ອົດສະຕຣາລີ ສືບຕໍ່ໃຫ້ທຶນການສຶກສາແກ່ລາວ

ຂປລ. ທ່ານ ຄຣິດສະໂຕເຟີ ພາຍ ລັດຖະມົນຕີກະຊວງສຶກສາ ປະເທດ ອົດສະຕຣາລີ ໄດ້ເປັນກຽດມອບທຶນການສຶກສາ ໃຫ້ແກ່ນັກສຶກສາລາວຈຳນວນ 50 ທຶນ ເພື່ອໄປສຶກສາຕໍ່ປະລິນຍາຕີ ແລະ ປະລິນຍາໂທ ທີ່ປະເທດ ອົດສະຕຣາລີ ໂດຍບັນດານັກສຶກສາເຫລົ່ານີ້ ຈະມີໂອກາດຮຽນຮູ້ ແລະ ພັດທະນາ ດ້ານທັກສະທີ່ມີພື້ນຖານເຂັ້ມແຂງ ອັນຈະນຳບົດຮຽນປະສົບການກັບມາພັດທະນາປະເທດຊາດ, ທັງເປັນການເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດໃຫ້ແໜ້ນແຟ້ນກວ່າ. ພິທີມອບທຶນການສຶກສາຄັ້ງນີ້ ໄດ້ມີຂຶ້ນໃນວັນທີ 12 ເດືອນກັນຍາ ປີ 2014 ທີ່ນະ ຄອນຫລວງວຽງຈັນ, ໂດຍມີທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີຊ່ວຍວ່າການ ກະຊວງ ສຶກສາທິການ ແລະ ກິລາ, ພ້ອມດ້ວຍ ທ່ານ ຈອນ ວິນລຽມ ເອກອັກຄະລັດຖະທູດ ອົດສະຕຣາລີ ປະຈຳລາວເຂົ້າຮ່ວມນຳ.


ທ່ານ ຄຣິດສະໂຕເຟີ ພາຍ ກ່າວວ່າ: ໂຄງການສະໜັບສະໜູນທຶນການສຶກສາ ຂອງລັດຖະບານອົດສະຕຣາລີ ແມ່ນມີຄວາມສຳຄັນຫລາຍ ໃນການປະກອບສ່ວນຊ່ວຍເຫລືອເພື່ອການພັດທະນາ ຢູ່ໃນບັນດາປະເທດຕ່າງໆ, ລວມທັງ ສປປ ລາວ ແລະ ພາກພື້ນອາຊີປາຊີຟິກ. ມາຮອດປັດຈຸບັນ ອະດີດນັກສຶກສາລາວທີ່ຮຽນຈົບຈາກປະເທດອົດສະຕຣາລີ ກວ່າ 1.000 ຄົນ ໄດ້ກາຍເປັນພະນັກງານການນຳ ທີ່ມີບົດບາດໃນ ພາກລັດ ຂອງ ສປປ ລາວ. ເຊັ່ນດຽວກັບ ນັກສຶກສາທີ່ໄດ້ຮັບທຶນຈາກລັດຖະບານ ອົດສະຕຣາລີ 50 ຄົນ ໃນປີນີ້ກໍຈະມີການພັດທະນາຕົນເອງຢ່າງຕັ້ງໜ້າ ແລະ ນຳເອົາບົດຮຽນປະສົບການຂອງປະເທດ ອົດສະຕຣາລີ ກັບມາພັດທະນາ ສປປ ລາວ.
ໃນແຕ່ລະປີ ລັດຖະບານອົດສະຕຣາລີ ໄດ້ສະໜອງທຶນການສຶກສາ ໃຫ້ແກ່ ລາວ 50 ທຶນ ເພື່ອໄປສຶກສາລະດັບປະລິນຍາຕີ ແລະ ໂທ ດ້ານວິຊາສະເພາະ ແລະ ຫລັກສູດທີ່ເຂົາເຈົ້າເລືອກຮຽນ. ສົກປີ 2014-2015 ລັດຖະບານອົດສະຕຣາລີ ໄດ້ອະນຸມັດທຶນຊ່ວຍເຫລືອເພື່ອການພັດທະນາຢູ່ ສປປ ລາວ ມູນຄ່າ 60 ລ້ານ ໂດລາອົດສະຕຣາລີ ເຊິ່ງແຜນງານນີ້ຈະສຸມໃສ່ໂຄງການດ້ານການສຶກສາ ແລະ ພັດທະນາ ຊັບພະຍາກອນມະນຸດ, ການພັດທະນາຊົນນະບົດ, ການເກັບກູ້ລະເບີດບໍ່ທັນແຕກ, ລວມທັງ ການຄ້າ, ການລົງທຶນ ແລະ ການຄຸ້ມຄອງຊັບພະຍາກອນທຳມະຊາດ.
ທ່ານລັດຖະມົນຕີຊ່ວຍວ່າການກະຊວງ ສຶກສາທິການ ແລະ ກິລາ ກໍໄດ້ເນັ້ນໃຫ້ນັກສຶກສາທຸກຄົນ ຕັ້ງໜ້າຄົ້ນຄ້ວາຮ່ຳຮຽນ ແລະ ຖອດຖອນເອົາບົດຮຽນນຳອົດສະຕຣາລີ ເຊິ່ງເປັນປະເທດທີ່ພັດທະນາແລ້ວ ກັບມານຳໃຊ້ເຂົ້າໃນວຽກງານຕົວຈິງ, ລັດຖະບານໄດ້ຝາກຄວາມຫວັງກັບນັກສຶກສາທັງໝົດ ທີ່ຈະກາຍເປັນຜູ້ມີຄວາມຮູ້ຄວາມສາມາດ ແລະ ເປັນຜູ້ສືບທອດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນຕໍ່ໜ້າ.