ທູດຫວຽດນາມ ຈັດງານລ້ຽງສະຫລອງວັນຊາດ ຄົບຮອບ 69 ປີ

ປຊຊ. ສະຫາຍ ດຣ. ຫງວຽນ ແມັ້ງຮຸ່ງ ເອກອັກຄະລັດຖະທູດ ແຫ່ງ ສສ ຫວຽດນາມ ປະຈຳ ສປປ ລາວ ພ້ອມພັນລະຍາໄດ້ ຈັດງານລ້ຽງສະເຫຼີມສະຫຼອງ ວັນຊາດ ສສ ຫວຽດນາມ ຄົບ ຮອບ 69 ປີ ຂຶ້ນໃນຕອນຄ່ຳ ຂອງວັນທີ 2 ກັນຍານີ້ ທີ່ສະຖານທູດຫວຽດນາມປະຈຳລາວ, ໂດຍການເປັນກຽດເຂົ້າຮ່ວມຂອງ ສະຫາຍ ບຸນຍັງ ວໍລະຈິດ ກຳມະການກົມການເມືອງສູນກາງພັກ ຜູ້ປະຈຳການຄະນະ ເລຂາທິການສູນກາງພັກ ຮອງ ປະທານປະເທດແຫ່ງ ສປປ ລາວ, ມີຮອງນາຍົກລັດຖະມົນຕີ, ລັດຖະມົນຕີວ່າການ, ຊ່ວຍວ່າການ, ທູຕານຸທູດ ແລະ ແຂກ ຖືກເຊີນເຂົ້າຮ່ວມ.


   ສະຫາຍ ຫງວຽນ ແມັ້ງຮຸ່ງ ກ່າວບາງຕອນໃນງານວ່າ: ຕະຫຼອດໄລຍະ 69 ປີພາຍໃຕ້ການຊີ້ນຳໍໆພາຂອງພັກກອມມູນິດ ຫວຽດນາມ ໂດຍແມ່ນທ່ານ ປະທານ ໂຮ່ຈິມິນ ເປັນຜູ້ກໍ່ຕັ້ງ ເພື່ອນຳພາປະຊາຊົນຮັ່ງມີຜາສຸກ, ປະເທດຊາດເຂັ້ມແຂງ, ປະຊາທິປະໄຕ, ຍຸຕິທຳ, ສີວິໄລ ນຳພາປະເທດຊາດກ້າວຂຶ້ນສັງຄົມນິຍົມ. ປະຈຸບັນ ພັກ - ລັດ ປະຊາຊົນຫວຽດນາມ ກຳລັງຈັດຕັ້ງປະຕິບັດມະຕິກອງ ປະຊຸມໃຫຍ່ຄັ້ງທີ XI ຂອງພັກ ກອມມູນິດຫວຽດນາມ ແລະ ແຜນພັດທະນາເສດຖະກິດ - ສັງຄົມ ໄລຍະ 5 ປີ 2011 - 2015 ການຈະເລີນເຕີບໂຕ ດ້ານເສດຖະກິດຢູ່ໃນລະດັບ 5,5%, ອັດຕາສ່ວນຄອບຄົວ ທຸກຍາກຍັງເຫຼືອພຽງ 9,8% (ຫຼຸຸດລົງ 1,3% ເມື່ອທຽບໃສ່ ປີ 2012).
