ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ເຊື່ອມຊຶມມະຕິ 8 ສະໄໝທີ IX ຂອງພັກ

ຂປລ. ໃນວັນທີ 31 ເດືອນກໍລະກົດ ປີ 2014, ຢູ່ໂຮງຮຽນສິລະປະແຫ່ງຊາດ, ກະຊວງຖະແຫລງ ຂ່າວ, ວັດທະນະທຳ ແລະ ທ່ອງທ່ຽວໄດ້ຈັດຕັ້ງ ເຜີຍແຜ່ເຊື່ອມຊຶມມະຕິກອງປະຊຸມຄົບຄະນະ ຄັ້ງທີ 8 ສະໄໝທີ IX ຂອງຄະນະບໍລິຫານງານສູນກາງພັກ ໃຫ້ແກ່ພະນັກງານການນຳຫລັກແຫລ່ງ  ເພື່ອເພີ່ມຄວາມຮັບຮູ້ເຂົ້າໃຈ ແລະ ກຳແໜ້ນແນວທາງນະໂຍບາຍຂອງພັກ ເພື່ອນຳໄປຈັດຕັ້ງປະຕິບັດເຂົ້າໃນວຽກງານຕົວຈິງໃຫ້ໄດ້ຮັບຜົນດີ,

ໃຫ້ກຽດ ເຜີຍແຜ່ເອກະສານດັ່ງກ່າວໂດຍ ສະຫາຍ ສຈ ດຣ ບໍ່ແສງຄຳ  ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີວ່າການກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ.


ສະຫາຍ ຈສ ດຣ ບໍ່ແສງຄຳ ວົງດາລາ  ໄດ້ຍົກໃຫ້ເຫັນກ່ຽວກັບສະພາບການຈັດຕັ້ງປະຕິບັດວຽກງານຮອບດ້ານໃນໄລຍະ 1 ປີຜ່ານມາ ທີ່ໄດ້ດຳເນີນໄປ ທ່າມກາງ ສະພາບແວດລ້ອມພາກພື້ນ ແລະ ສາກົນສືບຕໍ່ຜັນແປຢ່າງສະຫລັບຊັບຊ້ອນ, ສະພາບການພາຍໃນປະເທດໄດ້ປະສົບກັບສິ່ງທ້າທາຍ ຫລາຍ ປະການ ເປັນຕົ້ນແມ່ນ ດ້ານເສດຖະກິດ-ການເງິນ, ໄພທຳມະຊາດ, ອຸບັດເຫດດ້ານການບິນ ແລະ ອິດທິກຳລັງປໍລະປັກ ຍັງສືບຕໍ່ປະຕິບັດ ກົນອຸບາຍຫັນປ່ຽນໂດຍສັນຕິ ທີ່ເລິກແລບແນບນຽນກວ່າເກົ່າ ແຕ່ການຈັດຕັ້ງປະຕິບັດ ວຽກງານທຸກດ້ານຂອງພວກເຮົາ ຍັງສືບຕໍ່ເປັນຂະບວນຟົດຟື້ນ ແລະ ມີຜົນສຳເລັດເລັດເປັນຢ່າງດີ. ການພັດທະນາເສດຖະກິດ-ສັງຄົມ ໃນສົກປີ 2013-2014 ສືບຕໍ່ມີບັນຍາກາດດີ, ເສດຖະກິດເຕີບໂຕລະດັບ 7,5%, ລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນປະມານ 13 ລ້ານກວ່າກີບ ຫລື ປະມານ 1.692 ໂດລາສະຫະລັດ/ຄົນ/ປີ,  ອັດຕາເງິນເຟີ້ຢູ່ໃນລະດັບ 6%, ຂະບວນການຜະລິດເປັນສິນຄ້າ ແລະ ແກ້ໄຂຄວາມທຸກຍາກຂອງປະຊາຊົນສືບຕໍ່ມີການຫັນປ່ຽນຢ່າງຕັ້ງໜ້າ, ຂົງເຂດວັດທະນະທຳ-ສັງຄົມ ໄດ້ຮັບການເອົາໃຈໃສ່ ແລະ ມີຜົນສຳເລັດ ເປັນຕົ້ນວຽກສຶກສາທິການ ແລະ ກິລາ ມີການຫັນປ່ຽນທີ່ຕັ້ງໜ້າ, ດ້ານສາທາລະນະສຸກ ໄດ້ສືບຕໍ່ຂະຫຍາຍ ຕົວລົງສູ່ຮາກຖານຊົນນະບົດຢ່າງທົ່ວເຖິງ, ການຈັດຕັ້ງປະຕິບັດເປົ້າ ໝາຍສະຫັດສະວັດ MDGs ສາມາດບັນລຸໄດ້ເປັນສ່ວນຫລາຍ, ການທົດລອງ ສາມສ້າງໄດ້ຮັບການຜັນຂະຫຍາຍເຂົ້າສູ່ວຽກງານຕົວຈິງ. ສຳລັບວຽກງານຈຸດສຸມໃນຕໍ່ໜ້າແມ່ນຢຶດໝັ້ນຕໍ່ທັດສະນະລວມຂອງການພັດທະນາຕາມທິດຍືນຍົງ, ເພີ່ມທະວີການຄຸ້ມຄອງເສດຖະກິດມະຫາພາກ ໃຫ້ເຂົ້າສູ່ຄວາມສະຫງົບປົກກະຕິໂດຍໄວ, ເອົາໃຈໃສ່ຊີ້ນຳວຽກງານຂົງເຂດວັດທະນະທຳ-ສັງຄົມ, ເພີ່ມທະວີການສຶກສາອົບຮົບໃຫ້ພະນັກງານ-ລັດຖະກອນ, ທະຫານ, ຕຳຫລວດ ແລະ ປະຊາຊົນ ມີສະຕິເຄົາລົບລະບຽບກົດໝາຍ,  ປະຕິບັດວຽກງານ ປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ປະຕິບັດແນວທາງການຕ່າງປະເທດ ສັນຕິພາບ ເອກກະລາດ ມິດຕະພາບ ແລະ ການຮ່ວມ ມືເພື່ອການພັດທະນາ, ສືບຕໍ່ປຸກລະດົມຂະບວນແຂ່ງຂັນຮັກຊາດ ແລະ ສ້າງບ້ານພັດທະນາ ພ້ອມທັງສືບຕໍ່ປະຕິບັດຄາດໝາຍມະຕິ 9 ຂອງພັກວາງ ອອກໃຫ້ມີຜົນສຳເລັດສູງ.

