ນາຍົກ ຕ້ອນຮັບທີ່ປຶກສາແຫ່ງລັດ ລັດຖະມົນຕີ ຕ່າງປະເທດ ສປ ຈີນ

   

   ໃນວັນທີ 21 ກຸມພາຜ່ານມາ  ທີ່ສຳນັກງານນາຍົກລັດ ຖະມົນຕີ, ສະຫາຍ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ຫວາງ ອີ້ ທີ່ປຶກສາແຫ່ງລັດ ລັດຖະມົນຕີກະຊວງການຕ່າງ ປະເທດ ແຫ່ງ ສປ ຈີນ ແລະ ຄະນະ, ໃນໂອກາດທີ່ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນຳ້ຂອງ-ແມ່ນຳ້ລ້ານຊ້າງ ຄັ້ງທີ 5 ແລະ ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ສະໄໝພິເສດກ່ຽວກັບການລະບາດຂອງພະຍາດ ອັກເສບປອດຈາກເຊື້ອຈຸລະໂຣກສາຍພັນໃໝ່ (Covid-19) ໃນລະຫວ່າງວັນທີ 19-20 ກຸມພາ ທີ່ນະຄອນຫຼວງວຽງຈັນ.

   ໃນໂອກາດນີ້, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ສະຫາຍ  ຫວາງ ອີ້ ແລະ ຄະນະທີ່ເດີນທາງມາຢ້ຽມຢາມທາງການ ແລະ ເຂົ້າຮ່ວມກອງປະຊຸມສຳຄັນຢູ່ ສປປ ລາວ ໃນຄັ້ງນີ້ ຊຶ່ງຈະເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການເປັນຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານລະຫວ່າງລາວ-ຈີນ ຕາມທິດ 4 ດີ ກໍຄື ການເປັນຄູ່ຮ່ວມຊາຕາກຳລາວ-ຈີນ, ຈີນ-ລາວ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດໃຫ້ໄດ້ຮັບການເພີ່ມພູນຄູນສ້າງ ແລະ ເກີດດອກອອກຜົນຂຶ້ນໄປເລື້ອຍໆ ຊຶ່ງ ພັກ-ລັດຖະບານລາວ ໄດ້ຖືຄວາມສໍາຄັນເປັນຢ່າງຍິ່ງຕໍ່ການຈັດຕັ້ງປະຕິບັດແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ, ຈີນ-ລາວ ທີ່ສະຫາຍປະທານ ບຸນຍັງ ວໍລະຈິດ ແລະ ສະຫາຍປະທານ ສີຈິ້ນຜິງ ໄດ້ຮ່ວມກັນລົງນາມໃນເດືອນເມສາ 2019 ຜ່ານມາ.

  ພ້ອມນີ້, ສະຫາຍນາຍົກລັດຖະມົນຕີ  ໄດ້ຕີລາຄາສູງຕໍ່ຜົນສຳເລັດຂອງການພົບປະສອງຝ່າຍລະຫວ່າງສະຫາຍ ຫວາງ ອີ້ ກັບ ສະຫາຍ ສະເຫຼີມໄຊ ກົມມະສິດ, ທີ່ໄດ້ ມີການແລກປ່ຽນຄໍາຄິດຄໍາເຫັນໃນຫຼາຍບັນຫາແບບກົງໄປກົງມາກ່ຽວກັບການຮ່ວມມືສອງຝ່າຍ ແລະ  ຫຼາຍຝ່າຍ ບົນຈິດໃຈການເປັນຄູ່ຮ່ວມຊາ ຕາກຳຮ່ວມກັນ ໂດຍສະເພາະ ກ່ຽວກັບການກະກຽມຈັດກອງປະຊຸມສຸດຍອດແມ່ນຳ້ຂອງ-ແມ່ນຳ້ລ້ານຊ້າງ ຄັ້ງທີ 3 ທີ່ຈະຈັດຂຶ້ນໃນເດືອນມີນາ 2020 ໃຫ້ໄດ້ຮັບຜົນສໍາເລັດຢ່າງຈົບງາມ ກໍຄືການກະກຽມຕ້ອນຮັບສະຫາຍ ຫຼີເຄີ້ສຽງ ນາຍົກລັດຖະມົນຕີ ແຫ່ງ ສປ ຈີນ  ທີ່ຈະມາຢ້ຽມຢາມຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດດັ່ງກ່າວ ຢູ່ສປປ ລາວ ໃນທ້າຍເດືອນ ມີນາທີ່ຈະມາເຖິງນີ້, ສະຫາຍ ນາຍົກ ທອງລຸນ ສີສຸລິດ ໄດ້ສະແດງຄວາມຊົມເຊີຍຜົນສຳ ເລັດກອງປະຊຸມລັດຖະມົນຕີຕ່າງປະເທດຂອບການຮ່ວມມື ແມ່ນຳ້ຂອງ-ແມ່ນຳ້ລ້ານຊ້າງ  ຄັ້ງທີ 5 ແລະ ການຈັດກອງປະ ຊຸມລັດຖະມົນຕີຕ່າງປະເທດອາຊຽນ-ຈີນ ສະໄໝພິເສດກ່ຽວກັບການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່  (Covid-19) ແລະ ສະແດງຄວາມເຫັນໃຈຢ່າງສຸດຊຶ້ງຕໍ່ລັດຖະບານ ແລະ ປະຊາຊົນຈີນ ໂດຍສະເພາະຕໍ່ຍາດພີ່ນ້ອງຜູ້ໄດ້ຮັບເຄາະຮ້າຍຈາກການແຜ່ລະບາດຂອງເຊື້ອພະຍາດດັ່ງກ່າວ  ແລະ ສະແດງຄວາມເຊື່ອໝັ້ນວ່າ ພາຍໃຕ້ການຊີ້ນໍາ-ນໍາພາຂອງລັດຖະບານ ແລະ ຄວາມມຸ້ງໝັ້ນຂອງປະຊາຊົນ, ສປ ຈີນ ຈະສາມາດຄວບຄຸມ ແລະ ແກ້ໄຂການແຜ່ລະບາດຂອງພະຍາດດັ່ງກ່າວ. ພິເສດໃນປີ 2021 ທີ່ຈະມາເຖິງນີ້ ສອງປະເທດ ຈະຮ່ວມກັນປຶກສາຫາ ລືເພື່ອຈັດກິດຈະກຳສະເຫຼີມ ສະຫຼອງປີມິດຕະພາບ ແລະ ຄົບຮອບ 60 ປີ ແຫ່ງການສ້າງ ຕັ້ງສາຍພົວພັນການທູດນຳກັນຂອງສອງປະເທດໃຫ້ມີຄວາມໝາຍສຳຄັນ ແລະ ມີບັນຍາກາດອັນຟົດຟື້ນ.

