ປະກາດສ້າງ​ຕັ້ງ​ສະມາຄົມ​ສິລະ​ປິນການສະ​ແດງ

ຂປລ. ກະຊວງຖະແຫລງຂ່າວວັດທະນະທຳ ແລະ ທ່ອງທ່ຽວ (ຖວທ) ໄດ້ປະກາດສ້າງຕັ້ງສະມາຄົມສິລະປິນການສະແດງ ພ້ອມທັງປ່ອນບັດເລືອກຕັ້ງ ໂດຍແມ່ນ ທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າການກະຊວງ ຖວທ ໄດ້ຮັບການເລືອກຕັ້ງເປັນປະທານສະມາຄົມດັ່ງກ່າວ ພ້ອມດ້ວຍ ຮອງປະທານສະມາຄົມອີກ 6 ຄົນ

ຈາກຜູ້ສະໝັກທັງໝົດ 26 ຄົນ  ຢູ່ໃນກອງປະຊຸມໃຫຍ່ຄັ້ງທີ I ຂອງສະມາຄົມສິລະປິນການສະແດງ ແຫ່ງ ສປປ ລາວ ທີ່ຈັດຂຶ້ນໃນວັນທີ 30 ມິຖຸນາ 2014 ນີ້ ທີ່ສູນການຄ້າລາວ-ໄອເຕັກ ນະຄອນຫລວງວຽງຈັນ ໂດຍມີທ່ານ ສຈ.ດຣ ບໍ່ແສງຄຳ ວົງດາລາ ລັດ ຖະມົນຕີວ່າການກະຊວງ ຖວທ, ບັນດາລັດຖະມົນຕີຊ່ວຍວ່າການ, ຫົວໜ້າກົມ, ຮອງກົມ ພ້ອມດ້ວຍສິລະປິນແຫ່ງຊາດ ແລະ ສິລະປິນດີເດັ່ນ ເຂົ້າຮ່ວມ.

 

ໂອກາດດັ່ງກ່າວ ທ່ານ ສຈ.ດຣ ບໍ່ແສງຄຳ ວົງດາລາ ໄດ້ເນັ້ນໃຫ້ຜູ້ທີ່ໄດ້ຮັບກຽດຖືກຄັດເລືອກເປັນປະທານ, ຮອງປະທານ ກໍຄືຄະນະບໍລິຫານງານ ຂອງສະມາຄົມສິລະປິນການສະແດງ ຈົ່ງໄດ້ເຊີດຊູບົດບາດການນຳພາໃນການປົກປັກຮັກສາຜົນງານ ແລະ ຄຸນງາມຄວາມດີຂອງເຫລົ່າສິລະປິນເອົາໄວ້, ຕັ້ງໜ້າຄົ້ນຄິດ, ປະດິດສ້າງ ຈັດຕັ້ງນຳພາສະມາຄົມໃຫ້ດຳເນີນວຽກງານຕາມພາລະບົດບາດເພື່ອໃຫ້ກາຍເປັນແບບຢ່າງ ແລະ ແວ່ນແຍງອັນໄສແຈ້ງ ໃຫ້ແກ່ສິລະປິນລຸ້ນລູກລຸ້ນຫລານໄດ້ສືບທອດ ແລະ ຄົ້ນຄວ້າຮ່ຳຮຽນ ພ້ອມທັງສືບຕໍ່ປະກອບສ່ວນປະດິດຄິດແຕ່ງ ແລະ ສ້າງຜົນງານເຂົ້າໃນສວນ ອຸດທິຍານ ແລະ ຄັງສາງດ້ານວັດທະນະທຳການສະແດງຂອງຊາດໃຫ້ນັບມື້ອຸດົມຮັງມີ ແລະ ຮຸ່ງເຮືອງສວຍງາມຕໍ່ໆໄປ ພ້ອມນັ້ນ ທ່ານຍັງໃຫ້ຮູ້ອີກວ່າ: ສິລະປະການສະແດງຂອງຄົນລາວ ເປັນເອກະລັກຂອງຄວາມເປັນຊາດລາວ, ເປັນຮາກຖານຂອງການສ້າງຄວາມສາມັກຄີ ແລະ ຄວາມໝັ້ນຄົງຍືນຍົງ ຂອງຊາດເປັນສິ່ງສະແດງເຖິງກຽດສັກສີ, ຄວາມພາກພູມໃຈຮ່ວມກັນ ຂອງປະຊາຊົນລາວບັນດາເຜົ່າ, ເປັນປັດໃຈໃຫ້ຄົນທັງຊາດປະພຶດໃນທາງທີ່ດີງາມ, ມີຄຸນນະທຳເພື່ອພັດທະນາຕົນເອງ, ສັງຄົມ ແລະ ປະເທດຊາດ. ແຕ່ລະຊົນເຜົ່າລ້ວນແຕ່ມີຂະບົບທຳນຽມ, ປະເພນີ ແລະ ມູນເຊື້ອ ວັດທະນະທຳ ແລະ ສິລະປະການສະແດງ ທີ່ເປັນເອກະລັກຂອງຕົນ ເຊິ່ງໂຮມເຂົ້າເປັນວັດທະນະທຳ ແລະ ສິລະປະການສະແດງຂອງວົງ ຄະນະຍາດແຫ່ງຊາດ.