 

ສະຫາຍ ຈສ ດຣ ບໍ່ແສງຄຳ ວົງດາລາ ຍັງໄດ້ຊີ້ໃຫ້ເຫັນ ກ່ຽວກັບການກະກຽມເນື້ອໃນກອງປະຊຸມໃຫຍ່ຂອງພັກຄັ້ງທີ X ການປັບປຸງຮ່າງຍຸດທະສາດ ການພັດທະນາເສດຖະກິດ-ສັງຄົມ ປີ 2015-2025 ແລະ ວິໄສທັດຮອດປີ 2030 ໃຫ້ມີຄວາມສອດຄ່ອງ ແລະ ຮັບໃຊ້ໃຫ້ແກ່່ຈຸດໝາຍກ້າວຂຶ້ນ ຂອງປະເທດຕາມທິດສັງຄົມນິຍົມ, ລວມເຖິງການປັບປຸງຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII, ພະນັກງານ ຫລັກແຫລ່ງ ຕ້ອງ ເພີ່ມທະວີຄວາມຮັບຜິດຊອບທາງການເມືອງ ແລະ ຍົກສູງຄວາມສາມາດ ຊີ້ນຳ-ນຳພາ ປະຕິບັດບັນດາຄາດໝາຍວາງໄວ້, ມີຫົວຄິດປະດິດສ້າງ ແລະ ມີຄວາມຕັດສິນໃຈຜ່ານຜ່າຄວາມຫຍຸ້ງຍາກ ແລະ ປ່ຽນແປງໃໝ່ທັດສະນະ-ແບບແຜນນຳພາ ແລະ ວິທີເຮັດວຽກແບບຜິວເຜີນ, ມັກງ່າຍ, ທັງມີແນວຄິດເອື່ອຍອີງໂຍນຄວາມຮັບຜິດຊອບໃຫ້ຜູ້ອື່ນ ພ້ອມກັນນັ້ນ ກໍຕ້ອງເສີມຂະຫຍາຍມູນເຊື້ອເປັນແບບຢ່າງໃນການດຳລົງຊີວິດທີ່ປອດໄສ, ກ້າວ ໜ້າ, ປະຢັດຕ້ານການຟຸມເຟືອຍ, ມີສະຕິເຄົາລົບລະບຽບ, ວິໄນ ແລະ ກົດ ໝາຍ./.