ລັດຖະມົນຕີກະຊວງການຕ່າງປະເທດ ຕ້ອນຮັບທູດຕີມໍເລສເຕ

ໃນວັນທີ 23 ມັງກອນນີ້ ທີ່ໂຮງແຮມລາວພລາຊາ, ທ່ານ ສະເຫຼີມໄຊ ກົມມະສິດ  ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອຳລາຂອງທ່ານ ນາງ ມາເຣຍ ນາຕາເຣຍ ກຸເຕີເຣສ ວີກັສ ຄາລາສກາລາວ (MariaNatalia Gutterres Viegas Carrascalao) ເອກອັກຄະລັດຖະ ທູດ ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ ປະຈຳ ສປປ ລາວ, ໃນໂອກາດທີ່ສຳເລັດໜ້າທີ່ການທູດ ຢູ່  ສປປ ລາວ.

ໃນໂອກາດນີ້, ທ່ານລັດ ຖະມົນຕີ ໄດ້ສະແດງຄວາມຊົມເຊີຍແລະ ຕີລາຄາສູງ ຕໍ່ຜົນສຳເລັດໃນການປະຕິບັດໜ້າທີ່ຂອງທ່ານທູດຕະຫຼອດໄລຍະດຳລົງຕຳແໜ່ງເປັນເອກອັກຄະລັດຖະທູດ  ຊຶ່ງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນລະຫວ່າງສອງປະເທດ ກໍຄືປະຊາຊົນສອງຊາດໃຫ້ມີຄວາມແໜ້ນແຟ້ນຍິ່ງໆຂຶ້ນ. ພ້ອມນີ້, ທ່ານລັດຖະມົນຕີ ກໍໄດ້ສະແດງຄວາມຂອບໃຈມາຍັງ ລັດຖະບານ ແລະ ປະຊາຊົນ ຕີມໍ-ເລສເຕ ທີ່ໄດ້ໃຫ້ການຊ່ວຍເຫຼືອ ສປປ ລາວ ໃນໄລຍະຜ່ານມາ ໂດຍສະເພາະ ຕໍ່ເຫດການໄພພິບັດທາງທຳມະຊາດຢູ່ແຂວງອັດຕະປືໃນປີ 2018  ຊຶ່ງໄດ້ໃຫ້ການຊ່ວຍເຫຼືອເປັນເງິນ ຈໍານວນ 750.000 ໂດລາ.

ໃນຕອນທ້າຍ, ທ່ານລັດຖະມົນຕີໄດ້ອວຍພອນໃຫ້ທ່ານທູດ ປະສົບຜົນສໍາເລັດໃນການປະຕິບັດໜ້າທີ່ອັນໃໝ່ ແລະເດີນທາງກັບຄືນປະເທດດ້ວຍຄວາມສະຫວັດດີພາບ.ໃນຂະນະດຽວກັນ, ທ່ານທູດກໍໄດ້ສະແດງຄວາມຂອບໃຈເປັນຢ່າງສູງມາຍັງລັດຖະບານ ແລະ ປະຊາຊົນລາວ ກໍຄືກະຊວງການຕ່າງປະເທດ ແຫ່ງ ສປປ ລາວ ທີ່ໄດ້ໃຫ້ການຮ່ວມມື, ສະໜັບສະໜູນຊ່ວຍເຫຼືອແລະ ອໍານວຍຄວາມສະດວກເປັນຢ່າງດີ ຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປລາວ ໃນຄັ້ງນີ້ ຈົນໄດ້ຮັບຜົນສໍາເລັດອັນຈົບງາມ ແລະ ຈະສືບຕໍ່ ໃຫ້ການຮ່ວມມືໃນທຸກດ້ານ ເພື່ອປະກອບສ່ວນເຂົ້າໃນການຮັດແໜ້ນແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ຕີມໍ-ເລສເຕ- ສປປ ລາວ ໃຫ້ຈະເລີນງອກງາມຍິ່ງໆຂຶ້ນ.

Medialaos

ກະຊວງ ຖວທ ກອງປະຊຸມສ່ອງແສງ ວຽກງານ ພັກ-ລັດ ປະຈຳເດືອນ ມັງກອນ 2020

ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ຈັດກອງປະຊຸມສ່ອງແສງ ວຽກງານ ພັກ-ລັດ ປະຈຳເດືອນ ມັງກອນ 2020, ໂດຍການເປັນປະທານ ຂອງທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍ ຫົວໜ້າກົມ, ບັນນາທິການ ແລະ ພະນັກງານ-ລັດຖະກອນ ເຂົ້າຮ່ວມ.

