ຮອງ​ປະທານ​ປະເທດ​ແຫ່ງ​ສປປ​ລາວ​ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບອຳ​ລາ ທູດອາເມຣິກາ

ທ່ານ ພັນຄຳ ວິພາວັນ ຮອງປະທານປະເທດແຫ່ງສປປລາວໄດ້ຕ້ອນຮັບການເຂົ້າຢ້ຽມຂໍ່ານັບອຳລາຂອງທ່ານ ນາງ ຣີນາ ບິດເຕີ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສ.ອາເມຣິກາປະຈຳລາວໃນໂອກາດທີ່ທ່ານໄດ້ສຳເລັດໜ້າທີ່ທາງການທູດຢູ່ສປປລາວ (ນັບແຕ່ເດືອນ 10/2016 ເຖິງ ຕົ້ນປີ 2020) ໃນວັນທີ 17 ມັງກອນ, ທີ່ທຳນຽບປະທານປະເທດ.

ໃນໂອກາດດັ່ງກ່າວນີ້ ທ່ານຮອງປະທານປະເທດ ກໍໄດ້ສະແດງຄວາມຊົມເຊີຍຕໍ່ທ່ານທູດທີ່ີໄດ້ມີການ ເຄື່ອນໄຫວຢ່າງຫ້າວຫັນໃນໄລຍະການປະຕິບັດໜ້າທີ່ຢູ່ສປປ ລາວ ເພື່ອຊຸກຍູ້ ແລະ ສົ່ງເສີມ  ການພົວພັນ ຮ່ວມມືສອງຝ່າຍໃນດ້ານຕ່າງໆບົນພື້ນຖານແຫ່ງການເປັນຄູ່ຮ່ວມມືແບບກວມລວມລາວ-ອາເມຣິກາ, ເປັນຕົ້ນແມ່ນການແລກປ່ຽນການຢ້ຽມຢາມລະຫວ່າງສປປລາວ ແລະ ອາເມຣິກາໃນຫຼາຍລະດັບ, ການຈັດ ຕັ້ງປະຕິບັດບັນດາໂຄງການຮ່ວມມືສອງຝ່າຍໃນຂອບວຽກງານການເກັບກູ້ລະເບີດບໍ່ທັນແຕກ,ວຽກງານ ສາທາລະນະສຸກ ແລະ ໂພຊະນາການ, ການສຶກສາ, ເສດຖະກິດ, ການບັງຄັບໃຊ້ກົດໝາຍ ແລະ ອື່ນໆອັນເປັນການປະກອບສ່ວນເຮັດໃຫ້ການພົວພັນຮ່ວມມືສອງຝ່າຍມີສະພາບເປັນປົກກະຕິ ແລະ ຍັງມີການຂະຫຍາຍຕົວຢ່າງຕໍ່ເນື່ອງ.

ນອກຈາກນີ້ທ່ານທູດກໍໄດ້ສະແດງຄວາມຮູ້ບຸນຄຸນ ແລະ ຄວາມຂອບອົກຂອບ ໃຈຕໍ່ລັດຖະບານ ແລະ ປະ ຊາຊົນລາວທີ່ໄດ້ໃຫ້ການສະ ໜັບສະໜູນ ແລະ ຊ່ວຍເຫຼືອອັນຈຳເປັນຕະຫຼອດໄລຍະການປະຕິ ບັດໜ້າທີ່ຢູ່ສປປລາວເປັນຢ່າງດີໄດ້ຊ່ວຍໃຫ້ຂ້າພະເຈົ້າສຳເລັດໜ້າທີ່ທາງການທູດຢູ່ສປປລາວໃນຄັ້ງນີ້ ແລະ ຫວັງຢ່າງຍິ່ງວ່າການພົວພັນມິດຕະພາບ ແລະ ການຮ່ວມມືລາວ-ອາເມຣິກາ ຈະໄດ້ຮັບການເພີ່ມທະວີ ແລະ ຈະເລີນກ້າວໜ້າໃນອະນາຄົດ.

Medialaos

ສະຫຼອງວັນສ້າງຕັ້ງ ກອງທັບປະຊາຊົນລາວ ຄົບຮອບ 71 ປີ ແລະ ວັນສ້າງຕັ້ງເຫຼົ່າຮົບສືບຂ່າວກອງທັບ ຄົບຮອບ 65 ປີ

ພີທີສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ (20 ມັງກອນ 1949) ແລະ ວັນສ້າງຕັ້ງເຫຼົ່າຮົບສືບຂ່າວກອງທັບປະຊາຊົນລາວ ຄົບຮອບ 65 ປີ (25 ມັງກອນ 1954) ໄດ້ຈັດຂຶ້ນໃນວັນທີ 17 ມັງກອນ 2020 ທີ່ສະໜາມຝຶກແອບ ວິທະຍາຄານກົມມະດຳ.

ໃຫ້ເຂົ້າຮ່ວມໂດຍທ່ານ ທອງລຸນ ສີສຸລິດ ນາຍົກລັດຖະມົນຕີ, ມີທ່ານພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ມີບັນດາການນຳ ພັກ-ລັດ, ພ້ອມດ້ວຍ ພະນັກງານນາຍທະຫານ ແລະ ພົນທະຫານເຂົ້າຮ່ວມ.

