ກຽມພົບງານສະແດງຮ້ອງເພງຮ່ວມສະໄໝໄວໜຸ່ມອາຊຽນ ທີ່ນະຄອນຫລວງວຽງຈັນ

ຂປລ. ເຊີນຊວນມວນຊົນຊາວນະຄອນຫລວງວຽງຈັນ ເຂົ້າຊົມງານສະແດງຮ້ອງເພງ ຮ່ວມສະໄໝ ໄວໝຸ່ມອາຊຽນ 2017, ໂດຍສະເພາະໄວໜຸ່ມ ນັກຮຽນ-ນັກສຶກສາ ທີ່ມັກດ້ານສຽງເພັງ ແລະ ດົນຕີ ເຂົ້າຊົມເພື່ອສ້າງບັນຍາກາດ ແລະ ເປັນກຳລັງໃຈ ໃຫ້ກັບນັກຮ້ອງທັງ 10 ປະເທດອາຊຽນ, ຊຶ່ງງານດັ່ງກ່າວ ຈະໄດ້ຈັດຂຶ້ນ ໃນຕອນຄ່ຳຄືນຂອງວັນທີ 25 ສິງຫາ ນີ້ ທີ່ຫໍວັດທະນະທຳແຫ່ງຊາດ ນະຄອນຫລວງ ວຽງຈັນ, ເລີ່ມແຕ່ເວລາ 19:30 ໂມງ ເປັນຕົ້ນໄປ ໂດຍເຂົ້າຊົມບໍ່ໄດ້ເສຍຄ່າ.

ທ່ານ ຄຳໃບ ໂພທິສານ ປະທານສະມາຄົມນັກປະພັນລາວ, ທັງເປັນຫົວໜ້າອະນຸກຳມະການ ວັດທະນະທຳອາຊຽນ ກ່າວໃນງານຖະແຫລງຂ່າວ ກ່ຽວກັບງານສະແດງຮ້ອງເພງຮ່ວມສະໄໝໄວ ໝຸ່ມອາຊຽນ 2017 ໃນວັນທີ 23 ສິງຫາ ນີ້ ວ່າ: ການຈັດງານຄັ້ງນີ້, ເປັນການແລກປ່ຽນບົດຮຽນທາງ ດ້ານດົນຕີ ແລະ ສີລະປະການສະແດງ ລະຫວ່າງປະເທດສະມາຊິກອາຊຽນດ້ວຍກັນ ໂດຍມີຈຸດປະສົງເພື່ອສ້າງຄວາມເຂົ້າໃຈ ແລະ ຮຽນຮູ້ວັດທະນະທຳ ຊຶ່ງກັນ ແລະ ກັນ, ໂດຍຜ່ານດົນຕີ ແລະ ສຽງເພງ, ທັງເປັນເວທີແລກປ່ຽນຄວາມຮູ້ ແລະ ປະສົບການ ຂອງບັນດານັກຮ້ອງໄວໜຸ່ມ ທີ່ມີຊື່ສຽງ ຂອງແຕ່ລະ ປະເທດອາຊຽນ, ສິ່ງສຳຄັນຍັງເປັນການໂຄສະນາເຜີຍແຜ່ ສິລະປະວັດທະນະທຳ ໂດຍສະເພາະແມ່ນດ້ານດົນຕີ, ສຽງເພງ ແລະ ການສະແດງຕ່າງໆ ທີ່ເປັນເອກະລັກ ເພື່ອສ້າງໃຫ້ສັງຄົມມີຄວາມສຸກຮ່ວມກັນ.