ນາຍົກລັດຖະມົນຕີ ຕ້ອນຮັບຄະນະຜູ້ແທນ ກອງປະຊຸມ ລັດຖະມົນຕີສຶກສາອາຊຽນ ຄັ້ງທີ 8

ຂປລ. ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດ ຕ້ອນຮັບການເຂົ້າຢ້ຽມຂ່ຳນັບຂອງຄະນະຜູ້ແທນກອງປະຊຸມ ລັດຖະມົນຕີສຶກສາອາຊຽນ ຄັ້ງທີ 8 ນຳໂດຍ ທ່ານ ດຣ. ພັນຄຳ ວິພາວັນ ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງ ສຶກສາທິການ ແລະ ກິລາ ໃນວັນທີ 12 ເດືອນກັນຍາ ປີ 2014 ຢູ່ຫ້ອງວ່າການລັດຖະບານໃນໂອກາດທີ່ຄະນະຜູ້ແທນດັ່ງກ່າວ ໄດ້ເດີນທາງມາເຂົ້າຮ່ວມກອງປະຊຸມ ລັດຖະມົນຕີສຶກສາອາຊຽນ ທີ່ ສປປ ລາວ ເປັນເຈົ້າພາບຈັດຂຶ້ນແຕ່ວັນທີ 9-12 ເດືອນກັນຍາປີ 2014 ນີ້.


ໃນໂອກາດນີ້ ທ່ານ ດຣ. ພັນຄຳ ວິພາວັນ ໃນຖານະປະທານກອງປະຊຸມໄດ້ຕາງໜ້າ ຄະນະຜູ້ແທນລາຍງານຕໍ່ ທ່ານນາຍົກລັດຖະມົນຕີ ຊາບກ່ຽວກັບ ຜົນຂອງກອງປະຊຸມ ລັດຖະມົນຕີສຶກສາອາຊຽນ ຄັ້ງທີ 8 ແລະ ກອງປະຊຸມປິ່ນອ້ອມຕ່າງໆ ເຊິ່ງກອງປະຊຸມໄດ້ ພ້ອມກັນທົບທວນຄືນບັນດາແຜນການ ແລະ ຄວາມຄືບໜ້າຂອງການຈັດຕັ້ງປະຕິບັດ ແຜນວຽກທີ່ຮັບຮອງເອົາໃນກອງປະຊຸມລັດຖະມົນຕີສຶກສາຄັ້ງທີ 7 ຜ່ານມາ, ກຳນົດວິໄສທັດ, ທິດທາງແຜນການ ແລະ ການຈັດລຽງບູລິມະສິດການພັດທະນາການສຶກສາໃນຂອບອາຊຽນ ພາຍຫລັງປີ 2015 ໂດຍສະເພາະແມ່ນການພັດທະນາ ການສຶກສາໃນໄລຍະ 5 ປີ (2016-2020), ພ້ອມທັງແລກປ່ຽນບົດຮຽນເຊິ່ງກັນ ແລະ ກັນໃນການກະກຽມຄວາມພ້ອມ ດ້ານຕ່າງໆຂອງບັນດາປະເທດ ສະມາຊິກອາຊຽນ ເພື່ອກ້າວເຂົ້າສູ່ປະຊາຄົມເສດຖະກິດອາຊຽນໃນປີ 2015, ມີຄວາມເປັນເອກະພາບຮັບຮອງເອົາບັນດາເນື້ອໃນເອກະສານຕ່າງໆ ທີ່ສະເໜີໃນກອງປະຊຸມແນໃສ່ໃຫ້ບັນດາປະເທດສະມາຊິກອາຊຽນ ສາມາດນຳເອົາໄປຈັດຕັ້ງຜັນຂະຫຍາຍ ແລະ ປະຕິບັດໄດ້ຢູ່ໃນປະເທດຂອງຕົນ.
ທ່ານ ນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ພ້ອມທັງຕີລາຄາສູງຕໍ່ຄະນະຜູ້ແທນທີ່ເຂົ້າຮ່ວມກອງປະຊຸມ ສຶກສາອາຊຽນຄັ້ງທີ 8 ຢູ່ ສປປ ລາວ ໃນຄັ້ງນີ້ ອັນໄດ້ຮັບຜົນສຳເລັດເປັນຢ່າງດີ ເຊິ່ງເປັນການປະກອບສ່ວນ ສຳຄັນເຂົ້າໃນການເພີ່ມທະວີການພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ບັນດາປະເທດສະມາຊິກອາຊຽນດ້ວຍກັນ ກໍຄືອາຊຽນບວກ 3 ແລະ ອາຊຽນໃນຂອບ EAS ທາງດ້ານການຮ່ວມມືດ້ານການສຶກສາ ໃຫ້ນັບມື້ນັບເລິກເຊິ່ງເທື່ອລະກ້າວ. ພ້ອມນີ້ ທ່ານ ນາຍົກລັດຖະມົນຕີ ຍັງໄດ້ອວຍພອນໃຫ້ບັນດາຄະນະ ຜູ້ແທນທີ່ເຂົ້າຮ່ວມກອງປະຊຸມ ຈົ່ງມີສຸຂະພາບແຂງແຮງ ແລະ ເດີນທາງກັບປະເທດ ດ້ວຍຄວາມສະຫວັດດີພາບ ແລະ ປອດໄພ.