ການສະແດງໃນຄັ້ງນີ້ ເພື່ອສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ແລະ ວັນສ້າງຕັ້ງເຫຼົ່າຮົບສືບຂ່າວ, ທັງເປັນການຮັບປະກັນໃຫ້ກຳລັງກົມກອງເຫຼົ່າຮົບສືບຂ່າວ ໄດ້ຮັບການອົບຮົມຫັດແບບຢ່າງຕໍ່ເນື່ອງ, ປະຕິບັດລະບຽບພາກສະໜາມ, ມີຄວາມຊຳນິຊຳນານທາງດ້ານສິລະປະຍຸດ, ຍຸດທະວິທີສືບຂ່າວ, ເຕັກນິກການນຳໃຊ້ອາວຸດ-ກະສູນ, ອຸປະກອນປະກອບສະເພາະສືບຂ່າວ ແລະ ຮູບແບບການປະຕິບັດໜ້າທີ່ສູ້ຮົບປະສານກັບເຫຼົ່າຮົບທະຫານອາກາດ ກຽມພ້ອມ ປະຕິບັດໜ້າທີ່ແກ້ໄຂສະພາບການຕ່າງໆ ຕາມຄຳສັ່ງຂອງຂັ້ນເທິງ ໃນສະເພາະໜ້າ ແລະ ຍາວນານ.

ລາຍການທີ່ນຳມາສະແດງໃນຄັ້ງນີ້ ປະກອບມີ: ການສະແດງສິລະປະ, ການສະແດງມວນສືບຂ່າວ (ມວຍຫັດກາຍຊາຍ, ມວຍສູ້ຮົບ ຊາບ-ຍິງ, ສືບຂ່າວຂ້າມຜ່ານສິ່ງກີດຂວາງ ແລະ ໝອບສືບຂ່າວກຳລັງພາຍໃນ), ການກະໂດດຈ້ອງສະແດງກຳລັງ, ການຍິງເປີດປ້າຍຄຳຂັວນ, ການປະຕິບັດໜ້າທີ່ຕີ-ຈັບຜູ້ບັນຊາການແກນນຳກຸ່ມຊຸມນຸມປະທ້ວງ, ການບຸກຈັບຜູ້ບັນຊາແກນນຳ-ກອບກູ້ຊ່ວຍຕົວປະກັນ, ການໂດດຈ້ອງລົງແນວຫຼັງປິດລັບບັງເອີນຫຼອນຕີທຳຂຸມປຶນໃຫຍ່ຂອງສັດຕູ, ການບິນສະແດງຂອງຍົນສູ້ຮົບ ແລະ ລາຍການສະແດງອື່ນໆອີກ.

ນອກຈາກນີ້, ໄດ້ໃຫ້ກຽດຮັບຟັງຄຳໂອ້ລົມຈາກທ່ານ ນາຍົກລັດຖະມົນຕີ ແຫ່ງ ສປປ ລາວ ຕໍ່ກັບວຽກງານປ້ອງກັນຊາດ, ພ້ອມນີ້ທ່ານນາຍົກລັດຖະມົນຕີ ກໍໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານ 65 ປີ ຂອງວຽກງານເຫຼົ່າຮົບສືບຂ່າວ. ພ້ອມທັງ ອວຍພອນໃຫ້ 71 ປີ ຂອງກອງທັບປະຊາຊົນລາວ ແລະ 65 ປີ ຂອງເຫຼົ່າຮົບສືບຂ່າວ ຈົ່ງປະສົບຜົນສຳເລັດໃນໜ້າທີ່ ທີ່ພັກ-ລັດ ມອບໝາຍໃຫ້ຢ່າງໃຫຍ່ຫຼວງ.

Medialaos

ການສະແດງກຳລັງ ສະຫລອງວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ ແລະ ວັນສ້າງຕັ້ງ ເຫລົ່າຮົບສືບຂ່າວ 65 ປີ

ການສະແດງກຳລັງ ພາຍໃຕ້ລະຫັດ ຄົມໃນຟັກ-01 2020 ຂອງເຫລົ່າຮົບສືບຂ່າວ ກອງທັບປະຊາຊົນລາວ ໃນໂອກາດສະເຫລີມສະຫລອງ ວັນສ້າງຕັ້ງກອງທັບ ປະຊາຊົນລາວ ຄົບຮອບ 71 ປີ (20 ມັງກອນ 1949) ແລະ ວັນສ້າງຕັ້ງເຫລົ່າຮົບສືບຂ່າວ ກອງທັບປະຊາຊົນລາວ ຄົບຮອບ 65 ປີ (25 ທັນວາ 1954) ໄດ້ຈັດຂຶ້ນໃນວັນທີ 17 ມັງກອນ 2020 ທີ່ສະໜາມຝຶກແອບ ວິທະຍາຄານກົມມະດຳ. ໃຫ້ກຽດເຂົ້າຮ່ວມການສະແດງດັ່ງກ່າວ, ໂດຍ ທ່ານ ທອງລຸນ ສີສຸລິດ ນາຍົກລັດຖະມົນຕີ, ພົນເອກ ຈັນສະໝອນ ຈັນຍາລາດ ລັດຖະມົນຕີ ກະຊວງປ້ອງກັນປະເທດ, ມີບັນດາການນຳພັກ-ລັດ, ກະຊວງປ້ອງກັນປະເທດ, ກະຊວງປ້ອງກັນ ຄວາມສະຫງົບ, ພ້ອມດ້ວຍ ນາຍ ແລະ ພົນທະຫານ.

