາວ ແລະ ຕ່າງປະເທດອີກແຫ່ງໜ່ຶງຂອງລາວ.

ອ່ານເພີ່ມເຕີມ...

ທູດລາວ ປະຈຳຫວຽດນາມ ອວຍພອນຄະນະພົວພັນ ຕ່າງປະເທດສູນກາງພັກກອມມູນິດຫວຽດນາມ

ທ່ານ  ແສງເພັດ  ຮຸ່ງບຸນຍວງ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ພ້ອມຄະນະໄດ້ໄປອວຍພອນປີໃໝ່ ຄະນະນຳ ຄະນະພົວພັນຕ່າງປະເທດສູນກາງພັກກອມມູນິດຫວຽດນາມ  ເນື່ອງໃນໂອ ກາດປີໃໝ່ຫວຽດນາມ  ເມື່ອທ້າຍອາທິດທີ່ຜ່ານມາ  ໃນໂອ ກາດດັ່ງກ່າວ   ທ່ານ  ແສງເພັດ ຮຸ່ງບຸນຍວງ  ໄດ້ກ່າວຄຳອວຍ ພອນອັນປະເສີດມາຍັງຄະນະນຳ ແລະ ພະນັກງານຄະນະພົວ ພັນຕ່າງປະເທດສູນກາງພັກ ກອມມູນິດຫວຽດນາມ ແລະ ໄດ້ຕາງໜ້າໃຫ້ພັກ-ລັດຝາກຄຳອວຍພອນຜ່ານຄະນະນຳ ຄະນະພົວພັນຕ່າງປະເທດສູນກາງພັກກອມມູນິດຫວຽດ ນາມໄປຍັງການນຳຂັ້ນສູງພັກ -ລັດຖະບານຫວຽດນາມເນື່ອງ ໃນໂອກາດປີໃໝ່ ຈົ່ງມີສຸຂະ ພາບແຂງແຮງ ແລະ ປະສົບຜົນສຳເລັດອັນຍິ່ງໃຫຍ່ທີ່ພັກ,  ລັດ ແລະ ປະຊາຊົນມອບໝາຍໃຫ້, ປີ 2019   ຜ່ານມາຫວຽດ ນາມຍາດໄດ້ຜົນສຳເລັດອັນຍິ່ງໃຫຍ່ຮອບດ້ານ ແລະ ເລິກເຊິ່ງ ສສ   ຫວຽດນາມ   ສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ,  ສັງຄົມມີຄວາມສະຫງົບ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເປັນກ້າວໆບົດບາດ ແລະ ອິດທິພົນຂອງສສ ຫວຽດນາມໄດ້ເຊີດຊູສູງເດັ່ນຂຶ້ນໃນເວທີພາກພື້ນ ແລະ ສາກົນ.

ທ່ານ ຫງວຽນ ຮູຍດັງ ຮອງ ຫົວໜ້າຄະນະພົວພັນຕ່າງ ປະເທດສູນກາງພັກໄດ້ສະແດງຄວາມຂອບໃຈຕໍ່ທ່ານ ແສງເພັດ  ຮຸ່ງບຸນຍວງ  ພ້ອມທັງຕີລາຄາສູງຕໍ່ຜົນສຳເລັດຂອງການຮ່ວມມືລະຫວ່າງ ລາວ-ຫວຽດນາມ, ຕະຫຼອດຮອດຜົນສຳເລັດຂອງຫວຽດນາມໃນປີຜ່ານມາ. ສະ ເພາະປີ 2020 ນີ້ ຫວຽດນາມຈະມີຫຼາຍເຫດການສຳຄັນເປັນຕົ້ນ ວັນເກີດປະທານ ໂຮ່ຈິມິນ ຄົບ ຮອບ 130 ປີ, ວັນສ້າງຕັ້ງພັກ ກອມມູນິດຫວຽດນາມ  ຄົບຮອບ 90 ປີ, ວັນສ້າງຕັ້ງ ສສ ຫວຽດ ນາມ ຄົບຮອບ 75 ປີ  ສຳລັບ ວຽກງານຕ່າງປະເທດກໍຈະໄດ້ເປັນປະທານອາຊຽນ, ປະທານ  AIPA 41 (ໄອປາ) ໃນການເປັນສະມາຊິກບໍ່ຖາວອນຂອງສະພາຄວາມໝັ້ນຄົງຂອງສະ ຫະປະຊາຊາດ. ນອກນັ້ນແມ່ນ ການກະກຽມໃຫ້ແກ່ກອງປະຊຸມໃຫຍ່  ຄັ້ງທີ 13 ຂອງພັກ.   ດັ່ງ ນັ້ນ,  ຈຶ່ງມີຄວາມຫວັງວ່າ ສອງຝ່າຍພວກເຮົາຄວນຈະສືບຕໍ່ມູນເຊື້ອການພົວພັນຮ່ວມມືຢ່າງແໜ້ນແຟ້ນ  ເພື່ອພ້ອມກັນປະຕິບັດໃຫ້ສຳເລັດໃນທຸກວຽກງານພິເສດແມ່ນການປະຕິບັດຂໍ້ຕົກລົງຂອງການນຳຂັ້ນສູງຂອງສອງປະເທດໃຫ້ມີປະສິດທິຜົນສູງ.

