ລັດຖະບານ​ລາວ ມອບ​ຫລຽນ​ກາ​ມິດຕະພາບ​ ໃຫ້ກອງ​ເລຂາ​ກິລາ​ມະຫາວິທະຍາ​ໄລ​ອາ​ຊຽນ

ຂປລ. ທ່ານ ດຣ. ສຸກກົງແສງ ໄຊຍະເລີດ ອະທິການບໍດີມະຫາວິທະຍາໄລແຫ່ງຊາດ, ທັງເປັນຮອງປະທານຈັດງານມະຫະກຳກິລາ ມະຫາວິທະຍາ ໄລອາຊຽນຄັ້ງທີ 16 ໄດ້ຕາງໜ້າໃຫ້ລັດຖະບານ ສປປ ລາວ ມອບຫລຽນກາມິດຕະພາບໃຫ້ແກ່ ທ່ານ ຮາຈິມູ ຮາມັດຮານິບ ເລຂາທິການສະພາ ມະຫາວິທະຍາໄລອາຊຽນ, ຕາງໜ້າກອງເລຂາກິລາມະຫາວິທະຍາໄລອາຊຽນ ເຊິ່ງມີສຳນັກງານຕັ້ງຢູ່ປະເທດມາເລເຊຍ ທີ່ໄດ້ປະກອບສ່ວນຊ່ວຍເຫລືອ

ດ້ານເຕັກນິກໃນການຈັດງານແຂ່ງຂັນໃນງານມະຫະກຳກິລາມະຫາວິທະຍາໄລອາຊຽນ ຄັ້ງທີ 16 ທີ່ ສປປ ລາວ ໄດ້ຮັບກຽດເປັນເຈົ້າພາບໃນເດືອນ ທັນວາ ປີ 2012 .
ພິທີມອບ-ຮັບຫລຽນກາມິດຕະພາບດັ່ງກ່າວ ໄດ້ຈັດຂຶ້ນໃນວັນທີ 11 ເດືອນກັນຍາ ປີ 2014 ຢູ່ທີ່ ໂຮງແຮມ ດອນຈັນພາເລດ, ນະຄອນຫລວງວຽງຈັນ ໂດຍມີ ທ່ານ ດຣ ພັນຄຳ ວິພາວັນ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງ ສຶກສາທິການ ແລະ ກິລາ ແລະ ທ່ານ ທັນສຣິ ມາຢັດດິນຢາຊິນ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງ ສຶກສາທິການ ແຫ່ງ ປະເທດມາເລເຊຍ ພ້ອມດ້ວຍພະນັກງານຂັ້ນສູງຂອງສອງຝ່າຍເຂົ້າຮ່ວມ.