ສານທ່ານນາຍົກລັດຖະມົນຕີ ແຫ່ງ ສປປ ລາວ ເນື່ອງໃນວັນໄຂສົກຮຽນໃໝ່ ສົກຮຽນປີ 2017-2018

- ຜູ້ບໍລິຫານການສຶກສາ, ຄູອາຈານ, ນັກຮຽນ-ນັກສຶກ ແລະ ພໍ່ແມ່, ພີ່ນ້ອງ ປວງຊົນລາວ ໃນທົ່ວປະເທດ ທີ່ເຄົາລົບ ແລະ ຮັກແພງ.
ທ່າມກາງບັນຍາກາດ ທີ່ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ພວມພ້ອມກັນ ຜັນຂະຫຍາຍ ແລະ ຈັດຕັ້ງປະຕິບັດມະຕິ ກອງປະຊຸມໃຫ່ຍ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII (2016-2020) ຢ່າງຕັ້ງໜ້າ ແລະ ເປັນຂະບວນຟົດຟື້ນ, ພັກ ແລະ ລັດຖະບານ ຍາມໃດກໍໄດ້ຖືເອົາ ການພັດທະນາ ຊັບພະຍາກອນມະນຸດ ເປັນວຽກງານສໍາຄັນ,

ໄດ້ເອົາໃຈໃສ່ເປັນພິເສດ ຕໍ່ການສ້າງເງື່ອນໄຂ ແລະ ໂອກາດທີ່ເທົ່າທຽມກັນ ໃຫ້ແກ່ທຸກຄົນໄດ້ເຂົ້າເຖິງ ການສຶກສາ, ປັບປຸງ ແລະ ຍົກຄຸນນະພາບ ຂອງການຮຽນການສອນ ແລະ ພັດທະນາ ຊັບພະຍາກອນມະນຸດຂອງຊາດ ໃຫ້ມີຄວາມຮູ້ຄວາມສາມາດ ຕອບສະໜອງໄດ້ກັບ ຄວາມຮຽກຮ້ອງຕ້ອງການ ຂອງການພັດທະນາ ແນໃສ່ ນໍາເອົາປະເທດຊາດ ຫລຸດພົ້ນອອກຈາກ ຄວາມດ້ອຍພັດທະນາ ໃນປີ 2020 ກ້າວເດີນຕາມທິດສັງຄົມນິຍົມ.
ໃນໂອກາດ ວັນເປີດສົກຮຽນໃໝ່ ສົກປີ 2017-2018 ນີ້, ຂ້າພະເຈົ້າ ຂໍຕາງໜ້າໃຫ້ການນໍາພັກ ແລະ ລັດຖະບານ ສະແດງຄວາມຢື້ຢາມ ຖາມຂ່າວອັນອົບອຸ່ນ ມາຍັງບັນດາ ຜູ້ບໍລິຫານການສຶກສາ, ຄູ-ອາຈານ, ນັກ ຮຽນ-ນັກສຶກສາ ແລະ ພໍ່ແມ່-ພີ່ນ້ອງປວງຊົນລາວ ທົ່ວປະເທດທຸກຖ້ວນໜ້າ ນະໂອກາດນີ້ດ້ວຍ.
ຄືດັ່ງທີ່ພວກເຮົາຮູ້ນໍາກັນແລ້ວວ່າ ສະພາບການທາງດ້ານການເມືອງ, ເສດຖະກິດ-ສັງຄົມ ແລະ ສິ່ງແວດລ້ອມ ທັງພາຍໃນ ແລະ ຕ່າງປະເທດ ໄດ້ມີການປ່ຽນແປງ ແລະ ສ້າງໃຫ້ມີ ທັງກາລະໂອກາດ ເອື້ອອຳ ນວຍ, ທ້າທາຍທົດສອບຫລາຍປະການ ຊຶ່ງໄດ້ສົ່ງຜົນກະທົບໂດຍກົງ ຕໍ່ຊີວິດການເປັນຢູ່ ຂອງພະນັກງານ, ຄູ-ອາຈານ, ທະຫານ, ຕຳຫລວດ, ປະຊາຊົນລາວບັນດາເຜົ່າ ແລະ ນັກຮຽນ-ນັກສຶກສາ ກໍຄື ການພັດທະນາສ້າງສາປະເທດຊາດ ເວົ້າລວມ, ເວົ້າສະເພາະ ກໍແມ່ນຕໍ່ການພັດທະນາ ການສຶກສາພວກເຮົາ.