ຈຸດປະສົງຂອງກອງປະຊຸມ ແມ່ນສະຫຼຸບຕີລາຄາອັນພົ້ນເດັ່ນ ການເຄື່ອນໄຫວວຽກງານເສນາ, ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.

ຄະນະບໍລິຫານພັກກະຊວງ ໄດ້ເອົາໃຈໃສ່ໃກ້ຊິດຕິດແທດຊີ້ນຳ-ນຳພາສຶກສາອົບຮົມແນວຄິດເປັນສຳຄັນ ແລະ ຕົ້ນຕໍ, ຄະນະພັກ, ຄະນະນຳກະຊວງ ໄດ້ຊີ້ນຳ-ນຳພາສື່ມວນຊົນທຸກຂະແໜງການສຸມໃສ່ໂຄສະນາການເຄື່ອນໄຫວວຽກງານຢ່າງເປັນທາງການຂອງຜູ້ນຳພັກ-ລັດພາຍໃນ ແລະ ຕ່າງປະເທດ, ຄະນະສະເພາະກິດຂັ້ນສູນກາງ ແລະ ທ້ອງຖິ່ນ, ພ້ອມນີ້ຍັງໄດ້ ໂຄສະນາໃຫ້ແກ່ການຜັນຂະຫຍາຍມະຕິ 9 ສະໄໝທີ X, ໂຄສະນາໃຫ້ແກ່ຜົນສຳເລັດກອງປະຊຸມສະໄໝສາມັນ ເທື່ອທີ 8 ຂອງສະມາຊິກສະພາແຫ່ງຊາດ ຊຸດທີ VIII, ໂຄສະນາຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກໃນເຄິ່ງສະໄໝເພື່ອກະກຽມໃຫ້ແກ່ກອງປະຊຸມ 3 ຂັ້ນ, ການເຄື່ອນໄຫວຈັດຕັ້້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VIII ໂດຍສະເພາະການປະຕິບັດວຽກງານ 03 ສ້າງບັນດາແຂວງເປົ້າໝາຍ, ໂຄສະນາໃຫ້ແກ່ການດຳເນີນກອງປະຊຸມຄະນະບໍລິຫານສູນກາງພັກ, ກອງປະຊຸມລັດຖະບານປະຈຳເດືອນມັງກອນ, ການລົງຊຸກຍູ້ການພັດທະນາ ແລະ ການດຳເນີນການຜະລິດກະສິກຳຂອງການນຳຂັ້ນທ້ອງຖິ່ນ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ສະພາບການຜັນແປຂອງສາກົນທາງດ້ານເສດຖະກິດ-ການເມືອງ.

ນອກຈາກນີ້, ຍັງໄດ້ສຸມໃສໂຄສະນາເຜີຍແຜ່ເມືອງລະດົກໂລກທົ່ງໄຫຫີນ ແຂວງຊຽງຂວາງ ໃຫ້ກວ້າງຂວາງ ກະກຽມສະເຫຼີມສະຫຼອງເມືອງມໍລະດົກໂລກທົ່ງໄຫຫີນ ແຂວງຊຽງຂວາງ ໃນປີ 2020, ກະກຽມເປີດງານມະຫາກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງເປັນເຈົ້າພາບ ໃນປີ 2020 ນີ້.

Medialaos

 

CGTN ລາຍງານວ່າພົບຜູ້ຕິດເຊື້ອຢູ່ຈີນປະຈຸບັນມີ 574 ຄົນ

ການຕິດເຊື້ອປອດອັກເສບ. ຕາມການລາຍງານຂອງ CGTN ລາຍງານວ່າພົບຜູ້ຕິດເຊື້ອຢູ່ຈີນປະຈຸບັນມີ 574 ຄົນ, 95 ຄົນຕິດເຊື້ອຮຸນແຮງ ແລະ ເສຍຊີວິດແລ້ວ 17ຄົນ.

