ສູນກາງຊາວໜຸ່ມປະຊາຊົນປະຕິວັດລາວ ຈັດການແຂ່ງຂັນຕີດອກປີກໄກ່

ໃນວັນທີ 21 ມັງກອນ 2020 ສູນກາງຊາວໜຸ່ມ ປະຊາຊົນປະຕິວັດລາວ ຮ່ວມກັບ ບໍລິ ສັດວິກຕໍ ແລະ ສາມະຄົມນັກທຸລະກິດໜຸ່ມແຫ່ງຊາດລາວ, ເຊິ່ງມີຈໍານວນ 26 ທີມ. ໄດ້ຈັດຂະບວນການແຂ່ງຂັນ ກິລາຕີດອກປີກໄກ່ ຊິງຂັນເລຂາຄະນະບໍລິຫານງານພັກ ສູນກາງຊາວໜຸ່ມປະຊາຊົນປະ ຕິວັດລາວ ເພື່ອຂ່ຳນັບຮັບຕ້ອນ ກອງປະຊຸມໃຫຍ່ 3 ອົງການຈັດຕັ້ງມະຫາຊົນຂອງ ສຊປລ ແລະ ຕ້ອນຮັບວັນສຳຄັນຕ່າງໆ ຂອງພັກຂອງຊາດ ກໍຄື ວັນສ້າງຕັ້ງພັກປະຊາຊົນ ປະຕິວັດລາວຄົບຮອບ 65 ປີວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ ໃຫ້ເປັນຂະບວນຟົດຟື້ນມີບັນຍາກາດ ແລະ ຄວາມສາມັກຄີກັບ ຊາວໜຸ່ມແຕ່ລະກະຊວງອົງການນະຄອນ ຫລວງ  ແລະ ພາກສ່ວນຕ່າງໆ.

ໃນພິທີເປີດງານດັ່ງກ່າວ, ໂດຍມີ ທ່ານ ນາງ ວິລະວອນ ພັນທະວົງ ຮອງເລຂາຄະນະບໍລິ ຫານງານ ສູນກາງຊາວໜຸ່ມ ປະຊາຊົນປະຕິວັດລາວມີບັນດາຜູ້ຕາງໜ້າ ຄະນະບໍລິຫານງານ ຊາວໜຸ່ມແຕ່ລະກະຊວງອົງການນະຄອນຫລວງ, ພ້ອມດ້ວຍສະມາຊິກ ແລະ ນັກກິລາ ເຂົ້າຮ່ວມ.

 

Medialaos

ຮອງລັດຖະມົນຕີ ກະຊວງປ້ອງກັນປະເທດ ຢ້ຽມຢາມສູນພັດທະນາເສຍອົງຄະ 489

ໃນຕອນເຊົ້າວັນທີ 18 ມັງກອນ 2020, ທ່ານ ພົນຕີ ພູວົງ ວົງພົມ ຮອງລັດຖະມົນຕີກະຊວງປ້ອງກັນປະເທດ ພ້ອມດ້ວຍຄະນະນຳກະຊວງ ປ້ອງກັນປະເທດ ໄດ້ລົງພົບປະ ແລະ ຢ້ຽມຢາມ ສູນພັດທະນາເສຍອົງຄະ 489 ທີ່ບ້ານຂຸດສາມບາດ ເມືອງໄຊທານີນະຄອນຫລວງວຽງຈັນ ເນື່ອງໃນໂອກາດ ວັນສ້າງຕັ້ງກອງທັບຄົບຮອບ 71 ປີ.

ໃນໂອກາດດັ່ງກ່າວທ່ານ ສາຍແກ້ວ ຈໍຈະເລີນພົນ ຫົວໜ້າສູນພັດທະນາຜູ້ເສຍອົງຄະ 489 ໄດ້ລາຍງານສະພາບການ ແລະ ການຈັດຕັ້ງປະຕິບັດວຽກງານ ຜ່ານມາ, ໂດຍທ່ານກ່າວວ່າ: ສູນພັດ ທະນາຜູ້ເສຍອົງຄະ 489 ໄດ້ຍົກຍ້າຍຈາກຖໍ້ານໍ້ານາແທນ ເມືອງວຽງໄຊ ແຂວງຫົວພັນ ມາຢູ່ບ້ານຂຸດສາມບາດ ເມືອງໄຊທານີ ນະຄອນຫລວງວຽງຈັນ ໃນເດືອນເມສາ 1989. ສູນດັ່ງກ່າວ, ເປັນບ່ອນເຕົ້າໂຮມເອົາອະດິດນາຍ ແລະ ພົນທະຫານທີ່ເສຍອົງຄະຍ້ອນການສູ້ຮົບ ແລະ ຮັບໃຊ້ການສູ້ຮົບ ນັບແຕ່ປະເພດ 1-4, ເຂົ້າມາລວມຕົວກັນເປັນຊຸມຊົນໜຶ່ງ ໂດຍມີພະນັກງານ-ລັດຖະກອນ ເຮັດວຽກຄຸ້ມຄອງບໍລິຫານ ຮັບໃຊ້ຕາມອົງການບໍລິຫານລັດ. ປັດຈຸບັນສູນດັ່ງກ່າວ, ມີ 248 ຄອບຄົວໃນນີ້ຄອບ ຄົວເສຍອົງຄະ ມີ 189 ຄອບຄົວມີພົນລະເມືອງທັງໝົດ 977 ຄົນ, ຍິງ 509 ຄົນຈຳນວນຄົນຂອງຄອບຄົວ ພະນັກງານ ເສຍອົງຄະ-ບຳນານ ມີ 627 ຄົນ, ຍິງ 331 ຄົນ. ສຳລັບຄອບຄົວຂອງປະ ຊາຊົນ ມີ 212 ຄົນ, ຍິງ 103 ຄົນ.