ໃນວັນດຽວກັນ, ທີ່ກະຊວງການຕ່າງປະເທດ ຫວຽດນາມ, ທ່ານ ແສງເພັດ ຮຸ່ງບຸນຍວງ ພ້ອມດ້ວຍຄະນະກໍໄດ້ໄປອວຍ ພອນປີໃໝ່ຄະນະນຳກະຊວງ ການຕ່າງປະເທດ ແຫ່ງ ສສ ຫວຽດ ນາມ.  ທ່ານ ຫງວຽນ ມິງ ວູ່ ຮອງລັດຖະມົນຕີກະຊວງການຕ່າງ ປະເທດໄດ້ສະແດງຄວາມຂອບ ອົກຂອບໃຈຕໍ່ທ່ານທູດລາວ ທີ່ມາອວຍພອນ  ເນື່ອງໃນໂອ ກາດປີໃໝ່ຫວຽດນາມ,  ທ່ານຍັງ ໄດ້ເນັ້ນຕື່ມວ່າ ປີ  2020 ຫວຽດ ນາມຈະມີຫຼາຍເຫດການທີ່ສຳ ຄັນທີ່ສອງຝ່າຍຈະຕ້ອງໄດ້ປະ ສານສົມທົບກັນຢ່າງແໜ້ນແຟ້ນ ເພື່ອກະກຽມໃຫ້ແກ່ການນຳຂັ້ນສູງມາເຄື່ອນໄຫວຢູ່ຫວຽດ ນາມ ໃນໄລຍະຫວຽດນາມເປັນ ປະທານອາຊຽນ  ແລະ ເປັນ ສະ ມາຊິກບໍ່ຖາວອນຂອງສະພາຄວາມໝັ້ນຄົງຂອງສະຫະປະ ຊາຊາດປີ 2020-2021.

Medialaos

ທີ່ປຶກສາພິເສດ ປະຈຳນາຍົກລັດຖະມົນຕີ ຍີ່ປຸ່ນ ຢ້ຽມຢາມ ສປປ ລາວ

ໃນວັນທີ 21 ມັງກອນ 2020, ທີ່ກະຊວງການຕ່າງ ປະເທດ, ທ່ານ  ສະເຫຼີມໄຊ   ກົມມະສິດ  ລັດຖະມົນຕີກະ ຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ  ຄີຮາຣະ  ມິໂນຣຸ (KIHARA Minoru)  ທີ່ປຶກສາພິເສດປະຈໍານາຍົກລັດຖະມົນຕີຍີ່ປຸ່ນ ຮັບຜິດຊອບວຽກງານຄວາມໝັ້ນຄົງແຫ່ງຊາດຍີ່ປຸ່ນ ໃນໂອ ກາດເດີນທາງຢ້ຽມຢາມ ສປປ ລາວ ຢ່າງເປັນທາງການ(21-22/1/2020)ເພື່ອເປັນການເພີ່ມທະວີຮັດແໜ້ນສາຍພົວພັນມິດຕະພາບ ແລະ ການຮ່ວມມືທີ່ດີ ໃນດ້ານຕ່າງໆ ລະຫວ່າງ ສອງປະເທດ ພາຍໃຕ້ການເປັນຄູ່ຮ່ວມຍຸດທະສາດ ໃຫ້ນັບມື້ນັບກວ້າງຂວາງ, ແໜ້ນແຟ້ນ ແລະ ເລິກເຊິ່ງຍິ່ງໆຂຶ້ນ.