ສ່ວນຢູ່ປະເທດຕ່າງໆກໍມີການລາຍງານວ່າມີການກວດພົບຜູ້ຕິດເຊື້ອແລ້ວຄື:

 

  • ສະຫາລັດອາເມລິກາ
  • ຍີ່ປຸ່ນ
  • ໄທ
  • ເກົາຫລີໄຕ້

ລ້ຽງສັດໃຫຍ່ເປັນສິນຄ້າ ລາຍຮັບຄອບຄົວໝັ້ນຄົງ

(ຮູບພາບປະກອບ)

ການປູກຝັງ-ລ້ຽງສັດເປັນສິນຄ້າເປັນຊ່ອງທາງໜຶ່ງທີ່ເຮັດໃຫ້ສ້າງລາຍຮັບເຂົ້າຄອບຄົວໄດ້ປີໜຶ່ງຫລາຍສິບລ້ານກີບຈົນສາມາດຫລຸດພົ້ນອອກຈາກຄວາມທຸກຍາກໄດ້ ແລະ ກາຍເປັນຄອບຄົວພັດທະນາ ດັ່ງຄອບຄົວທ່ານ ສົມປອງ ແກ້ວພິມານ ປະຊາຊົນບ້ານພູຖ້ຳພວງ ເມືອງລະຄອນເພັງ ແຂວງສາລະວັນ ທີ່ລ້ຽງງົວ ແລະ ລ້ຽງເປັດໄກ່ ໝູ ແລະ ປາຈຳນວນໜຶ່ງ.

ທ່ານ ສົມປອງ ເລົ່າສູ່ຟັງວ່າ:ໃຈມັກຮັກອາຊີບກະສິກຳຫລາຍ ແລະ ກໍ່ເປັນອາຊີບທີ່ສອດຄ່ອງກັບແນວທາງນະໂຍບາຍ ແລະ ແຜນພັດທະນາເສດຖະກິດ-ສັງຄົມຂອງພັກ-ລັດ ທີ່ຊຸກຍູ້ສົ່ງເສີມປະ ຊາຊົນລາວບັນດາເຜົ່າພັດທະນາຊີວິດ ການເປັນໃຫ້ດີຂຶ້ນໂດຍ ການປູກຝັງ-ລ້ຽງສັດເປັນສິນຄ້າຈາກນີ້ຈຶ່ງ ໄດ້ຫັນມາຜະລິດເປັນສິນຄ້າໂດຍການປູກຫຍ້າລ້ຽງງົວທັງໄດ້ຕັດສິນໃຈກູ້ຢຶມເງິນ 20 ລ້ານກີບຊື້ງົວພໍ່ພັນແມ່ພັນງົວຕື່ມໃສ່ກັບງົວທີ່ຕົນເອງມີຢູ່ແລ້ວ ແລະ ລວມແລ້ວມີ 20 ກວ່າໂຕ.ນັບແຕ່ເລີ່ມລ້ຽງມາຮອດປັດຈຸບັນ ມີງົວ 40 ກວ່າໂຕ ແລະ ແຕ່ລະຊຸດທີ່ຂາຍງົວອອກໄດ້ເງິນ 60 ກວ່າລ້ານກີບ.

ພາຍ ຫລັງຂາຍອອກແລ້ວກໍ່ໄດ້ຊື້ເຂົ້າມາຕື່ມອີກຈຳນວນໜຶ່ງ.ນັບແຕ່ຜະລິດເປັນສິນຄ້າເປັນຕົ້ນ,ຄອບຄົວທ່ານ ສົມປອງ ສາມາດສ້າງລາຍຮັບເຂົ້າຄອບຄົວໄດ້ປີໜຶ່ງ 70 ລ້ານກວ່າ ກີບ.ຈາກການຂາຍງົວ,ໄກ່,ປາ ແລະ ໝູ ໄດ້ເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນກວ່າແຕ່ກ່ອນຫລາຍເທົ່າ. ຂ້າພະເຈົ້າປຸກ ເຮືອນຖາວອນ,ມີລົດຂີ່,ສົ່ງເສີມລູກຮຽນໜັງສື,ມີເງີນແຮໄວ້ໃຊ້ຈ່າຍໃນຄອບຄົວຊຶ່ງມາຮອດປັດຈຸບັນ ໜີ້ສິນກໍໃຊ້ໝົດແລ້ວທັງ ຄ່ອຍໆຫລຸດພົ້ນອອກຈາກຄວາມທຸກຍາກ.ຜົນສໍາເລັດດັ່ງກ່າວນັ້ນຍ້ອນວ່າຂັ້ນເທິງໄດ້ໃຫ້ທິດເຍືອງທາງ ແລະ ຊຸກຍູ້ສົ່ງເສີມຄອບຄົວຂອງຂ້າພະເຈົ້າ ເປັນຕົ້ນຫ້ອງການກະສິກຳ-ປ່າໄມ້ເມືອງລະຄອນເພັງໄດ້ສົ່ງວິຊາການມາໃກ້ຊິດຕິດແທດ,ແນະນຳການໃຊ້ເຕັກ ນິກວິທະຍາດຊ່ວຍໃນການປູກ-ການລ້ຽງ ເປັນຕົ້ນການສັກຢາປ້ອງກັນພະຍາດສັດ,ວິທີບົວລະບັດຮັກສາ ແລະ ອື່ນໆ.ສ່ວນຕໍ່ໜ້ານີ້ ຈະປູກຫຍ້າຫວານອິດສະລະແອນ,ຫຍ້າລູຊີ ແລະ ຫຍ້າກິນີ ເພື່ອລ້ຽງງົວທັງຈະຂະຫຍາຍໜອງປາ,ຊື້ງົວມາຂຸນໄວ້ ແລະ ເຮັດ ຄອກຕື່ມອີກທ່ານ ສົມປອງ ເວົ້າດ້ວຍຄວາມພາກພູມໃຈ.