ໂອກາດນີ້, ພັທ ສີເພັງ ສຸລະເດດ ຫົວໜ້າຫ້ອງເສນາທິການ ກົມ 213 ຜູ້ບັນຊາພາກສະໜາມ ກ່າວວ່າ: ຈຸດປະສົງຂອງການສະແດງໃນຄັ້ງນີ້, ແມ່ນເພື່ອສະເຫລີມ ສະຫລອງ ວັນສ້າງຕັ້ງກອງທັບປະຊາ ຊົນລາວ ແລະ ວັນສ້າງຕັ້ງເຫລົ່າຮົບສືບຂ່າວ, ທັງເປັນການຮັບປະກັນ ໃຫ້ກຳລັງກົມກອງເຫລົ່າຮົບສືບຂ່າວ ໄດ້ຮັບການອົບຮົມຫັດ ແອບຢ່າງຕໍ່ເນື່ອງ, ປະຕິບັດລະບຽບພາກສະໜາມ, ມີຄວາມຊຳນິຊຳນານ ທາງດ້ານສິລະປະຍຸດ, ຍຸດທະວິທີສືບຂ່າວ, ເຕັກນິກການນຳໃຊ້ອາວຸດ-ກະສູນ, ອຸປະກອນປະກອບ ສະເພາະສືບຂ່າວ ແລະ ຮູບແບບການປະຕິບັດໜ້າທີ່ສູ້ຮົບ ປະສານກັບເຫລົ່າທະຫານອາກາດ ກຽມພ້ອມປະຕິບັດໜ້າທີ່ແກ້ໄຂ ສະພາບການຕ່າງໆ ຕາມຄຳສັ່ງຂອງຂັ້ນເທິງ ໃນສະເພາະໜ້າ ແລະ ຍາວນານ. ໃນຫລາຍປີທີ່ຜ່ານມາ, ກຳລັງກົມກອງເຫລົ່າຮົບສືບຂ່າວ ໄດ້ຈັດຕັ້ງອົບຮົມ-ຫັດແອັບ ຕາມຄຳສັ່ງ ອົບຮົມ-ຫັດແອບປະຈຳປີ ຂອງກົມອົບຮົມກົມໃຫຍ່ ການເມືອງກອງທັບຢ່າງຕໍ່ເນື່ອງ ໂດຍໄດ້ສຸມໃສ່ອົບຮົມ-ຫັດ ແອບການທະຫານ ແລະ ການບັນຊາ, ໃນນີ້ໄດ້ສຸມໃສ່ອົບ ຮົມ-ຫັດແອບສິລະປະຍຸດ ແລະ ຍຸດທະວິທີສືບຂ່າວເປັນຈຸດໜັກ.

 

ການສະແດງໃນຄັ້ງນີ້ປະກອນ ມີການສະແດງສິລະປະ, ການສະແດງມວຍສືບຂ່າວ (ມວຍຫັດ ກາຍຊາຍ, ມວຍສູ້ຮົບຊາຍ-ຍິງ, ສືບຂ່າວຂ້າມຜ່ານສິ່ງກີດຂວາງ ແລະ ມວຍສືບຂ່າວກຳລັງພາຍໃນ), ການໂດດຈ້ອງສະແດງກຳລັງ, ການຍິງເປີດປ້າຍຄຳຂວັນ, ການໂດດຈ້ອງລົງແນວຫລັງ ປິດລັບບັງເອີນຫລອນຕີ ທຳລາຍຂຸມປືນໃຫຍ່ ຂອງສັດຕູ, ການໂຢດພົນລົງແນວຫລັງ ປິດລັບບັງເອີນຫລອນ ຕີທຳລາຍສັດຕູ, ການບິນສະແດງຂອງຍົນສູ້ຮົບ ແລະ ອື່ນໆ.

Medialaos

ຮອງ​ນາຍົກລັດຖະມົນຕີ ເຄ່ືອນໄຫວຢ້ຽມຢາມ ແລະ ເຮັດວຽກຢູ່ເມືອງຫົງສາ

ໃນວັນທີ 14 ມັງກອນຜ່ານມາ  ທີ່ຫ້ອງການພາກສະໜາມບໍລິສັດໄຟຟ້າຫົງສາ ຈໍາກັດ    ໄດ້ຕ້ອນຮັບທ່ານ   ສົມດີ  ດວງດີ    ຮອງນາຍົກລັດຖະມົນຕີ ລັດຖະມົນຕີກະຊວງການເງິນ  ພ້ອມດ້ວຍຄະນະທີ່ລົງເຄື່ອນໄຫວ ແລະ ເຮັດວຽກຢູ່ເມືອງຫົງສາ  ຊຶ່ງນໍາພາໂດຍທ່ານ  ຍັນຍົງ     ສີປະເສີດ ຮອງເລຂາພັກແຂວງ   ຮອງເຈົ້າແຂວງໆໄຊຍະບູລີ, ມີທ່ານ  ຄໍາຫຼ້າ  ຜິວວັນນາ  ເລຂາຄະນະບໍລິຫານງານພັກເມືອງ ເຈົ້າເມືອງໆຫົງສາ, ມີຄະນະນໍາຂອງແຂວງຂອງເມືອງ, ມີອໍານາດການປົກຄອງບ້ານນາແກ່ນຄໍາ ແລະ ປະຊາຊົນພາຍໃນບ້ານດັ່ງກ່າວ ຕ້ອນຮັບຢ່າງອົບອຸ່ນ.

