ລາວ-ຫວຽດນາມ ແລກປ່ຽນບົດຮຽນດ້ານການປ່ຽນແປງໃນຍຸກໃໝ່ຂອງສື່

ຂປລ. ສະມາຄົມນັກຂ່າວແຫ່ງ ສປປ ລາວ ໄດ້ຈັດຕັ້ງຮັບຟັງ ປາຖະກະຖາຫົວຂໍ້ “ການປ່ຽນແປງໃນຍຸກໃໝ່ຂອງສື່ ແລະ ສິ່ງທ້າທາຍຕໍ່ສື່ມວນຊົນ ບົດຮຽນຂອງ ສສ ຫວຽດນາມ” ໃນໂອກາດຄົບຮອບ 67 ປີ ຂອງວັນສື່ມວນຊົນລາວ. ໃນວັນທີ 21 ສິງຫາ 2017 ນີ້ ທີ່ນະຄອນຫລວງວຽງຈັນ, ໂດຍມີທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທັງເປັນປະທານ ສະມາຄົມນັກຂ່າວ ແຫ່ງ ສປປ ລາວ, ມີນັກວິທະຍາກອນຈາກ ສສ ຫວຽດນາມ, ພ້ອມດ້ວຍບັນດາສື່ມວນຊົນລາວ ຈາກທຸກຂະແໜງການເຂົ້າຮ່ວມ.

ໃນໂອກາດດັ່ງກ່າວ, ທ່ານ ເຈືອງ ຫງອກນາມ ຫົວໜ້າອໍານວຍການ ສະຖາບັນສື່ສານມວນຊົນ ແລະ ໂຄສະນາ ສສ ຫວຽດນາມ ໄດ້ຍົກໃຫ້ເຫັນການເຕີບໃຫຍ່ ຂະຫຍາຍຕົວ ວຽກງານຂອງວຽກງານສື່ມວນຊົນຢູ່ ສສ ຫວຽດນາມ, ການຊີ້ນໍາໆພາສື່ມວນຊົນ, ການຂະຫຍາຍຕົວຂອງສື່, ສິ່ງທ້າທາຍປ່ຽນແປງ ແລະ ການສ້າງບຸກຄະລາກອນຢູ່ ສສ ຫວຽດນາມ, ເຊິ່ງມາຮອດປັດຈຸບັນ ອົງການສື່ມວນຊົນຢູ່ ສສ ຫວຽດນາມ ມີຫລາຍກວ່າ 1000 ແຫ່ງ. ໃນນັ້ນ, ສື່ສິ່ງພິີມມີເຖິງ 859 ກວ່າສະບັບ, ສໍາລັບສື່ສິ່ງພີມທີ່ເປັນ ກະບອກສຽງຂອງ ພັກ-ລັດ ກໍມີໜັງສື່ພີມປະຊາຊົນ, ໜັງສື່ພີມກອງທັບ, ພ້ອມນັ້ນກໍມີສໍານັກຂ່າວສານຫວຽດນາມ ທີ່ເປັນສໍານັກໃຫ້ ຂໍ້ມູນຫລັກຢູ່ຫວຽດນາມ ແລະ ສໍານັກພີມອື່ນໆ. ສໍາລັບສື່ເອເລັກໂທນິກມີ 130 ກວ່າເວັບໄຊ. ມີການຂະຫຍາຍຕົວຢ່າງວ່ອງໄວ ຂອງບັນດາສື່ຕ່າງໆ ແລະ ເປັນສິ່ງທ້າທາຍສໍາລັບຂະແໜງສື່ ທີ່ໄດ້ຖືເອົາການຂະຫຍາຍຕົວ ເປັນກະບອກສຽງ ໃນການໂຄສະນາ, ລະບຽບກົດໝາຍ, ການສ່ອງແສງບັນຫາຕ່າງໆ ໃນສັງຄົມ, ແນວທາງນະໂຍບາຍ ຂອງພັກ-ລັດ ໄດ້ຢ່າງວ່ອງໄວ ແລະ ຖືກຕ້ອງ.
ຄຽງຄູ່ກັນນັ້ນ, ການຂະຫຍາຍຕົວດັ່ງກ່າວ ຍັງສົ່ງຜົນກະທົບ ເຮັດໃຫ້ເກີດມີ ຄວາມຂັດແຍ່ງ ໃນວຽກງານ ສື່ດ້ວຍກັນເອງ ແລະ ຮ້າຍໄປກວ່ານັ້ນ ກໍຍາກຕໍ່ການຄວບຄຸມໄດ້. ຖ້າມີການຄວບຄຸມຫລຸດຜ່ອນລົງ ໄດ້ທໍ່ໃດຍິ່ງເປັນການດີ ແລະ ຈະໃຫ້ເຫລືອພຽງ 30% ຂອງການພັດທະນາ ລະບົບສື່ທັງໝົດ. ໃນນັ້ນການພັດທະນາ ບຸກຄະລະກອນ ຍິ່ງເປັນບັນສໍາຄັນ ເພາະເປັນການປ່ຽນແປງ ໃນຍຸກໃໝ່ຂອງສື່ ແລະ ສິ່ງທ້າທາຍ ເພາະປັດຈຸບັນ ສື່ມວນຊົນພາກພື້ນ ແລະ ໃນໂລກ ກໍມີການຂະຫຍາຍຕົວ ຢ່າງວ່ອງໄວ ໃນການເຊື່ອມຕົວເຂົ້າສູ່ ລະບົບທັນສະໄໝ ເຊິ່ງເປັນການຊຸກຍູ້ໃຫ້ສື່ມວນຊົນ ເຮົາຕ້ອງໄດ້ບຸກບືນ ແລະ ປັບປຸງຕົນເອງ ໃຫ້ທັນກັບຍຸກສະໄໝເຕັກໂນໂລຊີ.
ທ່ານ ເຈືອງຫງອກນາມ ກ່າວຕື່ມວ່າ: ເພື່ອຮອງຮັບກັບ ຄວາມຮຽກຮ້ອງຕ້ອງການ ຂອງວຽກງານດັ່ງກ່າວ, ໃນນັ້ນໂດຍ ສະເພາະນັກຂ່າວຜູ້ໜຶ່ງ ຕ້ອງໃຫ້ມີຄວາມຮູ້, ຄວາມສາມາດ, ຮູ້ຈັກສ່ອງແສງບັນຫາ ວິເຄາະ ແລະ ບັນຫາອື່ນໆໄດ້ຢ່າງຄົບຖ້ວນ ໂດຍສະເພາະ ພະນັກງານທີ່ເຮັດໜ້າທີ່ນັກຂ່າວ ຖ້າບໍ່ເອົາໃຈໃສ່ ກໍ່ຈະນໍາໃຊ້ໄປໃນທາງທີ່ຜິດ ບໍ່ມີປະສິດທິພາບ, ຕ້ອງຫລີກເວັ້ນ ແລະ ຈໍາແນກໃຫ້ຖືກຕ້ອງ ເພາະສື່ມວນຊົນ ເປັນກະບອກສຽງ ໃນການໂຄສະນາ ແນວທາງນະໂຍບາຍຂອງ ພັກ-ລັດ ແລະ ທັງເປັນເວທີສະແດງ ແນວຄວາມຄິດເຫັນ ສອ່ງແສງໃຫ້ສັງຄົມ ໄດ້ຮັບຮູ້ ແລະ ເຂົ້າໃຈ.