ໃນໂອກາດດັ່ງກ່າວ, ທ່ານລັດຖະມົນຕີ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ການເດີນທາງມາຢ້ຽມຢາມ ສປປ ລາວ ຂອງທ່ານ ຄີຣາຣະມິໂນຣຸ KIHARA Minoru ພ້ອມດ້ວຍຄະນະ ໃນຄັ້ງນີ້. ພາຍຫຼັງທີ່ທ່ານໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນທີ່ປຶກສາພິເສດປະຈຳນາ ຍົກລັດຖະມົນຕີຍີ່ປຸ່ນ ແລະ ຖືໂອກາດນີ້ໄດ້ກ່າວສະແດງຄວາມຂອບໃຈຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ ການຮ່ວມມື, ສະໜັບສະໜູນຊ່ວຍເຫຼືອ ສປປ ລາວ ຕະຫຼອດມາ ເຊັ່ນ: ການຊ່ວຍເຫຼືອເພື່ອການພັດທະນາ (ODA) ຂອງຍີ່ປຸ່ນ (ມູນຄ່າ 90-100 ລ້ານໂດລາສະຫະລັດ/ປີ) ເປັນອັນ ດັບ 1 ຂອງຕ່າງປະເທດຊ່ວຍ ເຫຼືອແກ່ ສປປ ລາວ.

ໃນນັ້ນ, ກວມເອົາຂົງເຂດວຽກງານການພັດທະນາພື້ນຖານໂຄງລ່າງ, ຊັບພະຍາກອນມະນຸດ, ສາທາ ລະນະສຸກ, ກະສິກຳ-ປ່າໄມ້ ແລະ ອື່ນໆ ຊຶ່ງໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ແລະ ຜັນຂະຫຍາຍແຜນການການເຊື່ອມໂຍງເຂົ້າພາກພື້ນ ແລະ ສາກົນ ຂອງ ສປປ ລາວ. ນອກຈາກນັ້ນ, ສອງຝ່າຍໄດ້ປຶກສາຫາລືກ່ຽວກັບການກະກຽມກິດຈະກຳເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດ ສປປ ລາວ-ຍີ່ປຸ່ນ ຄົບຮອບ 65 ປີ  (ວັນທີ 5 ມີນາ 1955) ແລະ ການເປັນຄູ່ຮ່ວມຍຸດທະສາດ ລາວ-ຍີ່ປຸ່ນ ຄົບຮອບ 5 ປີ ໃນປີ 2020 ນີ້ ໃຫ້ປະສົບຜົນສຳເລັດຢ່າງຈົບງາມ.

ໃນໂອກາດເດີນທາງມາຢ້ຽມຢາມ ສປປ ລາວ ໃນຄັ້ງນີ້ ທ່ານທີ່ປຶກສາພິເສດປະຈຳນາຍົກລັດຖະມົນຕີຍີ່ປຸ່ນກໍ່ໄດ້ເຂົ້າຢ້ຽມຂາໍ່ນັບບັນດາການນຳ ຂອງ ສປປ ລາວຈຳນວນໜຶ່ງ.

Medialaos

ສປປ ລາວ ເຂົ້າຮ່ວມການທົບທວນປະຈໍາໄລຍະດ້ານສິດທິມະນຸດ ຮອບວຽນທີ 3 ທີ່ ສະພາສິດທິມະນຸດ, ທີ່ເຊີແນວ, ປະເທດ ສະວິສ໌

ໃນວັນທີ 21 ມັງກອນ 2020 ຕາມເວລາທ້ອງຖິ່ນ, ຄະນະຜູ້ແທນແຫ່ງ ສປປ ລາວ ນຳໂດຍ ທ່ານ ບຸນເກີດ ສັງສົມສັກ, ລັດຖະມົນຕີປະຈໍາສໍານັກງານນາຍົກລັດຖະມົນຕີ, ປະທານຄະນະກໍາມະການແຫ່ງຊາດວ່າດ້ວຍສິດທິມະນຸດ ພ້ອມດ້ວຍຄະນະຜູ້ແທນຈໍານວນ 25 ທ່ານ ທີ່ຕາງໜ້າໃຫ້ກະຊວງການຕ່າງປະເທດກະຊວງປ້ອງກັນຄວາມສະຫງົບກະຊວງຍຸຕິທໍາກະຊວງຖະແຫຼ່ງຂ່າວວັດທະນະທໍາ ແລະ ທ່ອງທ່ຽວກະຊວງພາຍໃນກະຊວງແຮງງານ ແລະ ສະຫັວດດີການສັງຄົມກະຊວງກະສິກໍາ ແລະ ປ່າໄມ້ສະພາແຫ່ງຊາດສານປະຊາຊົນສູງສຸດ ແລະ ສູນກາງສະຫະພັນແມ່ຍິງລາວ ໄດ້ເຂົ້າຮ່ວມກອງປະຊຸມ ຄັ້ງທີ 35 ຂອງໜ່ວຍງານ ທົບທວນປະຈຳໄລຍະດ້ານສິດທິມະນຸດ (UPR Working Group) ຂອງສະພາສິດທິມະນຸດທີ່ ສໍານັກງານອົງການ ສະຫະປະຊາຊາດ ປະຈໍານະຄອນເຊີແນວ, ປະເທດສະວິດ, ເພື່ອປ້ອງກັນບົດລາຍງານແຫ່ງຊາດດ້ານສິດທິມະນຸດພາຍໃຕ້ ກົນໄກ UPR ໃນຮອບວຽນທີ 3.

ການທົບທວນປະຈໍາໄລຍະ ຫລື Universal Periodic Review (UPR) ແມ່ນກົນໄກຫນຶ່ງຂອງສະພາສິດທິມະນຸດ ທີ່ ໄດ້ຮັບການສ້າງຕັ້ງຂຶ້ນພາຍໃຕ້ກົດບັດຂອງອົງການ ສປຊ, ເຊິ່ງປະເທດສະມາຊິກ ສປຊ ທຸກໆປະເທດ, ໂດຍບໍ່ການຈໍາແນກ,  ມີພັນທະເຂົ້າຮ່ວມການທົບທວນດັ່ງກ່າວທີ່ມີຂຶ້ນທຸກໆ 4 ປີເຄິ່ງ, ບົນພື້ນຖານຄວາມສະເຫມີພາບ ແລະ ເຄົາ ລົບຊິ່ງກັນ ແລະ ກັນ. ການທົບທວນໃນຮອບວຽນທີ 3 ນີ້ໜ່ວຍງານເຮັດວຽກເພື່ອການທົບທວນ ໄດ້ປະເມີນ ແລະ ທົບທວນຄືນກ່ຽວກັບການຈັດຕັ້ງປະຕິບັດ ສິດທິມະນຸດ ລວມທັງ  ຂໍ້ສະເໜີແນະ ຈຳນວນ116 ທີ່ ສປປ ລາວ ທີ່ໄດ້ຮັບເອົາໃນຮອບວຽນທີ 2 ໃນປີ 2015. ໃນກອງປະຊຸມທົບທວນຄັ້ງນີ້ ໄດ້ມີຜູ້ຕາງຫນ້າຈາກປະເທດສະມາຊິກ ສປຊ ຕ່າງໆເຂົ້າຮ່ວມ ແລະ ໃນນັ້ນ 93 ປະເທດໄດ້ປະກອບຄໍາເຫັນ ແລະ ມີຂໍ້ສະເໜີແນະຕໍ່ ສປປ ລາວ ເພື່ອນໍາໄປພິຈາລະນາ ແລະ ຮັບຮອງເອົາບົນພື້ນຖານຄວາມສະໝັກໃຈ ເພື່ອຈັດຕັ້ງປະຕິບັດໃນຕໍ່ໜ້າ ແລະ ພ້ອມກັນນັ້ນ, ກໍຍັງມີການເຂົ້າຮ່ວມຂອງຜູ້ຕາງຫນ້າອົງການຈັດຕັ້ງສາກົນ, ອົງການຈັດຕັ້ງສາກົນບໍ່ຂຶ້ນກັບລັດຖະບານ ແລະ ອົງການຈັດຕັ້ງທາງສັງຄົມຈຳນວນຫນຶ່ງໃນຖານະຜູ້ສັງເກດການ.