 ໃນໂອກາດນີ້   ທ່ານ ສົມດີ ດວງດີ  ກໍໄດ້ຮັບຟັງສະພາບລວມການຈັດຕັ້ງປະຕິບັດວຽກງານຕ່າງໆຂອງເມືອງ ແລະ ຮັບຟັງ ຄວາມເປັນມາຂອງກຸ່ມສະຫະກອນສົ່ງເສີມກະສິກໍາ ເມືອງຫົງສາ  ບ້ານນາແກ່ນຄໍາ ເປັນບ້ານຍົກຍ້າຍຈັດສັນຂອງໂຄງການໄຟຟ້າຫົງສາ  ຈໍາກັດ  ໂດຍມີຈັດສັນທີ່ຢູ່ອາໄສ, ທີ່ດິນທໍາການຜະລິດ, ສົ່ງເສີມໃຫ້ຊາວບ້ານໃຫ້ມີອາຊີບ ແລະ ລາຍໄດ້ທີ່ແນ່ນອນ, ເປັນຕົ້ນແມ່ນປູກພືດຜັກເປັນສິນຄ້າ, ປູກເຫັດ, ປູກຝ້າຍ, ລ້ຽງສັດ, ຊ່ວຍເຫຼືອປະຊາຊົນເຂົ້າເຮັດວຽກຢູ່ໂຄງການໄຟຟ້າຫົງສາ ແລະ ວຽກງານອື່ນໆ, ຫຼັງຈາກນັ້ນກໍໄດ້ເຂົ້າຢ້ຽມຊົມເບິ່ງໂຄງ ການໄຟຟ້າຫົງສາ ຈໍາກັດ  ຮັບຊົມການສະເໜີ ພາບລວມໂດຍຫຍໍ້,  ນັບຕັ້ງແຕ່ລັດຖະບານ ແຫ່ງ ສປປ ລາວ  ໄດ້ອະນຸມັດໃຫ້ມີການພັດທະນາໂຄງການໄຟຟ້າຫົງສາ ແລະ ໄດ້ເຊັນສັນຍາສໍາປະທານກັບບໍລິສັດໄຟຟ້າຫົງສາ ຈໍາກັດ ຄັ້ງວັນທີ  30  ເດືອນພະຈິກ 2009  ຈົນ ເຖິງປັດຈຸບັນໂຄງການໄດ້ມີ ການພັດທະນາເປັນລະບົບຕໍ່ເນື່ອງຈາກທ່ານ  ຄະທາຍຸດ   ຊູພູນ    ອໍານວຍການໃຫຍ່ບໍລິ ສັດໄຟຟ້າຫົງສາ ຈໍາກັດ ພ້ອມນັ້ນເຂົ້າຢ້ຽມຊົມຫ້ອງຄວບຄຸມການຜະລິດກະແສໄຟຟ້າຂອງໂຄງການ ແລະ ຈຸດຊົມວິວບໍ່ຖານຫີນໂຄງການໄຟຟ້າຫົງສາ, ຫຼັງຈາກນັ້ນກໍໄດ້ເດີນທາງໄປຢ້ຽມຢາມດ່ານນໍ້າເງິນ ຮັບຟັງບັນດາວຽກງານທີ່ເຄີຍໄດ້ຈັດຕັ້ງປະຕິບັດ ຂໍ້ສະດວກ,  ຂໍ້ຫຍຸ້ງຍາກທີ່ຈະພ້ອມກັນແກ້ໃນຕໍ່ໜ້າ.

ໃນໂອກາດທີ່ທ່ານຮອງນາຍົກລັດຖະມົນຕີ ລົງເຄື່ອນໄຫວ ແລະ ເຮັດວຽກຢູ່ເມືອງຫົງສາໃນຄັ້ງນີ້  ທ່ານກໍໄດ້ສະແດງຄວາມຍ້ອງຍໍຊົມເຊີຍຄະນະພັກ ອົງການປົກຄອງບ້ານແຕ່ລະຂັ້ນ ຕໍ່ກັບຜົນງານທີ່ຍາດໄດ້ ໃນໄລຍະຜ່ານມາ ຈົ່ງພ້ອມກັນສືບຕໍ່ເອົາໃຈໃສ່ຈັດຕັ້ງປະຕິບັດ ວຽກງານທີ່ໄດ້ຮັບການມອບໝາຍ ໃຫ້ໄດ້ຮັບຜົນດີ  ແລະ ວ່ອງໄວ ທັນໃຈ, ພ້ອມນັ້ນທ່ານຍັງໄດ້ໃຫ້ທິດຊີ້ນໍາ ຈົ່ງພ້ອມກັນເອົາໃຈໃສ່ວຽກງານດ້ານຕ່າງໆ ເຮັດໃຫ້ເສດຖະກິດ-  ສັງຄົມເມືອງພັດທະນາດີຂຶ້ນໄປເລື້ອຍໆ.

Medialaos

ແຂວງຊຽງຂວາງ ໄດ້ຮັບການຊ່ວຍເຫຼືອຈາກບັນດາບໍລິສັດ

ໃນໂອກາດທີ່ ປ້າ ຄຳເມິງ ວໍລະຈິດ ຄອບຄົວການນຳຂັ້ນສູງ ພ້ອມດ້ວຍຄະນະ ໄດ້ເດິນທາງໄປຮ່ວມພິທີຍົກເກດພະເຈົ້າອົງຫຼວງ ປາງປະທານພອນ ແລະ ງານເທດສະການບຸນເຂົ້າໄກ່ນ້ອຍ ປະຈຳປີ 2019 ທີ່ແຂວງຊຽງຂວາງ ໃນວັນທີ 11 ມັງກອນ 2020, ຢູ່ທີ່ຫ້ອງວ່າການແຂວງຊຽງຂວາງ.

ປ້າ ຄຳເມິງ ວໍລະຈິດ ໄດ້ຕາງໜ້າໃຫ້ບໍລິສັດ ໄອເຮັຈຊີ (IHC) ມອບເງິນຈຳນວນ 100,000,000 ກີບ, ເສື້ອກັນໜາວ ມູນຄ່າ 20,000 ໂດລາສະຫະລັດ ແລະ ບໍລິສັດ ເຄພີບີ (KPB) ກໍສ້າງ ແລະ ພັດທະນາ ຈຳກັດ ມອບເງິນ ມູນຄ່າ 56,000,000 ກີບ ໃຫ້ແຂວງຊຽງຂວາງ ເຊິ່ງເປັນກຽດຮັບໂດຍ ທ່ານ ບຸນຕົ້ນ ຈັນທະພອນ ເຈົ້າແຂວງ ແຂວງຊຽງຂວາງ ພ້ອມດ້ວຍຄະນະ.