   ໃນໂອກາດດຽວກັນ, ສະຫາຍ ຫວາງ ອີ້ ໄດ້ສະແດງຄວາມຂອບໃຈເປັນຢ່າງສູງຕໍ່ການຕ້ອນຮັບອັນອົບອຸ່ນຂອງ ສະຫາຍນາຍົກລັດຖະມົນຕີ ທອງລຸນ ສີສຸລິດ ໃນຄັ້ງນີ້, ຢືນ ຢັນຈະສືບຕໍ່ໃຫ້ການຮ່ວມມືກັບ ສປປ ລາວ ກໍຄືການ ຮ່ວມມືຂອງສອງກະຊວງການຕ່າງປະເທດ ທີ່ມີໜ້າທີ່ໂດຍກົງໃນການ ຊຸກຍູ້ໃຫ້ແກ່ການຕົກລົງຂອງການນຳສອງປະເທດໃຫ້ຖືກຈັດຕັ້ງປະຕິບັດຢ່າງມີປະສິດທິຜົນ, ບົນພື້ນຖານການເປັນຄູ່ຮ່ວມຍຸດທະສາດຮອບດ້ານໝັ້ນຄົງ ຍາວນານ ແລະ ການເປັນຄູ່ຮ່ວມຊາຕາກຳລະຫວ່າງ ສປປ ລາວ ແລະ ສປ ຈີນ.

   ຫຼັງຈາກນັ້ນ, ສະຫາຍ ທອງລຸນ ສີສຸລິດ ແລະ ສະຫາຍ ຫວາງ ອີ້ ໄດ້ເຂົ້າຮ່ວມເປັນສັກຂີພິຍານໃນພິທີມອບ-ຮັບ ເຄື່ອງຊ່ວຍເຫຼືອ ເພື່ອນຳໃຊ້ເຂົ້າໃນການຕ້ານກັບພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ ຫຼື ໂຄວິດ-19 ໃຫ້ແກ່ ສປ ຈີນ ຊຶ່ງກ່າວມອບໂດຍສະມາຄົມມິດຕະພາບລາວ-ຈີນ ໂດຍແມ່ນ ສະຫາຍ ຄຳມະນີ  ອິນທິລາດ ລັດຖະ ມົນຕີກະຊວງພະລັງງານ ແລະ ບໍ່ແຮ່ ແລະ ກ່າວຮັບໂດຍ ສະຫາຍ ຈ້າຍ ຈຽງ ຕົງ ເອກອັກຄະລັດຖະທູດວິສາມັນຜູ້ມີອຳ ນາດເຕັມແຫ່ງ ສປ ຈີນ ປະຈຳ ສປປ ລາວ, ເຄື່ອງທີ່ນຳມາມອບໃນຄັ້ງນີ້ ມີມູນຄ່າ 5 ແສນໂດລາ,  ໃນນັ້ນເປັນເງິນສົດ 4 ແສນໂດລາ ແລະ ອຸປະກອນການແພດມອບໃຫ້ນະຄອນຄຸນໝິງ, ຫູໜານ, ກວາງຕຸງ.ນອກຈາກນີ້ ເມືອງຈັນທະບູລີ ນະຄອນຫຼວງ ວຽງຈັນ ຍັງມອບເງິນໃຫ້ເມືອງຊາວຢາງ ນະຄອນ ຫຼວງປັກກິ່ງຈຳນວນ  1 ແສນໂດລາ.

Medialaos

ສະຖາບັນສື່ມວນຊົນລາວ-ສະຖາບັນວັດທະນະທຳຫວຽດນາມ ເຊັນບົດບັນທຶກຄວາມເຂົ້າໃຈ

ສະຖາບັນສື່ມວນຊົນ, ວັດທະ­ນະ­ທຳ ແລະ ທ່ອງທ່ຽວ ກະຊວງຖະ­ແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ແລະ ສະຖາບັນວັດທະ­ນະ­ທຳ ແລະ ສິລະປະກຳແຫ່ງຊາດ ກະ­ຊວງວັດທະນະທຳ, ກິ­ລາ ແລະ ທ່ອງທ່ຽວ ສສ ຫວຽດ­ນາມໄດ້ພົບປະເສີມຂະຫຍາຍການຮ່ວມມືສອງຝ່າຍໃນວັນທີ 13 ກຸມພາ ຜ່ານມາ ທີ່ຫໍວັດ­ທະນະທຳແຫ່ງຊາດ. ຝ່າຍລາວນຳໂດຍ ທ່ານ ວິ­ໄລທອງ ສີຊານົນ ຫົວ­ໜ້າສະຖາບັນສື່ມວນຊົນ ວັດ­ທະ­ນະທຳ ແລະ ທ່ອງທ່ຽວ, ຝ່າຍຫວຽດ­ນາມນຳໂດຍທ່ານ ບຸ່ຍຮວາຍເຊີນ ຫົວ­ໜ້າສະຖາ ບັນວັດ­ທະ­ນະ­ທຳ ແລະ ສິ­ລະປະ­ກຳແຫ່ງຊາດ.