ທ່ານ ບຸນເກີດ ສັງສົມສັກ ໄດ້ຍົກໃຫ້ເຫັນໃນເວລາກ່າວເປີດ ເຖິງການໃຫ້ຄວາມສໍາຄັນຂອງລັດຖະບານ ຕໍ່ການຮ່ວມມືກັບສາກົນໃນວຽກງານການສົ່ງເສີມ ແລະ ປົກປ້ອງສິດທິມະນຸດ ແລະ ການເຂົ້າຮ່ວມການທົບທວນໃນຄັ້ງນີ້, ພ້ອມດຽວກັນນັ້ນກໍໄດ້ຍົກໃຫ້ເຫັນເຖິງຜົນສໍາເລັດ ແລະ ຄວາມຄືບຫນ້າໃນການຈັດຕັ້ງປະຕິບັດສິດທິມະນຸດຢູ່ ສປປ ລາວ ນັບແຕ່ການທົບທວນຄັ້ງທີ 2 ຜ່ານມາ, ຊຶ່ງລັດຖະບານໄດ້ມີການທົບທວນນະໂຍບາຍ, ປັບປຸງລັດຖະທໍາມະນູນ ແລະ ກົດຫມາຍຫລາຍສະບັບ ທີ່ ພົວພັນເຖິງການຜັນຂະຫຍາຍພັນທະຂອງ ສປປ ລາວ ພາຍໃຕ້ສົນທິສັນຍາສາກົນດ້ານສິດທິມະນຸດ ທີ່ ສປປ ລາວ ເປັນພາຄີ 7 ສະບັບ ມາຮອດປະຈຸບັນ, ພ້ອມດຽວກັນນັ້ນກໍ່ຍົກໃຫ້ເຫັນຄວາມຄືບໜ້າ ໃນການປັບປຸງບຸລະນະການປົກຄອງ, ການສ້າງລັດແຫ່ງກົດຫມາຍ, ການພັດທະນາເສດຖະກິດ-ສັງຄົມ, ການລົບລ້າງຄວາມທຸກຍາກ, ການປະຕິບັດເປົ້າໝາຍການພັດທະນາແບຍືນຍົງຂອງ ສປຊ, ການຮ່ວມມືສາກົນດ້ານສິດທິມະນຸດ ກໍລ້ວນແລ້ວແຕ່ແມ່ນຕົວຊີ້ວັດທີ່ສະແດງໃຫ້ເຫັນ ຄວາມພະຍາຍາມຢ່າງຕັ້ງໜ້າຂອງລັດຖະບານ ໃນການສ້າງເງື່ອນໄຂ ແລະ ສະພາບແວດລ້ອມ, ໃນໄລຍະ 5 ປີຜ່ານມາ, ເພື່ອເຮັດໃຫ້ປະຊາຊົນລາວບັນດາເຜົ່າສາມາດຊົມໃຊ້ສິດຂອງເຂົາເຈົ້າທາງດ້ານການເມືອງ, ພົນລະເມືອງ, ເສດຖະກິດ, ສັງຄົມ ແລະ ວັດທະນະທໍາ, ຕາມລັດຖະທໍາມະນູນ ແລະ ກົດຫມາຍ ໄດ້ຢ່າງເຕັມສ່ວນ.