ໃນໂອກາດນີ້, ປ້າ ຄຳເມິງ ວໍລະຈິດ ໄດ້ກ່າວວ່າ ເງິນຈຳນວນດັ່ງກ່າວ ແມ່ນໃຫ້ນຳໃຊ້ເຂົ້າໃນການບໍລິຫານໃນງານມະຫາກຳກີລາແຫ່ງຊາດ ຄັ້ງທີ XI, ສ່ວນເສື້ອກັນໜາວ ແລະ ເກີບ ແມ່ນນຳໄປມອບໃຫ້ຄອບຄົວປະຊາຊົນຜູ້ທຸກຍາກ ຢູ່ເຂດຫ່າງໄກຊອກຫຼີກ ໃຫ້ໄດ້ຮັບກັນຢ່າງທົ່ວເຖິງ.

ທ່ານ ເຈົ້າແຂວງ ແຂວງຊຽງຂວາງ ກໍໄດ້ກ່າວສະແດງຄວາມຂອບໃຈຕໍ່ຄອບຄົວການນຳຂັ້ນສູງ ແລະ ບໍລິສັດ ທີ່ເປັນຫ່ວງເປັນໄຍ ໃຫ້ການຊ່ວຍເຫຼືອແຂວງຊຽງຂວາງ. ເສື້ອກັນໜາວ ແລະ ເກີບ ແມ່ນຈະນຳໄປມອບໃຫ້ເມືອງ ໃນໂອກາດກອງປະຊຸມໃຫຍ່ຂອງເມືອງ ເພື່ອໃຫ້ເມືອງນຳໄປມອບໃຫ້ບ້ານ ແລະ ຄອບຄົວທີ່ທຸກຍາກ ທີ່ຢູ່ເຂດຫ່າງໄກຊອກຫຼີກ ເປັນຕົ້ນແມ່ນ ກຸ່ມບໍກໍ ແລະ ກຸ່ມບໍເຍຍ ເມືອງໜອງແຮດ.

Medialaos

ເປີດນໍາໃຊ້ ເສັ້ນທາງເລກ 4B ຫົງສາ-ຊຽງແມນ ຢ່າງເປັນທາງການ

ໂຄງການກໍ່ສ້າງເສັ້ນທາງ(4B)  ຈາກບ້ານນາປຸ່ງ ເມືອງຫົງສາ  ແຂວງໄຊຍະບູລີ ຫາ ບ້ານຊຽງແມນ ເມືອງຈອມເພັດ  ແຂວງ ຫລວງພະບາງ ຊຶ່ງມີຄວາມຍາວທັງໝົດ  114ກິໂລແມັດ ໄດ້ສຳເລັດສຳເລັດສົມບູນ ແລະ ໄດ້ເປີດນໍາໃຊ້ຢ່າງເປັນທາງການໃນວັນທີ  14 ມັງກອນ 2020 ນີ້, ລວມມູນຄ່າທັງໝົດ 60ລ້ານໂດລາສະຫະລັດ.  ເປັນກຽດເຂົ້າຮ່ວມຂອງທ່ານ  ສົມດີ ດວງດີ ຮອງນາຍົກລັດຖະມົນຕີ,  ລັດຖະ ມົນຕີ ກະຊວງການເງິນ,  ມີທ່ານ ບຸນຈັນ ສິນທະວົງ ລັດຖະມົນກະຊວງໂຍທາທິການ  ແລະ ຂົນ ສົ່ງ, ທ່ານ ຄຳຂັນ ຈັນທະວີສຸກ  ເຈົ້າແຂວງໆຫລວງພະບາງ, ຜູ້ອໍານວຍການບໍລິສັດຮັບເໝົາກໍ່ສ້າງ  ແລະ ພາກ ສ່ວນ ກ່ຽວຂ້ອງເຂົ້າຮ່ວມ.

ເສັ້ນທາງເລກ 4Bເປັນເສັ້ນທາງຫລວງແຫ່ງຊາດ  ຊຶ່ງໄດ້ຮັບການສະຫນັບສະຫນູນດ້ານການເງິນ ຈາກລັດຖະບານແຫ່ງ ຣາຊະອານາຈັກໄທ  ກໍຄືສໍານັກງານຄວາມຮ່ວມມືພັດທະນາເສດຖະກິດ  ກັບປະເທດເພື່ອນ ບ້ານ(ອົງການມະຫາຊົນ  ຫລື NEDA ແຫ່ງປະເທດໄທ)  ຈໍານວນ 1.977 ລ້ານບາດ(ສະກຸນເງິນໄທ),  ໃນນີ້ ເປັນເງິນກູ້ຈໍານວນ 1.581 ລ້ານບາດ,  ເງິນຊ່ວຍເຫລືອລ້າ  395 ລ້ານບາດ.ເປັນເສັ້ນທາງປູຢາງສອງຊັ້ນ  ໂດຍ ແມ່ນ ບໍລິສັດ ຊໍທະວີຄອນ ສະຕຣັກຊັນ  ຈໍາກັດ ແຫ່ງປະເທດໄທ ຜູ້ຮັບເໝົາກໍ່ສ້າງ.

