ເນື້ອໃນຖະແຫລງຂ່າວ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໃນວັນທີ 1 ກັນຍາ 2017 ທີ່ພະນົມເປັນ

ຂໍຮຽນ ທ່ານ ສົມເດັດ ອັກຄະມະຫາ ເສນາ ບໍດີ ເຕໂຈ ຮຸນເຊນ ນາຍົກລັດຖະມົນຕີ ແຫ່ງ ຣາຊະອານາຈັກກໍາປູເຈຍ. ຂ້າພະເຈົ້າເຫັນດີເຫັນພ້ອມກັບທັງໝົດ ການຖະແຫລງ ຂອງນາຍົກລັດ ຖະມົນຕີ ຮຸນເຊນ ໃນການພົບປະຫາລື ຂອງຂ້າພະເຈົ້າ ກັບນາຍົກລັດຖະມົນຕີ ຮຸນເຊນ ມື້ນີ້.

ຂ້າພະເຈົ້າຂໍຂອບອົກຂອບໃຈ ແລະ ສະແດງຄວາມຮູ້ບຸນຄຸນຕໍ່ສົມເດັດ ຮຸນເຊນ ອີກເທື່ອໜຶ່ງ ທີ່ໄດ້ຕ້ອນຮັບຂ້າພະເຈົ້າຢ່າງອົບອຸ່ນ ທີ່ໄດ້ໃຫ້ກຽດ ທັງໃຫ້ໂອກາດຂ້າພະເຈົ້າໄດ້ພົບປະຫາລືວຽກງານສໍາຄັນ ໃນມື້ນີ້ ແລະ ພວກເຮົາກໍ່ຕົກລົງ ເປັນເອກະພາບກັນໃນ 4 ຂໍ້ ທີ່ມີຄວາມສໍາຄັນດັ່ງກ່າວນັ້ນ ທີ່ນາຍົກລັດ ຖະມົນຕີ ຮຸນເຊນໄດ້ຖະແຫລງ ໄປແລ້ວນັ້ນ. ອັນນີ້ຖືວ່າແມ່ນການ ແກ້ໄຂບັນຫາ ທີ່ມີຄວາມສໍາຄັນ ໃຫ້ແກ່ສາຍພົວພັນມິດຕະພາບ ການຮ່ວມມືອັນມີມູນເຊື້ອ ລະຫວ່າງ ສອງຊາດຂອງພວກເຮົາລາວ-ກໍາປູເຈຍ ແລະ ການຮ່ວມມືຢ່າງໃກ້ຊິດ ລະຫວ່າງສອງລັດຖະບານ ຂອງພວກເຮົາ. ຂ້າພະເຈົ້າກໍ່ ເຫັນດີກັບນາຍົກລັດຖະມົນຕີ ຮຸນເຊນ ວ່າ ກົນໄກຕ່າງໆ ທີ່ພວກເຮົາມີຢູ່ນີ້ ກໍສືບຕໍ່ເຄື່ອນໄຫວເຮັດວຽກຮ່ວມກັນ ແຕ່ວ່າກົນໄກທີ່ຄວາມສໍາພັນ ສ່ວນຕົວລະຫວ່າງຂ້າ ພະເຈົ້າກັບນາຍົກ ຮຸນເຊນ ແມ່ນເປັນກົນໄກທີ່ດີທີ່ສຸດ ແລະ ພວກເຮົາມີຫຍັງກໍປຶກສາຫາລືກັນໄດ້ທຸກເວລາ.