ທ່ານ ສຸດທະສອນ ຈັນທະວົງ ຫົວໜ້າໜ່ວຍງານລ້ຽງສັດ ແລະ ການປະມົງຫ້ອງການກະສິກຳ-ປ່າ ໄມ້ເມືອງລະຄອນເພັງ ຢັ້ງຢືນວ່າ:ຄອບຄົວທ່ານ ສົມປອງ ແມ່ນຄອບຄົວທີ່ດຸໝັ່ນຂະຫຍັນພຽນ,ອົດທົນມັກຮັກອາຊີບປູກຝັງ-ລ້ຽງສັດ ແລະ ຜະລິດເປັນສິນຄ້າຢ່າງແທ້ຈິງຈົນສ້າງລາຍຮັບໃຫ້ແກ່ຄອບຄົວທັງ ຫລຸດພົ້ນອອກຈາກຄວາມທຸກຍາກ ແລະ ກາຍເປັນຄອບຄົວຕົວແບບ.

Medialaos

ຊາວບ້ານນາຜາບ່ອງ ບໍ່ຂັດຂ້ອງຕໍ່ການພັດທະນາ

ຊາວບ້ານນາຜາບ່ອງ ບໍ່ໄດ້ມີຄວາມຂັດຂ້ອງຕໍ່ການພັດທະນາຕາມທິດທາງລວມ, ໂດຍສະເພາະ ບັນຫາທີ່ມີຫາງສຽງສັງຄົມ ກ່ຽວກັບຂຸດຄົ້ນຫີນ ຢູ່ເຂດໃກ້ບ້ານ ເພື່ອຮັບໃຊ້ໃຫ້ແກ່ການພັດທະນາ ເປັນຕົ້ນກຳເນີດກິດຈະການຂອງໂຮງງານຊີມັງໃນເຂດເມືອງຫີນເຫີບ ກໍຄື ຮັບໃຊ້ເຂົ້າໃນການພັດທະນາພື້ນຖານໂຄງລ່າງຕ່າງໆ.

ທ່ານ ຊຽງສິງ ພົມມະສີ ອາຍຸ 55 ປີ ຄົນພື້ນຖານຂອງບ້ານນາຜາບ່ອງ ເມືອງຫີນເຫີບ ແຂວງວຽງຈັນ ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວ ວ່າ: ໂດຍສ່ວນຕົວທີ່ເປັນຄົນພື້ນຖານຂອງບ້ານນາຜາບ່ອງນີ້ ບໍ່ໄດ້ມີຄວາມຂັດຂ້ອງຫຍັງຕໍ່ການພັດທະນາ, ໂດຍສະເພາະ ແມ່ນການຂຸດຄົ້ນຫີນ ເພື່ອຮັບໃຊ້ໃຫ້ແກ່ການພັດທະນາດ້ານຕ່າງໆ ເພາະສຳນຶກເຫັນສະພາບກ່ອນນີ້ ຫຼາຍສີບປີໃນເວລາອາຍຸ 14-15 ປີ ເສັ້ນທາງທາງຈາກບ້ານໄປຫາຫີນເຫີບແມ່ນລຳບາກຫຼາຍ, ໃຊ້ເວລາໄປມາເປັນມື້, ຕ້ອງໄດ້ລຸຍຂ້າມນ້ຳລີກເພາະບໍ່ມີຂົວ. 