ເຖິງຢ່າງໃດກໍຕາມ, ດ້ວຍແນວທາງ ນະໂຍບາຍອັນຖືກຕ້ອງຂອງພັກ, ດ້ວຍຄວາມສາມັກຄີ ທີ່ເປັນປຶກແຜ່ນແໜ້ນໜາ, ດ້ວຍມູນເຊື້ອດຸໝັ່ນ, ພາກພຽນ ແລະ ມານະອົດທົນ ແລະ ດ້ວຍຄວາມຮັບຜິດຊອບ ທີ່ເປັນເຈົ້າການ ຕໍ່ໜ້າທີ່ການເມືອງຂອງຕົນ, ພະນັກງານ, ຄູ-ອາຈານ, ທະຫານ, ຕຳຫລວດ, ປະຊາຊົນລາວ ບັນດາເຜົ່າ ແລະ ນັກຮຽນ-ນັກສຶກສາ ໄດ້ພ້ອມກັນ ປະກອບສ່ວນຢ່າງໃຫຍ່ຫລວງ ເຂົ້າໃນພາລະກິດ ປົກປັກຮັກສາ ແລະ ພັດທະນາປະເທດຊາດ ເຮັດໃຫ້ຕະຫລອດໄລຍະ 1 ປີຜ່ານມາ ການພັດທະນາ ຢູ່ປະເທດເຮົາ ໄດ້ມີທ່ວງທ່າ ກ້າວຂຶ້ນທີ່ໜັກແໜ້ນ ສັງຄົມມີຄວາມສະຫງົບ ໂດຍພື້ນຖານ, ເສດຖະກິດມີການ ຂະຫຍາຍຕົວທີ່ເຂັ້ມແຂງ, ຊີວິດການເປັນຢູ່ ຂອງປະຊາຊົນລາວບັນດາເຜົ່າ ໄດ້ຮັບການປັບປຸງດີຂຶ້ນ, ຊື່ສຽງ ແລະ ຖານະບົດບາດຂອງ ສປປ ລາວ ກໍນັບມື້ນັບໂດດເດັ່ນຂຶ້ນ ຢູ່ໃນເວທີຂອງພາກພື້ນ ແລະ ສາກົນ.
ສໍາລັບການພັດທະນາ ດ້ານການສຶກສາ ໃນສົກຮຽນ 2016-2017 ຜ່ານມາ ພວກເຮົາກໍມີ ຜົນສຳເລັດຫລາຍດ້ານທີ່ໜ້າຊົມເຊີຍ. ພວກເຮົາໄດ້ມີຜົນສຳເລັດ ຫລາຍດ້ານໃນການປະຕິຮູບ ລະບົບການສຶກສາ ເປັນຕົ້ນແມ່ນ ສາມາດຍົກຄຸນນະພາບ ຂອງວຽກງານກິລາ-ກາຍະກຳ, ປັບປຸງຫລັກ ສູດການຮຽນ-ການສອນ, ສ້າງໃຫ້ຄູສອນເກັ່ງ, ຫລໍ່ຫລອມໄດ້ ນັກຮຽນ-ນັກສຶກສາ ທີ່ມີຄຸນສົມບັດ ທັງຮຽນດີ-ຮຽນເກັ່ງ, ພັດທະນາໄດ້ໂຮງຮຽນຕົວແບບ, ໂຮງຮຽນສີຂຽວ, ໂຮງຮຽນປອດສິ່ງເສບຕິດ ແລະ ອື່ນໆ. ເດັກຢູ່ເກນອາຍຸເຂົ້າຮຽນ ໄດ້ເຂົ້າເຖິງການສຶກສາ ແລະ ກິລາ ຫລາຍຂຶ້ນ, ນັກຮຽນ-ນັກສຶກສາ ໄດ້ມີຄວາມຕັ້ງໃຈຕໍ່ການຮຽນ ດ້ວຍຕົນເອງ ແລະ ມີຜົນການຮຽນດີຂຶ້ນ. ເວົ້າລວມແລ້ວ ໃນສົກຮຽນທີ່ຜ່ານມາ ພວກເຮົາໄດ້ສືບຕໍ່ ຂະຫຍາຍຕົວທາງດ້ານປະລິມານ ແລະ ດ້ານຄຸນນະພາບ ຂອງການສຶກສາ ແລະ ບັນລຸຕາມມາດຕະຖານ ຮັບປະກັນຄຸນນະພາບ ການສຶກສາແຫ່ງຊາດ ແລະ ໃນບາງດ້ານ ແມ່ນສາມາດ ຍົກລະດັບມາດຕະຖານ ການສຶກສາຂອງພວກເຮົາ ໃຫ້ຫຍັບໃກ້ເຂົ້າ ແລະ ເທົ່າທຽມກັບມາດຕະຖານ ຂອງບັນດາປະເທດ ໃນພາກພື້ນ ແລະ ສາກົນ.