   ທ່ານທູດຫວຽດນາມຍັງ ສະແດງຄວາມພາກພູມໃຈຕໍ່ ບັນດາຜົນງານທີ່ທັງສອງປະເທດຫວຽດນາມ ແລະ ລາວ ຍາດມາໄດ້, ພວກເຮົາມີຄວາມ ປິຕິຊົມຊື່ນເປັນຢ່າງຍິ່ງຕໍ່ການ ຂະຫຍາຍຕົວຢ່າງກວ້າງຂວາງ ແລະ ເລິກເຊິ່ງຂອງສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ - ລາວ, ລາວ - ຫວຽດນາມ. ໃນປີນີ້, ການນຳ ຂັ້ນສູງຂອງສອງພັກ, ສອງລັດ ໄດ້ມີການພົບປະກັນຢ່າງເປັນປະຈຳ. ໃນເດືອນເມສາຜ່ານມາສະຫາຍ ຫງວຽນຝູຈ້ອງ ເລຂາທິການໃຫຍ່ພັກກອມມູນິດ ຫວຽດນາມ ແລະ ພັນລະຍາ ໄດ້ເດີນທາງມາຢ້ຽມຢາມ ສປປ ລາວ, ຮ່ວມຕ້ອນຮັບບຸນປີໃໝ່ລາວກັບປະຊາຊົນລາວ. ໃນເດືອນສິງຫາຜ່ານມາ, ສະຫາຍ ຈູມມາລີ ໄຊຍະສອນ ເລຂາທິການໃຫຍ່ພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ ແລະ ພັນລະຍາ ໄດ້ເດີນທາງໄປຢ້ຽມຢາມຫວຽດນາມ. ບັນດາຂໍ້ຕົກລົງຂັ້ນສູງ, ບັນດາສັນຍາຮ່ວມມືລະຫວ່າງສອງລັດຖະບານ, ລະຫວ່າງບັນດາກະຊວງ, ຂະແໜງການ, ທ້ອງຖິ່ນຕ່າງໆ ຂອງສອງປະເທດໄດ້ຮັບການຈັດຕັ້ງຜັນຂະຫຍາຍຢ່າງຕັ້ງໜ້າ, ແທດເໝາະກັບຕົວຈິງ ແລະ ມີປະສິດທິຜົນຈາກທັງສອງຝ່າຍ. ການຮ່ວມມືໃນຂົງເຂດປ້ອງກັນຊາດ, ປ້ອງກັນຄວາມສະຫງົບລະຫວ່າງສອງປະເທດສືບຕໍ່ໄດ້ຮັບການເພີ່ມທະວີ. ການຮ່ວມມືໃນຂົງເຂດ ການສຶກສາ ແລະ ພັດທະນາ ແຫຼ່ງຊັບພະຍາກອນມະນຸດ ໄດ້ຮັບການເອົາໃຈໃສ່ເປັນພິເສດ ແລະ ຊຸກຍູ້ຕາມທິດຍົກສູງປະສິດທິພາບ ແລະ ແທ້ຈິງ ໂດຍລັດຖະບານຫວຽດນາມມອບທຶນການສຶກສາ 800 ກວ່າທຶນໃຫ້ແກ່ນັກສຶກສາລາວ ໄປຮຽນຢູ່ຫວຽດນາມ ແລະ ລັດຖະບານລາວມອບທຶນ ການສຶກສາເກືອບ 50 ທຶນໃຫ້ ແກ່ນັກສຶກສາຫວຽດນາມ ມາຮ່ຳຮຽນສຶກສາຢູ່ລາວໃນປີນີ້. ການຮ່ວມມືໃນຂົງເຂດເສດຖະກິດ, ການຄ້າ ແລະ ການ ລົງທຶນລະຫວ່າງສອງປະເທດ ມີການຂະຫຍາຍຕົວດີຂຶ້ນ; ມີຫຼາຍໂຄງການຮ່ວມມືໃຫຍ່ ຕ່າງໆແມ່ນໄດ້ຮັບການນຳເຂົ້າເຄື່ອນໄຫວ; ມູນຄ່າການຄ້າ ສອງຝ່າຍໄລຍະ 6 ເດືອນຕົ້ນ ປີ 2014 ບັນລຸ 776 ລ້ານໂດ ລາສະຫະລັດ.
   ສອງປະເທດພວກເຮົາມີ ຄວາມເຊື່ອໝັ້ນຢ່າງໜັກແໜ້ນ ວ່າສາຍພົວພັນມິດຕະພາບ ອັນເປັນມູນເຊື້ອສະໜິດຕິດພັນ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ ແລະ ລາວ ຈະສວຍສົດງົດງາມ ແລະ ໝັ້ນຄົງ ທະນົງແກ່ນຕະຫຼອດການ, ຈະເປັນແຫຼ່ງກຳລັງແຮງອັນໃຫຍ່ຫຼວງ, ບໍ່ມີບ່ອນສິ້ນສຸດໃຫ້ແກ່ພາລະກິດປົກປັກຮັກສາ, ສ້າງສາພັດທະນາປະເທດຊາດຂອງຫວຽດນາມ ແລະ ລາວ, ປະກອບສ່ວນຢ່າງຕັ້ງໜ້າເຂົ້າໃນພາລະກິດສັນຕິພາບ, ສະຖຽນລະພາບ, ມິດຕະພາບ, ການຮ່ວມມື ແລະ ການ ພັດທະນາວັດທະນາຖາວອນ ຢູ່ໃນພາກພື້ນ ແລະ ໃນໂລກ.