ໃນກອງປະຊຸມຄັ້ງນີ້ມີຫຼາຍປະເທດໄດ້ສະແດງຄວາມຊົມເຊີຍຕໍ່ຜົນສໍາເລັດທີ່ ສປປ ລາວ ຍາດມາໄດ້ໃນການປະຕິບັດສິດທິມະນຸດໃນໄລຍະຜ່ານມາ ພ້ອມທັງໄດ້ມີຄຳເຫັນ ແລະ ຄຳຖາມເຈາະຈີ້ມຕໍບາງບັນຫາທີ່ພົວພັນເຖິງການພັດທະນາເສດຖະກິດ-ສັງຄົມຂອງ ສປປ ລາວ, ການລຶບລ້າງຄວາມທຸກຍາກ, ການເຂົ້າເຖິງຄວາມຍຸຕິທໍາ ແລະ ການຊ່ວຍເຫຼືອລ້າທາງດ້ານກົດໝາຍສໍາລັບປະຊາຊົນຜູ້ທີ່ດ້ອຍໂອກາດ, ໂທດປະຫານຊິວິດ, ການຕ້ານການທໍລະມານສະພາບເງື່ອນໄຂຄ້າຍຄຸ້ມຂັງສິດຂອງຊົນເຜົ່າ, ສິດເສລີພາບດ້ານສາສະຫນາ, ສິດເສລີພາບໃນການສະແດງຄວາມຄິດຄວາມເຫັນ, ການນໍາໃຊ້ອິນເຕີແນັດ, ອົງການຈັດຕັ້ງທາງສັງຄົມ, ບັນຫາຄົນທີ່ຫາຍສາບສູນ, ສິດຂອງພົນລະເມືອງຕໍ່ການນໍາໃຊ້ທີ່ດິນ, ສິດທິຂອງແມ່ຍິງ, ເດັກນ້ອຍການຄ້າມະນຸດ ແລະ ອື່ນໆຈໍານວນໜຶ່ງ. ຕໍ່ບັນຫາດັ່ງກ່າວ ຜູ້ແທນລາວທີ່ຕາງໜ້າໃຫ້ກະຊວງຂະແໜງການທີ່ກ່ຽວຂ້ອງ ກໍ່ໄດ້ໃຫ້ຂໍ້ມູນ ແລະ ຊີ້ແຈງອະທິບາຍເພີ່ມເຕີມ, ບົນພື້ນຖານນະໂຍບາຍ, ລັດຖະທໍາມະນູນ, ກົດໝາຍ ແລະ ມາດຕະການຕ່າງໆຂອງລັດ ທີ່ ຮັບຮອງເອົາ ເພື່ອແກ້ໄຂບັນຫາດັ່ງກ່າວ, ອັນໄດ້ເຮັດປະເທດສະມາຊິກ ສປຊ ກໍຄື ສະພາສິດທິມະນຸດ ແລະ ຜູ້ເຂົ້າຮ່ວມອື່ນໆມີຄວາມເຂົ້າອົກເຂົ້າໃຈເປັນຢ່າງດີກ່ຽວກັບການປະຕິບັດສິດທິມະນຸດຢູ່ ສປປ ລາວ. ການທົບທວນໃນຄັ້ງນີ້ ແມ່ນ ດໍາເນີນໄປເປັນເວລາ 3 ຊົ່ວໂມງເຄິ່ງ ດ້ວຍບັນຍາກາດສ້າງສັນ ແລະ ກົງໄປກົງມາ.

ໃນວັນທີ 24 ມັງກອນ 2020, ຄະນະຜູ້ແທນລາວ ຍັງຈະສືບຕໍ່ເຂົ້າຮ່ວມກອງປະຊຸມຂອງຫນ່ວຍງານທົບທວນປະຈໍາໄລຍະຂອງສະພາສິດທິມະນຸດ ເພື່ອຮັບຮອງເອົາຮ່າງບົດລາຍງານການທົບທວນຂອງ ສປປ ລາວ ທີ່ກວມເອົາຈໍານວນຂໍ້ສະເຫນີແນະຈາກປະເທດຕ່າງໆທີ່ສະເໜີໃຫ້ ສປປ ລາວ ນໍາເອົາຄືນມາພິຈາລະນາຮ່ວມກັບເຈົ້າໜ້າທີ່ທີ່ກ່ຽວຂ້ອງ ແລະ ອົງການຈັດຕັ້ງຕ່າງໆທາງສັງຄົມ ຢູ່ ສປປ ລາວ ແລະ ໄປລາຍງານຄືນໃນກອງປະຊຸມສະພາສິດທິມະນຸດທີ່ຈະມີຂຶ້ນໃນເດືອນມິຖຸນາ 2020 ທີ່ຈະມາເຖິງ ເພື່ອແຈ້ງວ່າ ຂໍ້ສະເໜີແນະໃດສອດຄ່ອງກັບນະໂຍບາຍ ແລະ ກົດໝາຍພາຍໃນຂອງພວກເຮົາ ແລະ ຂໍ້ສະເໜີແນະໃດທີ່ພວກເຮົາມີຄວາມອາດສາມາດຮັບເອົາມາຈັດຕັ້ງປະຕິບັດໄດ້ໃນຊຸມປີຕໍ່ໜ້າ.