ຕາງໜ້າໃຫ້ການນໍາຂອງພັກ ແລະ ລັດຖະບານ, ຂ້າພະເຈົ້າ ຂໍສະແດງຄວາມຍ້ອງຍໍ ຊົມເຊີຍມາຍັງຄະນະພັກ-ຄະນະນໍາກະຊວງ ສຶກສາທິການ ແລະ ກິລາ, ບັນດາມະຫາວິທະຍາໄລ, ໂຮງຮຽນວິຊາຊີບ, ໂຮງ ຮຽນສາມັນສຶກສາ, ບັນດາສະຖາບັນ ການສຶກສາທຸກຂັ້ນ ແລະ ບັນດາການຈັດຕັ້ງ ທັງພາກລັດ ແລະ ເອກະຊົນທີ່ກ່ຽວຂ້ອງ ຕະຫລອດຮອດ ພະນັກງານອາວຸໂສບໍານານ, ພໍ່ແມ່ປະຊາຊົນບັນດາເຜົ່າ ແລະ ພວກຫລານ ນັກຮຽນ-ນັກສຶກສາ ທຸກຖ້ວນໜ້າ ທີ່ໄດ້ປະກອບສ່ວນຢ່າງຕັ້ງໜ້າ ຕໍ່ຜົນສໍາເລັດດັ່ງທີ່ກ່າວມານີ້. ພ້ອມກັນນີ້, ກໍຂໍສະແດງ ຄວາມຂອບໃຈມາຍັງ ຄູ່ຮ່ວມພັດທະນາ, ບັນດາປະເທດເພື່ອນມິດ, ອົງການຈັດຕັ້ງສາກົນຕະຫລອດຮອດ ອົງການຈັດຕັ້ງ ທີ່ບໍ່ສັງກັດລັດຖະບານ ທີ່ໄດ້ໃຫ້ການຊ່ວຍເຫລືອ ແລະ ມີສ່ວນຮ່ວມເຂົ້າໃນການພັດທະນາ ວຽກງານການສຶກສາຂອງ ສປປ ລາວ ໃຫ້ນັບມື້ນັບເຕີບໃຫຍ່ເຂັ້ມແຂງ ແລະ ເປັນກໍາລັງແຮງໃຫ້ແກ່ ການພັດທະນາ ເສດຖະກິດ-ສັງຄົມແຫ່ງຊາດ ຕະຫລອດມາ ແລະ ຫວັງຢ່າງຍິ່ງວ່າ ໃນຕໍ່ໜ້າຍັງຈະໄດ້ສືບຕໍ່ ໃຫ້ການສະໜັບສະໜູນ ແລະ ຊ່ວຍເຫລືອຕື່ມອີກ.
ຜົນສຳເລັດທີ່ກ່າວມານັ້ນ, ໄດ້ເປັນພື້ນຖານອັນໜັກແໜ້ນ ໃຫ້ແກ່ການພັດທະນາ ເສດຖະກິດ-ສັງຄົມ ຂອງປະເທດເຮົາ, ແຕ່ພວກເຮົາກໍຍັງ ປະເຊີນກັບອຸປະສັກ ແລະ ສິ່ງທ້າທາຍທົດສອບ ຫລາຍປະການ ເປັນຕົ້ນ: ການຂະຫຍາຍ ຕາໜ່າງການສຶກສາ ໂດຍສະເພາະ ການສຶກສາກ່ອນໄວຮຽນ ໄປສູ່ເຂດຊົນນະບົດ ແລະ ເຂດຫ່າງໄກສອກຫລີກ ຍັງບໍ່ທັນທົ່ວເຖິງ, ການບັນລຸເປົ້າໝາຍ ການສຶກສາເພື່ອທຸກຄົນ ກໍຄື ເປົ້າໝາຍສະຫັດສະຫວັດ ດ້ານການພັດທະນາ ຍັງມີບາງຕົວຊີ້ບອກ ກໍຍັງເປັນສິ່ງທ້າທາຍ ໂດຍສະເພາະ ອັດຕາການລອດເຫລືອ ຂອງນັກຮຽນຊັ້ນປະຖົມ; ຄວາມສະເໜີພາບ ລະຫວ່າງ ຍິງ-ຊາຍ; ການເຂົ້າເຖິງການສຶກສາ ທີ່ຍັງແຕກໂຕນກັນ ລະຫວ່າງ ຕົວເມືອງ, ຊົນນະບົດ ແລະ ເຂດຫ່າງໄກສອກຫລີກ ໂດຍສະເພາະ ໃນສາຍອາຊີວະສຶກສາ ແລະ ການສຶກສາຊັ້ນສູງ; ຄ່ານິຍົມຂອງຜູ້ປົກຄອງ ແລະ ຜູ້ຮຽນ ທີ່ຕ້ອງການການສຶກສາຂັ້ນປະລິນຍາຕີຂຶ້ນໄປ ແລະ ບໍ່ເຫັນຄວາມສໍາຄັນ ຂອງການສຶກສາຂັ້ນ ອາຊີວະສຶກສາ; ການສ້າງສີມືແຮງງານ ຍັງບໍ່ທັນສອດຄ່ອງ ກັບຄວາມຕ້ອງການ ຂອງຕະຫລາດແຮງງານ ແລະ ອື່ນໆ. ບັນຫາເຫລົ່ານີ້, ພວກເຮົາຈະຕ້ອງໄດ້ສຸມໃສ່ແກ້ໄຂ.
ພີ່ນ້ອງຮ່ວມຊາດ ທີ່ຮັກແພງທັງຫລາຍ
ເພື່ອເຮັດໃຫ້ລະບົບ ການສຶກສາຂອງພວກເຮົາ ເຕີບໃຫຍ່ຂະຫຍາຍຕົວ ຢ່າງໜັກແໜ້ນ, ເຂັ້ມແຂງ ແລະ ພັດທະນາໄປຕາມວິໃສທັດ ຂອງຂະແໜງການ ການສຶກສາ ທີ່ພວກເຮົາໄດ້ກຳນົດ ຄື: " ຮອດປີ 2030 ພົນລະເມືອງລາວທຸກຄົນ ໄດ້ຮັບການສຶກສາ ທີ່ມີຄຸນນະພາບ ຢ່າງສະເໝີພາບ ແລະ ເທົ່າທຽມກັນ ເພື່ອໃຫ້ເຂົາເຈົ້າ ໄດ້ພັດທະນາຕົນເອງ ກາຍເປັນພົນລະເມືອງດີຂອງຊາດ, ມີຄຸນສົມບັດ, ມີສຸຂະພາບເຂັ້ມແຂງ, ມີຄວາມຮູ້ຄວາມສາມາດສູງ, ມີຄວາມເປັນມືອາຊີບ ເພື່ອພັດທະນາປະເທດຊາດ ໃຫ້ສີວິໄລຍືນຍົງ, ສາມາດເຊື່ອມໂຍງ, ແຂ່ງຂັນກັບພາກພື້ນ ແລະ ສາກົນໄດ້".
ຂ້າພະເຈົ້າ ຂໍຮຽກຮ້ອງມາຍັງບັນດາ ຜູ້ບໍລິຫານການສຶກສາ ແລະ ຄູ-ອາຈານ ຈົ່ງເພີ່ມທະວີ ຄວາມຮັບຜິດຊອບ ໃນການປະຕິບັດໜ້າທີ່ ການເມືອງຂອງຕົນ ດ້ວຍຄວາມບໍລິສຸດ, ຊື່ສັດ ແລະ ນໍ້າໃຈເສຍສະຫລະສູງ ໃນການບໍາລຸງສ້າງ ນັກຮຽນ-ນັກສຶກສາ ທີ່ເປັນກຳລັງແຮງຂອງຊາດ ທັງໃນປະຈຸບັນ ແລະ ອານາຄົດ.