ໃນໄລຍະ 40 ກວ່າປີມານີ້ ລັດໄດ້ຟື້ນຟູບູລະນະເສັ້ນທາງນ້ອຍໆ ເປັນເສັ້ນທາງ ໄປ-ມາ ສະດວກ ແລະ ໃນໄລຍະປີມໍ່ໆມານີ້ ເສັ້ນທາງກໍໄດ້ຮັບການປັບປຸງຕື່ມ, ມີຂົວໃໝ໋ ໄປ-ມາ ຍິ່ງສະດວກກວ່າເກົ່າ ຍ້ອນມີໂຄງການພັດທະນາມາເຖິງ, ໂດຍສະເພາະໂຮງງານຊີມັງ ຫົງຊື ຊຶ່ງເປັນການລົງທຶນຂອງຕ່າງປະເທດຢູ່ບໍລິເວນໃກ້ນີ້ ແລະ ຊາວບ້ານຈຳນວນໜຶ່ງກໍໄດ້ມີວຽກເຮັດງານທຳປະກອບອາຊີບຢູ່ໃນໂຮງງານຊີມັງດັ່ງກ່າວ, ມີລາຍຮັບມາພັດທະນາຊີວິດການເປັນຢູ່.

ຕາມຄຳເຫັນຂອງທ່ານ ຊຽງສິງ ພົມມະສີແລ້ວ ການພັດທະນາບໍ່ອາດປາສະຈາກ ຫຼື ຜົນລົບ, ໂດຍສະເພາະການຂຸດຄົ້ນຫີນ ຢູ່ຜາບ່ອງ ເພື່ອນຳໄປຮັບໃຊ້ໃນການຜະລິດຂອງໂຮງງານຊີມັງຫົງຊື ແລະ ໂຄງການພັດທະນາພື້ນຖານໂຄງລ່າງຢູ່ເຂດເມືອງຫີນເຫີບ, ເຖິງວ່າບໍລິສັດກ່ຽວຂ້ອງໄດ້ມີການຫົດນ້ຳເສັ້ນທາງ ແຕ່ກໍຍັງເຮັດບໍ່ປົກກະຕິເທົ່າທີ່ຄວນ. ສ່ວນຝຸ່ນຈາກການຂຸດຄົ້ນຫີນ ເປັນຕົ້ນໃນເວລາຈູດລະເບີດຫີນນັ້ນ ຮັບຊາບວ່າທາງອຳນາດການປົກຄອງບ້ານ ແລະ ເຂດໄດ້ນຳເອົາຄຳສະເໜີຂອງປະຊາຊົນທີ່ສຳປະທານຂຸດຄົ້ນແລ້ວ ເພື່ອຊອກຫາວິທີແກ້ໄຂໃຫ້ໄວ.

Medialaos

ຮອງ​ນາຍົກລັດຖະມົນຕີ ລົງຊຸກຍູ້ ການກະກຽມກອງປະຊຸມ 3 ຂັ້ນ ແລະ ຊຸກຍູ້ ການກໍ່ສ້າງທາງລົດໄຟຢູ່ແຂວງວຽງຈັນ

ປະທານຄະນະກວດກາສູນກາງພັກ ປະທານອົງການກວດກາລັດຖະບານ ແລະ ຫົວໜ້າອົງ ການຕ້ານການສໍ້ລາດບັງຫຼວງ ຂັ້ນສູນກາງ  ຫົວໜ້າຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ ພ້ອມຄະນະ ໄດ້ໄປຢ້ຽມຢາມ ແລະ ຊຸກຍູ້ວຽກງານ ການກະກຽມກອງປະຊຸມໃຫຍ່ 3 ຂັ້ນຂອງພັກ ແລະ ຊຸກຍູ້ໂຄງການກໍ່ສ້າງທາງລົດໄຟ ລາວ-ຈີນ ຢູ່ແຂວງວຽງຈັນ ຊຶ່ງມີສະຫາຍ ບຸນຈັນ ສິນທະວົງ ກຳມະການສູນກາງພັກ ລັດຖະມົນຕີກະຊວງໂຍທາທິການ  ແລະ  ຂົນສົ່ງ ຮ່ວມລົງເຄື່ອນໄຫວຄັ້ງນີ້. ສະຫາຍ  ຄໍາພັນ ສິດທິດຳພາ  ກໍາມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ, ມີຄະນະປະຈໍາ, ຄະນະພັກ, ພະນັກງານຫຼັກແຫຼ່ງ, ພະນັກງານທີ່ກ່ຽວຂ້ອງຕ້ອນຮັບ ແລະ ຮ່ວມເຮັດວຽກນຳ.

