ລັດຖະມົນຕີວ່າການກະຊວງ ຖວທ ຮັບທູດຣັດເຊຍອຳລາ

ຂປລ. ທ່ານ ສຈ.ດຣ. ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ (ຖວທ) ໄດ້ໃຫ້ກຽດ ຕ້ອນຮັບການເຂົ້າຢ້ຽມຂ່ຳນັບອຳລາຂອງ ທ່ານ ອາເລັກ ກາບານົບ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສະຫະພັນ ຣັດເຊຍ ປະຈຳລາວ ໃນວັນທີ 1 ກໍລະກົດ 2014 ນີ້ ທີ່ກະຊວງ ຖວທ ໃນໂອກາດທີ່ທ່ານໄດ້ສຳເລັດການປະຕິບັດໜ້າທີ່ການທູດ ຢູ່ ສປປ ລາວ.

 

 

ທ່ານລັດຖະມົນຕີ  ກໍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານການປະຕິ ບັດໜ້າທີ່ ການທູດຂອງທ່ານ ອາເລັກ ກາບານົບ ຢູ່ ສປປ ລາວ ໃນຕະຫລອດໄລຍະທີ່ຜ່ານມາ ເຊິ່ງເປັນການປະກອບສ່ວນອັນສຳຄັນໃນການຊຸກຍູ້, ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສ ຣັດເຊຍ ໃຫ້ມີບົດບາດຂະຫຍາຍຕົວຢ່າງຕໍ່ເນື່ອງ, ພ້ອມທັງອວຍພອນ ໃຫ້ທ່ານເອກອັກຄະລັດຖະທູດສະຫະພັນຣັດ ເຊຍ ກັບຄືນ ປະເທດດ້ວຍຄວາມສະຫວັດດີພາບ,  ປະ ສົບຜົນສຳເລັດໃນພາລະກິດອັນໃໝ່ ແລະ ມີກຽດຂອງທ່ານ.

ໃນໂອກາດນີ້ ທ່ານ ອາເລັກ ກາບານົບ  ກໍໄດ້ສະແດງຄວາມຂອບໃຈຕໍ່ທ່ານລັດຖະມົນຕີ ທີ່ໄດ້ໃຫ້ກຽດຕ້ອນຮັບອັນອົບອຸ່ນໃນຄັ້ງນີ້, ພ້ອມທັງສະແດງ ຄວາມຂອບໃຈຕໍ່ລັດຖະບານ ສປປ ລາວ ກໍຄືທຸກພາກສ່ວນທີ່ກ່ຽວຂ້ອງທີ່ໄດ້ໃຫ້ການຮ່ວມມື, ສະໜັບສະໜູນ ແລະ ອຳນວຍຄວາມສະດວກ ທຸກຢ່າງ ໃນຕະຫລອດໄລຍະທີ່ປະຕິບັດໜ້າທີ່ການທູດຢູ່ ສປປ ລາວ ພ້ອມທັງຢືນຢັນຈະສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືກັບ ສປປ ລາວ ຕະຫລອດໄປ./.