 

ເສັ້ນທາງ(4B) ເປັນທາງປູຢາງສອງຊັ້ນ,  ໜ້າທາງລົດແລ່ນມີ 2 ຊ່ອງຈະລາຈອນ,  ຄວາມກວ້າງໜ້າທາງເຂດທົ່ງພຽງແມ່ນ  9 ແມັດ, ເຂດຫລຸບໂນນແມ່ນ 8 ແມັດ  ແລະ ເຂດພູດອຍແມ່ນ 7 ແມັດ, ມີບ່າທາງເບື້ອງລະ 1 ແມັດ.  ພ້ອມນັ້ນຍັງໄດ້ກໍ່ສ້າງຂົວຂ້າມທັງຫມົດ 8 ແຫ່ງ,  ໃນນັ້ນຢູ່ເຂດແຂວງໄຊຍະບູລີ 1 ແຫ່ງ  ແລະ ຢູ່ເຂດແຂວງຫລວງພະບາງມີ 7 ແຫ່ງ  ຊຶ່ງໄດ້ອຳນວຍຄວາມສະ ດວກໃຫ້ປະຊາຊົນ  ແລະ ພໍ່ຄ້າຊາວຂາຍ, ນັກທ່ອງທ່ຽວ  ໃນການໃຊ້ລົດໃຊ້ຖະໜົນ ໄປສູ່ພາກເໜືອ ໂດຍສະເພາະ  ເມືອງຈອມເພັດ ຫາ ເມືອງຫົງສາ.

Medialaos

ຂະແໜງ​ສ່ວຍ​ສາ​ອາກອນ ເກັບ​ລາຍ​ຮັບ​ໄດ້​ຫລາຍ​ກວ່າ 11 ພັນ​ຕື້​ກີບ

(ຮູບພາບປະກອບ)

ໃນ 1 ປີ ຜ່ານມາ ຂະແໜງສ່ວຍສາອາກອນ  ສາມາດປະຕິບັດລາຍຮັບ ສ່ວຍສາອາກອນໄດ້ 11.422ຕື້ກີບ,  ເທົ່າກັບ 92,72%ຂອງແຜນການປີ  (ຕົວເລກເບື້ອງຕົ້ນບໍ່ທັນສະຫລຸບຂາດຕົວ)  ທຽບໃສ່ໄລຍະດຽວກັນ ຂອງປີຜ່ານມາເພີ່ມຂຶ້ນ 580ຕື້ກີບ  ເທົ່າກັບ 5,8% ໃນນີ້, ກົມສ່ວຍສາອາກອນເກັບໄດ້ 6.658,29ຕື້ກີບ  ເທົ່າກັບ 88,61%ຂອງແຜນການປີ  ທຽບໃສ່ປີຜ່ານມາເພີ່ມຂຶ້ນ 9,10%  ບັນດາແຂວງ ນະຄອນຫລວງເກັບໄດ້ 4.764,35ຕື້ກີບ,  ເທົ່າກັບ 99,09%ຂອງແຜນການປີ  ທຽບໃສ່ປີ ຜ່ານມາເພີ່ມຂຶ້ນ 0,5%  ເຊິ່ງເຫັນວ່າຫລາຍທ້ອງຖິ່ນ ສາມາດປະຕິບັດໄດ້ຕາມແຜນການ ລື່ນແຜນການ  ແລະ ຫລາຍທ້ອງຖິ່ນ ບໍ່ສາມາດບັນລຸຕາມແຜນການ  ສາເຫດຈາກຫລາຍປັດໄຈ.

    ທ່ານ ພູທະນູເພັດ ໄຊສົມບັດ  ຫົວໜ້າກົມສ່ວຍສາອາກອນ ໄດ້ກ່າວ ໃນກອງປະຊຸມສະຫລຸບຕີລາຄາວຽກງານສ່ວຍສາອາກອນ  ປະຈຳປີ 2019ແລະ ທິດທາງແຜນການ  ປີ 2020 ຈັດຂຶ້ນໃນວັນທີ 13-14 ມັງກອນ 2020ນີ້ວ່າ:  ປີ 2019ຂະແໜງສ່ວຍສາອາກອນ ໄດ້ປະຕິບັດເກັບລາຍຮັບ  ສ່ວຍສາອາກອນ  ໃນເງື່ອນໄຂມີທັງຂໍ້ສະດວກ ແລະ ຂໍ້ຫຍຸ້ງຍາກ  ສິ່ງທ້າທາຍທົດສອບທີ່ເປັນອຸປະສັກ ຕໍ່ການປະຕິບັດໜ້າທີ່ວິຊາສະເພາະ  ໂດຍໄດ້ສຸມໃສ່ຍົກສູງປະສິດທິພາບ  ໃນການຈັດຕັ້ງປະຕິບັດ ການຈັດເກັບໃຫ້ຄົບຖ້ວນ  ຖືກຕ້ອງຕາມກົດໝາຍ ແລະ ທັນເວລາ  ຫັນການຄຸ້ມຄອງຖານຫົວໜ່ວຍທຸລະກິດ,  ຖານລາຍຮັບ ແລະ ການຊຳລະ  ເຂົ້າສູ່ລະບົບທັນສະໄໝ ຜ່ານລະບົບທະນາຄານ,  ປັບປຸງກົນໄກການຄຸ້ມຄອງ  ບໍລິສັດນຳເຂົ້ານ້ຳ ມັນເຊື້ອໄຟ, ພາຫະນະ ແລະ ສິນຄ້າຕົ້ນຕໍ  ໃຫ້ສາມາດຄຸ້ມຄອງ ແຕ່ການສະໜອງຕົ້ນທາງ ຮອດຂອດຈຳໜ່າຍ, ປັບປຸງການເກັບອາກອນຊົມໃຊ້  ຈາກເຄື່ອງດື່ມທີ່ມີທາດເຫລົ້າ,  ຢາສູບໃຫ້ຍຸຕິທຳ ສຳລັບຜູ້ຜະລິດພາຍໃນ  ແລະ ຜູ້ນຳເຂົ້າ, ຜັນຂະຫຍາຍການປະຕິຮູບ ຂະແໜງສ່ວຍສາອາກອນໄປຕາມ  4 ແຜນງານໃຫຍ່ ແລະ 11ໂຄງການ  ສາມາດສ້າງ ແລະ ປັບປຸງກົດໝາຍໄດ້ 3ສະບັບ  ແລະ ນິຕິກຳລຸ່ມກົດໝາຍຈຳນວນຫລາຍສະບັບ,  ເພີ່ມປະສິດທິພາບໃນການປັບປຸງລະບົບ  ແລະ ກົນໄກເກັບລາຍຮັບໃຫ້ໄດ້ສູງຂຶ້ນ  ເພີ່ມປະສິດທິພາບ ໃນການບໍລິຫານຄວາມສ່ຽງ,  ປັບປຸງວຽກງານການແຈ້ງລາຍຮັບ  ໃນການຕິດຕາມກວດກາ ການປະຕິບັດພັນທະຜູ້ເສຍອາກອນ  ໃຫ້ສອດຄ່ອງກັບລະບຽບກົດໝາຍ,  ສືບຕໍ່ຜັນຂະຫຍາຍການນຳໃຊ້ລະບົບ ການຈັດເກັບລາຍຮັບ ສ່ວຍສາອາກອນຜ່ານລະບົບ  TaxRIS ໄດ້ທັງໝົດ 18 ແຂວງ 10ເມືອງ,  ຫັນການຊຳລະຄ່າທຳນຽມທາງ,  ພາສີທີ່ດິນຜ່ານລະບົບທະນາຄານ ເພີ່ມປະສິດທິພາບ ໃຫ້ເສຍພັນ ທະຊຳລະເງິນ ຜ່ານທະນາຄານຫລາຍຂຶ້ນ,  ຜ່ານປ່ອງບໍລິການ  ເຊິ່ງຂະບວນການສົ່ງເສີມ ການແຈ້ງລາຍຮັບ ແລະ ມອບລາຍຮັບດ້ວຍຕົນເອງ  ຜ່ານລະບົບທະນາຄານ ກວມ 80%  ຂອງລາຍຮັບສ່ວຍສາອາ ກອນ ປີ 2019.