Medialaos

ແຈ້ງການ ເຝົ້າລະວັງ ພະຍາດອັດເສບປອດ ເຊື້ອຈຸລະໂລກສາຍພັນໃໝ່ Novel Corona Virus-nCOV

ແຈ້ງການ ກ່ຽວກັບ ການກຽມຄວາມພ້ອມຢູ່ດ່ານເພື່ອຮັບມື ໃນການກັນ ແລະ ຄວບຄຸມພະຍາດອັບເສບປອດຈາກ ເຊື້ອຈຸລະໂລກສາຍພັນໃໝ່ Novel Corona Virus-nCOV ເມືອງອູຫັ້ນ, ແຂວງຫູເປີ່ຍ, ສປ ຈີນ.

Medialaos

ສະຫະລັດອາເມລິກາ ສະໜັບສະໜູນ ແກ້ໄຂບັນຫາລະເບີດບໍ່ທັນແຕກ ຢູ່ 6 ແຂວງໃນ ສປປ ລາວ

ໃນວັນທີ 21 ມັງກອນ 2020, ທີ່ໂຮງແຮມລາວພລາຊາ ນະຄອນຫລວງວຽງຈັນ, ໄດ້ມີພິທີເຊັນ ບົດບັນທຶກຄວາມເຂົ້າໃຈ ລະຫວ່າງ ທ່ານ ໂຈມແຍງ ແພງທອງສະຫວັດ ຫົວໜ້າຫ້ອງການຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດ ບໍ່ທັນແຕກທີ່ຕົກຄ້າງຢູ່ ສປປ ລາວ (ຫຄຊກລ) ແລະ ທ່ານ ໄມເຄີນ ເຣນ ຜູ້ຈັດການບໍລິສັດ ເທທຣາເທັກ ມີ ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມທ່ານ ນາງ ເຣນາ ບິດເຕີ ເອກອັກຄະລັດຖະທູດ ສະຫະລັດອາເມລິກາປະຈຳ ສປປ ລາວມີບັນດາຜູ້ຕາງໜ້າຈາກກະຊວງ ແລະ ຂະແໜງ ການກ່ຽວຂ້ອງເຂົ້າຮ່ວມເປັນສັກຂີພິຍານ. ການເຊັນ ບົດບັນທຶກດັ່ງກ່າວ, ແມ່ນໄດ້ຮັບທຶນສະໜັບສະໜູນ ຈາກລັດຖະບານສະຫະລັດອາເມລິການ ໃນມູນຄ່າ 4.960.790 ໂດລາສະຫະລັດ ເພື່ອສະໜັບສະໜູນ ຫຄຊກລ ແກ້ໄຂບັນຫາລະເບີດບໍ່ທັນແຕກ ຢູ່ ສປປ ລາວ ໂດຍສຸມໃສ່ວຽກງານໃນການທຳ ລາຍລະເບີດແບບເຄື່ອນທີ່ ຢູ່ 6 ແຂວງ ເຊັ່ນ: ແຂວງຫົວພັນຄຳມ່ວນສະຫວັນນະເຂດສາລະວັນຈຳປາສັກ ແລະ ແຂວງອັດຕະປື, ເຊິ່ງມີໄລຍະເວລາໃນການຈັດຕັ້ງປະຕິບັດ 3 ປີ.

