ປະທານລັດຖະສະພາສິງກະໂປ ຢ້ຽມຢາມ ສັນຖະວະໄມຕີ ສປປ ລາວ ຢ່າງເປັນທາງການ

ຂປລ. ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ແລະ ພົບປະກັບ ທ່ານນາງ ຮາລີມາ ຢາຄ໋ອບ ປະທານລັດຖະສະພາແຫ່ງສິງກະໂປ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມສັນຖະວະໄມຕີ ຢ່າງເປັນທາງການຢູ່ ສປປ ລາວ ເຊິ່ງ ພິທີຕ້ອນຮັບຢ່າງເປັນທາງການ ໄດ້ຈັດຂຶ້ນໃນວັນທີ 15 ເດືອນກັນຍາ ປີ 2014 ທີ່ສະພາແຫ່ງຊາດລາວ.
ທ່ານນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານນາງ ຮາລີມາ ຢາຄ໋ອບ ທີ່ໄດ້ນຳພາຄະນະ ເດີນທາງມາຢ້ຽມຢາມ ສັນຖະວະໄມຕີຢ່າງເປັນທາງການຢູ່ ສປປ ລາວ ເຊິ່ງເປັນການຢ້ຽມຢາມທີ່ມີຄວາມໝາຍສຳຄັນ ໃນການປະກອບສ່ວນເພີ່ມພູນຄູນສ້າງ ແລະ ຮັດແໜ້ນ ສາຍພົວພັນ ລະຫວ່າງ ລາວ-ສິງກະໂປ, ສິງກະໂປ-ລາວ, ເວົ້າລວມ, ເວົ້າສະເພາະ ລະຫວ່າງ ສອງອົງການນິຕິບັນບັດຂອງສອງປະເທດ ໃຫ້ນັບມື້ກ້າວເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ. ເພື່ອເພີ່ມທະວີຮັດແໜ້ນການຮ່ວມມື ລະຫວ່າງສອງປະເທດນັ້ນ, ທ່ານປະທານສະພາແຫ່ງຊາດລາວ

ໄດ້ສະເໜີໃຫ້ມີການແລກປ່ຽນຢ້ຽມຢາມຂອງຄະນະຜູ້ແທນໃນລະດັບຕ່າງໆຫລາຍຂຶ້ນ ເພື່ອແລກປ່ຽນບົດຮຽນປະສົບການໃນຂົງເຂດ ນິຕິບັນຍັດ ແລະ ຂໍ້ມູນຂ່າວສານນຳກັນ ດ້ວຍຫລາຍຮູບການເຊັ່ນ: ການຝຶກອົບຮົມສ້າງພະນັກງານວິຊາການ ກ່ຽວກັບວຽກງານການສ້າງກົດໝາຍ, ການສ້າງຄວາມອາດສາມາດໃຫ້ແກ່ສູນ ຝຶກອົບຮົມຂອງສະພາແຫ່ງຊາດລາວ ໃຫ້ກາຍເປັນແຫລ່ງສະໜອງຄວາມຮູ້ດ້ານຕ່າງໆ ແລະ ຄວນເພີ່ມທະວີຊຸກຍູ້ລັດຖະບານຂອງສອງປະເທດ ໃຫ້ປະຕິບັດສົນທິສັນຍາ, ສັນຍາ ແລະ ຂໍ້ຕົກລົງຮ່ວມກັນດ້ານຕ່າງໆໃຫ້ປະກົດຜົນເປັນຈິງ ແລະ ຮູບປະທຳຫລາຍຂຶ້ນ.
ໃນໂອກາດດຽວກັນ, ທ່ານນາງ ຮາລີມາ ຢາຄ໋ອບ ກໍໄດ້ສະແດງຄວາມຂອບອົກຂອບໃຈຕໍ່ການຕ້ອນຮັບອັນອົບອຸ່ນຂອງ ທ່ານປະທານສະພາແຫ່ງຊາດລາວ ພ້ອມທັງໄດ້ແຈ້ງໃຫ້ຊາບກ່ຽວກັບສະພາບການພັດທະນາເສດຖະກິດ-ສັງຄົມ ກໍຄືການເຄື່ອນໄຫວວຽກງານຂອງສະພາແຫ່ງຊາດສິງກະໂປ ລວມທັງໝາກຜົນຂອງສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງຊາດ ສິງກະໂປ-ລາວ ໂດຍສະເພາະແມ່ນການຮ່ວມມື ລະຫວ່າງ ສອງອົງການ ນິຕິບັນຍັດ ສິງກະໂປ-ລາວ ໃນຕະຫລອດໄລຍະຜ່ານມາ.