ສຳລັບແຜນການ ແລະ ຄາດໝາຍສູ້ຊົນປີ 2020  ຈໍານວນ 13.590 ຕື້ກີບ ເທົ່າກັບ 7,8% ຂອງລວມຍອດ ຜະລິດຕະພັນພາຍໃນ (GDP) ທຽບໃສ່ ແຜນການປີຜ່ານມາເພີ່ມຂຶ້ນ 13,2%  ໃນນີ້ ກົມສ່ວຍສາອາກອນຄາດຄະເນ 8.650ຕື້ກີບ  ເທົ່າກັບ 4,84% ຂອງ GDP ທຽບໃສ່ ປີຜ່ານມາເພີ່ມຂຶ້ນ 15,15%ສ່ວນທ້ອງຖິ່ນປະມານ  5.300 ຕື້ກີບ ເທົ່າກັບ 2,96%ຂອງ  GDP ທຽບໃສ່ປີຜ່ານມາເພີ່ມຂຶ້ນ 10,23%  ພ້ອມດຽວກັນນີ້ ຂະແໜງການອື່ນໆ ຈະເອົາໃຈໃສ່ສືບຕໍ່ປັບປຸງໃຫ້ດີຂຶ້ນ.

Medialaos

ປີ 2019 ເຂດ​ເສດ​ຖະ​ກິດ​ພິ​ເສດ ມອບ ພັນທະ ເຂົ້າງົບປະມານຂອງລັດໄດ້ 122,09 ຕື້ກີບ

ໃນວັນທີ 14 ມັງກອນ 2020,  ທີ່ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ,  ກະຊວງແຜນການ ແລະ ການລົງທຶນ  ໄດ້ຈັດກອງປະຊຸມສະຫລຸບວຽກງານ ການພັດທະນາ ແລະ ຄຸ້ມຄອງເຂດເສດຖະກິດພິເສດ  ປະຈຳ ປີ 2019 ພາຍໃຕ້ການເປັນປະທານຂອງ  ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ,  ລັດຖະມົນຕີ ກະຊວງແຜນການ ແລະ ການລົງທຶນ  ມີບັນຮອງເຈົ້າແຂວງ, ຮອງເຈົ້າຄອງ  ທີ່ເຂດເສດຖະກິດພິເສດ ຕັ້ງຢູ່  ແລະ ບັນດາຮອງລັດຖະມົນຕີ, ຄະນະກົມ  ແລະ ພະແນກການຈາກຂະແໜງການທີ່ກ່ຽວຂ້ອງ  ແລະ ຄະນະຄຸ້ມຄອງເຂດເສດຖະກິດພິເສດ ທົ່ວປະເທດ ເຂົ້າຮ່ວມ.

