ປີ 2020 ຟຟລ ຈະສູ້ຊົນ​ໃຫ້ທົ່ວປະເທດ​ໄດ້ຊົມໃຊ້ໄຟຟ້າ 90%

ຂປລ. ປີ 2020 ລັດວິສາຫະກິດໄຟຟ້າລາວ (ຟຟລ) ຈະສູ້ຊົນ ໃຫ້ປະຊາຊົນທົ່ວປະເທດໄດ້ຊົມໃຊ້ໄຟຟ້າໄດ້ 90% ຕາມແຜນການ, ເຊິ່ງໃນປັດຈຸບັນ ການຂະຫຍາຍຕາໜ່າງໄຟຟ້າໃນຂອບເຂດທົ່ວປະເທດບັນລຸໄດ້ປະມານ 87%, ຂະນະທີ່ທຸກໆບ້ານໃນນະຄອນຫລວງວຽງຈັນມີໄຟຟ້າໃຊ້ແລ້ວ 100%.
ທ່ານ ສຸພົນ ສູນທອນ ຫົວໜ້າຝ່າຍປະຕິບັດການໄຟຟ້ານະຄອນຫລວງວຽງຈັນ ໃຫ້ຮູ້ໃນໂອກາດຕອບຂໍ້ຂ້ອງໃຈຂອງປະຊາຊົນຜ່ານສາຍດ່ວນສະພາແຫ່ງຊາດ ໃນຕອນເຊົ້າວັນທີ 11 ເດືອນກັນຍາ ປີ 2014 ນີ້ວ່າ: ສະເພາະໃນນະຄອນຫລວງວຽງຈັນ ທຸກບ້ານມີໄຟຟ້າ ໃຊ້ 100%, ແຕ່ການສະໜອງ ບໍລິການໄຟຟ້າໃນບາງຈຸດ, ບາງເຂດ ຍັງບໍ່ພຽງພໍຕໍ່ຄວາມຮຽກຮ້ອງຕ້ອງການ ຂອງຜູ້ຊົມ ໃຊ້ຈຶ່ງເຮັດ ໃຫ້ປະຊາຊົນບໍ່ເຂົ້າໃຈ ແລະ ມີຫາງສຽງ ຕໍ່ກັບບັນຫາກະແສໄຟຟ້າບໍ່ພຽງພໍ,

ການເກັບຄ່າໄຟຟ້າແພງ, ໄຟຟ້າມັກມອດ, ການສ້ອມແປງຊັກຊ້າ ແລະ ບັນຫາພະນັກງານທີ່ມາຈົດຕົວເລກ ໄຟຟ້າບໍ່ຖືກຕ້ອງກັບຄວາມເປັນຈິງ, ຕໍ່ກັບບັນຫາດັ່ງກ່າວທາງ ຟຟລ ແມ່ນໄດ້ຊີ້ແຈງ ແລະ ຕອບຂໍ້ຂ້ອງໃຈໃຫ້ສັງຄົມ ແລ້ວ ຄືກໍລະນີບັນຫາທີ່ໄຟຟ້າບໍ່ພຽງພໍ ຫລື ໄຟຟ້າຕົກ ສາເຫດແມ່ນມາຈາກການຂະຫຍາຍຕົວຂອງ ເສດຖະກິດ-ສັງຄົມ, ມີໂຮງຈັກ-ໂຮງງານເພີ່ມຂຶ້ນ ແລະ ການສ້າງສາພັດທະນາ ພື້ນຖານໂຄງລ່າງຕ່າງໆ ທີ່ຕ້ອງການຊົມໃຊ້ພະລັງງານໄຟຟ້າເຂົ້າໃນການຜະລິດ ແລະ ບັນຫາພະນັກງານທີ່ມາເກັບກຳຈົດຕົວເລກ ທີ່ຍັງບໍ່ຖືກຕ້ອງ ກັບຕົວຈິງນັ້ນ ແມ່ນທາງ ຟຟລ ກໍມີການແກ້ໄຂມາຕະຫລອດ ເພາະພະນັກງານທີ່ໄປ ຈົດ ຫລືໄປຢາຍບິນ ເກັບຄ່າໄຟຟ້າບາງບ້ານທາງ ຟຟລ ກໍໄດ້ຈ້າງ ແລະມອບໝາຍໃຫ້ບ້ານດັ່ງກ່າວເກັບກຳໃຫ້. ສຳລັບປີນີ້ ຝ່າຍປະຕິບັດການໄຟຟ້າ ນະຄອນຫລວງວຽງຈັນ ມີແຜນຈະເພີ່ມໝໍ້ແປງ ໄຟຟ້າ ຕື່ມ 200 ໜ່ວຍ, ເພື່ອໃຫ້ການຊົມໃຊ້ໄຟຟ້າ ພຽງພໍກັບຄວາມຕ້ອງການ. ສ່ວນບັນຫາໄຟຟ້າມັກມອດ ແມ່ນເກີດຈາກລະບົບສາຍສົ່ງເກົ່າ, ໝົດອາຍຸການໃຊ້ງານ. ກໍລະນີ ການສ້ອມແປງຊັກຊ້າ ແລະ ໃຊ້ເວລາດົນນັ້ນ ໃນການປະຕິບັດຕົວຈິງບາງຈຸດ, ບາງເຂດການສັນຈອນແອອັດ, ທາງແຄບ ແລະ ສະຖານທີ່ ເກີດເຫດແມ່ນໄກຈາກຈຸດບໍລິການ. ປັດຈຸບັນ ພາກສ່ວນທີ່ກ່ຽວຂ້ອງໄດ້ມີແຜນ ຈະຕິດຕັ້ງລະບົບກວດສອບໄຟຟ້າທີ່ທັນສະໄໝ ເພື່ອເຮັດໃຫ້ສາມາດ ຊອກຫາຈຸດທີ່ເປ່ເພໄດ້ງ່າຍ.