ກຸ່ມຂ່າວສານລາຍວັນຢຸນນານ ແຫ່ງ ສ ປ ຈີນ ເຂົ້າຢ້ຽມຢາມລັດຖະມົນຕີວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ.

ສມຊ.ໃນຕອນເຊົ້າຂອງວັນທີ 18 ສິງຫາ 2014 ທ່ານ ສຈ.ດຣ ບໍ່ແສງຄຳ ວົງດາລາ ກຳມະການສູນກາງພັກ, ລັດຖະມົນຕີວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ຕ້ອນຮັບການຢ້ຽມຢາມຂອງກຸ່ມຂ່າວສານລາຍວັນຢຸນນານ ສ.ປ ຈີນ ເຊິ່ງ ນຳພາໂດຍ ທ່ານ ຈາງ ກວາງ ຊື ຜູ້ອຳນວຍການກຸ່ມຂ່າວສານລາຍວັນຢຸນນານພ້ອມດ້ວຍຄະນະ.

 

ໃນການຢ້ຽມຢາມຂອງຄະນະດັ່ງກ່າວໃນຄັ້ງນີ້ ທ່ານ ສຈ.ດຣ ບໍ່ແສງຄຳ ວົງດາລາລັດຖະມົນຕີວ່າການກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ສະແດງຄວາມຊົມເຊີຍ ແລະໃຫ້ຄວາມຕ້ອນຮັບຢ່າງອົບອຸນຕໍ່ການເຂົ້າຢ້ຽມຢາມ ຂອງຄະນະກຸ່ມດັ່ງກ່າວ.ທ່ານລັດຖະມົນຕີ ຍັງໄດ້ແຈ້ງສະພາບກ່ຽວກັບການພັດທະນາ ເສດຖະກິດ-ສັງຄົມ ໃນສປປລາວ ເວົ້າລວມ, ເວົ້າສະເພາະແມ່ນໄດ້ແຈ້ງສະພາບການພັດທະນາໃນ ວຽກງານຖະແຫລງຂ່າວ, ວັດທະນະທຳ ແລະ ທ່ອງທ່ຽວ  ລວມໃນນີ້້ ແມ່ນ ການພົວພັນຮ່ວມມື ໃນວຽກງານຖະແຫລງຂ່າວ ແລະ ສື່ມວນຊົນ ລະຫວ່າງ ສປປລາວ ກັບ ສປ ຈີນ ໃຫ້ກຸ່ມຂ່າວສານລາຍວັນຢຸນນານຊາບ ເປັນຕົ້ນ ການຮ່ວມມືກັບວິທະຍຸສາກົນແຫ່ງປະເທດຈີນ (CRI) ເຊິ່ງໄດ້ຕັ້ງສະຖານນີຮັບຖ່າຍທອດຢູ່ນະຄອນຫລວງວຽງຈັນກະຈາຍລາຍການວິທະຍຸສາກົນແຫ່ງປະເທດຈີນພາກພາສາລາວຈາກປາກກິ່ງ ສປຈີນ.ນອກນັ້ນຍັງມີການຮ່ວມມືດ້ານການພັດທະນາ ລະບົບໂທລະພາບດີຈີຕອນຕາມມາດຕະຖານຈີນ(DTMB) ຈາກທີ່ມີຢູ່ 4 ແຂວງໃຫ່ຍແລ້ວ ຈະຂະຫຍາຍໄປທຸກແຂວງໃນທົ່ວປະເທດ.

ໃນການເຂົ້າຢ້ຽມຢາມ ທ່ານ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວໃນຄັ້ງນີ້ ທ່ານ ຈາງ ກວາງ ຊື  ໄດ້ສະແດງຄວາມຂອບໃຈເປັນຢ່າງສູງຕໍ່ການຕ້ອບຮັບຢ່າງອົບອຸ່ນຂອງ  ທ່ານ ລັດຖະມົນຕີ ໃນຄັ້ງນີ້ ແລະ ທ່ານ ຍັງໄດ້ ລາຍງານ ການເຄື່ອນໄຫວ ຂອງກຸ່ມຂ່າວສານລາຍວັນຢຸນນານ ແຫ່ງ ສ ປ ຈີນ ໂດຍສະເພາະແມ່ນກິດຈະການໜັງສືພິມ, ວາລະສານ, ກິດຈະການອະສັງຫາລິມະຊັບ ແລະ ວຽກງານອື່ນ ທີ່ໄດ້ຮັບອະນຸຍາດ ເຊິ່ງໄດ້ມີການເຄື່ອນໄຫວຢ່າງຕັ້ງໜ້າໃນການປະກອບສ່ວນແກ່ການພັດທະນາ ໃນແຂວງ ຢູນນານ ກໍຄື ສປ ຈີນ ໃຫ້ ທ່ານລັດຖະມົນຕີຊາບ. 

ການຢ້ຽມຢາມພົບປະໂອລົມກັນລະຫວ່າງແຂກ ແລະ ເຈົ້າພາບແມມເຕັມໄປດ້ວຍບັນຍາກາດເພື່ອນມິດ ສະໜິດສະໜົມແຕ່ຕົ້ນຕະຫລອດປາຍ.