ສອງນາຍົກ ລາວ-ກຳປູເຈຍ ຫາລືແນວທາງແກ້ໄຂບັນຫາຍຊາຍແດນ

ຂປລ. ສືບຕໍ່ຈາກການປຶກສາຫາລື ກ່ຽວກັບບັນຫາຊາຍແດນ ຢູ່ເຂດບໍລິເວນແກ້ງຕໍມໍຄອຍ ແລະ ຫ້ວຍຕະເງົາ ໃນວັນທີ 12 ສິງຫາ 2017 ທີ່ນະຄອນຫລວງວຽງຈັນ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ເດີນທາງໄປພົບປະກັບ ສົມເດັດ ອັກຄະມະຫາ ເສນາບໍດີ ເຕໂຈ ຮຸນແຊນ, ນາຍົກລັດຖະມົນຕີ ແຫ່ງ ຣາຊະອານາຈັກກຳປູເຈຍ ໃນວັນທີ 1 ກັນຍາ 2017 ນີ້, ທີ່ພະນົມເປັນ ລາດຊະອານາຈັກກຳປູເຈຍ ເພື່ອສືບຕໍ່ປຶກສາຫາລືກ່ຽວກັບ ທິດທາງການແກ້ໄຂ ບັນຫາຊາຍແດນ ລາວ-ກຳປູເຈຍ.

ການພົບປະ ດັ່ງກ່າວ, ສອງນາຍົກລັດຖະມົນຕີ ລາວ-ກຳປູເຈຍ ໄດ້ຕົກລົງເປັນເອກະພາບກັນ ກ່ຽວກັບທິດທາງ ໃນການແກ້ໄຂຈຸດຄົງຄ້າງຊາຍແດນ ລະຫວ່າງສອງປະເທດ ຄື: ມອບໃຫ້ລັດຖະ ມົນຕີຕ່າງປະເທດ ຂອງ 2 ປະເທດ ລາວ-ກຳປູເຈຍ ພົບປະກັນ ໃນເວລາອັນໄວ ເພື່ອປຶກສາຫາລື ໃນລາຍລະອຽດ ກ່ຽວກັບວິທີການແກ້ໄຂບັນຫາ; ໃຫ້ຄະນະຊາຍແດນ ຂອງສອງປະເທດ ລົງກວດກາພື້ນທີ່ຕົວຈິງ ເພື່ອແກ້ໄຂບັນຫາຊາຍແດນ ຢູ່ 4 ຈຸດ ຄົງຄ້າງ; ໃຫ້ຄະນະກຳມະການຊາຍແດນ ຂອງສອງຝ່າຍ ລົງກວດກາຕົວຈິງ ຢູ່ບໍລິເວນ ແກ້ງຕໍມໍຄອຍ ແລະ ຫ້ວຍຕະເງົາ ເພື່ອກຳນົດທີ່ຕັ້ງ ຂອງຫລັກໝາຍຊາຍແດນ ເພື່ອໃຫ້ພ້ອມກັນຕົກລົງ ປັກຫລັກໝາຍຊາຍແດນ ໃຫ້ສຳເລັດໂດຍໄວ, ຈຸດໃດທີ່ສອງຝ່າຍສາມາດຕົກລົງກັນໄດ້ ກໍ່ໃຫ້ປັກຫລັກໝາຍ ໃນທັນທີ ເພື່ອກ້າວໄປສູ່ ການປັກຫລັກໝາຍຕໍ່ໆໄປ; ສອງນາຍົກລັດຖະມົນຕີ ລາວ-ກຳປູເຈຍ ຈະຂຽນຈົດໝາຍທາງການເຖິງ ປະທານາທິບໍດີຝຣັ່ງ ເພື່ອໃຫ້ ລັດຖະບານຝຣັ່ງ ສົ່ງແຜນທີມາດຕາສ່ວນ 1/100,000 ແລະ 1/50,000 ທີ່ພິມໂດຍພະແນກ ແຜນທີອິນດູຈີນ ແລະ ບັນດາເອກະສານອື່ນໆ ທີ່ກ່ຽວຂ້ອງກັບການກຳນົດເສັ້ນຊາຍແດນ ລາວ-ກຳປູເຈຍ ສົ່ງໃຫ້ ລັດຖະບານລາວ ແລະ ລັດຖະບານກຳປູເຈຍ ເພື່ອນຳໃຊ້ເປັນຂໍ້ມູນ ແລະ ຫລັກຖານ ໃນການແກ້ໄຂບັນຫາເສັ້ນຊາຍແດນ ລະຫວ່າງ 2 ປະເທດ. ພ້ອມກັນນັ້ນ, ສອງນາຍົກລັດຖະມົນຕີ ຍັງໄດ້ຕົກລົງ ຈະຮັກສາ ຄວາມສະຫງົບ ແລະ ຄວາມໝັ້ນຄົງ ໃນບໍລິເວນຊາຍແດນ ລະຫວ່າງສອງປະເທດ ເພື່ອໃຫ້ປະຊາຊົນໄດ້ທຳມາຫາກິນ ແລະ ດຳລົງຊີວິດ ໃນຄວາມສະຫງົບ ແລະ ມີມິດໄມຕີຕໍ່ກັນ.
ຜົນຂອງການພົບປະລະຫວ່າງ 2 ນາຍົກລັດຖະມົນຕີ ລາວ-ກຳປູເຈຍ ໃນຄັ້ງນີ້ ຖືເປັນການສະແດງອອກ ແລະ ຢັ້ງຢືນອີກເທື່ອໜຶ່ງ ເຖິງຄວາມຕັ້ງໃຈ ແລະ ຄວາມຈິງໃຈ ຂອງສອງລັດຖະບານ ກໍຄືປະຊາຊົນ 2 ຊາດ ລາວ-ກຳປູເຈຍ ໃນການແກ້ໄຂ ບັນຫາຊາຍແດນຮ່ວມກັນ ເພື່ອຮັກສາມູນເຊື້ອ ແຫ່ງມິດຕະພາບ ແລະ ຄວາມເປັນເພື່ອບ້ານທີ່ດີຕໍ່ກັນຕະຫລອດໄປ.