ກອງ​ປະຊຸມ ​ລັດຖະມົນຕີ​ສຶກສາອາ​ຊຽນ ຄັ້ງທີ VIII ໄຂ​ຂຶ້ນຢ່າງ​ເປັນ​ທາງ​ການ

ຂປລ. ກອງປະຊຸມລັດຖະມົນຕີສຶກສາອາຊຽນຄັ້ງທີ VIII ໄດ້ໄຂຂຶ້ນຢ່າງເປັນທາງການ ໃນວັນທີ 11 ເດືອນກັນຍາ ປີ 2014 ຢູ່ທີ່ ໂຮງແຮມ ດອນຈັນພາເລດ, ນະຄອນຫລວງວຽງຈັນ, ໂດຍການເປັນປະທານຂອງ ທ່ານ ດຣ. ພັນຄຳ ວິພາວັນ ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງສຶກສາທິການ ແລະ ກິລາ ແຫ່ງ ສປປ ລາວ, ມີບັນດາ ລັດຖະມົນຕີສຶກສາ ຈາກບັນດາປະເທດສະມາຊິກອາຊຽນ, ທ່ານ ມີເຊວ ໂກຟິນ ອຸປະທູດປະຈຳສຳນັກງານຜູ້ຕາງໜ້າສະຫະພາບເອີຣົບ ປະຈຳ ສປປ ລາວ, ທ່ານ ດຣ. ສະເຕຟານ ເຮວ ຫົວໜ້າໂຄງການຊ່ວຍເຫລືອປະຈຳພາກພື້ນອາຊຽນ-ອີຢູເຂົ້າຮ່ວມ.


ໃນໂອກາດນີ້ ທ່ານ ດຣ. ພັນຄຳ ວິພາວັນ ໃນຖານະປະທານກອງປະຊຸມໄດ້ກ່າວວ່າ: ຕາງໜ້າລັດຖະບານແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ປະຊາຊົນລາວບັນດາເຜົ່າ ມີຄວາມຮູ້ສຶກເປັນກຽດ ແລະ ພາກພູມໃຈທີ່ສຸດທີ່ໄດ້ຮັບກຽດເປັນເຈົ້າພາບຈັດກອງປະຊຸມລັດຖະມົນຕີສຶກສາອາຊຽນຄັ້ງທີ VIII, ເນື່ອງມາຈາກຜົນຂອງກອງປະຊຸມຄັ້ງທີ VII ເຊິ່ງໄດ້ຈັດຂຶ້ນວັນທີ 3-5 /7/ 2012 ທີ່ຢອກຢາກາຕາ, ປະເທດອິນໂດເນເຊຍ, ກອງປະຊຸມໃນຄັ້ງນີ້ ໄດ້ໄຂຂຶ້ນໃນຂະນະທີ່ ສາທາລະນະລັດ ປະຊາທິປະໄຕ ປະຊາຊົນລາວ ກໍຄື ບັນດາປະເທດສະມາຊິກ ອາຊຽນກຽມທຸກເງື່ອນໄຂ ເພື່ອກ້າວເຂົ້າສູ່ປະຊາຄົມເສດຖະກິດອາຊຽນໃນປີ 2015 ທີ່ຈະມາເຖິງນີ້, ໃນນາມເປັນປະເທດເຈົ້າພາບ, ຂ້າພະເຈົ້າຂໍສະແດງຄວາມຊົມເຊີຍຢ່າງສຸດໃຈ ແລະ ຍິນດີຕ້ອນຮັບບັນດາຜູ້ແທນທີ່ເຂົ້າຮ່ວມກອງປະຊຸມທັງພາຍໃນ ແລະ ຕ່າງປະເທດໂດຍສະເພາະແມ່ນບັນດາຄະນະຜູ້ແທນທີ່ມາຈາກບັນດາປະເທດ ສະມາຊິກອາຊຽນທີ່ໄດ້ເປັນກຽດເຂົ້າຮ່ວມກອງປະຊຸມຄັ້ງນີ້. ທຸກທ່ານທີ່ເຂົ້າມາຮ່ວມກອງປະຊຸມລັດຖະມົນຕີສຶກສາອາຊຽນໃນຄັ້ງນີ້ ແມ່ນສະແດງເຖິງ ຄວາມສາມັກຄີ, ສາຍພົວພັນທີ່ດີ, ມິດຕະພາບ, ສັນຕິພາບ ແລະ ການຮ່ວມມືຂອງບັນດາປະເທດສະມາຊິກອາຊຽນພວກເຮົາ, ອີກເທື່ອໜຶ່ງ ຂ້າພະເຈົ້າຕາງໜ້າໃຫ້ລັດຖະບານ ສປປ ລາວ ແລະ ປະຊາຊົນລາວບັນດາເຜົ່າ ຂໍສະແດງຄວາມຍິນດີຕ້ອນຮັບອັນອົບອຸ່ນມາຍັງບັນດາທ່ານຜູ້ແທນ ກອງປະຊຸມທຸກໆທ່ານເຂົ້າຮ່ວມກອງປະຊຸມລັດຖະມົນຕີສຶກສາອາຊຽນຄັ້ງທີ VIII ແລະ ຖືຄືກັນກັບຄອບຄົວອາຊຽນໜຶ່ງດຽວ.
ທ່ານ ຍັງກ່າວຕື່ມອີກວ່າ: ກອງປະຊຸມລັດຖະມົນຕີສຶກສາອາຊຽນຄັ້ງທີ VIII ນີ້ຈະໄດ້ທົບທວນຄືນບົດລາຍງານຄວາມຄືບໜ້າຂອງການຈັດຕັ້ງປະຕິບັດ ແຜນວຽກທີ່ຮັບຮອງເອົາໃນກອງປະຊຸມລັດຖະມົນຕີສຶກສາອາຊຽນຄັ້ງທີ VII ຜ່ານມາ, ພ້ອມທັງໄດ້ກຳນົດວິໄສທັດ, ທິດທາງແຜນການ ແລະ ການ ຈັດລຽງບູລິມະສິດການພັດທະນາການສຶກສາໃນຂອບອາຊຽນພາຍຫລັງປີ 2015 ໂດຍສະເພາະແມ່ນແຜນການພັດທະນາການສຶກສາໃນໄລຍະ 5 ປີ (2016-2020) ສະນັ້ນ ກອງປະຊຸມໃນຄັ້ງນີ້ເປັນກອງປະຊຸມທີ່ມີຄວາມໝາຍ, ຄວາມສຳຄັນຫລາຍຕໍ່ວຽກງານການສຶກສາ ກໍຄື ການພັດທະນາ ຊັບພະຍາກອນມະນຸດ ສຳລັບບັນດາ ປະເທດສະມາຊິກອາຊຽນ, ນອກນັ້ນ ກອງປະຊຸມຍັງເປັນນິມິດໝາຍທີ່ຍືນຍົງເຖິງການເພີ່ມທະວີການຮ່ວມມືດ້ານ ການສຶກສາຂອງບັນດາປະເທດສະມາຊິກອາຊຽນ ແນໃສ່ເພື່ອຫລຸດຜ່ອນຊ່ອງວ່າງການພັດທະນາການສຶກສາ ລະຫວ່າງ ບັນດາປະເທດສະມາຊິກ ອາຊຽນດ້ວຍກັນ.