ທ່ານ ນາຍົກລັດຖະມົນຕີ ຕ້ອນຮັບຜູ້ຕາງໜ້າ ສປຊ ເພື່ອການພັດທະນາປະຈຳ ສປປ ລາວ

ຂປລ. ທ່ານ ທອງສິງ ທຳມະວົງ ນາຍົກລັດຖະມົນຕີແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ ກາລີນາ ອິມໂມເນນ ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ (ສປຊ) ປະຈຳ ສປປ ລາວ ຄົນໃໝ່ ໃນວັນທີ 2 ເດືອນ ກັນຍາ 2014 ຢູ່ຫ້ອງວ່າການລັດຖະບານ ໃນໂອກາດທີ່ມາດຳລົງຕຳແໜ່ງເປັນຜູ້ຕາງໜ້າ ອົງການສະຫະປະຊາຊາດ ເພື່ອການພັດທະນາຄົນໃໝ່ປະຈຳ ສປປ ລາວ


ທ່ານ ນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາ ສູງຕໍ່ ທ່ານ ນາງ ກາລີນາ ອິມໂມເນນ ທີ່ໄດ້ຖືກແຕ່ງຕັ້ງໃຫ້ ມາດຳລົງຕຳແໜ່ງເປັນຜູ້ຕາງໜ້າ ອົງການສະຫະປະຊາຊາດ ເພື່ອການພັດທະນາປະຈຳ ສປປ ລາວ ເຊິ່ງ ເປັນການປະກອບສ່ວນອັນສຳຄັນເຂົ້າໃນ ການເສີມຂະຫຍາຍການພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ອົງການສະຫະປະຊາຊາດ ເພື່ອການພັດທະນາໃຫ້ນັບມື້ນັບເລິ່ກ ເຊິ່ງຍິ່ງຂຶ້ນ ໂດຍສະເພາະແມ່ນການພົວພັນຮ່ວມມືທາງດ້ານການພັດທະນາເສດຖະກິດ-ສັງຄົມ ລະຫວ່າງ ສປຊ ແລະ ສປປ ລາວ ໃຫ້ນັບມື້ນັບຂະ ຫຍຍາຍຕົວຍິ່ງໆຂຶ້ນ
ທ່ານ ນາງ ກາລິນາ ອິມໂມເນນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງທ່ານ ນາຍົກລັດຖະມົນຕີ ໃນຄັ້ງນີ້ ພ້ອມທັງຢືນຢັນ ຈະສືບຕໍ່ໃຫ້ການຮ່ວມມືຊ່ວຍ ເຫລືອດ້ານການພັດທະນາໃຫ້ລັດຖະບານລາວ ໂດຍສະເພາະດ້ານການສະໜັບສະໜູນ ການສ້າງຄວາມເຂັ້ມແຂງການ ຍົກລະດັບບຸກຄະລາກອນ, ການປັບປຸງນິຕິກຳ ແລະ ອື່ນໆໃຫ້  ສປປ ລາວ ໃຫ້ນັບມື້ນັບມີປະສິດທິພາບຍິ່ງຂຶ້ນ.