ໄດ້ຮັບຟັງການລາຍງານ ສະພາບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງແຂວງ ຈາກສະຫາຍ  ຄໍາພັນ ສິດທິດໍາພາ ເປັນຕົ້ນການກະກຽມດ້ານເນື້ອໃນ, ດ້ານບຸກຄະລາກອນ, ດ້ານຂະບວນການ, ດ້ານເສດຖະກິດ, ການປ້ອງກັນຊາດ-ປ້ອງກັນຄວາມສະຫງົບ. ປັດຈຸບັນທົ່ວແຂວງວຽງຈັນມີ 120 ຄະນະພັກຮາກຖານ; ສໍາເລັດກອງປະຊຸມໃຫຍ່ 87 ຄະນະພັກຮາກຖານ, ມີໜ່ວຍພັກທັງໝົດ 1.256 ໜ່ວຍພັກ ໃນນີ້ ຢູ່ສໍານັກງານອົງການມີ 18 ຄະນະພັກ ແລະ 105 ໜ່ວຍພັກ.

ສຳເລັດກອງປະຊຸມໃຫຍ່ອົງຄະນະພັກເມືອງ 4 ເມືອງ ຄື: ເມືອງໝື່ນ, ເມືອງແມດ, ເມືອງກາສີ, ເມືອງຊະນະຄາມ ແລະ ຄະນະພັກກອງບັນຊາການ ທະຫານແຂວງ. ສໍາເລັດການທາບທາມບຸກຄະລາກອນ ແລະ ດໍາເນີນຊີວິດການເມືອງ ຮອບທີ III ມີ 2. ເມືອງຄື: ເມືອງເຟືອງ ແລະ ເມືອງວັງວຽງ. ສໍາເລັດການທາບທາມບຸກຄະລາກອນ ຮອບທີ II ມີ 4 ເມືອງຄື: ເມືອງຫີນເຫີບ, ເມືອງແກ້ວອຸດົມ, ເມືອງທຸລະຄົມ, ເມືອງວຽງຄໍາ ແລະ ກອງບັນຊາການ ປກສ ແຂວງ. ສຳເລັດການທາບທາມບຸກຄະລາກອນ ຮອບທີ I  ມີ ເມືອງໂພນໂຮງ ແລະ 17 ຄະນະພັກຮາກຖານ, 20 ໜ່ວຍພັກເອກະລາດ ຂອງພະແນກການອ້ອມຂ້າງແຂວງ.

ສ່ວນໂຄງການກໍ່ສ້າງທາງລົດໄຟລາວ-ຈີນ ສະຫາຍ ດາວເຮືອງ ນັນທະວົງ ຄະນະປະຈໍາພັກແຂວງ ຮອງເຈົ້າແຂວງ  ຫົວໜ້າຄະນະກໍາມະການໄກ່ເກ່ຍສິ່ງກີດຂວາງ ແລະ ປ້ອງກັນຄວາມສະຫງົບ ໂຄງການທາງລົດໄຟລາວ-ຈີນ ແລະ ທາງດ່ວນນະຄອນຫຼວງວຽງຈັນ ຫາ ວັງວຽງ ໄລຍະຜ່ານແຂວງ ວຽງຈັນ ລາຍງານໃຫ້ຮູ້ວ່າ: ທາງລົດໄຟຜ່ານແຂວງວຽງຈັນມີ ຄວາມຍາວ ທັງໝົດ145,69 ກມ ຜ່ານ 4 ເມືອງ 60 ບ້ານຄື: ເມືອງກາສີ 9 ບ້ານ, ເມືອງວັງວຽງ 16 ບ້ານ, ເມືອງຫີນເຫີບ 11 ບ້ານ ແລະ ເມືອງໂພນໂຮງ 24 ບ້ານ, ມີຄອບຄົບທີ່ໄດ້ຮັບຜົນກະທົບ1.589 ຄ/ຄ ລວມມູນຄ່າຊົດເຊີຍທັງໝົດ 290 ຕື້ກວ່າກີບ. ການໄກ່ເກ່ຍສິ່ງກີດຂວາງ ໃຫ້ແກ່ໂຄງການ ມາຮອດຕົ້ນເດືອນມັງກອນ 2020 ນີ້ປະຕິບັດໄດ້ 145,06 ກິໂລ ແມັດ ຂອງຄວາມຍາວທັງໝົດ 145,69 ກມ ເທົ່າກັບ 99,58%, ແຕ່ພາຍຫຼັງການລົງຕິດຕາມ, ກວດກາ ແລະ ຊຸກຍູ້ໂຄງການກໍ່ສ້າງທາງລົດໄຟລາວ-ຈີນ ໄລຍະຜ່ານແຂວງວຽງຈັນ ຂອງສະຫາຍຮອງນາຍົກລັດຖະມົນຕີຄັ້ງນີ້ ສາມາດເວົ້າໄດ້ວ່າການໄກ່ເກ່ຍ ແລະ ມອບພື້ນທີ່ໃຫ້ແກ່ໂຄງການສໍາເລັດ 100%.

