ກອງປະຊຸມ ໄອປາ ແລະ ໄວປາ ຈະພິຈາລະນາຫລາຍບັນຫາສຳຄັນ

ຂປລ. ກອງປະຊຸມ ສະມາຊິກລັດຖະສະພາເພດຍິງ ລະຫວ່າງ ຊາດອາຊຽນ (ໄວປາ) ຈະໄດ້ໄຂຂຶ້ນ ໃນວັນທີ 15 ເດືອນກັນຍາ ປີ 2014 ທີ່ ໂຮງແຮມ ດອນຈັນພາເລດ ນະຄອນຫລວງວຽງຈັນ ກ່ອນການດຳເນີນກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ (ໄອປາ) ເຊິ່ງທັງສອງກອງປະຊຸມນີ້ ຈະພິຈາລະນາ ແລະ ຮັບຮອງເອົາມະຕິສຳຄັນຫລາຍຢ່າງທີ່ພົວພັນຕໍ່ການພັດທະນາດ້ານຕ່າງໆໃນອາຊຽນ.


ທ່ານ ສຈ ດຣ ນາງ ບຸນຍົງ ບຸບຜາ ຮອງປະທານກຳມາທິການຕ່າງປະເທດ ສະພາແຫ່ງຊາດ ຫົວໜ້າກອງເລຂາໄອປາ ໄດ້ຖະແຫລງຂ່າວ ຕໍ່ບັນດາທູຕານຸທູດ ແລະ ອົງການຈັດຕັ້ງສາກົນປະຈຳລາວ ພ້ອມດ້ວຍສື່ມວນຊົນ ໃນວັນທີ 9 ເດືອນກັນຍາ ປີ 2014 ທີ່ສະພາແຫ່ງຊາດວ່າ: ມາເຖິງປັດຈຸບັນທັງ 8 ອະນຸກຳມະການ ຄື: ອະນຸກຳມະການກອງເລຂາໄອປາ; ອະນຸກຳມະການເນື້ອໃນ; ອະນຸກຳມະການພິທີການ, ສະຖານທີ່ ແລະ ພາຫະນະ; ອະນຸກຳມະການ ໂຄສະນາ-ຂ່າວສານ, ສິລະປະ ແລະ ທ່ອງທ່ຽວ; ອະນຸກຳມະການປະດັບປະດາ ແລະ ອະນາໄມຕົວເມືອງ; ອະນຸກຳມະການສຸຂະພາບ; ອະນຸກຳມະການງົບປະມານ ແລະ ອະນຸກຳມະການປ້ອງກັນຊາດ-ປ້ອງກັນຄວາມສະຫງົບ ແມ່ນໄດ້ມີການກຽມ ແລະ ມີຄວາມພ້ອມໃນທຸກດ້ານ. ສຳລັບ ວາລະກອງປະຊຸມ ໄວປາ ຈະມີການພິຈາລະນາ ແລະ ຮັບຮອງເອົາຫລາຍ ມະຕິສຳຄັນເຊັ່ນ: ມະຕິວ່າດ້ວຍການເພີ່ມທະວີຄວາມພະຍາຍາມໃນການປ້ອງກັນທຸກຮູບແບບການຈຳແນກ ແລະ ການໃຊ້ຄວາມຮຸນແຮງ ຕໍ່ແມ່ຍິງ ແລະ ເດັກນ້ອຍໃນອາຊຽນ; ມະຕິວ່າດ້ວຍ ການປັບປຸງບົດບາດຂອງສະມາຊິກລັດຖະສະພາເພດຍິງໃຫ້ເຂັ້ມແຂງໃນການສ້າງປະຊາຄົມອາຊຽນ ແລະ ມະຕິວ່າ ດ້ວຍພາວະການເປັນຜູ້ນຳຂອງ ແມ່ຍິງຢູ່ອາຊີຕາເວັນອອກສ່ຽງໃຕ້. ສ່ວນວາລະກອງປະຊຸມ ໄອປາ ຈະມີການພິຈາລະນາມະຕິວ່າດ້ວຍ ການສົ່ງເສີມການພັດທະນາສີຂຽວແບບຍືນຍົງໃນອາຊຽນ; ການສົ່ງເສີມການພັດທະນາຜູ້ປະກອບການໃນຂະບວນການຮັດແຄບຄວາມແຕກໂຕນທາງດ້ານ ການພັດທະນາໃນອາຊຽນ; ການສ້າງຕັ້ງໜ່ວຍງານວິຊາການຂອງ ໄອໂຟຄອມ; ການຮ່ວມມືດ້ານນິຕິກຳ ໃນການປ້ອງກັນ ແລະ ຄວບຄຸມພະຍາດບໍ່ຕິດຕໍ່ ລະຫວ່າງ ລັດຖະສະພາ ປະເທດສະມາຊິກ ອາຊຽນ ໃນການປະກອບສ່ວນເຂົ້າໃນການສ້າງຕັ້ງປະຊາຄົມວັດທະນະທຳ-ສັງຄົມອາຊຽນ; ການເພີ່ມທະວີບົດບາດຂອງລັດຖະສະພາ ໃນການໃຫ້ບູລິມະສິດ ແກ່ຂະແໜງສຶກສາວິຊາຊີບ ແລະ ການພັດທະນາສີມືແຮງງານ ໃຫ້ເຊື່ອມໂຍງເຂົ້າກັບຕະຫລາດແຮງງານຂອງປະຊາຄົມອາຊຽນ; ນັບທັງການຍົກສູງການຮ່ວມມືລະຫວ່າງລັດຖະສະພາໃນການປ້ອງກັນພະຍາດຕິດຕໍ່ ອີໂບລາ, ນອກນີ້ ຈະສຸມໃສ່ພິຈາລະນາມະຕິ ກ່ຽວກັບການ ດັດແກ້ລັດຖະທຳມະນູນ ໄອປາ ໃຫ້ມີຄວາມສອດຄ່ອງຍິ່ງຂຶ້ນ, ການສ້າງກອງເລຂາທິການໃຫຍ່ ໄອປາ, ວຽກງານການເງິນ ແລະ ວຽກງານບຸກຄະລາ ກອນເປັນຕົ້ນ. ສຳລັບຄະນະຜູ້ແທນທີ່ຈະເຂົ້າຮ່ວມ ກອງປະຊຸມຄັ້ງນີ້ ນອກຈາກບັນດາລັດຖະສະພາໃນ 10 ປະເທດສະມາຊິກອາຊຽນ ຍັງມີບັນດາປະເທດສັງເກດການທີ່ເປັນຄູ່ເຈລະຈາຄື: ປະເທດອົດສະຕຣາລີ, ເບລາຣຸສ, ສປ ຈີນ, ອິນເດຍ, ຍີ່ປຸ່ນ, ສ.ເກົາຫລີ, ຣັດເຊຍ ແລະ ປະເທດຕີມໍເລສະເຕ. ນອກນີ້ ຍັງບັນດາອົງການຈັດຕັ້ງສາກົນເຊັ່ນ: ກອງເລຂາອາຊຽນ, ອົງການອະນຸລັກສັດປ່າອາຊີ, ເວທີປຶກສາຫາລື ຂອງເພດຍິງກ່ຽວ ກັບກົດໝາຍ ແລະ ການ ພັດທະນາ, ອົງການຮ່ວມມືສາກົນ ປະເທດເຢຍລະມັນ, ອົງການສະຫະປະຊາຊາດ ເພື່ອຍຸດທະສາດຫລຸດຜ່ອນໄພພິບັດສາກົນ ແລະ ປະເທດ ມົງໂກລີ, ນັບທັງແຂກຂອງປະເທດເຈົ້າພາບອີກຈຳນວນໜຶ່ງລວມທັງໝົດ 369 ທ່ານ.