ໂອກາດດຽວກັນທ່ານ ພົນຕີ ພູວົງ ໄດ້ເນັ້ນບັນດາພະນັກງານ ຜູ້ເສຍອົງຄະ ຈົ່ງສືບຕໍ່ປະຕິ ບັດປະພຶດຕົນ ໃຫ້ເປັນແບບຢ່າງຮອບດ້ານສຶກສາອົບຮົມລູກເຕົ້າ ແລະ ຄົນລຸ້ນໃໝ່ໃຫ້ມີຄວາມກ້າວໜ້າ ເພື່ອກາຍເປັນລຸ້ນສືບທອດປະຕິວັດ ສ້າງໃຫ້ເຂົາມີນ້ຳໃຈຮັກຊາດ ແລະ ເສຍສະຫລະອັນສູງສົ່ງໃຫ້ສືບຕໍ່ສູ້ຊົນເຮັດ ສຸດຄວາມສາມາດ ໃນການສ້າງເສດຖະກິດຄອບຄົວ ຕາມແນວທາງນະໂຍບາຍຂອງພັກ-ລັດວາງອອກ ແລະ ຖືກຕ້ອງຕາມລະບຽບກົດໝາຍ ເພື່ອແກ້ໄຂຊີວິດການເປັນຢູ່ ໃຫ້ຫລຸດພົ້ນ ອອກຈາກ ຄວາມທຸກຍາກເທື່ອລະກ້າວ. ພ້ອມນີ້ກໍໃຫ້ສືບຕໍ່ຮັກສາຄຸນສົມບັດທັດສະນະປະຕິວັດ ປະ ຕິບັດກົດໝາຍຂອງ ບ້ານເມືອງໃຫ້ເຂັ້ມງວດ ສ້າງຄວາມສາມັກຄີ ພາຍໃນ ແລະ ສາມັກຄີກັບປະຊາຊົນອ້ອມຂ້າງໃຫ້ດີ ເປັນແບບຢ່າງໃນການດຳລົງຊີວິດ ອັນປອດໃສຂາວສະອາດ ແລະ ກ້າວໜ້າ, ເອົາໃຈ ໃສ່ເຕົ້າໂຮມຄວາມ ສາມັກຄີເປັນ ຈິດໜຶ່ງໃຈດຽວ ຈິງໃຈຊ່ວຍເຫລືອເຊິ່ງກັນ ແລະ ກັນ ບໍ່ວ່າວັດຖຸກໍຄືຈິດໃຈ.

Medialaos

 

ຄູນລານ ຫລື ກອງເຂົ້າ ມີຄວາມໝາຍຫລາຍກວ່າຄຳວ່າບຸນ

ຢ້ອນຄືນຫລັງເຖິງຄວາມໝາຍຂອງບຸນຄູນລານເຂົ້າ ຫລື ບຸນກອງເຂົ້າ ຊຶ່ງຄຳວ່າ " ລານ " ແປວ່າ ເດີ່ນ ຫລື ບ່ອນທີ່ຮາບພຽງດີ ທີ່ເພິ່ນເອົາເຂົ້າມາກອງໄວ້.ບຸນນີ້ແມ່ນບຸນໜຶ່ງທີ່ສຳຄັນໃນສະໄໝບູຮານ ແລະກ່ອນຈະເອົາເຂົ້າຂຶ້ນເລົ້າຂຶ້ນເຍຍໄດ້ເພິ່ນຕ້ອງເຮັດບຸນໃຫ້ເຂົ້າກ່ອນ ຊຶ່ງການເຮັດແບບນີ້ກໍ່ເພື່ອເປັນສິລິມຸງຄຸນມັ່ງມູນພູນສຸກຕໍ່ໄປ.ຄວາມຈິງແລ້ວປະຊາຊົນລາວສະໄໝບູຮານນັ້ນ,ເພິ່ນນິຍົມເຮັດບຸນນີ້ເນື່ອງຈາກເຂົ້າມີປະໂຫຍດເໜືອກວ່າສິ່ງໃດ;ຖ້າໄດ້ເຮັດບຸນຂວັນເຂົ້າແລ້ວ,ຄົນລາວບູຮານເຊື່ອວ່າ ເປັນການກິນທີ່ບໍ່ໝົດ ຈົກບໍ່ລົງ ຈົນມີຄຳວ່າເຂົ້າມີສາລີພ້ອມ ຈອມດອຍກໍ່ພໍຢູ່ ເຂົ້າບໍ່ມີ ສາລີບໍ່ພ້ອມຈອມແກ້ວຢູ່ບໍ່ເປັນແລະ ການເຮັດບຸນຄູນລານເຂົ້າ ຫລື ບຸນຂວັນເຂົ້ານີ້,ມີເລື່ອງເລົ່າກ່ຽວພັນກັບສາສະໜາສືບຕໍ່ກັນມາເຖິງທຸກມື້ນີ້ໂດຍເລື່ອງມາຈາກສອງອ້າຍນ້ອງທີ່ເຮັດນານຳກັນນັ້ນເອງ.ຂະນະທີ່ອີກຄວາມຈິງໜຶ່ງຄືເດືອນຍີ່ເປັນເດືອນວ່າງທາງກິດຈະກຳຂອງພະສົງ.ສະນັ້ນປະຊາຊົນລາວບູຮານຈຶ່ງຖືເດືອນນີ້ເປັນເດືອນຫາຫລົວຟືນມາໄວ້ເຕັມຖຸນເຕັມລ່າງເພື່ອກຽມເຮັດບຸນເຂົ້າຈີ່ໃນເດືອນ ຈົນມີຄໍາວ່າເດືອນອ້າຍເຮັດບຸນເຂົ້າກໍາ ເດືອນຍີ່ຫາຟືນມາໄວ້ "ນັ້ນເອງ.