ສະຖານການສຶກສາ ຕ້ອງເປັນເຈົ້າການ ໃນການປະຕິບັດກົດໝາຍ ແລະ ລະບຽບການທີ່ກ່ຽວຂ້ອງ ກັບການສຶກສາ ເພື່ອບໍ່ເປີດໂອກາດ ໃຫ້ມີການເຄື່ອນໄຫວ ແລະ ສິ່ງລໍ້ລວງ, ຊັກຈູງ ນັກຮຽນ-ນັກສຶກສາ ໄປໃນທາງທີ່ເຊື່ອມເສຍ ແລະ ເປັນພິດເປັນໄພຕໍ່ການສຶກສາ. ນັກຮຽນ-ນັກສຶກສາ ຕ້ອງເອົາໃຈໃສ່ ແລະ ຕັ້ງໃຈຮໍ່າຮຽນ, ຖືເອົາການຮໍ່າຮຽນ ເປັນການກໍ່ສ້າງ ອານາຄົດຂອງຕົນ ກໍຄື ອານາຄົດຂອງຊາດ.
ເພື່ອເຮັດໃຫ້ ການໄຂສົກຮຽນໃໝ່ ສົກປີ 2017-2018 ໄດ້ມີບັນຍາກາດທີ່ດີ ແລະ ທັນກັບເວລາຕາມປະຕິທິນປີ ການສຶກສາຂອງແຕ່ລະຊັ້ນ, ແຕ່ລະສາຍ. ສະນັ້ນ, ຈຶ່ງຂໍຮຽກຮ້ອງມາຍັງ ຄະນະພັກຄະນະນໍາ, ຜູ້ບໍລິຫານການສຶກສາ, ຄະນະພັດທະນາ ການສຶກສາທຸກຂັ້ນ ແລະ ທຸກພາກສ່ວນໃນສັງຄົມ ຈົ່ງເປັນເຈົ້າການຮ່ວມກັນ ກະກຽມຄວາມພ້ອມ ແລະ ອຳນວຍຄວາມສະດວກ ຕາມເງື່ອນໄຂ ແລະ ຄວາມສາມາດຕົວຈິງ ຂອງຂະແໜງການ ແລະ ທ້ອງຖິ່ນ ໂດຍສະເພາະແມ່ນ ການຊັບຊ້ອນບັນຈຸຄູສອນ, ກະກຽມອາຄານສະຖານທີ່ຫ້ອງຮຽນ, ອຸປະກອນ ການສອນ-ການຮຽນ, ບ່ອນທີ່ພັກພາອາໄສຂອງຄູ ຢູ່ເຂດຫ່າງໄກສອກຫລີກ ແລະ ອື່ນໆ... ເພື່ອຮັບໃຊ້ໃຫ້ແກ່ ການເປີດສົກຮຽນ ແລະ ຮັບໃຊ້ໃຫ້ແກ່ ການສອນ-ການຮຽນ ຕະຫລອດສົກຮຽນໃໝ່ ໃຫ້ໄດ້ຮັບຜົນດີ.
ທ້າຍສຸດນີ້, ຕາງໜ້າໃຫ້ການນໍາພັກ ແລະ ລັດຖະບານ, ຂ້າພະເຈົ້າ ຂໍອວຍພອນໄຊອັນປະເສີດ ມາຍັງຜູ້ບໍລິຫານ ການສຶກສາ, ຄູ-ອາຈານ, ນັກຮຽນ-ນັກສຶກສາ, ພະນັກງານ-ລັດຖະກອນ, ທະຫານ, ຕຳຫລວດ ຕະຫລອດຮອດ ປະຊາຊົນລາວບັນດາເຜົ່າ ໃນທົ່ວປະເທດ ຈົ່ງມີສຸຂະພາບເຂັ້ມແຂງ, ມີຄວາມສຸກຄວາມຈະເລີນ ແລະ ມີຜົນສຳເລັດ ໃນໜ້າທີ່ວຽກງານຂອງຕົນ.