ທ່ານ ບົວເງິນ ຊາພູວົງ ກ່າວວ່າ: ຈຸດປະສົງລະດັບຄາດໝາຍ ຂອງການສ້າງຕັ້ງສະມາຄົມສິລະປິນການສະແດງນີ້ ກໍເພື່ອເຮັດໃຫ້ແນວທາງວັດທະ ນະທຳທີ່ມີລັກສະນະຊາດ, ກ້າວໜ້າ ແລະ ມະຫາຊົນຂອງຊາດໄດ້ຮັບການຈັດຕັ້ງປະຕິບັດຢ່າງເປັນຮູບປະທຳເພື່ອສົ່ງເສີມມູນເຊື້ອຜົນງານອັນດີງາມ ຂອງວຽກງານສິລະປະການສະແດງຂອງຊາດເຮົາໃຫ້ມີຄວາມຈະເລີນກ້າວໜ້າ ແລະ ຕອບສະໜອງໄດ້ຄວາມຮຽກຮ້ອງຕ້ອງການຂອງສັງຄົມ ໃຫ້ນັບ ມື້ນັບດີຂຶ້ນແນໃສ່ເພື່ອເຕົ້າໂຮມຄວາມສາມັກຄີ ເອກະພາບທາງດ້ານແນວຄິດ ແລະ ພຶດຕິກຳຂອງເຫລົ່າສິລະປິນໃຫ້ມີຄວາມສະໜິດສະໜົມ ກົມກຽວ ເປັນໂອກາດເຮັດໃຫ້ມີການແລກປ່ຽນສົນທະນາໃນການພັດທະນາຕົນເອງ ແລະ ວຽກງານ ດ້ວຍຈິດໃຈສ້າງສັນ, ສົ່ງເສີມຄວາມຮູ້-ຄວາມສາມາດ ແລະ ພອນສະຫວັນທີ່ບົ່ມຊ້ອນຢູ່ໃນຖັນ ແຖວສິລະປິນຂອງພວກເຮົາໃຫ້ໄດ້ຮັບການພັດທະນາ, ເຜີຍແຜ່ຜົນງານອອກສູ່ສັງຄົມທັງພາຍໃນ ແລະ ຕ່າງປະເທດ, ເຮັດໃຫ້ສິລະປິນໄດ້ຊ່ວຍເຫລືອເຊິ່ງກັນ ແລະ ກັນ ທາງດ້ານສະຫວັດດີການສັງຄົມ ພ້ອມນັ້ນກໍເພື່ອປະກອບສ່ວນຊຸກຍູ້ຊ່ວຍເຫລືອ ວຽກງານຕ່າງໆຂອງສັງຄົມໃນແຕ່ລະໄລຍະ./.