ໃນການພົບປະຄັ້ງນີ້ທັງ ສອງຝ່າຍໄດ້ລາຍງານສະພາບ ການຮ່ວມມືໃນໄລ­ຍະຜ່ານມາໃຫ້ກັນ ແລະ ກັນຊາບ ແລະ ພ້ອມນີ້ຍັງໄດ້ຕົກ ລົງເຫັນດີເປັນເອ­ກະພາບເຊັນບົດບັນທຶກຄວາມເຂົ້າ­ໃຈທາງດ້ານ ວັດທະ­ນະ­ທຳ ແລະ ສິ­ລະປະ­ກຳໄລ­ຍະປີ 2020-2025 ສອງຝ່າຍຈະຮ່ວມມືໃນຂົງ­ເຂດກໍ່­ສ້າງ ແລະ ບຳ­ລຸງບຸກຄະ­ລາກອນໃຫ້ແກ່ພະ­ນັກ­ງານຄຸ້ມຄອງວັດທະນະທຳ, ສິ­ລະປະກຳ ແລະ ການຄົ້ນ­ຄວ້າວິທະ ຍາສາດ ເພື່ອຜົນປະ­ໂຫຍດທັງສອງຝ່າຍເພື່ອເປັນພື້ນ­ຖານອັນໝັ້ນ­ຄົງຂອງການຮ່ວມມືໃນປັດ­ຈຸ­ບັນ ແລະ ອະ­ນາ­ຄົດຂອງທັງສອງຝ່າຍ, ເພີ່ມທະ­ວີຄວາມຮູ້ຄວາມສາ­ມາດ, ເພີ່ມທະ­ວີທ່າ­ແຮງໃຫ້ທັງສອງຝ່າຍ ແລະ ແຕ່ລະປີສອງຝ່າຍຈະແລກ­ປ່ຽນຄະ­ນະຜູ້ແທນນຳກັນ, ແລກ­ປ່ຽນເອກະສານຄົ້ນ­ຄວ້າທາງດ້ານວັດທະ­ນະ­ທຳ ລາວ-ຫວຽດນາມ, ຫວຽດ­ນາມ - ລາວ ພິ­ເສດ ແມ່ນເອ­ກະ­ສານທາງດ້ານມໍ­ລະ­ດົກວັດ­ທະ­ນະ­ທຳທີ່ເປັນວັດ­ຖຸ ແລະ ບໍ່ເປັນວັດ­ຖຸຂອງຫວຽດນາມທີ່ອົງ­ການ UNESCO ໄດ້ຮັບຮູ້, ຮ່ວມມືຄົ້ນ­ຄວ້າ ແລະ ແລກ­ປ່ຽນການຄົ້ນຄ້ວາວິ­ທະຍາ­ສາດ, ວັດ­ທະ­ນະ­ທຳສິ­ລະປະ­ກຳຂອງຫວຽດ­ນາມຢູ່ ສປປ ລາວ, ສະຖາບັນວັດ­ທະ­ນະທຳ ແລະ ສິ­ລະປະ­ກຳແຫ່ງຊາດຫວຽດ­ນາມຮັບກໍ່­ສ້າງນັກຄົ້ນຄວ້າຂັ້ນປະ­ລິນ­ຍາໂທ, ປະລິນຍາເອກໃຫ້ແກ່ພະ­ນັກ­ງານໃນຂົງ­ເຂດວັດ­ທະ­ນະ­ທຳ ແລະ ສິ­ລະປະ­ກຳຂອງລາວປີລະ 2 ທຶນ, ສະຖາບັນວັດ­ທະ­ນະ­ທຳ ແລະ ສິ­ລະປະ­ກຳແຫ່ງຊາດຫວຽດ­ນາມ ຮັບຈັດຊຸດຝຶກອົບຮົມໃຫ້ແກ່ພະນັກ­ງານໃນຂົງເຂດວັດ­ທະ­ນະ­ທຳ ແລະ ສິ­ລະປະ­ກຳຂອງກະ­ຊວງຖະ­ແຫຼງຂ່າວ, ວັດ­ທະ­ນະ­ທຳ ແລະ ທ່ອງທ່ຽວຂອງ ສປປ ລາວ.

ຈາກນັ້ນ ກໍໄດ້ມີພິ­ທີເຊັນບົດບັນ­ທຶກຄວາມເຂົ້າ­ໃຈ ຝ່າຍລາວເຊັນໂດຍທ່ານ ວິ­ໄລທອງ ສີຊານົນ ຫົວ­ໜ້າສະຖາບັນສື່ມວນຊົນ ວັດ­ທະ­ນະ­ທຳ ແລະ ທ່ອງທ່ຽວ ແລະ ຝ່າຍຫວຽດ ນາມເຊັນໂດຍ ທ່ານ ບຸ່ຍຮວາຍເຊີນ ຫົວ­ໜ້າສະຖາບັນວັດ­ທະ ນະ­ທຳ ແລະ ສິ­ລະປະ­ກຳແຫ່ງຊາດໂດຍຊ້ອງໜ້າພະ­ນັກ­ງານທັງສອງຝ່າຍ.

Medialaos

ສະຫາຍ ພັນຄຳ ວິພາວັນ ຕ້ອນຮັບທູດ ສປ ຈີນ

ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມ ຂໍ່ານັບ ຂອງ ສະຫາຍ ຈ່ຽງຈ້າຍຕົງ, ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ທີ່ສຳນັກງານສູນກາງພັກ ເມື່ອ ວັນທີ 12 ກຸມພາຜ່ານມາ.

ສະຫາຍ ຈ່ຽງຈ້າຍຕົງ  ໄດ້ແຈ້ງສະພາບການລະບາດ ແລະ ການນໍາໃຊ້ມາດຕະການ ທີ່ມີປະສິດທິຜົນ ແລະ ທັນການຂອງພັກ ແລະ ລັດຖະບານຈີນ ໃນການສະກັດກັ້ນ, ປ້ອງກັນ, ຄວບຄຸມ ແລະ ຮັບມືກັບເຊື້ອພະຍາດຈຸລະໂຣກປອດອັກເສບສາຍພັນໃໝ່ ທີ່ເກີດຂຶ້ນຢູ່ນະຄອນອູຮັ້ນ ແຂວງຫູເປີຍ ສປ ຈີນ ກໍຄື ບັນດາແຂວງພາຍໃນປະເທດຈີນ ທັງໄດ້ສະແດງຄວາມຂອບໃຈມາຍັງພັກ, ລັດຖະບານ ແລະ ປະຊາຊົນລາວທີ່ມີຄວາມເປັນຫ່ວງເປັນໃຍ ແລະ ໄດ້ຈັດຫຼາຍກິດຈະກຳເພື່ອສະໜັບສະໜູນຊ່ວຍເຫຼືອການຮັບມືກັບສະພາບການດັ່ງກ່າວຂອງຝ່າຍຈີນ ນັບແຕ່ພະຍາດດັ່ງກ່າວເກີດຂຶ້ນເປັນຕົ້ນມາ. ສະຫາຍ ຈ່ຽງຈ້າຍຕົງ ຍັງໄດ້ຖືໂອກາດດັ່ງກ່າວແຈ້ງແຜນການຮ່ວມມືລະຫວ່າງສອງພັກ, ສອງປະເທດໃນຕໍ່ໜ້າອີກດ້ວຍ.