ຂ້າພະເຈົ້າມີຄວາມຮູ້ສຶກອົບອຸ່ນ ແລະ ມີຄວາມເພິ່ງພໍໃຈ ຕໍ່ກັບຜົນສໍາເລັດຂອງການພົບປະ, ເຫັນດີ ພວກເຮົາກໍຕ້ອງໄດ້ໃຫ້ສອງລັດຖະມົນຕີ ຕ່າງປະເທດພົບປະກັນຢ່າງໄວເທົ່າທີ່ຈະໄວໄດ້ ຕາມທີ່ຂ້າພະເຈົ້າຮູ້ວ່າ ລັດຖະມົນຕີຕ່າງປະເທດ ກໍາປູເຈຍ Prak Sokhonh ໄດ້ເປັນເອກະພາບກັບລັດຖະມົນຕີຕ່າງປະເທດ ສະເຫລີມໄຊ ກົມມະສິດ ແລ້ວ ອັນທີ່ສອງນີ້ ສອງນາຍົກໄດ້ຕົກລົງຈະແກ້ໄຂ 4 ຈຸດ ທີ່ທາງນາ ຍົກສະເຫນີມານັ້ນໄປສາກ່ອນ ຈະເລີມຕົ້ນໄດ້ພາຍຫລັງສອງ ລັດຖະມົນຕີຕ່າງປະເທດພົບປະຫາລືກັນ ຄື: 033, ເສັ້ນຊາຍແດນ 017, ເວີນຄໍາ, ອູສະວາຍ ຫລືເຂດ 032 ທີ່ໄດ້ສະເຫນີໄປແລ້ວນັ້ນ ຈະເລີ້ມປຶກສາຫາລືແກ້ໄຂນໍາກັນໂດຍໄວ ເທົ່າທີ່ຈະໄວໄດ້, ຈາກນັ້ນພວກເຮົາຈະລົງໄປພື້ນທີຕົວຈິງ ເຂດທີ່ຄົງຄ້າງ ທີ່ພວກ ເຮົາຈະໄດ້ແກ້ໄຂນັ້ນຄື ເຂດຫ້ວຍຕະເງົ້າ, ຊຶ່ງກໍເຫັນດີນໍາກັນວ່າຈະລົງໄປກວດພື້ນທີຕົວຈິງ ບ່ອນໃດເປັນເອກພາບກັນກໍ່ປັກຫລັກໂລດ ເພື່ອສືບຕໍ່ປັກຫລັກ ໝາຍຕໍ່ໄປ ຂ້າພະເຈົ້າຄິດວ່າ ໄວຫລືຊ້າ ເຂດນີ້ກໍ່ຕ້ອງມີຫລັກຫມາຍຊາຍແດນ. ຂໍ້ທີ່ 4 ທີ່ຕົກລົງກັນຄືທ່ານສົມເດັດ ຮຸນເຊນ ນາຍົກລັດຖະມົນຕີ ໄດ້ປະກາດໄປນັ້ນພວກເຮົາຈະໄດ້ ຂຽນຈົດໝາຍເຖິງ ປະທານາທິບໍດີຝຣັ່ງ ໃຫ້ຊ່ວຍນໍາເອົາແຜນ ທີແຜນທີ່ ມາດຕາ 1/100.000 ແລະ ມາດຕາ 1/50.000, ຫລື ວ່າເອກະສານຕ່າງໆ ທີ່ພົວພັນເຖິງການກໍານົດເສັ້ນຊາຍແດນ ລະຫວ່າງລາວ ແລະ ກໍາປູເຈຍ ນີ້ສົ່ງໃຫ້ລາວ ແລະ ກໍາປູເຈຍ ເພື່ອໃຫ້ເປັນຫລັກຖານ ພ້ອມກັນປຶກສາຫາຫລື ເພື່ອແກ້ໄຂຊາຍແດນຂອງພວກເຮົາຕໍ່ໄປ. ຂ້າພະເຈົ້າເຊື່ອວ່າ ການແກ້ໄຂບັນຫາຊາຍແດນຂອງພວກເຮົາ ທັງສອງປະເທດນັ້ນຈະເຕັມໄປດ້ວຍບົນພື້ນຖານຫລັກການ, ແຫ່ງມິດ ຕະພາບ, ສະເໝີພາບ ແລະ ບໍ່ໃຫ້ໃຜໄດ້ ໃຜເສຍ. ນອກຈາກນັ້ນ, ສອງນາຍົກ ກໍໄດ້ປຶກສາຫາລືເປັນເອກະພາບກັນວ່າ ຈະປົກປັກຮັກສາຄວາມສະຫງົບ ບໍ່ໃຫ້ມີຄວາມເຄັ່ງຕຶງ ໃນເຂດຊາຍແດນທີ່ບໍ່ທັນໄດ້ຕົກລົງກັນ ອັນນີ້ແມ່ນການ ຕົກລົງ ທີ່ທັງສອງຝ່າຍ ເຫັນວ່າມີຄວາມສໍາຄັນຫລາຍ ເມື່ອເປັນແນວນັ້ນພວກເຮົາ ກໍຈະຕ້ອງໄດ້ປົກຮັກສາໃຫ້ສະພາບການເປັນຢູ່ໃນຂົງເຂດນັ້ນ ໃຫ້ເປັນປົກກະຕິ ແລະ ບໍ່ໃຫ້ມີການສ້າງຄວາມເຄັ່ງຕຶງໃດໆ ຕໍ່ກັນ ອັນນີ້ເປັນການ ຕົກລົງທີ່ມີຄວາມສໍາ ຄັນຫລາຍ ທີ່ສອງນາຍົກພວກເຮົາໄດ້ປຶກສາຫາລືກັນ ແລະ ຕົກລົງເປັນເອກະພາບກັນ.
ໂດຍຫລັກການ ທີ່ພວກເຮົາຕົກລົງກັນມື້ນີ້ 4 ຫລັກການນັ້ນ ຂ້າພະເຈົ້າເຊື່ອໝັ້ນທີ່ສຸດວ່າ ເສັ້ນຊາຍແດນ ຂອງພວກເຮົາຈະໄດ້ຮັບການສືບຕໍ່ແກ້ໄຂ ຕໍ່ໄປສ່ວນຍັງເຫລືອ 13-14% ນັ້ນຈະສາມາດມີມື້ໜຶ່ງ ພວກເຮົາຈະມີ ເສັ້ນ ຊາຍແດນທີ່ສົມບູນແບບ ແລະ ເຮັດໃຫ້ເປັນມໍລະດົກຕົກທອດ ໃຫ້ລູກຫລານພວກເຮົາສືບທອດຕໍ່ໆໄປ. ບົນພື້ນຖານດັ່ງກ່າວນີ້ ນໍ້າໃຈມິດຕະພາບທີ່ມີມູນເຊື້ອ, ການຮ່ວມມືທີ່ມີຫມາກມີຜົນ ດ້ວຍຄວາມຈິງໃຈ ລະຫວ່າງປະ ຊາຊົນສອງ ປະເທດພວກເຮົາ ຈະສືບຕໍ່ໄດ້ຮັບການຜັນຂະຫຍາຍເຂົ້າສູ່ລວງເລິກ ມີປະສິດທິຜົນ ກ້າວໄປສູ່ເຮັດໃຫ້ປະຊາຊົນສອງ ປະເທດພວກເຮົາ ສືບຕໍ່ເປັນບ້ານໃກ້ເຮືອນຄຽງທີ່ດີ, ບ້ານພີ່ເມືອງນ້ອງບ້ານແກ່ວ ເມືອງດອງຕໍ່ໄປ.
ອີກເທື່ອຫນຶ່ງຂ້າພະເຈົ້າ ຂໍຂອບໃຈທ່ານສົມເດັດ ອັກຄະມະຫາ ເສນາ ບໍດີ ເຕໂຈ ຮຸນເຊນ, ທີ່ໄດ້ຕ້ອນຮັບຂ້າພະເຈົ້າຢ່າງອົບອຸ່ນ ແລະ ຕອບສະໜອງການສະເໜີ ມາພົບສົມເດັດ ຮຸນເຊນໃນມື້ນີ້.
ຂໍຂອບໃຈສື່ມວນຊົນທີ່ໄດ້ໃຫ້ຄວາມສົນໃຈ ໃນການເອົາຂ່າວໃນມື້ນີ້.