ສື່ມວນຊົນລາວກຽມພ້ອມໂຄສະນາໃຫ້ແກ່ ກອງປະຊຸມ ໄອປາ ຄັ້ງທີ 35 ແລະ ກອງປະຊຸມ ລັດຖະມົນຕີສຶກສາອາຊຽນ

ກອງປະຊຸມກະກຽມຄວາມພ້ອມ ແລະ ປຶກສາຫາລື ຂອງໜ່ວຍງານ ໂຄສະນາຂ່າວສານ ຂອງອານຸກຳມະການໂຄສະນາຂ່າວສານ ຂອງກອງປະຊຸມ ໄອປາ ແລະ ກອງປະຊຸມ ລັດຖະມົນຕີສຶກສາອາຊຽນ ໄດ້ຈັດຂຶ້ນທີ່ ຫ້ອງປະຊູມໃຫຍ່ຊັ້ນ I ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວໃນຕອນເຊົ້າຂອງວັນທີ 05 ກັນຍາ 2014 ພາຍໃຕ້ການເປັນປະທານຂອງທ່ານ ສະຫວັນຄອນ ລາຊມູນຕຣີ ລັດຖະມົນຕີຊ່ວຍວ່າການກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ

ໂດຍມີສະມາຊິກຂອງໜ່ວຍງານໂຄສະນາຂ່າວສານເຊິ່ງມາຈາກອົງການສື່ມວນຊົນລາວຂະແໜງຕ່າງໆ, ກົມສື່ມວນຊົນກະຊວງ ຖວທ, ກົມການຂ່າວ ກະຊວງການຕ່າງປະເທດ ແລະ ກົມສື່ມວນຊົນ ສະພາແຫ່ງຊາດ.

ກອງປະຊຸມໄດ້ກວດກາຄືນຜົນສຳເລັດໃນການໂຄສະນາໃຫ້ແກ່ການກະກຽມດຳເນີນກອງປະຊຸມ ໄອປາ. ພ້ອມນີ້ກອງປະຊຸມໄດ້ກະກຽມແຜນການ ສ້າງຕັ້ງສູນຂ່າວໃນໄລຍະກອງປະຊຸມ ເຊິ່ງຈະໄດ້ມີການລາຍງານຂ່າວປະຈຳວັນ ຜ່ານໜັງສືພິມ, ວິທະຍຸ, ໂທລະພາບ ແລະ ເວບໄຊ ພ້ອມທັງມີການຖ່າຍທອດສົດພິທີເປີດພິທີປິດກອງປະຊຸມ.

ສື່ມວນຊົນລາວ ທຸກຂະແໜງ ບໍ່ວ່າຈະເປັນ ຂ່າວສານປະເທດລາວ, ວິທະຍຸແຫ່ງຊາດ, ໂທລະພາບແຫ່ງຊາດ, ໜັງສືພິມພາສາຕ່າງປະເທດ ບັນດາໜັງສືພິມຕ່າງໆ ບັນດາຂະແໜງການຕ່າງໆ ລວມທັງໜັງສືພິມຂອງສະພາແຫ່ງຊາດເອງ ລ້ວນແລ້ວແຕ່ມີຄວາມພ້ອມ ໃນການໂຄສະນາໃຫ້ແກ່ກອງປະຊຸມທັງສອງ ໃຫ້ໄດ້ຮັບຜົນສຳເລັດ. ພາຍຫຼັງສຳເລັດກອງປະຊຸມ ສື່ມວນຊົນກໍ່ຈະໄດ້ນຳເອົາຜົນຂອງກອງປະຊຸມ ໂດຍສະເພາະ ມະຕິຕ່າງໆ, ຂໍ້ສະເໜີຕ່າງໆມານຳສະເໜີໃຫ້ມວນຊົນທັງພາຍໃນ ແລະ ຕ່າງປະເທດໄດ້ຮັບຮູ້ຢ່າງທົ່ວເຖີງ.