ທີ່ວ່າມີຄວາມໝາຍຫລາຍກວ່າຄໍາວ່າບຸນດັ່ງຫົວບົດທີ່ຕັ້ງຂຶ້ນນີ້ເນື່ອງຈາກຜູ້ຂຽນເອງໄດ້ດັ້ນດົ້ນໄປເຖິງທີ່ ຊຶ່ງຄວາມຈິງແລ້ວພາຍໃນບໍລິເວນບຸນກໍ່ບໍ່ຕ່າງຈາກບຸນອື່ນໆທີ່ຈັດຕັ້ງກັນຂຶ້ນມາໂດຍສະເພາະມີການຂາຍສິນຄ້າ ເຂົ້າຫລາມປີ້ງໄກ່ ຜົນລະປູກນາໆຊະນິດ ໂດຍລວມແລ້ວມັນກໍ່ເປັນເລື່ອງທຳມະດາ,ແຕ່ທີ່ບໍ່ທຳມະດາ ຫລື ອາດຈະແຕກຕ່າງຈາກບ່ອນອື່ນໆທີ່ຈັດບຸນກອງເຂົ້າ ເຊັ່ນຢູ່ເມືອງພຽງແຂວງໄຊຍະບູລີ ຫລື ໃນມໍ່ໆນີ້ຄື 21-23 ມັງກອນທີ່ຈັດຂຶ້ນຢູ່ເມືອງເຟືອງແຂວງວຽງຈັນກໍ່ເປັນໄປໄດ້.ຢ້ອນໄປຫາຄຳວ່າບໍ່ທຳມະດານັ້ນກໍ່ຄືຜູ້ຂຽນເອງບໍ່ນຶກບໍ່ຝັນວ່າຈະເຫັນພາບແບບນີ້ໂດຍພາຍຫລັງຍ່າງອ້ອມກອງເຂົ້າໃຫຍ່ 1 ກອງ ແລະ ກອງເຂົ້ານ້ອຍທີ່ຫຸ້ມລ້ອມ 5-6 ກອງ ໂດຍສະເພາະຢູ່ກອງເຂົ້າໃຫຍ່ ເພາະຢູ່ພາຍໃນມີເຄື່ອງມືການຜະລິດຫລາຍຢ່າງຫລາຍແນວ ຊຶ່ງເກືອບວ່າບໍ່ຄ່ອຍເຫັນແລ້ວລະບໍ່ວ່າຈະເປັນແປ້ນ ໄມ້ກັງ ຫລື ໄມ້ດ່ຽງຕີ ຫລື ຟາດເຂົ້າ ຄາດໄມ້ ຫລື ແມ່ນແຕ່ເຄື່ອງມືຫາປາບໍ່ວ່າຈະເປັນສະ ຫວີງ ເຂິງ ສຸ່ມ ຊຶ່ງລູກໆຫລານອາດຈະເຫັນແຕ່ອາດບໍ່ຮູ້ຊື່ກໍ່ມີ ລວມທັງກີ່ຕໍ່າຫູກ...ຈຸດໜຶ່ງຂະນະເລາະເບິ່ງ ສິ່ງທີ່ຕຳຕາຕຳໃຈຈົນນໍ້າຕາໄຫລຊຶມເບົ້າກໍ່ຄືພາບຜູ້ປົກຄອງແນະນຳຊື່ເຄື່ອງມືການຜະລິດ ເຄື່ອງມືຫາກິນບູຮານໃຫ້ລູກອາຍຸ 5-6 ປີທັງບອກແກ່ຄາດຫລິ້ນ,ເດັກນ້ອຍຜູ້ນີ້ທັງຫົວທັງດີໃຈບາງເທື່ອກໍ່ບໍ່ພໍໃຈເມື່ອຜູ້ປົກຄອງ ບອກວ່າພໍແລ້ວ ແລະ ອີກຈຸດໜຶ່ງຜູ້ປົກຄອງແນະນຳລູກເລື່ອງສິ້ນທີ່ແມ່ນຸ່ງນີ້ກໍ່ມາຈາກກີ່ນີ້ທັງບອກລູກໄປນັ່ງກີ່ຈັບຫັ້ນບາຍນີ້,ເດັກຍິງຊາຍອາຍຸ 12-13 ປີ ກໍ່ສົນໃຈເວົ້າໂສເຫລ້ກັນຜູ້ຮູ້ແດ່ກໍ່ບອກຖືກ ຜູ້ບໍ່ຮູ້ແດ່ກໍ່ໄດ້ແຕ່ແກວ່ງຫົວ...ນີ້ລະຄືຈຸດທີ່ຜູ້ຂຽນຍົກຂຶ້ນມາເພື່ອສະທ້ອນໃຫ້ເຫັນວ່າ ເຖິງວ່າຍຸກນີ້ເປັນຍຸກສະໄໝຍຸກແຫ່ງເຕັກໂນໂລຊີກໍ່ດີ,ແຕ່ຖ້າວ່າພໍ່ແມ່ຜູ້ປົກຄອງທັງຫລາຍປູກຝັງຄວາມເປັນຄົນລາວ ວິຖີລາວຄວາມກະຕັນຍູກະຕະເວທີບັນພະບຸລຸດ ຫລື ກະຕັກຍູຮູ້ຄຸນເຂົ້າປາອາຫານ ເຄື່ອງມືການຜະລິດດັ້ງເດີມບູຮານນີ້ຄົງດີກວ່າບໍ່ບອກບໍ່ພາເຂົາໄປທ່ຽວບຸນທີ່ສະແດງເຖິງຄວາມຮູ້ຄຸນຄ່າຂອງເຂົ້າທີ່ມີປະໂຫຍດເໜືອກວ່າສິ່ງໃດ.

