ນະຄອນຫລວງ ເລັ່ງແກ້ໄຂນ້ຳຖ້ວມໃນຕົວເມືອງ

ຂປລ. ຕອນເຊົ້າວັນທີ 4 ເດືອນກັນຍາ ປີ 2014 ນີ້, ທ່ານ ດຣ. ສິນລະວົງ ຄຸດໄພທູນ ເຈົ້າຄອງ ນະຄອນຫລວງວຽງຈັນ ໄດ້ປະຊຸມຮ່ວມກັບບັນດາເຈົ້າເມືອງ 7 ຕົວເມືອງ ໃນຈຳນວນ 9 ເມືອງ ( ນອກຈາກ ເມືອງສັງທອງ ແລະ ເມືອງປາກງື່ມ ) ແລະ ຂະແໜງການທີ່ກ່ຽວຂ້ອງເພື່ອປຶກສາຫາລື ວິທີການສະກັດກັ້ນ ແລະ ແກ້ໄຂບັນຫານ້ຳຖ້ວມທີ່ກຳລັງເກີດຂຶ້ນໃນປັດຈຸບັນຢູ່ນະຄອນຫລວງວຽງຈັນ.


ບັນດາເຈົ້າເມືອງທີ່ເຂົ້າຮ່ວມໄດ້ລາຍງານກ່ຽວກັບ ສະພາບນ້ຳຖ້ວມຢູ່ເມືອງຂອງຕົນຕໍ່ການນຳ ນະຄອນຫລວງ ໂດຍສາເຫດທີ່ເຮັດໃຫ້ນ້ຳຖ້ວມຂັງ ສ່ວນຫລາຍ ແມ່ນເກີດຈາກຫລາຍບັນຫາ ໂດຍສະເພາະຮ່ອງລະບາຍນ້ຳອຸດຕັນ, ຮ່ອງນ້ຳບໍ່ໄດ້ມາດຕະຖານ, ການກໍ່ສ້າງລະບົບລະບາຍນ້ຳຍັງບໍ່ເປັນລະບົບໝາຍວ່າ: ຮ່ອງລະບາຍນ້ຳສາຍແມ່ຈຳນວນໜຶ່ງຍັງບໍ່ເຊື່ອມຕໍ່ຮອດບຶງທາດຫລວງ ຫລື ຈຸດອອກ ຂອງນ້ຳ, ຮ່ອງລະບາຍນ້ຳ ແຄມທາງຮ່ອມຂອງຄຸ້ມບ້ານ ຍັງບໍ່ທັນເຊື່ອມຕໍ່ໃສ່ຮ່ອງລະບາຍນ້ຳແຄມທາງ ສາຍຫລັກ ( ທາງໃຫຍ່ ) ແລະ ອື່ນໆ. ພ້ອມນັ້ນກໍໄດ້ປຶກສາຫາລືກ່ຽວກັບວິທີທາງແກ້ໄຂ ແລະ ສະກັດກັ້ນ ໄພນ້ຳຖ້ວມ ດັ່ງກ່າວ.
ທ່ານ ດຣ. ສິນລະວົງ ຄຸດໄພທູນ ໄດ້ເນັ້ນໃຫ້ພາກສ່ວນກ່ຽວຂ້ອງເອົາໃຈໃສ່ແກ້ໄຂບ່ອນທີ່ມີ ບັນຫາຢ່າງຮີບດ່ວນ ໂດຍສະເພາະບຶງທາດຫລວງ ແລະ ແຫ່ງອື່ນໆ, ແບ່ງຄວາມຮັບຜິດຊອບໃນການຈັດ ຕັ້ງປະຕິບັດວຽກງານຄວບຄຸມໄພນ້ຳຖ້ວມ, ລາຍງານໃຫ້ລັດຖະບານ, ຫ້ອງວ່າການສູນກາງພັກ ແລະ ອຳນາດການປົກຄອງທຸກຂັ້ນຊາບ, ພ້ອມນັ້ນ ທ່ານ ຍັງເນັ້ນໃຫ້ອຳນາດການປົກຄອງເມືອງ, ບ້ານ ທຸກຂັ້ນລົງນຳພາ ປຸກລະດົມພໍ່ແມ່ປະຊາຊົນຊ່ວຍກັນ ທຳຄວາມສະອາດຮ່ອງລະບາຍນ້ຳ, ຄອງຊົນລະປະທານ ແລະ ອື່ນໆ ເປັນປະຈຳ.
ທ່ານ ສົມບູນ ອາຄະວົງສາ ຮອງປະທານອົງການພັດທະນາ ແລະ ບໍລິຫານຕົວເມືອງວຽງຈັນ ( ອພບ ) ກໍໄດ້ໃຫ້ຮູ້ກ່ຽວກັບວິທີການແກ້ໄຂ ແລະ ສະກັດກັ້ນ ໄພນ້ຳຖ້ວມໃນຕໍ່ໜ້າ ໂດຍມີການແບ່ງວຽກ, ແບ່ງເຂດຮັບຜິດຊອບໃຫ້ອຳນາດການປົກຄອງເມືອງ, ບ້ານເປັນເຈົ້າການສ້າງຂະບວນການ ອະນາໄມຮ່ອງລະບາຍນ້ຳ, ແຕ່ງຕັ້ງຄະນະຮັບຜິດຊອບແກ້ໄຂນ້ຳຖ້ວມຂັງໃນຕົວເມືອງ, ມອບໃຫ້ພະແນກການທີ່ກ່ຽວຂ້ອງ ເຊັ່ນ: ພະແນກກະສິກຳ-ປ່າໄມ້ ຈັດຕັ້ງປະຕິບັດລ່ວງຜັກຕົບ, ຫຍ້າອອກຈາກຄອງບຶງ ທາດຫລວງ, ອພບ ຈັດຕັ້ງປະຕິບັດລ່ວງຜັກຕົບ, ຫຍ້າອອກຈາກຮ່ອງລະບາຍນ້ຳ ສາຍແມ່ໃນຕົວເມືອງ ແລະ ຮ່ອງລະບາຍນ້ຳ ແຄມທາງສາຍຫລັກຈຸດທີ່ນ້ຳຖ້ວມຂັງ ແລະ ພະແນກໂຍທາທິການ ແລະ ຂົນສົ່ງລ່ວງຮ່ອງລະບາຍ ນ້ຳແຄມທາງທີ່ພາໃຫ້ເສັ້ນ ທາງເປ່ເພ, ສ້າງໃຫ້ມີລະບົບຜັງເມືອງກ່ຽວກັບການຮັກສາ ເຂດສະຫງວນບຶງໜອງ ແລະ ຮ່ອງລະບາຍນ້ຳທຳມະຊາດ ໄວ້ເພື່ອເປັນບ່ອນເກັບນ້ຳ ແລະ ລະບາຍນ້ຳ ອອກຈາກຕົວເມືອງ.