ພາຍຫຼັງທີ່ໄດ້ຮັບຟັງການລາຍງານສະພາບການຕ່າງໆແລ້ວ ສະຫາຍຮອງນາຍົກລັດຖະມົນຕີ ກໍໄດ້ໃຫ້ກຽດໂອ້ລົມ ແລະ ມີທິດຊີ້ນຳຕໍ່ຄະນະພັກ-ຄະນະນໍາ ຂອງແຂວງ ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ, ຄະນະນຳແຂວງ ທີ່ໄດ້ມີຄວາມຕັດສິນໃຈສູງໃນການຊີ້ນຳ-ນຳພາວຽກງານຮອບດ້ານ, ໂດຍສະເພາະແມ່ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການກະກຽມກອງປະຊຸມໃຫຍ່ 3 ຂັ້ນ.

Medialaos

ສື່ມວນຊົນ ລົງພື້ນທີ່ສືບຕໍ່ໂຄສະນາການທ່ອງທ່ຽວວັງວຽງ

ຂປລ. ທ້າຍອາທິດຜ່ານມາ, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃນນາມຜູ້ຊີ້ນຳວຽກງານຖະແຫລງຂ່າວ ສືມວນຊົນ ໄດ້ນໍາພາຄະນະສ່ືມວນຊົນຫລັກຈຳນວນໜ່ຶງລົງຕິດຕາມບັນຍາກາດການທ່ອງທ່ຽວຢູ່ເມືອງວັງວຽງ ແຂວງວຽງຈັນຊ່ຶງເປັນເຂດທ່ອງທ່ຽວຍອດນິຍົມສຳລັບຄົນລາວ ແລະ ຕ່າງປະເທດອີກແຫ່ງໜ່ຶງຂອງລາວ.

ອ່ານເພີ່ມເຕີມ...

ທູດລາວ ປະຈຳຫວຽດນາມ ອວຍພອນຄະນະພົວພັນ ຕ່າງປະເທດສູນກາງພັກກອມມູນິດຫວຽດນາມ

ທ່ານ  ແສງເພັດ  ຮຸ່ງບຸນຍວງ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ພ້ອມຄະນະໄດ້ໄປອວຍພອນປີໃໝ່ ຄະນະນຳ ຄະນະພົວພັນຕ່າງປະເທດສູນກາງພັກກອມມູນິດຫວຽດນາມ  ເນື່ອງໃນໂອ ກາດປີໃໝ່ຫວຽດນາມ  ເມື່ອທ້າຍອາທິດທີ່ຜ່ານມາ  ໃນໂອ ກາດດັ່ງກ່າວ   ທ່ານ  ແສງເພັດ ຮຸ່ງບຸນຍວງ  ໄດ້ກ່າວຄຳອວຍ ພອນອັນປະເສີດມາຍັງຄະນະນຳ ແລະ ພະນັກງານຄະນະພົວ ພັນຕ່າງປະເທດສູນກາງພັກ ກອມມູນິດຫວຽດນາມ ແລະ ໄດ້ຕາງໜ້າໃຫ້ພັກ-ລັດຝາກຄຳອວຍພອນຜ່ານຄະນະນຳ ຄະນະພົວພັນຕ່າງປະເທດສູນກາງພັກກອມມູນິດຫວຽດ ນາມໄປຍັງການນຳຂັ້ນສູງພັກ -ລັດຖະບານຫວຽດນາມເນື່ອງ ໃນໂອກາດປີໃໝ່ ຈົ່ງມີສຸຂະ ພາບແຂງແຮງ ແລະ ປະສົບຜົນສຳເລັດອັນຍິ່ງໃຫຍ່ທີ່ພັກ,  ລັດ ແລະ ປະຊາຊົນມອບໝາຍໃຫ້, ປີ 2019   ຜ່ານມາຫວຽດ ນາມຍາດໄດ້ຜົນສຳເລັດອັນຍິ່ງໃຫຍ່ຮອບດ້ານ ແລະ ເລິກເຊິ່ງ ສສ   ຫວຽດນາມ   ສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ,  ສັງຄົມມີຄວາມສະຫງົບ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເປັນກ້າວໆບົດບາດ ແລະ ອິດທິພົນຂອງສສ ຫວຽດນາມໄດ້ເຊີດຊູສູງເດັ່ນຂຶ້ນໃນເວທີພາກພື້ນ ແລະ ສາກົນ.