 

ເອົາເປັນວ່າບຸນກອງເຂົ້າຢູ່ເມືອງສັງທອງ ນະຄອນຫລວງວຽງຈັນປີນີ້ເພິ່ນຈະປິດໃນວັນທີ 23 ມັງກອນ ຊຶ່ງຖືວ່າຍັງມີເວລາອີກ 2-3 ມື້ ຜູ້ປົກຄອງທັງຫລາຍລວມທັງຜູ້ອຳນວຍການໂຮງຮຽນສົມ ຄວນພາລູກຫລານ ແລະ ນັກຮຽນ ໄປທັດສະນະສຶກສາຮຽນຮູ້ວິຖີຊີວິດຂອງຊາວນາ ຫລື ພູມປັນຍາຂອງຄົນລາວບູຮານພວກເຮົາວ່າຈະເປັນແນວໃດ?ຮັບຮອງວ່າໄດ້ທັງຄວາມຮູ້ໄດ້ທັງຄວາມມ່ວນຄວາມຊື່ນທັງໄດ້ຊື້ສິນຄ້າ ອາຫານການກິນ ຜົນຜະລິດກະສິກຳປອດສານເຄມີຕິດໄມ້ຕິດມືກັບເຮືອນກັບຊານ.

Medialaos

ຮອງປະທານ ສພຊ ເຂົ້າຮ່ວມກອງປະຊຸມສະໄໝສາມັນ ເທື່ອທີ 8 ຂອງ ສພຂ ສະຫວັນນະເຂດຊຸດທີ I

ໃນວັນທີ 20-25 ມັງກອນ 2020 ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ (ສພຊ), ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມ ສະໄໝສາມັນເທື່ອທີ 8 ຂອງສະພາປະຊາຊົນ ແຂວງສະຫວັນນະເຂດ (ສພຂ) ຊຸດທີ ທີ່ຫໍວັດທະນະທໍາໄກສອນພົມວິຫານ, ໂດຍການເປັນປະທານຂອງ ທ່ານ ຄໍາເຜີຍ ຜັນທະຈອນ ປະທານ ສພຂ ສະຫວັນນະເຂດ, ມີບັນດາທ່ານສະມາຊິກ ສະພາແຫ່ງຊາດ ປະຈໍາເຂດເລືອກຕັ້ງທີ 13 ແລະ ສະມາຊິກສະພາປະຊາຊົນ ແຂວງ ສະຫວັນນະເຂດເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດບັນດາທ່ານການນໍາພັກ-ລັດ ແຂວງ ແລະ ເມືອງອະດີດການນໍາ ແລະ ອະດີດສະມາຊິກ ສະພາແຫ່ງຊາດ ປະຈໍາເຂດເລືອກຕັ້ງທີ່ 13, ບັນດາແຂກທີ່ຖືກ ເຊີນຈາກພາກສ່ວນຕ່າງໆ ເຂົ້າຮ່ວມ.

ພິທີໄຂກອງປະຊຸມ ທ່ານ ຄໍາເຜີຍ ຜັນທະຈອນ ໄດ້ກ່າວວ່າກອງປະຊຸມສະໄໝສາມັນ ເທື່ອທີ 8 ຂອງ ສພຂ ແຂວງສະຫວັນນະເຂດ ຊຸດທີ ຈະໄດ້ພິຈາລະນາ ແລະ ຕົກລົງບັນຫາສໍາຄັນຂອງແຂວງ ດັ່ງນີ້: ພິຈາລະນາ ແລະ ຮັບຮອງເອົາການລາຍງານ ຂອງທ່ານເຈົ້າແຂວງ ສະຫວັນນະເຂດ ກ່ຽວກັບ ສະ ພາບການພັດທະນາ ເສດຖະກິດ-ສັງຄົມ ແລະ ແຜນງົບປະມານ ປະຈຳປີ 2019 ແລະ ທິດທາງແຜນພັດ ທະນາເສດຖະກິດ-ສັງຄົມ ປະຈຳ ປີ 2020; ຮັບຟັງການລາຍງານ ຈາກທ່ານຫົວໜ້າພະແນກແຜນການ ແລະ ການລົງທືນແຂວງ ກ່ຽວກັບການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ຂອງແຂວງ ປະຈໍາ ປີ 2019 ແລະ ທິດທາງແຜນການປະຈຳປີ 2020; ຮັບຟັງການລາຍງານ ຈາກທ່ານຮອງເຈົ້າແຂວງ ຜູ້ຊີ້ນໍາຂົງເຂດເສດຖະກິດຂອງແຂວງ ກ່ຽວກັບການຈັດຕັ້ງປະຕິບັດ ແຜນງົບປະມານແຫ່ງລັດ ຂັ້ນແຂວງ ປະຈໍາ ປີ 2019 ແລະ ທິດທາງແຜນການ ປະຈຳປີ 2020; ພິຈາລະນາ ແລະ ຮັບຮອງເອົາບົດສະຫລຸບ ການເຄື່ອນໄຫວວຽກງານ ຂອງອົງການກວດສອບແຫ່ງລັດ ປະຈຳພາກກາງ ສໍາລັບປີ 2019, ທິດທາງແຜນການເຄື່ອນໄຫວປະຈຳປີ 2020 ແລະ ບົດລາຍງານຜົນການ ກວດສອບບົດສະຫລຸບຂາດຕົວ ການຈັດຕັ້ງປະຕິບັດ ແຜນງົບປະມານໃນປີ 2018 ຂອງແຂວງສະຫວັນນະເຂດ; ຮັບຟັງການລາຍງານ ຈາກທ່ານປະທານອົງການກວດກາລັດແຂວງ ກ່ຽວກັບຜົນການກວດກາ ການແກ້ໄຂຕາມຜົນການກວດສອບ; ພິຈາລະນາ ແລະ ຮັບຮອງເອົາບົດສະຫລຸບ ການເຄື່ອນໄຫວຈັດຕັ້ງປະຕິບັດ ວຽກງານ ປະຈຳປີ 2019 ແລະ ທິດທາງແຜນການເຄື່ອນໄຫວວຽກງານ ປະຈຳປີ 2020 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ; ພິຈາລະນາ ແລະ ຮັບຮອງບົດສະຫລຸບການເຄື່ອນໄຫວວຽກງານ ປະຈໍາປີ 2019 ແລະ ທິດທາງແຜນການເຄື່ອນໄຫວປະຈໍາປີ 2020 ຂອງສະພາປະຊາຊົນແຂວງ ຊຸດທີ Iພິຈາລະນາ ແລະ ຮັບຮອງເອົາການ ປັບປຸງບຸກຄະລາກອນ ຂອງສະພາປະຊາຊົນແຂວງ, ຂອງອົງການປົກຄອງແຂວງ ແລະ ປະເມີນຜົນການປະຕິບັດໜ້າທີ່ ຂອງບຸກຄະລາກອນ ດໍາລົງຕໍາແໜ່ງ ທີ່ສະພາປະຊາຊົນແຂວງເລືອກຕັ້ງ ແລະ ຮັບຮອງເອົາການແຕ່ງຕັ້ງ ແລະ ພິຈາລະນາຮ່າງຂໍ້ຕົກລົງ ຂອງທ່ານເຈົ້າແຂວງສະຫວັນນະເຂດ ຈໍານວນ 03 ສະບັບ ຄື: ຂໍ້ຕົກລົງ ວ່າດ້ວຍການຄຸ້ມຄອງ ການບໍລິການຮ້ານອາ ຫານ, ຮ້ານກິນດື່ມ, ຮ້ານບັນເທິງພາຍໃນແຂວງ, ຂໍ້ຕົກລົງ ວ່າດ້ວຍການຄຸ້ມຄອງ ທຸລະກິດຂະໜາດນ້ອຍ,ຂະໜາດກາງ ແລະ ຂໍ້ຕົກລົງວ່າດ້ວຍການ ຄຸ້ມຄອງການຂຸດຄົ້ນດິນດໍາ-ດິນແດງ ພາຍໃນແຂວງ.

