ນະຄອນຫລວງ ໄດ້ຮັບການປະດັບປະດາຕ້ອນຮັບກອງປະຊຸມໄອປາ​

ຂປລ. ຈາກຄຳຖະແຫລງຂອງທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫລວງວຽງຈັນ ທັງເປັນຫົວໜ້າອະນຸກຳມະການປະດັບປະດາ ແລະ ອະນາໄມຕົວເມືອງ ເມື່ອວັນທີ 9 ເດືອນກັນຍາ ປີ 2014 ນັ້ນວ່າ: ທັງໝົດ 8 ອະນຸກຳມະການຢູ່ໃນສະພາບກຽມພ້ອມເກືອບ 100% ແລ້ວໃນນັ້ນ ອະນຸກຳມະການປະດັບປະດາ ແລະ ອະນາໄມຕົວເມືອງ ກໍໄດ້ມີຄວາມພ້ອມ ແລະ ສຳເລັດການຈັດຕັ້ງປະຕິບັດວຽກງານອະນາໄມທຳຄວາມສະອາດ, ປະດັບປະດາ ແລະ ຕິດຕັ້ງຄຳຂວັນຕາມເສັ້ນທາງສາຍຕ່າງໆຢູ່ນະຄອນຫລວງວຽງຈັນ ເຊັ່ນ: ຕິດຕັ້ງຊຸມທຸງ, ຕິດປ້າຍແພຄຳຂວັນຂ້າມທາງ, ຕິດຕັ້ງແຜ່ນປ້າຍໂຄສະນາຕິດເສົາໄຟ, ຕິດຕັ້ງ ບ໋ອກໄຟຄຳຂວັນກອງປະຊຸມ, ຕິດຕັ້ງຈໍ LCD ແລະ ວຽກງານແກ້ໄຂຄວາມແອອັດຂອງການສັນຈອນ ແລະ ອື່ນໆ ທັງນີ້

ກໍເພື່ອກຽມຄວາມພ້ອມຮັບໃຊ້ກອງປະຊຸມສະມັດຊາລັດຖະສະພາອາຊຽນ (ໄອປາ) ຄັ້ງທີ 35 ທີ່ຈະຈັດຂຶ້ນໃນເດືອນກັນຍາ 2014 ນີ້ ທີ່ນະຄອນຫລວງວຽງຈັນ.
ຕາມການລາຍງານຂອງອະນຸກຳມະການ ປະດັບປະດາ ແລະ ອະນາໄມຕົວເມືອງ ໃຫ້ຮູ້ວ່າ: ປັດຈຸບັນ ບັນດາເສັ້ນທາງສາຍຫລັກຕ່າງໆ ໃນນະຄອນຫລວງວຽງຈັນ ແມ່ນໄດ້ຮັບການປັບປຸງໃຫ້ມີຄວາມເປັນລະບຽບຮຽບຮ້ອຍ ແລະ ມີຄວາມສວຍງາມຂຶ້ນກວ່າເກົ່າ ໂດຍມີເຈົ້າໜ້າທີ່ ຫລື ພະນັກງານ ທຳຄວາມສະອາດ ດ້ວຍການປັດກວດ-ດູດຝຸ່ນ-ລ້າງທາງ ໃນແຕ່ລະມື້ເປັນປະຈຳ, ປະດັບປະດາ ຕິດຕັ້ງຊຸມທຸງ 23 ຫລັກ(ຊຸມທຸງ 22 ປະເທດສະມາຊິກອາຊຽນ, ປະເທດຄູ່ເຈລະຈາ 11 ປະເທດ, ປະເທດສັງເກດການ 1 ປະເທດ ແລະ ທຸງໂລໂກໄອປາ), ຕິດຕັ້ງທຸງບັນດາປະເທດສະມາຊິກອາຊຽນ ໃສ່ເສົາໄຟຟ້າສຳເລັດຕາມ ແຕ່ລະເສັ້ນທາງສາຍຫລັກຄື: ຖະໜົນລ້ານຊ້າງ, ສຸພານຸວົງ, ສາມແສນໄທ, ເສດຖາທິລາດ, ເຈົ້າຟ້າງຸ່ມ ແລະ ຖະໜົນໄກສອນພົມວິຫານ, ຕິດຕັ້ງແພຄຳຂວັນຂ້າມທາງ ຈຳນວນ 15 ຈຸດ ໃນ 6 ເສັ້ນທາງ, ຕິດຕັ້ງ ແຜ່ນປ້າຍ ໂຄສະນາຕິດເສົາໄຟ ລວມທັງໝົດ 412 ແຜ່ນໃນ 6 ເສັ້ນທາງ, ຕິດຕັ້ງ ບ໋ອກໄຟຄຳຂວັນ ກອງປະຊຸມ ຈຳນວນ 3 ບ໋ອກ ( ສວນເຈົ້າຟ້າງຸ່ມ, ວົງວຽນໂພນເຄັງ ແລະ ສວນປະຕູໄຊ ). ນອກນັ້ນ ຍັງໄດ້ໄດ້ຕິດຕັ້ງຈໍ LCD ຢູ່ 5 ຈຸດຄື: ທາງເຂົ້າສະໜາມບິນວັດໄຕ, ຈຸດເທິງອ່າງນ້ຳໂພນເຄັງ, ຈຸດໄຟແດງໜອງໄຮ, ຈຸດຫໍພິພິຕະພັນ ປກສ ແລະ ຈຸດຕະຫລາດເຊົ້າ.
ສ່ວນການແກ້ໄຂຄວາມແອອັດຂອງການສັນຈອນ ແມ່ນໄດ້ແຕ່ງຕັ້ງຄະນະຮັບຜິດຊອບທັງໝົດ 70 ຄົນ ປະກອບມີຫລາຍພາກສ່ວນເຂົ້າຮ່ວມ ໂດຍແບ່ງອອກເປັນແຕ່ລະຈຸດ ຕາມສາຍທາງຫລັກຕ່າງໆ ພ້ອມນັ້ນ ວຽກງານດ້ານໄຟຟ້າ ແລະ ນ້ຳປະປາ ກໍມີຄວາມພ້ອມເຕັມທີ່ ເພື່ອສະໜອງໃຫ້ ແກ່ກອງປະຊຸມດັ່ງກ່າວ ເຊິ່ງໄດ້ແຕ່ງຕັ້ງ ຄະນະຮັບຜິດຊອບປະຈຳຢູ່ແຕ່ລະຈຸດ.