ໃນໂອກາດດັ່ງກ່າວທ່ານ ຄຳແພງ ໄຊສົມແພງ ໄດ້ມີຄຳເຫັນວ່າ: ສປປ ລາວ ເປັນປະເທດໄດ້ຮັບຜົນກະທົບ ຈາກລູກລະເບີດບໍ່ທັນແຕກ ແລະ ເປັນໄພຂົ່ມຂູ່ຕໍ່ ກັບການທຳມາຫາກິນ ແລະ ການດຳລົງຊີວິດປະຈຳວັນຂອງເດັກນ້ອຍ ແລະ ປະຊາຊົນບັນດາເຜົ່າ ທີ່ຢູ່ໃນຂອບເຂດທົ່ວປະເທດທີ່ມີຜົນກະທົບ. ນອກນັ້ນຍັງສະກັດກັ້ນ ແລະ ກີດຂວາງແກ່ການພັດທະນາ ພື້ນຖານໂຄງລ່າງ ແລະ ແຜນ ພັດທະນາ ເສດຖະກິດ-ສັງຄົມແຫ່ງຊາດ ຂອງ ສປປ ລາວ ແລະ ແຜນລຶບລ້າງຄວາມທຸກຍາກ.

ສໍາລັບປີ 2020 ນີ້ຕາມມະຕິຂອງສະພາແຫ່ງຊາດ ໃຫ້ຂະແໜງການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ສູ້ຊົນຈັດຕັ້ງປະຕິບັດ ການກວດກູ້ລະເບີດໃຫ້ໄດ້ 10.000 ເຮັກຕາ. ປັດຈຸບັນຂະ ແໜງການເກັບກູ້ລະເບີດ ກໍ່ມີຄວາມຈຳເປັນໄດ້ທົບທວນ ແລະ ແຜນຍຸດທະສາດແຫ່ງຊາດ ກ່ຽວກັບເສັ້ນທາງຄວາມປອດໄພ II, ແຜນບູລິມະສິດ ການຂອງການສໍາຫລວດ ແລະ ກວດກູ້ໂດຍຕິດພັນກັບລົບລ້າງຄວາມທຸກຍາກ ແລະ ການພັດທະນາເຂດຈຸດສຸມ. ນອກຈາກນີ້ຈະໄດ້ມີການປັບ ປຸງກົນໄກ ການປະສານງານການຄຸ້ມຄອງຂໍ້ມູນ ແລະ ພາລະບົດບາດໃຫ້ສອດຄ່ອງ ກັບສະພາບຕົວຈິງ. ພ້ອມນີ້ກໍ່ຈະໄດ້ມີການປຶກສາຫລື ເພື່ອກ້າວສູ່ການຈັດຕັ້ງຜັນ ຂະຫຍາຍສົນທິສັນຍາ ວ່າດ້ວຍລະເບີດລູກຫວ່ານໂດຍຈະສ້າງເປັນດໍາລັດ ກ່ຽວກັບລະເບີດລູກຫວ່ານ.

ພ້ອມນີ້ທ່ານ ນາງ ເຣນາ ບິດເຕີ ກໍໄດ້ມີຄຳເຫັນວ່າ: ລັດຖະບານສະຫະລັດອາເມລິກາ ໄດ້ໃຫ້ການຊ່ວຍເຫລືອ ລັດຖະບານລາວຕະຫລອດມາ ໃນການແກ້ໄຂ ບັນຫາ ລະເບີດບໍ່ທັນແຕກໃນ ສປ ປລາວ ແລະ ເພື່ອຢາກໃຫ້ລັດຖະບານລາວ ບັນລຸໄດ້ແຜນຍຸດທະສາດ SDG ທີ່18 ເຊິ່ງໃນປີ 2020 ນີ້ ກໍເປັນປີທີ່ສຳຄັນ ຄົບຮອບແຜນຍຸດທະສາດ ໃນໂຄງການເກັບກູ້ລະເບີດ ແຫ່ງຊາດຂອງລັດຖະບານລາວ, ເຊິ່ງລັດຖະບານສະຫະລັດອາເມລິກາ ກໍໄດ້ໃຫ້ການສະໜັບສະໜູນ ໃນການສ້າງ ແຜນຍຸດທະສາດນີ້ ແລະ ສະໜັບສະໜູນຫ້ອງການ ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະ ເບີດບໍ່ທັນແຕກທີ່ຕົກຄ້າງຢູ່ ສປປ ລາວ ໃນການປະຕິບັດ ພາລະບົດບາດນີ້.

Medialaos