      ນອກຈາກນັ້ນກອງປະຊຸມຈະໄດ້ຮັບຟັງ ການປະກອບຄໍາເຫັນ ຈາກອົງການແນວລາວສ້າງຊາດແຂວງ ຕໍ່ກັບການເຄື່ອນໄຫວວຽກງານ ຂອງສະພາປະຊາຊົນແຂວງໃນ 1 ປີທີ່ຜ່ານມາ, ຮັບຟັງການຊີ້ແຈງຈາກ ທ່ານເຈົ້າແຂວງຮອງເຈົ້າແຂວງ, ບັນດາທ່ານຫົວໜ້າພະແນກ ການຈໍານວນໜຶ່ງ ຂອງອົງການປົກຄອງແຂວງ ແລະ ຈະໄດ້ຮັບຟັງການຊີ້ແຈງບັນຫາຕ່າງໆປະເດັນຕ່າງໆ ທີ່ບັນດາທ່ານສະມາຊິກສະ ພາແຫ່ງຊາດສະມາຊິກສະພາປະຊາຊົນແຂວງ ໃຫ້ຄວາມສົນໃຈ.

Medialaos

ຮອງ​ປະທານ​ປະເທດ​ແຫ່ງ​ສປປ​ລາວ​ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບອຳ​ລາ ທູດອາເມຣິກາ

ທ່ານ ພັນຄຳ ວິພາວັນ ຮອງປະທານປະເທດແຫ່ງສປປລາວໄດ້ຕ້ອນຮັບການເຂົ້າຢ້ຽມຂໍ່ານັບອຳລາຂອງທ່ານ ນາງ ຣີນາ ບິດເຕີ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສ.ອາເມຣິກາປະຈຳລາວໃນໂອກາດທີ່ທ່ານໄດ້ສຳເລັດໜ້າທີ່ທາງການທູດຢູ່ສປປລາວ (ນັບແຕ່ເດືອນ 10/2016 ເຖິງ ຕົ້ນປີ 2020) ໃນວັນທີ 17 ມັງກອນ, ທີ່ທຳນຽບປະທານປະເທດ.

ໃນໂອກາດດັ່ງກ່າວນີ້ ທ່ານຮອງປະທານປະເທດ ກໍໄດ້ສະແດງຄວາມຊົມເຊີຍຕໍ່ທ່ານທູດທີ່ີໄດ້ມີການ ເຄື່ອນໄຫວຢ່າງຫ້າວຫັນໃນໄລຍະການປະຕິບັດໜ້າທີ່ຢູ່ສປປ ລາວ ເພື່ອຊຸກຍູ້ ແລະ ສົ່ງເສີມ  ການພົວພັນ ຮ່ວມມືສອງຝ່າຍໃນດ້ານຕ່າງໆບົນພື້ນຖານແຫ່ງການເປັນຄູ່ຮ່ວມມືແບບກວມລວມລາວ-ອາເມຣິກາ, ເປັນຕົ້ນແມ່ນການແລກປ່ຽນການຢ້ຽມຢາມລະຫວ່າງສປປລາວ ແລະ ອາເມຣິກາໃນຫຼາຍລະດັບ, ການຈັດ ຕັ້ງປະຕິບັດບັນດາໂຄງການຮ່ວມມືສອງຝ່າຍໃນຂອບວຽກງານການເກັບກູ້ລະເບີດບໍ່ທັນແຕກ,ວຽກງານ ສາທາລະນະສຸກ ແລະ ໂພຊະນາການ, ການສຶກສາ, ເສດຖະກິດ, ການບັງຄັບໃຊ້ກົດໝາຍ ແລະ ອື່ນໆອັນເປັນການປະກອບສ່ວນເຮັດໃຫ້ການພົວພັນຮ່ວມມືສອງຝ່າຍມີສະພາບເປັນປົກກະຕິ ແລະ ຍັງມີການຂະຫຍາຍຕົວຢ່າງຕໍ່ເນື່ອງ.

