ສະມາຄົມນັກຂ່າວ ສປປ ລາວ-ສສ ຫວຽດນາມ ພົບປະແລກປ່ຽນບົດຮຽນ

ຂປລ. ໃນວັນທີ 9 ຕຸລາ 2017 ນີ້ ທ່ານ ສົມສະໝຸກ ມີໄຊ ຮອງປະທານສະມາຄົມນັກຂ່າວ ແຫ່ງ ສປປ ລາວ ໄດ້ໃຫ້ການຕ້ອນຮັບ ແລະ ພົບປະແລກປ່ຽນບົດຮຽນ ກັບ ທ່ານ ພັນຮິວ ມິງ ກຳມະການ ໃນຄະນະປະຈຳຂອງຄະນະບໍລິຫານງານສະມາຄົມນັກຂ່າວ ສສ ຫວຽດນາມ, ໃນໂອກາດທີ່ເດີນ ທາງມາຢ້ຽມຢາມ ສປປ ລາວ ແຕ່ວັນທີ 9-15 ຕຸລາ 2017 ເພື່ອເປັນການຜັນຂະຫຍາຍຂໍ້ຕົກລົງການຮ່ວມມືສອງຝ່າຍໃນແຕ່ລະປີ.

ການພົບປະຄັ້ງນີ້, ສອງຝ່າຍໄດ້ມີການລາຍງານ ສະພາບການເຄື່ອນໄຫວວຽກງານ ຂອງສະມາຄົມສອງປະເທດ, ພ້ອມທັງຕີລາຄາໝາກຜົນ ຂອງການຮ່ວມມືສອງຝ່າຍ ໃນໄລຍະຜ່ານມາ ເພື່ອເປັນການເສີມຂະຫຍາຍ ສາຍພົວພັນຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ ຫວຽດນາມ ກໍຄື ສອງສະມາຄົມໃຫ້ຈະເລີນງອກງາມຍິ່ງໆຂຶ້ນ.
ໃນລະຫວ່າງການຢ້ຽມຢາມ ສປປ ລາວ ຄະນະຜູ້ແທນສະມາຄົມນັກຂ່າວ ສສ ຫວຽດນາມ ຈະໄດ້ລົງເຄື່ອນໄຫວຢ້ຽມຢາມບັນດາແຂວງ ຢູ່ ສປປ ລາວ ເຊັ່ນ: ແຂວງວຽງຈັນ (ວັງວຽງ), ບໍລິຄຳໄຊ, ແລະ ໄປຖ່າຍທຳ ທີ່ວັດພະບາດໂພນສັນ ເພື່ອສົ່ງເສີມສື່ອອນລາຍ ກໍຄື ວັດທະນະທຳທີ່ສວຍສົດງົດງາມຂອງ ສປປ ລາວ ແລະ ໄປຖ່າຍທອດເປັນສາລະຄະດີ ຢູ່ ສສ ຫວຽດນາມ.