ສະຫາຍ ພັນຄຳ ວິພາວັນ ໄດ້ສະແດງຄວາມຂອບໃຈຕໍ່ສະຫາຍທູດຈີນ ທີ່ໄດ້ມາລາຍງານກ່ຽວກັບສະພາບການແຜ່ລະບາດຂອງພະຍາດປອດອັກເສບສາຍພັນໃໝ່ດັ່ງກ່າວ ໂດຍເຫັນວ່າ ການແຜ່ລະບາດຂອງເຊື້ອພະຍາດນີ້ໄດ້ສົ່ງຜົນກະທົບຕໍ່ການດຳລົງຊີວິດ, ເສດຖະກິດ-ສັງຄົມ ແລະ ສ້າງຄວາມສູນເສຍດ້ານຊີວິດ ກໍຄື ກະທົບຕໍ່ການພັດທະນາເສດຖະກິດ-ສັງຄົມຂອງປະຊາຊົນຈີນຢ່າງຫຼວງຫຼາຍ. ຕໍ່ບັນຫາດັ່ງກ່າວ ພັກ, ລັດຖະບານລາວ ກໍໄດ້ຕິດຕາມສະພາບການຢ່າງໃກ້ຊິດ ແລະ ເຊື່ອໝັ້ນວ່າພາຍໃຕ້ການຊີ້ນໍາ-ນໍາພາຢ່າງໃກ້ຊິດ, ເດັດດ່ຽວໜັກແໜ້ນ ແລະ ຜ່ານການນໍາໃຊ້ມາດຕະການສະກັດກັ້ນ, ຄວບຄຸມປ້ອງກັນຢ່າງຖືກຕ້ອງ ແລະ ທັນການຂອງພັກ, ລັດຖະບານ ກໍຄືຄວາມເປັນຈິດໜຶ່ງໃຈດຽວຂອງປະຊາຊົນຈີນ ໃນຂອບເຂດທົ່ວປະເທດ ແລະ ການສະໜັບສະໜູນຈາກປະຊາຄົມສາກົນ ສປ ຈີນ ຈະສາມາດໄດ້ຮັບຜົນສຳເລັດ ໃນການຮັບມືກັບພະຍາດທີ່ຮ້າຍແຮງດັ່ງກ່າວ ພັກ, ລັດຖະບານ ແລະ ປະຊາຊົນລາວ ໃນຖານະທີ່ເປັນເພື່ອນມິດບ້ານໃກ້ເຮືອນຄຽງທີ່ມີມູນເຊື້ອ ແລະ ເປັນຄູ່ຮ່ວມຊາຕາກຳທີ່ມີຄວາມໝາຍຍຸດທະສາດກັບສະຫາຍຈີນ ຍາມໃດກໍຈະຢູ່ຄຽງບ່າຄຽງ ໄຫຼ່, ເປັນກຳລັງໃຈ ແລະ ສະ ໜັບສະໜູນຕໍ່ນະໂຍບາຍ, ມາດຕະການໃນການຮັບມືຕໍ່ສູ້ກັບເຊື້ອພະຍາດດັ່ງກ່າວ, ທັງເຊື່ອໝັ້ນຢ່າງໜັກແໜ້ນວ່າພັກ, ລັດຖະບານ ແລະ ປະຊາຊົນຈີນຈະສາມາດຄວບຄຸມເຊື້ອພະຍາດດັ່ງກ່າວໄດ້ຢ່າງສຳເລັດຜົນ, ປະຊາຊົນຈີນຈະສາມາດກັບມາດຳລົງຊີວິດ ແລະ ດຳເນີນການຜະລິດໄດ້ຕາມປົກກະຕິໂດຍໄວ, ເສດຖະກິດຂອງຈີນຈະສືບຕໍ່ຮັກສາທ່າອ່ຽງການຂະຫຍາຍທີ່ໝັ້ນທ່ຽງຕໍ່ໄປ.

ການເຂົ້າຢ້ຽມຂໍ່ານັບຄັ້ງນີ້, ຍັງມີສະຫາຍການນຳທີ່ຕາງໜ້າຈາກຫ້ອງວ່າການສູນກາງພັກ, ຄະນະພົວພັນຕ່າງປະເທດສູນກາງພັກ, ກະຊວງການຕ່າງປະເທດ, ກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງຈຳນວນໜຶ່ງເຂົ້າຮ່ວມ.

Medialaos

ກອງປະຊຸມໂຄສະນາອົບຮົມທົ່ວປະເທດ ປະຈຳປີ

ກອງປະຊຸມວຽກງານໂຄສະນາອົບຮົມທົ່ວປະເທດປະຈຳປີ 2019 ໄດ້ຈັດຂຶ້ນໃນວັນທີ 12 ກຸມພານີ້ ທີ່ສະໂມສອນຄະນະໂຄສະນາອົບຮົມສູນກາງພັກ, ນະຄອນຫຼວງວຽງຈັນ ໂດຍການເປັນປະທານຂອງທ່ານ ຄຳພັນ ພົມມະທັດ ຫົວໜ້າຄະນະໂຄສະນາອົບຮົມສູນກາງພັກ, ມີບັນດາຄະນະໂຄສະນາອົບຮົມສູນກາງພັກຈາກທ້ອງຖິ່ນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີທ່ານ ຄຳເຈນ ວົງໂພສີ ຮອງຫົວໜ້າຄະນະໂຄສະນາອົບຮົມສູນກາງພັກໄດ້ກ່າວບາງຕອນສຳຄັນໃຫ້ຮູ້ວ່າ: ໃນໄລຍະ 2 ປີຜ່ານມາວຽກງານໂຄສະນາສຶກສາອົບຮົມ, ການຊຸກຍູ້, ປຸກລະດົມຂະບວນການຈັດ ຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII ເຂົ້າສູ່ຊີວິດຕົວຈິງຍັງບໍ່ທັນແຂງແຮງ, ເລິກເຊິ່ງ ແລະ ທົ່ວເຖິງ, ກຳລັງຄວາມສາມາດ ແລະ ຄຸນນະພາບຂອງວຽກງານໂຄສະນາອົບຮົມບໍ່ທັນໄດ້ຍົກລະດັບໃຫ້ສູງຂຶ້ນ, ຈຸດອ່ອນ-ຂໍ້ຄົງຄ້າງຈຳນວນໜຶ່ງ ຂອງວຽກງານໂຄສະນາອົບຮົມໃນຊຸມປີຜ່ານມາບໍ່ທັນໄດ້ຮັບການແກ້ໄຂຢ່າງເຖິງຖອງ.