ນອກຈາກນີ້ທ່ານທູດກໍໄດ້ສະແດງຄວາມຮູ້ບຸນຄຸນ ແລະ ຄວາມຂອບອົກຂອບ ໃຈຕໍ່ລັດຖະບານ ແລະ ປະ ຊາຊົນລາວທີ່ໄດ້ໃຫ້ການສະ ໜັບສະໜູນ ແລະ ຊ່ວຍເຫຼືອອັນຈຳເປັນຕະຫຼອດໄລຍະການປະຕິ ບັດໜ້າທີ່ຢູ່ສປປລາວເປັນຢ່າງດີໄດ້ຊ່ວຍໃຫ້ຂ້າພະເຈົ້າສຳເລັດໜ້າທີ່ທາງການທູດຢູ່ສປປລາວໃນຄັ້ງນີ້ ແລະ ຫວັງຢ່າງຍິ່ງວ່າການພົວພັນມິດຕະພາບ ແລະ ການຮ່ວມມືລາວ-ອາເມຣິກາ ຈະໄດ້ຮັບການເພີ່ມທະວີ ແລະ ຈະເລີນກ້າວໜ້າໃນອະນາຄົດ.

Medialaos

ສະຫຼອງວັນສ້າງຕັ້ງ ກອງທັບປະຊາຊົນລາວ ຄົບຮອບ 71 ປີ ແລະ ວັນສ້າງຕັ້ງເຫຼົ່າຮົບສືບຂ່າວກອງທັບ ຄົບຮອບ 65 ປີ

ພີທີສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ (20 ມັງກອນ 1949) ແລະ ວັນສ້າງຕັ້ງເຫຼົ່າຮົບສືບຂ່າວກອງທັບປະຊາຊົນລາວ ຄົບຮອບ 65 ປີ (25 ມັງກອນ 1954) ໄດ້ຈັດຂຶ້ນໃນວັນທີ 17 ມັງກອນ 2020 ທີ່ສະໜາມຝຶກແອບ ວິທະຍາຄານກົມມະດຳ.

ໃຫ້ເຂົ້າຮ່ວມໂດຍທ່ານ ທອງລຸນ ສີສຸລິດ ນາຍົກລັດຖະມົນຕີ, ມີທ່ານພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ມີບັນດາການນຳ ພັກ-ລັດ, ພ້ອມດ້ວຍ ພະນັກງານນາຍທະຫານ ແລະ ພົນທະຫານເຂົ້າຮ່ວມ.

ການສະແດງໃນຄັ້ງນີ້ ເພື່ອສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ແລະ ວັນສ້າງຕັ້ງເຫຼົ່າຮົບສືບຂ່າວ, ທັງເປັນການຮັບປະກັນໃຫ້ກຳລັງກົມກອງເຫຼົ່າຮົບສືບຂ່າວ ໄດ້ຮັບການອົບຮົມຫັດແບບຢ່າງຕໍ່ເນື່ອງ, ປະຕິບັດລະບຽບພາກສະໜາມ, ມີຄວາມຊຳນິຊຳນານທາງດ້ານສິລະປະຍຸດ, ຍຸດທະວິທີສືບຂ່າວ, ເຕັກນິກການນຳໃຊ້ອາວຸດ-ກະສູນ, ອຸປະກອນປະກອບສະເພາະສືບຂ່າວ ແລະ ຮູບແບບການປະຕິບັດໜ້າທີ່ສູ້ຮົບປະສານກັບເຫຼົ່າຮົບທະຫານອາກາດ ກຽມພ້ອມ ປະຕິບັດໜ້າທີ່ແກ້ໄຂສະພາບການຕ່າງໆ ຕາມຄຳສັ່ງຂອງຂັ້ນເທິງ ໃນສະເພາະໜ້າ ແລະ ຍາວນານ.

ລາຍການທີ່ນຳມາສະແດງໃນຄັ້ງນີ້ ປະກອບມີ: ການສະແດງສິລະປະ, ການສະແດງມວນສືບຂ່າວ (ມວຍຫັດກາຍຊາຍ, ມວຍສູ້ຮົບ ຊາບ-ຍິງ, ສືບຂ່າວຂ້າມຜ່ານສິ່ງກີດຂວາງ ແລະ ໝອບສືບຂ່າວກຳລັງພາຍໃນ), ການກະໂດດຈ້ອງສະແດງກຳລັງ, ການຍິງເປີດປ້າຍຄຳຂັວນ, ການປະຕິບັດໜ້າທີ່ຕີ-ຈັບຜູ້ບັນຊາການແກນນຳກຸ່ມຊຸມນຸມປະທ້ວງ, ການບຸກຈັບຜູ້ບັນຊາແກນນຳ-ກອບກູ້ຊ່ວຍຕົວປະກັນ, ການໂດດຈ້ອງລົງແນວຫຼັງປິດລັບບັງເອີນຫຼອນຕີທຳຂຸມປຶນໃຫຍ່ຂອງສັດຕູ, ການບິນສະແດງຂອງຍົນສູ້ຮົບ ແລະ ລາຍການສະແດງອື່ນໆອີກ.

ນອກຈາກນີ້, ໄດ້ໃຫ້ກຽດຮັບຟັງຄຳໂອ້ລົມຈາກທ່ານ ນາຍົກລັດຖະມົນຕີ ແຫ່ງ ສປປ ລາວ ຕໍ່ກັບວຽກງານປ້ອງກັນຊາດ, ພ້ອມນີ້ທ່ານນາຍົກລັດຖະມົນຕີ ກໍໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານ 65 ປີ ຂອງວຽກງານເຫຼົ່າຮົບສືບຂ່າວ. ພ້ອມທັງ ອວຍພອນໃຫ້ 71 ປີ ຂອງກອງທັບປະຊາຊົນລາວ ແລະ 65 ປີ ຂອງເຫຼົ່າຮົບສືບຂ່າວ ຈົ່ງປະສົບຜົນສຳເລັດໃນໜ້າທີ່ ທີ່ພັກ-ລັດ ມອບໝາຍໃຫ້ຢ່າງໃຫຍ່ຫຼວງ.

