ປະທານປະເທດ​ຕ້ອນຮັບ​ປະທານ​ສະພາ​ແຫ່ງ​ຊາດ​ກຳປູ​ເຈຍ

ຂປລ. ທ່ານ ຈູມມາລີ ໄຊຍະສອນ ປະທານປະເທດແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ສົມເດັດ ອັກຄະມະຫາ ໂປເຢຍ ຈັກກຣີ ເຮັງຊຳລິນ ປະທານສະພາແຫ່ງຊາດແຫ່ງ ຣາຊະອານາຈັກ ກຳປູເຈຍ ແລະ ຄະນະໃນວັນທີ 15 ເດືອນ ກັນຍາປີ 2014 ທີ່ທຳນຽບປະທານປະເທດ ໃນໂອກາດທີ່ສົມເດັດໄດ້ເດີນທາງມາຢ້ຽມຢາມສັນຖະວະໄມຕີສປປ ລາວ ຢ່າງເປັນທາງການຕາມຄຳເຊີນ ຂອງ ທ່ານ ນາງ ປານີ ຢ່າທໍ່ຕູ້ ປະທານສະພາແຫ່ງຊາດ ແລະ ເຂົ້າຮ່ວມກອງປະຊຸມສະມັດຊາລັດຖະສະພາ ລະຫວ່າງ ຊາດອາຊຽນ ທີ່ ສປປ ລາວ ໄດ້ຮັບກຽດເປັນ ເຈົ້າພາບແຕ່ວັນທີ 14-20 ເດືອນກັນຍາ ປີ 2014.


ໃນໂອກາດນີ້ ທ່ານ ປະທານປະເທດ ຈູມມາລີ ໄຊຍະສອນ ໄດ້ກ່າວສະແດງຄວາມຕ້ອນຮັບ ຢ່າງອົບອຸ່ນ ແລະ ຊົມເຊີຍທີ່ ສົມເດັດ ອັກຄະມະຫາ ໂປເຢຍ ຈັກກຣີ ເຮັງຊຳລິນ ໄດ້ນຳພາຄະນະຜູ້ແທນຂັ້ນສູງ ຈາກສະພາກຳປູເຈຍມາຢ້ຽມຢາມສັນຖະວະໄມຕີລາວຢ່າງເປັນທາງການ ແລະ ເຂົ້າຮ່ວມກອງປະຊຸມໄອປາ ຄັ້ງທີ 35 ທີ່ ສປປ ລາວ ຮັບກຽດເປັນເຈົ້າພາບ, ພ້ອມທັງເຊື່ອໝັ້ນວ່າການມາຮ່ວມກອງປະຊຸມຄັ້ງນີ້ຂອງ ຄະນະຜູ້ແທນສະພາ ແຫ່ງຊາດ ແຫ່ງ ຣາຊະອານາຈັກກຳປູເຈຍ ຈະເປັນການປະກອບສ່ວນຢ່າງໃຫຍ່ຫລວງ ຕໍ່ຜົນສຳເລັດຂອງກອງປະຊຸມທັງເປັນການປະກອບສ່ວນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສະມາຊິກລັດຖະສະພາອາຊຽນ ກໍຄືສະພາແຫ່ງຊາດລາວ ແລະ ຣາຊະອານາຈັກກຳ ປູເຈຍໃຫ້ນັບມື້ແໜ້ນແຟ້ນຍິ່ງໆຂຶ້ນ.
ທ່ານປະທານປະເທດສະແດງຄວາມປິຕິຍິນດີທີ່ເຫັນວ່າສາຍພົວພັນທີ່ດີງາມລະຫວ່າງ ສອງປະເທດ ສປປ ລາວ ແລະ ຣາຊະອານາຈັກກຳປູເຈຍ ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງໃນຊຸມປີຜ່ານມາ, ພ້ອມທັງ. ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນກຳປູເຈຍທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອແກ່ ສປປ ລາວ ໃນໄລຍະຜ່ານມາ. ກ່ຽວກັບການຮ່ວມມືລະຫວ່າງສອງສະພາແຫ່ງຊາດ, ປະທານປະເທດເຮົາ ກໍໄດ້ສະແດງຄວາມເຫັນດີເຫັນພ້ອມ ແລະ ໃຫ້ສອງສະພາແຫ່ງຊາດລາວ-ກຳປູເຈຍ ສືບຕໍ່ປຶກສາຫາລື ແລະແລກປ່ຽນຄຳຄິດຄຳເຫັນ ແລະ ປະສົບການໃນການຈັດຕັ້ງປະຕິບັດໜ້າທີ່ຂອງອົງການນິຕິບັນຍັດຂອງສອງປະເທດ, ນອກຈາກນັ້ນກໍໄດ້ມີການສະເໜີໃຫ້ສອງປະເທດ ສືບຕໍ່ຊຸກຍູ້ໃຫ້ມີ ການພົວພັນ ແລະ ລົງທຶນ ລະຫວ່າງ ສອງປະເທດໃຫ້ແຂງແຮງກວ່າເກົ່າ. ທ່ານ ປະທານປະເທດ ຍັງໄດ້ຖືໂອກາດນີ້ຝາກຄວາມຖາມຂ່າວສະບາຍດີ ພະບາດສົມເດັດ ພະບໍຣົມມະນຽດໂນໂຣດົມສີຫາມູນີ ພະມະຫາກະສັດ ແຫ່ງ ຣາຊະອານາຈັກ ກຳປູເຈຍ.
ສົມເດັດເຮັງຊຳລິນກໍໄດ້ສະແດງຄວາມຂອບໃຈຕໍ່ທ່ານປະທານປະເທດທີ່ໄດ້ສະຫລະເວລາ ຕ້ອນຮັບອັນອົບອຸ່ນໃນຄັ້ງນີ້ ພ້ອມທັງ ຢືນຢັນຈະສືບຕໍ່ໃຫ້ ການຮ່ວມມືຊ່ວຍເຫລືອຊຸກຍູ້ ສປປ ລາວ ໂດຍສະເພາະແມ່ນວຽກງານດ້ານນິຕິບັນຍັດຂອງສອງປະເທດໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.
ໃນຕອນເຊົ້າວັນດຽວກັນນີ້ ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບ ສົມເດັດ ອັກຄະມະຫາ ໂປເຢຍ ຈັກກຣີ ເຮັງຊຳລິນ ປະທານສະພາ ແຫ່ງຊາດແຫ່ງ ຣາຊະອານາຈັກ ກຳປູເຈຍ ເຊັ່ນດຽວກັນ.