ກອງປະຊຸມລັດຖະບານເປີດກວ້າງ ໄດ້ພິຈາລະນາປຶກສາ ຫາລື 7 ບັນຫາສຳຄັນ

ຂປລ. ກອງປະຊຸມລັດຖະບານເປີດກວ້າງຄັ້ງທີ I ປີ 2017 ໄດ້ປິດລົງໃນວັນທີ 8 ກັນຍາ 2017 ທີ່ຫໍປະຊຸມແຫ່ງຊາດ, ໂດຍການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ມີບັນດາສະມາຊິກລັດຖະບານ, ເຈົ້າຄອງນະຄອນຫລວງ, ບັນດາເຈົ້າແຂວງ, ຜູ້ຕາງໜ້າອົງການຈັດຕັ້ງພັກ, ສະພາແຫ່ງຊາດ ແລະ ອົງການນິຕິບັນຍັດ ເຂົ້າຮ່ວມ.

ໃນກອງປະຊຸມດັ່ງກ່າວ, ໄດ້ພິຈາລະນາປຶກສາຫາລື ແລະ ຕົກລົງ 7 ບັນຫາສຳຄັນ ຄື: ສະຫລຸບຕີລາຄາຄວາມຄືບໜ້າ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ ປະຈຳປີ 2017 ແລະ ປຶກສາຫາລືກ່ຽວກັບທິດທາງ ສຳລັບປີ 2018; ຮັບຟັງລາຍງານການສະຫລຸບຖອດຖອນບົດຮຽນ ແລະ ທິດທາງຜັນຂະຫຍາຍ ຜົນການຢ້ຽມຢາມຕ່າງປະເທດ ຂອງການນຳຂັ້ນສູງພັກ ແລະ ລັດຖະບານ; ສະຫລຸບຕີລາຄາການຈັດຕັ້ງ ປະຕິບັດ ມະຕິຄຳສັ່ງແຈ້ງການ ແລະ ການຕົກລົງຂອງລັດຖະບານ ໃນໄລຍະຜ່ານມາ; ສະຫລຸບຕີລາຄາ ການຈັດຕັ້ງປະຕິບັດຄໍາສັ່ງເລກທີ 15/ນຍ ກ່ຽວກັບການເພີ່ມທະວີຄວາມເຂັ້ມງວດ ໃນການຄຸ້ມຄອງ ແລະ ກວດກາການຂຸດຄົ້ນໄມ້, ເຄື່ອນ ຍ້າຍໄມ້ ແລະ ທຸລະກິດໄມ້; ປືກສາຫາລືກ່ຽວກັບທິດທາງ ການສົ່ງເສີມການຜະລິດເປັນສິນຄ້າ ແລະ ການຄໍ້າປະກັນຄວາມໜັ້ນຄົງ ດ້ານສະບຽງອາຫານ; ການກະກຽມຄວາມພ້ອມ ໃນການເປີດປີທ່ອງທ່ຽວລາວ ປີ 2018 ແລະ ຮັບຟັງ ລາຍງານສະພາບການ ແກ້ໄຂສິ່ງກີດຂວາງ ແລະ ການຊົດເຊີຍ ຜູ້ທີ່ໄດ້ຮັບຜົນກະທົບຈາກການກໍ່ສ້າງໂຄງການທາງລົດໄຟ ລາວ-ຈີນ.
ໃນຕອນທ້າຍກອງປະຊຸມ, ທ່ານ ນາຍົກລັດຖະມົນຕີ ໄດ້ຊີ້ນຳໃຫ້ສະມາຊິກລັດຖະບານ, ເຈົ້າຄອງນະຄອນຫລວງວຽງຈັນ ແລະ ບັນດາເຈົ້າແຂວງ ຈົ່ງນຳເອົາເນື້ອໃນຈິດໃຈ ທີ່ໄດ້ຕົກລົງເປັນເອກະພາບ ໃນກອງປະຊຸມໃນຄັ້ງນີ້ ລວມທັງບັນດາວຽກງານຈຸດສຸມ ໃນປີ 2018 ໄປຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດດ້ວຍຄວາມຮັບຜິດຊອບສູງຄື: ສືບຕໍ່ເອົາໃຈໃສ່ວຽກງານ ຮັກສາສະຖຽນລະພາບທາງດ້ານການເມືອງ, ຄວາມສະຫງົບ ແລະ ເປັນລະບຽບຮຽບຮ້ອຍຂອງສັງຄົມ ເພື່ອສ້າງສະພາບແວດລ້ອມ ແລະ ເງື່ອນໄຂ ໃຫ້ແກ່ການພັດທະນາຢ່າງຕໍ່ເນື່ອງ; ສືບຕໍ່ແກ້ໄຂບັນຫາເສດຖະກິດ ເພື່ອໃຫ້ມີທິດຫັນປ່ຽນທີ່ໜັກແໜ້ນ, ສູ້ຊົນໃຫ້ບັນລຸຄາດໝາຍຂອງແຜນພັດທະນາເສດຖະກິດ-ສັງຄົມ ປີ 2017 ທີ່ສະພາແຫ່ງຊາດຮອງຮັບ, ສ້າງພື້ນຖານອັນແຂງແກ່ນໃຫ້ແກ່ການຈັດຕັ້ງປະຕິບັດແຜນ ປີ 2018 ແລະ ປີ ຕໍ່ໆໄປ; ສືບຕໍ່ພັດທະນາທາງດ້ານສັງຄົມ, ພັດທະນາຊົນນະບົດ ແລະ ລຶບລ້າງຄວາມທຸກຍາກ, ໂດຍເອົາໃຈໃສ່ປັບປຸງຄຸນນະພາບການສຶກສາ ແລະ ສາທາລະນະສຸກ ໃນເຂດຊົນນະບົດຫ່າງໄກສອກຫລີກ, ສຸມທຶນຮອນເຂົ້າໃນການປັບປຸງ ແລະ ກໍ່ສ້າງພື້ນຖານໂຄງລ່າງໃນຊົນນະບົດ; ສືບຕໍ່ຍູ້ແຮງການພັດທະນາໃຫ້ໄປຕາມທິດທີ່ຍືນຍົງ ໂດຍເພີ່ມທະວີຄວາມເຂັ້ມງວດໃນການຄຸ້ມຄອງ, ກວດກາການຂຸດຄົ້ນໄມ້ ແລະ ການເຄື່ອນຍ້າຍໄມ້ ຄ່ຽງຄູ່ກັບການຫັນທຸລະກິດໄມ້ ໄປສູ່ການຜະລິດທີ່ເປັນລະບົບຄົບວົງຈອນ, ສືບຕໍ່ກວດກາ ແລະ ຄຸ້ມຄອງປ່າສະຫງວນແຫ່ງຊາດ ໂດຍການມີສ່ວນຮ່ວມຂອງປະຊາຊົນ; ພ້ອມນີ້, ໃຫ້ສືບຕໍ່ເພື່ມທະວີຄວາມສັກສິດ ແລະ ປະສິດທິຜົນໃນການຄຸ້ມຄອງລັດ-ຄຸ້ມຄອງສັງຄົມ ຕາມກົດໝາຍ ແລະ ລະບຽບການຢ່າງເຂັ້ມງວດ ສືບຕໍ່ປັບປຸງກົນໄກການປະສານງານ ແລະ ປະສານສົມທົບ ລະຫວ່າງຂະແໜງການຂັ້ນສູນກາງ ແລະ ອົງການປົກຄອງທ້ອງຖິ່ນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ມີປະ ສິດທິພາບ.
ນອກນີ້, ທ່ານນາຍົກລັດຖະມົນຕີ ຍັງຮຽກຮ້ອງໃຫ້ບັນດາສະມາຊິກລັດຖະບານ, ເຈົ້າຄອງນະຄອນຫລວງ ແລະ ບັນດາເຈົ້າແຂວງ ໃຫ້ສືບຕໍ່ເອົາໃຈໃສ່ບຸກບືນຫລາຍຂຶ້ນຕື່ມໃນການຊີ້ນຳ, ຕິດຕາມ, ຊຸກຍູ້ ແລະ ກວດກາການຈັດຕັ້ງປະຕິບັດ ບັນດາວຽກງານຈຸດສຸ່ມພາຍໃຕ້ຄວາມຮັບຜິດຊອບຂອງຕົນ ໃຫ້ມີປະສິດທິຜົນ ແລະ ສະເໜີໃຫ້ບັນດາອົງການຈັດຕັ້ງຂອງພັກ, ອົງການກວດກາລັດຖະບານ, ສະພາແຫ່ງຊາດ, ສານປະຊາຊົນ, ອົງການໄອຍະການປະຊາຊົນ, ສູນກາງແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ ສືບຕໍ່ຕິດຕາມ, ກວດກາ ແລະ ປະສານສົມທົບ ຢ່າງໃກ້ສິດຕິດແທດ ກັບ ລັດ ຖະບານ ກໍຄື ບັນດາຂະແໜງການ ແລະ ອຳນາດການປົກຄອງທ້ອງຖິ່ນ ເພື່ອສ້າງເງື່ອນໄຂ, ຮ່ວມມືກັນ ແລະ ຊຸກຍູ້ໃຫ້ລັດຖະບານ ປະຕິບັດຕາມພາລະບົດບາດ, ໜ້າທີ່ ແລະ ຂອບເຂດສິດ ທີ່ໄດ້ກຳນົດໄວ້ໃນກົດໝາຍວ່າດ້ວຍລັດຖະບານ ໃຫ້ມີປະສິດທີຜົນສູງ.