ສື່ມວນຊົນ ກຽມພ້ອມຮັບໃຊ້ກອງປະຊຸມສາກົນ​ທີ່ ສປປ ລາວ​ ເປັນ​ເຈົ້າພາບ

ຂປລ. ໃນວັນທີ 5 ເດືອນກັນຍາປີ 2014 ນີ້, ບັນດາການນາໍສື່ມວນຊົນທັງ ສື່ສິ່ງພິມ ແລະ ສື່ເອເລັກໂຕນິກ ໄດ້ຮ່ວມກັນປຶກສາຫາລືກ່ຽວກັບການກະກຽມ ຄວາມພ້ອມຂອງສື່ມວນຊົນລາວໃນດ້ານຕ່າງໆ ເພື່ອຮັບໃຊ້ກອງປະຊຸມລັດຖະສະພາ ລະຫວ່າງຊາດອາຊຽນ ຄັ້ງທີ 35 ແລະ ກອງປະຊຸມລັດຖະມົນຕີສຶກສາ ອາຊຽນຄັ້ງທີ 8  ແລະ ກອງປະຊຸມປິ່ນອ້ອມຕ່າງໆ ທີ່ ສປປ ລາວ ໄດ້ຮັບກຽດເປັນເຈົ້າພາບໃນເດືອນກັນຍາປີ 2014 ນີ້.


ກອງປະຊຸມປຶກສາຫາລືຄັ້ງນີ້ ຈັດຂຶ້ນຢູ່ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໂດຍການເປັນປະທານ ຂອງທ່ານ ສະຫວັນຄອນ ຣາຊມຸນຕຣີ ລັດຖະມົນຕີຊ່ວຍວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ມີບັນດາຫົວໜ້າກົມ, ຮອງກົມ ແລະ ຫົວໜ້າອຳນວຍການສື່ສິ່ງພິ່ມ ແລະ ສື່ເອເລັກໂຕນິກ ທັງພາກ ລັດ ແລະ ເອກະຊົນເຂົ້າຮ່ວມ.
ທ່ານ ປິ່ນປາຖະໜາ ພັນທະມາລີ ຫົວໜ້າກົມສື່ມວນຊົນ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ແຈ້ງໃຫ້ຮູ້ວ່າ: ກອງປະຊຸມໄດ້ ປຶກສາຫາລືການກະກຽມຄວາມພ້ອມຂອງສື່ມວນຊົນລາວໃນດ້ານຕ່າງໆ ເປັນຕົ້ນແມ່ນການກະກຽມສ້າງຕັ້ງສູນຂ່າວ, ການເຮັດໃບຂ່າວ ເພື່ອຮັບໃຊ້ກອງປະຊຸມ AIPA ຄັ້ງທີ 35 ແລະ ກອງປະຊຸມລັດຖະມົນຕີສຶກສາອາຊຽນຄັ້ງທີ 8 ທີ່ ສປປ ລາວ ໄດ້ຮັບກຽດເປັນເຈົ້າພາບໃນຕົ້ນເດືອນກັນຍາປີ 2014 ນີ້. ພ້ອມນີ້ ຍັງໄດ້ຕີລາຄາຄືນຜົນງານໃນການປະກອບສ່ວນຂອງສື່ມວນຊົນລາວໃນການກະກຽມກອງປະຊຸມດັ່ງກ່າວເຊິ່ງເລີ່ມມາແຕ່ເດືອນມີນາ ປີ 2014 ເປັນຕົ້ນມາ ເຊິ່ງເຫັນວ່າ: ເນື້ອໃນໂຄສະນາ ກໍມີຫລາກຫລາຍທີ່ໄດ້ເວົ້າເຖິງປະຫວັດຄວາມ ເປັນມາຂອງກອງປະຊຸມ AIPA  ພ້ອມດຽວກັນນັ້ນ ກໍໄດ້ຍົກໃຫ້ເຫັນບົດບາດສະພາແຫ່ງຊາດລາວໃນເວທີສາກົນ ແລະ ໃນເວທີອາຊຽນ ໂດຍສະເພາະໃນເວທີ ຂອງກອງປະຊຸມລັດຖະສະພາອາຊຽນ, ການໂຄສະນາປຸກລະດົມໃນການເປັນເຈົ້າພາບຮ່ວມ ເພື່ອສ້າງບັນຍາກາດອັນດີ ແລະ ກຽມພ້ອມຕ້ອນຮັບ, ການອະນາໄມຕົວເມືອງ, ການກະກຽມສະຖານທີ່, ການສະແດງສິລະປະວັນນະຄະດີຕ່າງໆ. ໃນບັນດາສື່ສິ່ງພິມ ແລະ ເອເລັກໂຕນິກ ກໍລ້ວນແຕ່ມີຄໍລຳ, ມີການອອກ ໂລໂກ, ມີບົດສະເໜີ ແລະ ການສຳພາດສົນທະນາບັນດາອະນຸກຳມະການດ້ານຕ່າງໆ, ການສຳພາດພໍ່ແມ່ປະຊາຊົນ ແລະ ອື່ນໆ.
ໃນໂອກາດນີ້ ທ່ານ ສະຫວັນຄອນ ຣາຊມຸນຕຣີ ກໍໄດ້ສະແດງຄວາມຊົມເຊີຍຜົນງານທີ່ບັນດາສື່ມວນຊົນໄດ້ປະກອບສ່ວນ ເຂົ້າໃນການເຜີຍແຜ່ໂຄສະນາວຽກງານຕ່າງໆໃນໄລຍະຜ່ານມາ ແລະ ໃຫ້ທິດຊີ້ນຳຕໍ່ກອງປະຊຸມໂດຍ ໄດ້ຮຽກຮ້ອງໃຫ້ທຸກພາກສ່ວນມີສ່ວນຮ່ວມໃນການໂຄສະນາຢ່າງກວ້າງຂວາງ ຮັບໃຊ້ກອງປະຊຸມດັ່ງກ່າວດ້ວຍຄວາມຮັບຜິດຊອບ ແລະ ໃຫ້ມີຫລາຍຮູບແບບ, ນອກຈາກນີ້ແລ້ວ ທ່ານ ສະຫວັນຄອນ ຣາຊມຸນຕຣີ ຍັງແນະນຳສື່ມວນຊົນ ສືບຕໍ່ເອົາໃຈໃສ່ໂຄສະນາເຫດການຕ່າງໆທີ່ເກີດຂຶ້ນ ເພື່ອສ່ອງແສງໃຫ້ສັງຄົມເຫັນ ແລະ ຮັບຮູ້ໄດ້ຢ່າງຖືກຕ້ອງ ແລະ ມີການປ່ຽນແປງໄປໃນທາງທີ່ດີ. ພ້ອມກັນນັ້ນ ກໍໃຫ້ສືບຕໍ່ໂຄສະນາການສະກັດກັ້ນ ແລະ ຕ້ານປະກົດການຫຍໍ້ທໍ້ໃນສັງຄົມ ແລະ ອື່ນໆເພື່ອໃຫ້ປະຊາຊົນໄດ້ຮັບຮູ້ຂໍ້ມູນຂ່າວສານໄດ້ຢ່າງທົ່ວເຖິງ.