ກອງປະຊຸມສາມັນຄົບຄະນະ ຄັ້ງທີ 17 ສະໄໝທີ III ຂອງຄະນະພັກກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ

ກອງປະຊຸມສາມັນຄົບຄະນະຄັ້ງທີ 17 ສະໄໝທີ III ຂອງຄະນະພັກກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ໄຂຂຶ້ນໃນຕອນເຊົ້າ ວັນທີ 29 ສິງຫາ 2014 ທີ່ຫ້ອງປະຊຸມກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໂດຍການເປັນປະທານຂອງສະຫາຍ ສຈ.ດຣ ບໍ່ແສງຄຳ ວົງດາລາ, ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີວ່າການກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ມີບັນດາສະຫາຍຄະນະປະຈຳພັກ, ຄະນະພັກກະຊວງເຂົ້າຮ່ວມ.

ສະຫາຍເລຂາຄະນະພັກກະຊວງໄດ້ໃຫ້ກຽດກ່າວເປີດກອງປະຊຸມໂດຍໄດ້ຍົກໃຫ້ເຫັນຜົນສຳເລັດ ຂອງກອງປະຊຸມຄະນະປະຈຳພັກ ປະຈຳເດືອນ ສິງຫາ 2014. ຈາກນັ້ນກອງປະຊຸມໄດ້ຜ່ານບົດສະຫລຸບການເຄື່ອນໄຫວວຽກງານການ ຊີ້ນຳ-ນຳພາ ໃນໄລຍະ 3 ເດືອນຜ່ານມາ(5-6-7/2014) ແລະ ຜ່ານທິດທາງແຜນການ 3 ເດືອນຕໍ່ໜ້າ (8-9-10/2014) ຂອງອົງຄະນະພັກກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ໄດ້ປະກອບຄຳເຫັນໃສ່ບົດສະຫລຸບ ແລະ ທິດທາງແຜນການດັ່ງກ່າວ. ກອງປະຊຸມໃນຄັ້ງນີ້, ຄະນະພັກຍັງໄດ້ກວດກາຕີລາຄາຄືນ ຜົນສຳເລັດຂອງການດຳເນີນກອງປະຊຸມໃຫຍ່ຂອງບັນດາໜ່ວຍພັກ, ຮາກຖານພັກ ແລະ ຂອງບັນດາອົງການຈັດຕັ້ງມະຫາຊົນ. ກອງປະຊຸມຍັງໄດ້ຄົ້ນຄວ້າກ່ຽວກັບການກະກຽມດຳເນີນກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງ. ນອກຈາກນັ້ນ, ກອງປະຊຸມຍັງໄດ້ປຶກສາຫາລືກ່ຽວກັບບັນຫາສຳຄັນ ແລະ ຮີບດ່ວນຈຳນວນໜຶ່ງອີກ.