ພິທີ ມອບ-ຮັບ ລາງວັນການແຂ່ງຂັນຮູບແຕ້ມຊາວໜຸ່ມອາຊຽນລະດັບຊາດ

ໃນວັນທີ 2 ກັນຍາ 2014, ຄະນະກໍາມະການຖະແຫລງຂ່າວ-ວັດທະນະທຳອາຊຽນ ແຫ່ງ ສປປ ລາວ (ASEAN-COCI) ໄດ້ຈັດພິທີ ມອບ-ຮັບ ລາງວັນ ໃຫ້ແກ່ຜູ້ຊະນະເລີດການແຂ່ງຂັນປະກວດຮູບພາບລະບາຍສີລະດັບຊາດ ໃນຫົວຂໍ້: “ ສິລະປະ ແລະ ສິດທິມະນຸດ ” ຫລື “ ASEAN Youth Competition on Arts and Human rights ” ທີ່ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ. ໂດຍການເປັນປະທານຂອງ ທ່ານ ບຸນເລື່ອນ ບຸບຜາ, ຫົວໜ້າ ກົມຮ່ວມມືສາກົນ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ

ພ້ອມທັງຕາງໜ້າໃຫ້ແກ່ຄະນະກຳມະການຖະແຫລງຂ່າວ-ວັດຖະນະທຳອາຊຽນ ແຫ່ງ ສປປ ລາວ ເປັນກຽດມອບເງິນລາງວັນຈຳນວນ 450$ ໃຫ້ແກ່ ທ້າວ ສຸຈິນດາ ຂຽວອາພອນ, ນັກສຶກສາ ຊັ້ນປີທີ 2 ຈາກສະຖາບັນວິຈິດສິນແຫ່ງຊາດ, ດ້ວຍຜົນງານທີ່ມີຊື່ວ່າ: “ ຄວາມເທົ່າທຽມໃນສັງຄົມ ”. ເຂົ້າຮ່ວມໃນການ ມອບ-ຮັບ ລາງວັນຄັ້ງນີ້ມີຜູ້ຕາງໜ້າຈາກ ກົມອາຊຽນ-ກະຊວງການຕ່າງປະເທດ, ຕາງໜ້າສະຖາບັນວິຈິດສິນແຫ່ງຊາດ ແລະ ບັນດາພະນັກງານທີ່ມີສ່ວນກ່ຽວຂ້ອງ. ການແຂ່ງຂັນປະກວດຮູບພາບລະບາຍສີລະດັບຊາດ ໄດ້ຈັດຂຶ້ນເພື່ອຄັດເລືອກເອົາຜົນງານຂອງຜູ້ຊະນະເລີດລະດັບຊາດຈາກ 10 ປະເທດ ສະມາຊິກອາຊຽນ ເພື່ອສົ່ງຜົນງານເຂົ້າແຂ່ງຂັນໃນລະດັບພາກພື້ນ ເນື່ອງໃນໂອກາດວັນສ້າງຕັ້ງອາຊຽນ ຄົບຮອບ 48 ປີ ແລະ ສປປ ລາວ ເຂົ້າເປັນສະມາຊິກອາຊຽນ ຄົບຮອບ 18 ປີ, ເຊິ່ງການແຂ່ງຂັນໄດ້ເລີ່ມຕົ້ນຂຶ້ນແຕ່ ວັນທີ 1 ພຶດສະພາ - 2 ມິຖຸນາ 2014 ແລະ ປິດໃນວັນທີ 25 ມິຖູນາ 2014.