ກອງປະຊຸມຄັ້ງນີ້ພວກເຮົາຈະໄດ້ພ້ອມກັນຄົ້ນຄວ້າຕີລາຄາບັນດາປັດໄຈຕັ້ງໜ້າ ແລະ ຫຍໍ້ທໍ້ທີ່ສົ່ງຜົນກະທົບຕໍ່ແນວຄິດ ແລະ ການເຄື່ອນໄຫວວຽກງານໂຄສະນາອົບຮົມ, ບັນຫາທີ່ພົ້ນເດັ່ນທາງດ້ານແນວຄິດໃນປີ 2018-2019 ໃນນັ້ນຕ້ອງຍົກໃຫ້ເຫັນບັນຫາທີ່ຕ້ອງໄດ້ເສີມຂະຫຍາຍ ແລະ ຊອກໃຫ້ເຫັນດ້ານອ່ອນ-ຂໍ້ຄົງຄ້າງຢ່າງຈະແຈ້ງ, ພວກເຮົາຈະໄດ້ພ້ອມກັນປຶກສາຫາລືວິທີການປັບປຸງແກ້ໄຂ ແລະ ວາງທິດທາງ, ໜ້າທີ່ຈຸດສຸມວຽກງານໂຄສະນາອົບຮົມໃນປີ 2020 ໃຫ້ມີເນື້ອໃນເລິກເຊິ່ງ, ແທດຕົວຈິງ ແລະ ສາມາດປະຕິບັດໄດ້ເພື່ອປະກອບສ່ວນອັນສຳຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ບັນລຸຕາມລະດັບຄາດໝາຍທີ່ພັກເຮົາໄດ້ວາງໄວ້ໂດຍສະເພາະແມ່ນເຮັດໃຫ້ການກໍ່ສ້າງພັກ-ພະນັກງານມີຄວາມປອດໃສ, ເຂັ້ມແຂງ ແລະ ໜັກແໜ້ນທາງດ້ານການເມືອງ-ແນວຄິດເພື່ອກຽມໃຫ້ແກ່ກອງປະຊຸມໃຫຍ່ຄັ້ງທີ XI ຂອງພັກ.

Medialaos

ສປປ ລາວ ໄດ້ຮັບລາງວັນຊະນະເລີດອັນດັບທີ 3 ປະເທດຍອດນິຍົມແຫ່ງການທ່ອງທ່ຽວ ປະຈຳປີ 2020

ໃນວັນທີ 30 ມັງກອນ 2020 ທີ່ຜ່ານມານີ້ ທ່ານ ພົງສະຫວັນ ສີສຸລາດ, ເອກອັກຄະລະຖະທູດ ໄດ້ຕາງໜ້າ ສປປ ລາວ ເຂົ້າຮ່ວມງານປະກາດລາງວັນຂອງ ວາລະສານການທ່ອງທ່ຽວ Wanderlust ຂອງປະເທດອັງກິດ ປະຈຳປີ 2020 (Wanderlust Reader Travel Award 2020).

ເຄື່ອງໝາຍລາງວັນ Top Country

ຊຶ່ງຄັ້ງໃນນີ້ ສປປ ລາວ ໄດ້ຮັບລາງວັນຊະນະເລີດອັນດັບທີ 3 ໂດຍໄດ້ຮັບຄະແນນສຽງ (96.25%) ປະເທດຍອດນິຍົມ ແຫ່ງການທ່ອງທ່ຽວຂອງໂລກ (Top Country) ຈາກຜົນການລົງຄະແນນສຽງຄວາມພໍໃຈຂອງຜູ້ອ່ານວາລະສານຜ່ານທາງອອນລາຍ 8,500 ກວ່າຄົນ.

ສຳລັບຜົນການປະກາດລາງວັນອັນດັບທີ 1 ຂອງ Top Country ແມ່ນປະເທດ ນາມີເບຍ ດ້ວຍຄະແນນ (96.77%), ອັນດັບທີ 2 ແມ່ນປະເທດ ເປຣູ ດ້ວຍຄະແນນ (96.33%) ແລະ ອັນດັບທີ 3 ແມ່ນ ສປປ ລາວ ດ້ວຍຄະແນນ (96.25%). ສ່ວນອັນດັບທີ 4 ເຖິງ 10 (ແມ່ນບໍ່ໄດ້ຮັບລາງວັນ) ຄື: ນິວຊີແລນ, ຍີ່ປຸ່ນ, ທານຊາເນຍ, ການາດາ, ເຄນຢາ, ຫວຽດນາມ ແລະ ອິນເດຍ ລຽງຕາມລຳດັບ.

ການຮັບລາງວັນຄັ້ງນີ້ ຖືເປັນຄັ້ງທຳອິດທີ່ ສປປ ລາວ ໄດ້ຮັບລາງວັນປະເພດ Top Country ຜ່ານມາ ມີພຽງແຕ່ ຫຼວງພະບາງ ທີ່ໄດ້ຮັບລາງວັນອັນດັບທີ 1 ປະເພດເມືອງຍອດນິຍົມແຫ່ງການທ່ອງທ່ຽວຂອງໂລກ (Best City ຫຼື Top City) ຊຶ່ງໄດ້ຮັບມາແລ້ວ 8 ຄັ້ງ ແລະ ກໍຕິດ 1 ໃນ 10 ເມືອງຍອດນິຍົມແຫ່ງການທ່ອງທ່ຽວຂອງໂລກມາຫຼາຍຄັ້ງ ຕັ້ງແຕ່ປີ 2006.

