ລາວກຽມຮັບມືຕ້ານໄພພິບັດ​ທຳມະຊາດ ຫລຸດຜ່ອນການສູນເສຍຊີວິດ ແລະ ຊັບ​ສິນ

ຂປລ.ໄພທຳມະຊາດ ເປັນໄພຄຸກຄາມໃໝ່ ທີ່ລັດຖະບານຂອງປະເທດຕ່າງໆທົ່ວໂລກ ໃຫ້ຄວາມສຳຄັນ ເນື່ອງຈາກສະພາບການປ່ຽນແປງຂອງ ດິນ ຟ້າອາກາດ, ສະເພາະປີ 2014 ນີ້ ປະເທດ ໃນສະມາຊິກອາຊຽນໂດຍສະເພາະ ປະເທດໄທ, ຫວຽດນາມ, ມຽນມາ, ກຳປູເຈຍ ລວມທັງ ສປປ ລາວ ຕ່າງກໍໄດ້ຮັບຜົນເສຍຫາຍຈາກໄພພິບັດນ້ຳຖ້ວມ.

ຈາກການລາຍງານຄວາມສ່ຽງເກີດໄພທຳມະຊາດຂອງທະນາຄານໂລກລະບຸວ່າ ປະເທດ ລາວ ເປັນປະເທດທີ່ສ່ຽງຕໍ່ໄພທຳມະຊາດລະດັບສູງ ເນື່ອງຈາກຢູ່ໃນເຂດມໍລະສຸມ ແລະ ມີພາຍຸປິ່ນອ້ອມເຂດຮ້ອນທີ່ກໍ່ຕົວຈາກທະເລຈີນໃຕ້ ຫລື ມະຫາສະໝຸດ ປາຊີຟິກ ພັດຜ່ານເປັນປະຈຳ. ອີກດ້ານໜຶ່ງ ພູມສາດປະເທດລາວ ເປັນບ່ອນຮາບພຽງລຸ່ມລະຫວ່າງພູເຮັດໃຫ້ເມື່ອມີພາຍຸພັດກະທົບກັບສັນພູ ເກີດຝົນຕົກໜັກ ແລະ ອຸທົກກະໄພນ້ຳປ່າໄຫລຊຸ, ດິນເຈື່ອນ ໃນໄລຍະລະດູຝົນຂອງທຸກປີ. ດັ່ງນັ້ນ ເພື່ອກຽມພ້ອມຮັບມືກັບໄພພິບັດທີ່ອາດຈະເກີດຂຶ້ນ, ການແຈ້ງເຕືອນໄພລ່ວງໜ້າຈຶ່ງມີຄວາມຈຳເປັນ ແລະ ສຳຄັນ ແນໃສ່ຫລຸດຜ່ອນການສູນເສຍຢ່າງມະຫາສານທາງດ້ານຊີວິດ ແລະ ຊັບສິນຂອງປະຊາຊົນ ເຊິ່ງ ສປປ ລາວ ກຽມສ້າງສູນດັ່ງກ່າວ ໃນ ປີ 2015 ນີ້.
ທ່ານ ຫຸມພັນ ອິນທະລາດ ລັດຖະມົນຕີຊ່ວຍວ່າການກະຊວງວິທະຍາສາດ ແລະ ເຕັກໂນໂລຊີ ແຫ່ງ ສປປ ລາວໃນຖານະເປັນປະທານ ໄດ້ກ່າວຕໍ່ກອງປະຊຸມສາມັນປະຈຳປີຂອງອະນຸກຳມະການອາຊຽນດ້ານອຸຕຸນິຍົມ ແລະ ທໍລະນີຟີຊິກຄັ້ງທີ 36 (Sub-Committee on Meteorology and Geophysics: SCMG) ເຊິ່ງໄດ້ຈັດຂຶ້ນແຕ່ວັນທີ 1-3 ເດືອນ ກັນຍາປີ 2014 ຢູ່ທີ່ໂຮງແຮມລາວພລາຊາ, ນະຄອນຫລວງວຽງຈັນວ່າ: ສປປ ລາວ ເປັນປະເທດໜຶ່ງທີ່ໄດ້ຖືເອົາວຽກງານດ້ານອຸຕຸນິຍົມ ແລະ ທໍລະນີຟີຊິກເປັນວຽກງານທີ່ສຳໍຄັນປິ່ນອ້ອມ ວຽກງານອື່ນເພື່ອເປັນການເສີມຂະຫຍາຍ ຄວາມອາດສາມາດຂອງການບໍລິການຂໍ້ມູນຂ່າວສານອຸຕຸນິຍົມແລະ ທໍລະນີຟີຊິກເພື່ອປົກປັກຮັກສາຊີວິດ, ຊັບສິນຂອງປະຊາຊົນພາຍໃນປະເທດ ແລະ ບັນດາຂະແໜງການຕ່າງໆເຊັ່ນ: ການບິນ, ກະສິກຳ, ການທ່ອງທ່ຽວ ແລະ ການພັດທະນາເສດຖະກິດ-ສັງຄົມ. ສະນັ້ນ ການສ້າງຕັ້ງ ແລະ ປັບປຸງຂະຫຍາຍສູນເຕືອນໄພພິບັດທຳມະຊາດ ແມ່ນມີຄວາມຈຳເປັນທີ່ສຸດ ເພື່ອສະໜັບສະໜູນຄວາມຕ້ອງການຂອງບັນດາປະເທດສະມາຊິກອາຊຽນ ໃນຂົງເຂດອຸຕຸນິຍົມ, ແຜ່ນດິນໄຫວ, ພູເຂົາໄຟແລະ ບັນຫາສິ່ງແວດລ້ອມອື່ນໆແນໃສ່ ເພື່ອສ້າງຄວາມເຂັ້ມແຂງແກ່ປະເທດສະມາຊິກ. ສະເພາະ ສປປ ລາວ ສູນເຕືອນໄພພິບັດ ທຳມະຊາດ ຈະສ້າງຂຶ້ນໃນປີ 2015 ນີ້.
ກອງປະຊຸມສາມັນປະຈຳປີຂອງອະນຸກຳມະການອາຊຽນດ້ານອຸຕຸນິຍົມແລະ ທໍລະນີຟີຊິກຄັ້ງທີ 36 ຈັດຂຶ້ນຄັ້ງນີ້, ບັນດາອະນຸກຳໍມະການຈາກ 10 ປະເທດສະມາຊິກອາຊຽນ ໄດ້ຮ່ວມກັນປຶກສາຫາລືກ່ຽວກັບພະຍາກອນອາກາດ, ນ້ຳ, ການປະເມີນປະລິມານນ້ຳຝົນລ່ວງໜ້າ, ລະບົບເຕືອນໄພລ່ວງໜ້າເພື່ອຫລຸດຜ່ອນຄວາມສ່ຽງ ແລະ ການປ່ຽນແປງດິນຟ້າອາກາດ ເພື່ອກ້າວເຂົ້າສູ່ການສ້າງຄວາມທົນທານຕໍ່ໄພພິບັດຂອງອາຊຽນ. ພ້ອມນັ້ນ ຍັງໄດ້ປຶກສາຫາລືວຽກງານທີ່ເປັນບູລິມະສິດໃນແຜນດຳເນີນງານອາຊຽນດ້ານວິທະຍາສາດ ແລະ ເຕັກໂນໂລຊີ ສົກປີ 2012-2013  ທີ່ຕິດພັນກັບອຸທົກກະສາດ, ອຸຕຸນິຍົມທາງທະເລ ແລະ ມະຫາສະໝຸດເພື່ອສ້າງວິໄສທັດອາຊຽນໃນປີ 2015 ໃຫ້ເປັນຈິງ. ນອກນັ້ນ ຍັງໄດ້ຮັບຊາບແຜນເຕືອນໄພ ຊຶນາມິອາຊຽນ, ແຜນການຮັບມືກັບໄພພິບັດທີ່ເກີດຈາກລົມພາຍຸໄຕ້ຝຸ່ນ, ລະບົບເຕືອນໄພລ່ວງໜ້າ ເພື່ອຫລຸດຜ່ອນຄວາມສ່ຽງຈາກໄພພິບັດ, ໝອກຄວັນຂ້າມຊາຍແດນ. ຂະນະດຽວກັນນີ້ ກໍໄດ້ມີການເຜີຍແຜ່ຂໍ້ມູນແຜ່ນດິນໄຫວຂອງປະເທດສະມາຊິກ ແລະ ຈະປຶກສາຫາລືກັບບັນດາປະເທດຄູ່ຮ່ວມເຈລະຈາເຊັ່ນ: ອຸຕຸນິຍົມໂລກ, ສ. ເກົາຫລີ, ຍີ່ປຸ່ນ ແລະ ສປ ຈີນ ໃນຂອບ ໂຄງການຮ່ວມມື ແລະ ໃຫ້ການຊ່ວຍເຫລືອແຕ່ລະດ້ານ ກ່ຽວກັບອຸຕຸນິຍົມແລະ ທໍລະນີຟີຊິກ ອີກດ້ວຍ.