ໃນໂອກາດດັ່ງກ່າວ, ທ່ານ ສອນໄຊ ສີພັນດອນ  ໄດ້ກ່າວວ່າ: ການພັດທະນາເຂດເສດຖະກິດພິເສດ  ຢູ່ ສປປ ລາວ ໄດ້ມີຈຸດພິເສດ  ແລະ ມີຄຸນລັກສະນະແຕກຕ່າງກັບການພັດທະນາ ເຂດເສດ ຖະກິດພິເສດຢູ່ປະເທດອື່ນໆ,  ເນື່ອງຈາກປະເທດອື່ນ ລັດຖະບານ ເປັນຜູ້ພັດທະນາພື້ນຖານໂຄງລ່າງທີ່ຈຳເປັນ,  ໃຫ້ນະໂຍບາຍສົ່ງເສີມພິເສດ ແລະ ສ້າງເງື່ອນໄຂ ທີ່ອຳນວຍຄວາມ ສະດວກໄວ້ລໍຖ້າ  ເພື່ອໃຫ້ນັກລົງທຶນ ເຂົ້າມາລົງທຶນໃນກິດຈະການຕ່າງໆ ຕາມເປົ້າໝາຍ ທີ່ລັດຖະບານໄດ້ກຳນົດໄວ້. ສ່ວນປະເທດເຮົາຍ້ອນເຫັນໄດ້ທ່າແຮງ  ແລະ ຄວາມສຳຄັນຂອງການພັດທະນາເສດຖະກິດ  ໃຫ້ມີຄວາມຫລາກຫລາຍ  ບວກກັບເງື່ອນໄຂ ທີ່ຕັ້ງພູມສັນຖານ  ທີ່ບໍ່ມີຊາຍແດນຕິດຈອດກັບທະເລ  ແລະ ງົບປະມານຂອງລັດ  ມີຈຳນວນຈຳກັດ ຈຶ່ງໄດ້ສົ່ງເສີມ ໃຫ້ຜູ້ພັດທະນາເອກະຊົນທັງພາຍໃນ  ແລະ  ຕ່າງປະເທດເຂົ້າມາລົງທຶນ  ໂດຍການໃຫ້ນະໂຍບາຍ ສົ່ງເສີມພິເສດ  ແນໃສ່ການພັດທະນາພື້ນຖານໂຄງລ່າງ,  ການຜະລິດເພື່ອສົ່ງອອກ, ຍົກລະດັບສີມືແຮງງານ  ແລະ ຖ່າຍທອດເຕັກໂນໂລຊີທີ່ທັນສະໄໝ.  ພ້ອມນີ້, ເຂດເສດຖະກິດພິເສດ  ຍັງໄດ້ປະກອບສ່ວນສຳຄັນ ຕໍ່ກັບການພັດທະນາເສດຖະກິດ-ສັງຄົມ  ໂດຍສະເພາະ ການພັດທະນາພື້ນຖານໂຄງລ່າງ,  ການສ້າງຕົວເມືອງໃໝ່ ໃນຊົນນະບົດໃຫ້ມີໃບໜ້າໃໝ່  ຍົກລະດັບຊີວິດການເປັນ ຢູ່ຂອງປະຊາຊົນ  ບ່ອນທີ່ເຂດເສດຖະກິດພິເສດ ຕັ້ງຢູ່,  ສ້າງໜໍ່ແໜງທາງດ້ານອຸດສາຫະກຳ,  ການຖ່າຍທອດເຕັກໂນໂລຊີ,  ສ້າງວຽກເຮັດງານທຳ ໄປຄ່ຽງຄູ່ກັບການຍົກລະດັບສີມືແຮງງານ  ໃຫ້ປະຊາຊົນໃນທາງກົງ ແລະ ທາງອ້ອມ,  ສ້າງຖານລາຍຮັບໃໝ່ ໃຫ້ກັບລັດຖະບານ ແລະ ອື່ນໆ.

ການພັດທະນາເຂດເສດຖະກິດພິເສດ  ໄດ້ສ້າງຄວາມເຊື່ອໝັ້ນ ສາມາດດຶງເອົາບໍລິສັດລາຍໃຫຍ່  ທີ່ມີຊື່ສຽງ ແລະ ມີຄຸນນະພາບຈາກຕ່າງປະເທດ  ເຂົ້າມາລົງທຶນນັບມື້ນັບຫລາຍຂຶ້ນ  ໂດຍສະເພາະ ຢູ່ເຂດສະຫວັນ-ເຊໂນ (ຈຸດC), ເຂດກວມລວມໄຊເຊດຖາ,  ເຂດນິຄົມອຸດສາຫະກໍາ ການຄ້າວຽງຈັນ-ໂນນທອງ,  ເຂດບໍ່ເຕ່ນແດນງາມ ແລະ ເຂດສາມຫລ່ຽມຄໍາ,  ຊຶ່ງມາຮອດປັດຈຸບັນ ກໍ່ໄດ້ມີບໍລິສັດເຂົ້າມາລົງທຶນທັງໝົດ  806 ບໍລິສັດ, ສຳລັບປີ 2019  ໄດ້ມີບໍລິສັດເຂົ້າມາລົງທຶນ 202 ບໍລິສັດ,  ມອບພັນທະເຂົ້າງົບປະມານຂອງລັດໄດ້ 122,09 ຕື້ກີບ,  ສົ່ງອອກໄດ້ 394,4 ລ້ານໂດລາສະຫະລັດ  ແລະ  ສ້າງວຽກເຮັດງານທຳໄດ້ 26.756 ຄົນ  (ລາວ 2.607 ຄົນ ກວມເອົາ 9.74%). ຜົນສຳເລັດທີ່ຍາດມາໄດ້ນັ້ນ  ກໍ່ຍ້ອນການເອົາໃຈໃສ່ ແລະ ຊີ້ນຳຢ່າງໃກ້ຊິດ  ຈາກທຸກພາກສ່ວນທັງສູນກາງ ແລະ ທ້ອງຖີ່ນ,  ບວກກັບຄວາມຕັ້ງໃຈ, ຄວາມຈິງໃຈຂອງຜູ້ພັດທະນາ  ແລະ ຜູ້ລົງທຶນແຕ່ລະເຂດ  ທີ່ໄດ້ເອົາໃຈໃສ່ຂົນຂວາຍການລົງທຶນ  ເຂົ້າມາໃນເຂດດັ່ງກ່າວ ໃຫ້ນັບມື້ນັບຫລາຍຂຶ້ນ.

Medialaos