ທ່ານ ຫງວຽນ ຮູຍດັງ ຮອງ ຫົວໜ້າຄະນະພົວພັນຕ່າງ ປະເທດສູນກາງພັກໄດ້ສະແດງຄວາມຂອບໃຈຕໍ່ທ່ານ ແສງເພັດ  ຮຸ່ງບຸນຍວງ  ພ້ອມທັງຕີລາຄາສູງຕໍ່ຜົນສຳເລັດຂອງການຮ່ວມມືລະຫວ່າງ ລາວ-ຫວຽດນາມ, ຕະຫຼອດຮອດຜົນສຳເລັດຂອງຫວຽດນາມໃນປີຜ່ານມາ. ສະ ເພາະປີ 2020 ນີ້ ຫວຽດນາມຈະມີຫຼາຍເຫດການສຳຄັນເປັນຕົ້ນ ວັນເກີດປະທານ ໂຮ່ຈິມິນ ຄົບ ຮອບ 130 ປີ, ວັນສ້າງຕັ້ງພັກ ກອມມູນິດຫວຽດນາມ  ຄົບຮອບ 90 ປີ, ວັນສ້າງຕັ້ງ ສສ ຫວຽດ ນາມ ຄົບຮອບ 75 ປີ  ສຳລັບ ວຽກງານຕ່າງປະເທດກໍຈະໄດ້ເປັນປະທານອາຊຽນ, ປະທານ  AIPA 41 (ໄອປາ) ໃນການເປັນສະມາຊິກບໍ່ຖາວອນຂອງສະພາຄວາມໝັ້ນຄົງຂອງສະ ຫະປະຊາຊາດ. ນອກນັ້ນແມ່ນ ການກະກຽມໃຫ້ແກ່ກອງປະຊຸມໃຫຍ່  ຄັ້ງທີ 13 ຂອງພັກ.   ດັ່ງ ນັ້ນ,  ຈຶ່ງມີຄວາມຫວັງວ່າ ສອງຝ່າຍພວກເຮົາຄວນຈະສືບຕໍ່ມູນເຊື້ອການພົວພັນຮ່ວມມືຢ່າງແໜ້ນແຟ້ນ  ເພື່ອພ້ອມກັນປະຕິບັດໃຫ້ສຳເລັດໃນທຸກວຽກງານພິເສດແມ່ນການປະຕິບັດຂໍ້ຕົກລົງຂອງການນຳຂັ້ນສູງຂອງສອງປະເທດໃຫ້ມີປະສິດທິຜົນສູງ.

ໃນວັນດຽວກັນ, ທີ່ກະຊວງການຕ່າງປະເທດ ຫວຽດນາມ, ທ່ານ ແສງເພັດ ຮຸ່ງບຸນຍວງ ພ້ອມດ້ວຍຄະນະກໍໄດ້ໄປອວຍ ພອນປີໃໝ່ຄະນະນຳກະຊວງ ການຕ່າງປະເທດ ແຫ່ງ ສສ ຫວຽດ ນາມ.  ທ່ານ ຫງວຽນ ມິງ ວູ່ ຮອງລັດຖະມົນຕີກະຊວງການຕ່າງ ປະເທດໄດ້ສະແດງຄວາມຂອບ ອົກຂອບໃຈຕໍ່ທ່ານທູດລາວ ທີ່ມາອວຍພອນ  ເນື່ອງໃນໂອ ກາດປີໃໝ່ຫວຽດນາມ,  ທ່ານຍັງ ໄດ້ເນັ້ນຕື່ມວ່າ ປີ  2020 ຫວຽດ ນາມຈະມີຫຼາຍເຫດການທີ່ສຳ ຄັນທີ່ສອງຝ່າຍຈະຕ້ອງໄດ້ປະ ສານສົມທົບກັນຢ່າງແໜ້ນແຟ້ນ ເພື່ອກະກຽມໃຫ້ແກ່ການນຳຂັ້ນສູງມາເຄື່ອນໄຫວຢູ່ຫວຽດ ນາມ ໃນໄລຍະຫວຽດນາມເປັນ ປະທານອາຊຽນ  ແລະ ເປັນ ສະ ມາຊິກບໍ່ຖາວອນຂອງສະພາຄວາມໝັ້ນຄົງຂອງສະຫະປະ ຊາຊາດປີ 2020-2021.

Medialaos