ການໄດ້ຮັບລາງວັນໃນຄັ້ງນີ້ ຖືເປັນຂີດໝາຍທີ່ສຳຄັນ ທີ່ເຮັດໃຫ້ຊື່ “Laos” ປະກົດຕົວໃນສື່ອອນລາຍຂອງວົງການທ່ອງທ່ຽວໂລກເປັນຄັ້ງທຳອິດ ແລະ ຍັງສະແດງໃຫ້ເຫັນວ່າ ບໍ່ສະເພາະແຕ່ ຫຼວງພະບາງ ເທົ່ານັ້ນ ແຕ່ຍັງມີຫຼາຍຂົງເຂດອື່ນໆອີກຂອງ ສປປ ລາວ ທີ່ເປັນໜ້າທ່ອງທ່ຽວຢ່າງປະທັບໃຈເຊັ່ນກັນ.

Medialaos

 

ລັດຖະມົນຕີ ກະຊວງ ຖວທ ຕ້ອນຮັບບັນດາທູດຄົນໃໝ່ ປະຈຳ ສປປ ລາວ

ໃນວັນທີ 7 ກຸມພາ 2020 ຢູ່ ກະຊວງຖະແຫລງຂ່າວວັດທະນະທໍາ ແລະ ທ່ອງທ່ຽວ (ຖວທ)ທ່ານ ກິແກ້ວ ໄຂຄຳພິທູນ ລັດຖະມົນຕີ ກະຊວງ ຖວທ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ Ms samantha K.Jayasuriya ເອກອັກຄະລັດ ຖະທູດ ແຫ່ງ ສີລັງກາ ປະຈຳ ສປປ ລາວໃນໂອກາດ ມາຍືນສານຕາຕັ້ງຕໍ່ ທ່ານປະທານປະເທດ ແຫ່ງ ສປປ ລາວພ້ອມທັງປຶກສາ ຫາລືສານຕໍ່ ກ່ຽວກັບວຽກງານການຮ່ວມມືສອງຝ່າຍ ແລະ ຫລາຍຝ່າຍ ໃນຂົງເຂດວຽກງານວັດທະນະທຳ ແລະ ທ່ອງທ່ຽວ ໃຫ້ນັບມື້ນັບ ຫລາຍຂຶ້ນ.

ໃນໂອກາດດັ່ງກ່າວ, ທ່ານ ກິແກ້ວ ໄຂຄຳພິທູນ ໄດ້ສະແດງຄວາມຍິນດີຕ້ອນຮັບ ອັນອົບອຸ່ນມາຍັງ ທ່ານ Ms samantha K.Jayasuriya ເອກອັກຄະລັດຖະທູດ ແຫ່ງ ສີລັງກາ ປະຈຳ ສປປ ລາວທີ່ໄດ້ເດີນທາງມາຮັບຕຳແຕ່ງ ເປັນເອກອັກຄະລັດ ຖະທູດຄົນໃໝ່ປະຈຳ ສປປ ລາວ ໃນຄັ້ງນີ້ຊຶ່ງເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍ ສາຍພົວພັນມິດຕະພາບ ອັນເປັນມູນ ເຊື້ອດີທີ່ ນັບມື້ນັບໄດ້ຮັບການເສີມ ຂະຫຍາຍຢ່າງຕໍ່ເນື່ອງ ໂດຍສະເພາະວຽກງານ ວັດທະນະທຳ ແລະ ທ່ອງທ່ຽວ.

ໃນໂອກາດດຽວກັນທ່ານ Ms samantha K.Jayasuriya ໄດ້ກ່າວຂໍສະແດງຄວາມຂອບໃຈເປັນຢ່າງສູງ ຕໍ່ທ່ານລັດຖະມົນຕີ ຖວທ ທີ່ໄດ້ໃຫ້ກຽດຕ້ອນຮັບ ອັນອົບອຸ່ນໃນຄັ້ງນີ້ພ້ອມຕີລາຄາສູງ ຕໍ່ການພົວພັນຮ່ວມມື ຂອງ 2 ປະເທດ ແລະ ສະແດງຄວາມຍີນດີ ສືບຕໍ່ໃນການຮ່ວມມື ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ.

ໃນວັນດຽວກັນນັ້ນ, ທ່ານ ກິແກ້ວ ໄຂຄຳພິທູນ ລັດຖະມົນຕີ ກະຊວງ ຖວທ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ Ganesh Dhakl, ເອກອັກຄະລັດ ຖະທູດແຫ່ງ ເນປານ ປະຈຳ ສປປ ລາວຊຶ່ງມີສຳນັກງານຕັ້ງຢູ່ ບາງກອກ ຣາຊະອານາຈັກໄທ.

 ໃນໂອກາດມາຍືນສານຕາຕັ້ງຕໍ່ ທ່ານ ປະທານປະເທດ ແຫ່ງ ສປປ ລາວທັງສອງຝ່າຍໄດ້ໂອ້ລົມ ແລະ ປຶກສາຫາລື ກ່ຽວກັບການເພີ່ມ ທະວີວຽກງານ ການຮ່ວມມືສອງຝ່າຍ ໃຫ້ມີປະສິດທິຜົນຫລາຍຂຶ້ນກວ່າເກົ່າ ເຊັ່ນດຽວກັບ ຂົງເຂດວຽກງານ ການທ່ອງທ່ຽວ, ຊຶ່ງນັບແຕ່ປີ 2017 ເປັນຕົ້ນມາ ໃນແຕ່ລະປີ ກໍ່ໄດ້ຮ່ວມກັບສະຖານທູດ ເນປານ ຈັດຕັ້ງກິດຈະກຳສົ່ງເສີມ ການທ່ອງທ່ຽວ ເນປານ-ລາວ ພາຍໃຕ້ຫົວຂໍ້ ປະເທດເນປານ ທີ່ສວຍງາມ  “Napal si beautiful : Visit & Enjoy in Napal” ຊຶ່ງໄດ້ເຮັດໃຫ້ປະຊາຊົນລາວ ໄດ້ຮັບຮູ້ກ່ຽວກັບປະເທດເນປານ ຢ່າງກວ້າງຂວາງຫລາຍຂຶ້ນ.