Medialaos

ການສະແດງກຳລັງ ສະຫລອງວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ ແລະ ວັນສ້າງຕັ້ງ ເຫລົ່າຮົບສືບຂ່າວ 65 ປີ

ການສະແດງກຳລັງ ພາຍໃຕ້ລະຫັດ ຄົມໃນຟັກ-01 2020 ຂອງເຫລົ່າຮົບສືບຂ່າວ ກອງທັບປະຊາຊົນລາວ ໃນໂອກາດສະເຫລີມສະຫລອງ ວັນສ້າງຕັ້ງກອງທັບ ປະຊາຊົນລາວ ຄົບຮອບ 71 ປີ (20 ມັງກອນ 1949) ແລະ ວັນສ້າງຕັ້ງເຫລົ່າຮົບສືບຂ່າວ ກອງທັບປະຊາຊົນລາວ ຄົບຮອບ 65 ປີ (25 ທັນວາ 1954) ໄດ້ຈັດຂຶ້ນໃນວັນທີ 17 ມັງກອນ 2020 ທີ່ສະໜາມຝຶກແອບ ວິທະຍາຄານກົມມະດຳ. ໃຫ້ກຽດເຂົ້າຮ່ວມການສະແດງດັ່ງກ່າວ, ໂດຍ ທ່ານ ທອງລຸນ ສີສຸລິດ ນາຍົກລັດຖະມົນຕີ, ພົນເອກ ຈັນສະໝອນ ຈັນຍາລາດ ລັດຖະມົນຕີ ກະຊວງປ້ອງກັນປະເທດ, ມີບັນດາການນຳພັກ-ລັດ, ກະຊວງປ້ອງກັນປະເທດ, ກະຊວງປ້ອງກັນ ຄວາມສະຫງົບ, ພ້ອມດ້ວຍ ນາຍ ແລະ ພົນທະຫານ.

ໂອກາດນີ້, ພັທ ສີເພັງ ສຸລະເດດ ຫົວໜ້າຫ້ອງເສນາທິການ ກົມ 213 ຜູ້ບັນຊາພາກສະໜາມ ກ່າວວ່າ: ຈຸດປະສົງຂອງການສະແດງໃນຄັ້ງນີ້, ແມ່ນເພື່ອສະເຫລີມ ສະຫລອງ ວັນສ້າງຕັ້ງກອງທັບປະຊາ ຊົນລາວ ແລະ ວັນສ້າງຕັ້ງເຫລົ່າຮົບສືບຂ່າວ, ທັງເປັນການຮັບປະກັນ ໃຫ້ກຳລັງກົມກອງເຫລົ່າຮົບສືບຂ່າວ ໄດ້ຮັບການອົບຮົມຫັດ ແອບຢ່າງຕໍ່ເນື່ອງ, ປະຕິບັດລະບຽບພາກສະໜາມ, ມີຄວາມຊຳນິຊຳນານ ທາງດ້ານສິລະປະຍຸດ, ຍຸດທະວິທີສືບຂ່າວ, ເຕັກນິກການນຳໃຊ້ອາວຸດ-ກະສູນ, ອຸປະກອນປະກອບ ສະເພາະສືບຂ່າວ ແລະ ຮູບແບບການປະຕິບັດໜ້າທີ່ສູ້ຮົບ ປະສານກັບເຫລົ່າທະຫານອາກາດ ກຽມພ້ອມປະຕິບັດໜ້າທີ່ແກ້ໄຂ ສະພາບການຕ່າງໆ ຕາມຄຳສັ່ງຂອງຂັ້ນເທິງ ໃນສະເພາະໜ້າ ແລະ ຍາວນານ. ໃນຫລາຍປີທີ່ຜ່ານມາ, ກຳລັງກົມກອງເຫລົ່າຮົບສືບຂ່າວ ໄດ້ຈັດຕັ້ງອົບຮົມ-ຫັດແອັບ ຕາມຄຳສັ່ງ ອົບຮົມ-ຫັດແອບປະຈຳປີ ຂອງກົມອົບຮົມກົມໃຫຍ່ ການເມືອງກອງທັບຢ່າງຕໍ່ເນື່ອງ ໂດຍໄດ້ສຸມໃສ່ອົບຮົມ-ຫັດ ແອບການທະຫານ ແລະ ການບັນຊາ, ໃນນີ້ໄດ້ສຸມໃສ່ອົບ ຮົມ-ຫັດແອບສິລະປະຍຸດ ແລະ ຍຸດທະວິທີສືບຂ່າວເປັນຈຸດໜັກ.

 

ການສະແດງໃນຄັ້ງນີ້ປະກອນ ມີການສະແດງສິລະປະ, ການສະແດງມວຍສືບຂ່າວ (ມວຍຫັດ ກາຍຊາຍ, ມວຍສູ້ຮົບຊາຍ-ຍິງ, ສືບຂ່າວຂ້າມຜ່ານສິ່ງກີດຂວາງ ແລະ ມວຍສືບຂ່າວກຳລັງພາຍໃນ), ການໂດດຈ້ອງສະແດງກຳລັງ, ການຍິງເປີດປ້າຍຄຳຂວັນ, ການໂດດຈ້ອງລົງແນວຫລັງ ປິດລັບບັງເອີນຫລອນຕີ ທຳລາຍຂຸມປືນໃຫຍ່ ຂອງສັດຕູ, ການໂຢດພົນລົງແນວຫລັງ ປິດລັບບັງເອີນຫລອນ ຕີທຳລາຍສັດຕູ, ການບິນສະແດງຂອງຍົນສູ້ຮົບ ແລະ ອື່ນໆ.

Medialaos

ຮອງ​ນາຍົກລັດຖະມົນຕີ ເຄ່ືອນໄຫວຢ້ຽມຢາມ ແລະ ເຮັດວຽກຢູ່ເມືອງຫົງສາ

ໃນວັນທີ 14 ມັງກອນຜ່ານມາ  ທີ່ຫ້ອງການພາກສະໜາມບໍລິສັດໄຟຟ້າຫົງສາ ຈໍາກັດ    ໄດ້ຕ້ອນຮັບທ່ານ   ສົມດີ  ດວງດີ    ຮອງນາຍົກລັດຖະມົນຕີ ລັດຖະມົນຕີກະຊວງການເງິນ  ພ້ອມດ້ວຍຄະນະທີ່ລົງເຄື່ອນໄຫວ ແລະ ເຮັດວຽກຢູ່ເມືອງຫົງສາ  ຊຶ່ງນໍາພາໂດຍທ່ານ  ຍັນຍົງ     ສີປະເສີດ ຮອງເລຂາພັກແຂວງ   ຮອງເຈົ້າແຂວງໆໄຊຍະບູລີ, ມີທ່ານ  ຄໍາຫຼ້າ  ຜິວວັນນາ  ເລຂາຄະນະບໍລິຫານງານພັກເມືອງ ເຈົ້າເມືອງໆຫົງສາ, ມີຄະນະນໍາຂອງແຂວງຂອງເມືອງ, ມີອໍານາດການປົກຄອງບ້ານນາແກ່ນຄໍາ ແລະ ປະຊາຊົນພາຍໃນບ້ານດັ່ງກ່າວ ຕ້ອນຮັບຢ່າງອົບອຸ່ນ.

 ໃນໂອກາດນີ້   ທ່ານ ສົມດີ ດວງດີ  ກໍໄດ້ຮັບຟັງສະພາບລວມການຈັດຕັ້ງປະຕິບັດວຽກງານຕ່າງໆຂອງເມືອງ ແລະ ຮັບຟັງ ຄວາມເປັນມາຂອງກຸ່ມສະຫະກອນສົ່ງເສີມກະສິກໍາ ເມືອງຫົງສາ  ບ້ານນາແກ່ນຄໍາ ເປັນບ້ານຍົກຍ້າຍຈັດສັນຂອງໂຄງການໄຟຟ້າຫົງສາ  ຈໍາກັດ  ໂດຍມີຈັດສັນທີ່ຢູ່ອາໄສ, ທີ່ດິນທໍາການຜະລິດ, ສົ່ງເສີມໃຫ້ຊາວບ້ານໃຫ້ມີອາຊີບ ແລະ ລາຍໄດ້ທີ່ແນ່ນອນ, ເປັນຕົ້ນແມ່ນປູກພືດຜັກເປັນສິນຄ້າ, ປູກເຫັດ, ປູກຝ້າຍ, ລ້ຽງສັດ, ຊ່ວຍເຫຼືອປະຊາຊົນເຂົ້າເຮັດວຽກຢູ່ໂຄງການໄຟຟ້າຫົງສາ ແລະ ວຽກງານອື່ນໆ, ຫຼັງຈາກນັ້ນກໍໄດ້ເຂົ້າຢ້ຽມຊົມເບິ່ງໂຄງ ການໄຟຟ້າຫົງສາ ຈໍາກັດ  ຮັບຊົມການສະເໜີ ພາບລວມໂດຍຫຍໍ້,  ນັບຕັ້ງແຕ່ລັດຖະບານ ແຫ່ງ ສປປ ລາວ  ໄດ້ອະນຸມັດໃຫ້ມີການພັດທະນາໂຄງການໄຟຟ້າຫົງສາ ແລະ ໄດ້ເຊັນສັນຍາສໍາປະທານກັບບໍລິສັດໄຟຟ້າຫົງສາ ຈໍາກັດ ຄັ້ງວັນທີ  30  ເດືອນພະຈິກ 2009  ຈົນ ເຖິງປັດຈຸບັນໂຄງການໄດ້ມີ ການພັດທະນາເປັນລະບົບຕໍ່ເນື່ອງຈາກທ່ານ  ຄະທາຍຸດ   ຊູພູນ    ອໍານວຍການໃຫຍ່ບໍລິ ສັດໄຟຟ້າຫົງສາ ຈໍາກັດ ພ້ອມນັ້ນເຂົ້າຢ້ຽມຊົມຫ້ອງຄວບຄຸມການຜະລິດກະແສໄຟຟ້າຂອງໂຄງການ ແລະ ຈຸດຊົມວິວບໍ່ຖານຫີນໂຄງການໄຟຟ້າຫົງສາ, ຫຼັງຈາກນັ້ນກໍໄດ້ເດີນທາງໄປຢ້ຽມຢາມດ່ານນໍ້າເງິນ ຮັບຟັງບັນດາວຽກງານທີ່ເຄີຍໄດ້ຈັດຕັ້ງປະຕິບັດ ຂໍ້ສະດວກ,  ຂໍ້ຫຍຸ້ງຍາກທີ່ຈະພ້ອມກັນແກ້ໃນຕໍ່ໜ້າ.

ໃນໂອກາດທີ່ທ່ານຮອງນາຍົກລັດຖະມົນຕີ ລົງເຄື່ອນໄຫວ ແລະ ເຮັດວຽກຢູ່ເມືອງຫົງສາໃນຄັ້ງນີ້  ທ່ານກໍໄດ້ສະແດງຄວາມຍ້ອງຍໍຊົມເຊີຍຄະນະພັກ ອົງການປົກຄອງບ້ານແຕ່ລະຂັ້ນ ຕໍ່ກັບຜົນງານທີ່ຍາດໄດ້ ໃນໄລຍະຜ່ານມາ ຈົ່ງພ້ອມກັນສືບຕໍ່ເອົາໃຈໃສ່ຈັດຕັ້ງປະຕິບັດ ວຽກງານທີ່ໄດ້ຮັບການມອບໝາຍ ໃຫ້ໄດ້ຮັບຜົນດີ  ແລະ ວ່ອງໄວ ທັນໃຈ, ພ້ອມນັ້ນທ່ານຍັງໄດ້ໃຫ້ທິດຊີ້ນໍາ ຈົ່ງພ້ອມກັນເອົາໃຈໃສ່ວຽກງານດ້ານຕ່າງໆ ເຮັດໃຫ້ເສດຖະກິດ-  ສັງຄົມເມືອງພັດທະນາດີຂຶ້ນໄປເລື້ອຍໆ.

Medialaos