Medialaos

ປະກາດແຕ່ງຕັ້ງຮອງລັດຖະມົນຕີ ກະຊວງການເງິນຄົນໃໝ່

ກະຊວງການເງິນ ໄດ້ປະ ກາດແຕ່ງຕັ້ງຮອງລັດຖະມົນຕີກະຊວງການເງິນຄົນໃໝ່ ຂຶ້ນໃນວັນທີ 3 ກຸມພາຜ່ານມາ ທີ່ກະຊວງການເງິນ ໂດຍການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີບັນດາຫົວໜ້າກົມ, ຮອງຫົວ ໜ້າກົມ, ຫົວໜ້າສະຖາບັນ, ຫົວໜ້າພະແນກ, ຮອງຫົວໜ້າພະແນກ, ຜູ້ອໍານວຍການລັດວິສາຫະກິດ ພ້ອມດ້ວຍພະນັກງານ-ລັດຖະກອນ ເຂົ້າຮ່ວມ.

ໃນວາລະກອງປະຊຸມໄດ້ມີການຜ່ານດໍາລັດຂອງນາຍົກລັດຖະມົນຕີ ສະບັບເລກທີ 24/ນຍ, ລົງວັນທີ 15 ມັງກອນ 2020 ວ່າດ້ວຍການແຕ່ງຕັ້ງຮອງລັດຖະມົນຕີຂອງກະຊວງການເງິນ ໂດຍໄດ້ແຕ່ງຕັ້ງທ່ານ ບຸນເຫຼືອ ສິນໄຊວໍຣະວົງ ເປັນຮອງລັດຖະມົນຕີກະຊວງການເງິນ. ພ້ອມນັ້ນ, ໄດ້ຜ່ານຂໍ້ຕົກລົງຂອງກະຊວງການເງິນ ສະບັບເລກທີ 0291/ກງ, ລົງວັນທີ 24 ມັງກອນ 2020 ວ່າດ້ວຍການແຕ່ງຕັ້ງຮອງຫົວໜ້າກົມຂອງກະຊວງການເງິນ, ໄດ້ຕົກລົງແຕ່ງຕັ້ງທ່ານ ສົມຈິດ ຄໍາມຸງຄຸນ ຫົວໜ້າພະແນກສັງລວມ ແລະ ເລຂານຸການ ຫ້ອງການກະຊວງການເງິນ ເປັນຮອງຫົວໜ້າຫ້ອງການກະຊວງການເງິນ ແລະ ແຕ່ງຕັ້ງທ່ານ ນາງ ການ ສິງທາວົງໄຊ ຫົວໜ້າພະແນກບໍລິການຄັງເງິນ ເປັນຮອງຫົວໜ້າຄັງເງິນແຫ່ງຊາດ.

ຜ່ານຂໍ້ຕົກລົງສະບັບເລກທີ 4369/ກງ,ລົງວັນທີ 29 ຕຸລາ 2019 ວ່າດ້ວຍການຍົກຍ້າຍພະນັກງານຮັບໜ້າທີ່ໃໝ່ຢູ່ກະຊວງການເງິນ,ໄດ້ຍົກຍ້າຍທ່ານ ຂັນທອງ ແກ້ວໄພທູນ ຮອງຜູ້ອໍານວຍການລັດວິສາຫະກິດ ລາວບໍລິການສິນຄ້າຜ່ານແດນ ມາຮັບໜ້າທີ່ໃໝ່ຢູ່ຫ້ອງການກະຊວງການເງິນ, ເພື່ອລໍຖ້າຮັບອຸດໜູນບໍານານຕາມກົດໝາຍ ແລະ ລະບຽບການ.

ຜ່ານຂໍ້ຕົກລົງສະບັບເລກທີ 4887/ກງ, ລົງວັນທີ 9 ທັນວາ 2019 ວ່າດ້ວຍການແຕ່ງຕັ້ງຮອງຜູ້ອໍານວຍການລັດວິສາຫະກິດ ລາວບໍລິການສິນຄ້າຜ່ານແດນ ໂດຍແຕ່ງຕັ້ງທ່ານ ສາຍຂອງ ລາດດາວົງ ເປັນຮອງຜູ້ອໍານວຍການລັດວິສາຫະກິດ ລາວບໍລິການສິນຄ້າຜ່ານແດນ.

ໂອກາດດັ່ງກ່າວ, ທ່ານ ສົມດີ ດວງດີ ໄດ້ມີຄຳເຫັນວ່າ: ການປັບປຸງການຈັດຕັ້ງໃນຄັ້ງນີ້, ເປັນການປັບປຸງຄະນະນໍາກະຊວງ, ຄະນະກົມຈໍານວນໜຶ່ງ, ເພື່ອສ້າງຄວາມເຂັ້ມ ແຂງໃຫ້ຂະແໜງການເງິນໂດຍການສືບທອດປ່ຽນແທນຕາມພາລະບົດບາດຂອງການຈັດຕັ້ງການຊັບຊ້ອນໝູນວຽນພະນັກງານການນໍາຂອງກົມ, ພະນັກງານຫຼັກແຫຼ່ງຈໍານວນໜຶ່ງ, ເພື່ອເຮັດໃຫ້ມີຄວາມໜັກແໜ້ນເຂັ້ມແຂງ ສາມາດປະຕິບັດໄດ້ຫຼ້ອນໜ້າ ທີ່ການເມືອງທີ່ພັກ-ລັດມອບໝາຍ. ພ້ອມນັ້ນ, ຍັງເນັ້ນໃຫ້ເອົາໃຈໃສ່ສ້າງຜົນງານໃຫ້ດີຂຶ້ນເລື້ອຍໆ ຊຶ່ງໃນໄລຍະນີ້ ເປັນໄລຍະຂອງການປັບປຸງກົງຈັກການຈັດຕັ້ງຂອງບັນດາກົມຂອງບັນດາຂະແໜງການຕ່າງໆທີ່ຂຶ້ນກັບກະຊວງການເງິນ.

ສ່ວນການຈັດຕັ້ງປະຕິບັດວຽກງານວິຊາສະເພາະໃຫ້ເອົາ ໃຈໃສ່ແຕ່ຕົ້ນປີ ໂດຍສະເພາະບັນດາວຽກທາງດ້ານລາຍຮັບໃຫ້ຂຸ້ນຂ້ຽວສຸມໃສ່ເຮັດແຕ່ຫົວ ທີ, ສໍາລັບລາຍຈ່າຍໃຫ້ມີການກວດກາຕິດຕາມຢ່າງເຄັ່ງຂັດຂຶ້ນຕື່ມ.

Medialaos                     

ສປປ ລາວ ຍັງບໍ່ມີກໍລະນີຕິດເຊື້ອ ພະຍາດອັກເສບປອດ Novel Corona Virus

ທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກໄດ້ຖະແຫຼງຂ່າວຕໍ່ສື່ມວນຊົນເມື່ອວັນທີ 4 ກຸມພານີ້ ທີ່ກະຊວງສາທາລະນະສຸກ ໃນການຕິດຕາມພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່  ຫຼື ໄວຣັດໂຄໂຣນາ (Novel Corona Virus pneumonia) ທີ່ເມືອງອູຮັ້ນ ແຂວງ ຫູເປີ່ຍ ສປ ຈີນວ່າ: ມາຮອດວັນທີ 3 ກຸມພາ 2020, ພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່  ຫຼື ໄວຣັດໂຄໂຣນາ ໃນ ສປ ຈີນ, ມີລາຍງານທັງໝົດ 20.438 ກໍລະນີ, ເສຍຊີວິດ 425 ກໍລະນີ, ຄົນເຈັບໜັກ 2.788 ກໍລະນີ ຊຶ່ງມີລາຍງານຈາກ 31 ແຂວງ,ຕໍ່ສະພາບດັ່ງກ່າວມີບາງປະເທດທີ່ບໍ່ອະນຸມັດໃຫ້ຄົນຈີນເຂົ້າປະເທດຊົ່ວຄາວ ປະກອບມີ: ປະເທດສິງກະໂປ, ຫວຽດນາມ, ເຢຍລະມັນ, ຣັດເຊຍ, ອີຕາລີ, ມົງໂກນ ແລະ ສະຫະລັດອາເມຣິກາ. ນອກຈາກ ສປ ຈີນ ພະຍາດດັ່ງກ່າວຍັງມີການລະບາດຢູ່ປະເທດຕ່າງໆ.

ມາຮອດປັດຈຸບັນ ສປປ ລາວ ຍັງບໍ່ມີກໍລະນີຕິດເຊື້ອພະຍາດດັ່ງກ່າວ,ເຖິງຢ່າງໃດກໍຕາມກະຊວງສາທາລະນະສຸກໄດ້ມີການຕິດຕາມເຝົ້າລະວັງສະຖານະການຢ່າງໃກ້ຊິດ ໂດຍການກຳນົດຈຸດປະສານງານໃນການຈັດຕັ້ງປະຕິບັດມາດຕະການ ໃນການກຽມຄວາມພ້ອມ.ບັນດາດ່ານສາກົນໄດ້ມີການໃຫ້ຂໍ້ມູນຂ່າວສານແກ່ຜູ້ໂດຍສານຂາເຂົ້າ ແລະ ມີການກຽມຄວາມພ້ອມໃນການກວດກາຜູ້ໂດຍສານທີ່ເດີນທາງມາຈາກຕ່າງປະເທດທີ່ມີລາຍງານການລະບາດ.ບັນດາໂຮງໝໍທີ່ເປັນຕາໜ່າງເຝົ້າລະວັງໄດ້ມີການກະກຽມຫ້ອງແຍກປ່ຽວ, ອຸປະກອນປ້ອງກັນຕົນເອງ ແລະ ລົດຮັບສົ່ງຄົນເຈັບ.

ທ່ານສາມາດສອບຖາມຂໍ້ມູນເພີ່ມເຕີມ ຫຼື ຖ້າຫາກທ່ານພົບເຫັນຄົນທີ່ມີອາການສົງໄສເປັນພະຍາດດັ່ງກ່າວ ແລະ ຕ້ອງການຄວາມຊ່ວຍເຫຼືອກະລຸນາໂທ +85620 54066777 ຫຼື ສາຍດ່ວນ 166 ຕໍ່ການປະຕິບັດມາດຕະການດັ່ງກ່າວນັ້ນຈຶ່ງສາມາດສັງລວມໄດ້ຈຳນວນທັງໝົດ 14 ກໍລະນີ (ຄົນລາວ 10 ແລະ ຄົນຈີນ 4 ກໍລະນີ), ໄດ້ເກັບຕົວຢ່າງມາກວດທັງໝົດ 14 ຕົວຢ່າງໄດ້ຜົນກວດ 13 ຕົວຢ່າງໃຫ້ຜົນລົບທັງໝົດ 13 ຕົວຢ່າງ ແລະ ອີກ 1 ຕົວຢ່າງຍັງລໍຖ້າຜົນກວດ.

ວິທີປ້ອງກັນ: 1.ຫຼີກລ່ຽງການເດີນທາງໄປເທດທີ່ມີການລະບາດ ຫຼື ຊຸມຊົນແອອັດ, ຖ້າຈຳເປັນຈະຕ້ອງໄປຄວນໃສ່ຜ້າອັດປາກ, 2.ຫຼີກລ່ຽງການສຳຜັດໃກ້ຊິດກັບຄົນທີ່ມີອາການຄ້າຍຄືໄຂ້ຫວັດເຊັ່ນ: ໄຂ້, ໄອ, ເຈັບຄໍ ແລະ ຫາຍໃຈຍາກ, 3.ຖ້າມີອາການທີ່ກ່າວມາຂ້າງເທິງກະລຸນາໄປພົບແພດໝໍທີ່ຢູ່ໃກ້ບ້ານ ແລະ ແຈ້ງປະຫວັດການເດີນທາງຂອງທ່ານ,ຖ້າທ່ານໄດ້ໄປເຂດທີ່ມີການລະບາດຂອງພະຍາດດັ່ງກ່າວ ໃນໄລຍະ 14 ວັນກ່ອນມີອາການ, 4.ຫຼີກລ່ຽງການສຳຜັດ ຫຼື ກິນສັດເປັນ ຫຼື ສັດຕາຍ,5.ປະຕິບັດມາລະຍາດການໄອຈາມດ້ວຍການອັດປາກ ແລະ ດັງ,ໃຊ້ຜ້າອັດປາກ, ລ້າງມືຂອງທ່ານທຸກຄັ້ງດ້ວຍນ້ຳສະອາດ, ສະບູ ຫຼື ນ້ຳຢາຂ້າເຊື້ອ.

Medialaos