ສປປ ລາວ​ ພ້ອມເປັນເຈົ້າພາບ​ຈັດກອງປະຊຸມລັດຖະມົນຕີ​ສຶກສາ​ອາຊຽນຄັ້ງທີ VIII

ຂປລ. ປັດຈຸບັນ ສປປ ລາວ ມີຄວາມພ້ອມແລ້ວ ທີ່ຈະເປັນເຈົ້າພາບຈັດກອງປະຊຸມລັດຖະມົນຕີ ສຶກສາອາຊຽນ ຄັ້ງທີ VIII ແລະ ກອງປະຊຸມປິ່ນອ້ອມຕ່າງໆ ຕິດພັນອີກ 5 ກອງປະຊຸມ ທີ່ ສປປ ລາວໄດ້ຮັບກຽດເປັນເຈົ້າພາບ ເຊັ່ນ: ກອງປະຊຸມເຈົ້າໜ້າທີ່ອາວຸໂສອາຊຽນ ຄັ້ງທີ IX, ກອງປະຊຸມເຈົ້າໜ້າທີ່ອາວຸໂສສຶກສາອາຊຽນບວກ 3 ຄັ້ງທີ V, ກອງປະຊຸມເຈົ້າໜ້າທີ່ອາວຸໂສ ສຶກສາອາຊຽນໃນຂອບຄັ້ງທີ III,

ກອງປະຊຸມລັດຖະມົນຕີສຶກສາອາຊຽນ ບວກ 3 ແລະ ກອງປະຊຸມລັດຖະມົນຕີສຶກສາອາຊຽນໃນຂອບອາຊີ ຕາວັນອອກ ຄັ້ງທີ II ເຊິ່ງຈະໄດ້ຈັດຂຶ້ນຢ່າງເປັນທາງການແຕ່ວັນທີ 3-8 ເດືອນກັນຍາປີ 2014 ຢູ່ນະຄອນຫລວງວຽງຈັນ.ພາຍຫລັງກອງປະຊຸມລະດັບຊາດເພື່ອກຽມຄວາມພ້ອມເປັນເຈົ້່າພາບຈັດກອງປະຊຸມລັດຖະມົນຕີສຶກສາອາຊຽນ ຄັ້ງທີ VIII ໄດ້ຈັດຂຶ້ນໃນຕອນບ່າຍຂອງວັນທີ 1 ເດືອນກັນຍາ ປີ 2014 ນີ້, ໂດຍການເປັນປະທານຂອງທ່ານ ດຣ. ພັນຄຳໍ ວິພາວັນ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງສຶກສາ ທິການ ແລະ ກິລານັ້ນ, ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີຊ່ວຍວ່າການກະຊວງສຶກສາທິການ ແລະ ກິລາໄດ້ຖະແຫລງຂ່າວກ່ຽວກັບການກຽມຄວາມພ້ອມຈັດກອງປະຊຸມດັ່ງກ່າວວ່າ: ການກຽມຄວາມພ້ອມໃຫ້ແກ່ກອງປະຊຸມດັ່ງກ່າວ ສປປ ລາວ ໄດ້ແຕ່ງຕັ້ງຄະນະຊີ້ນຳລະດັບຊາດ, ຄະນະກຳມະການຝ່າຍຕ່າງໆ, ກອງເລຂາປະສານງານ ແລະ ຄະນະກຳມະການເນື້ອໃນ ເພື່ອປະສານງານກັບປະເທດສະມາຊິກ ແລະ ພາກສ່ວນທີ່ກ່ຽວຂ້ອງ, ກອງປະຊຸມດັ່ງກ່າວຈະໄດ້ເນັ້ນໃສ່ປຶກສາຫາລື 3 ຫົວຂໍ້ສຳໍຄັນ: ການປະເມີນ ແລະ ກວດກາຄືນບັນດາໜ້າວຽກທີ່ໄດ້ຕົກລົງກັນຢູ່ໃນແຜນວຽກສົກປີ 2010-2015 ກໍຄືລາຍງານຄວາມຄືບໜ້າຂອງການຈັດຕັ້ງປະຕິບັດແຜນວຽກໄລຍະຜ່ານມາ ໂດຍສະເພາະແມ່ນໜ້າວຽກທີ່ສະມາຊິກໄດ້ດຳເນີນການສຳເລັດ ແລະ ບັນດາໜ້າວຽກທີ່ມີຄວາມຊັກຊ້າ ແລະ ປະຕິບັດບໍ່ໄດ້ຕາມແຜນວາງໄວ້, ການກຳນົດວິໄສທັດ ແລະ ທິດທາງການພັດທະນາຂອງຂະແໜງການສຶກສາໃນຂອບອາຊຽນພາຍຫລັງປີ 2015 ໂດຍເນັ້ນໜັກກົນໄກ ແລະ ວິທີການ ເພື່ອສົ່ງເສີມການຮຽນ-ການສອນ ແລະ ການນຳໃຊ້ພາສາຂອງບັນດາສະມາຊິກອາຊຽນນຳກັນໃນກຸ່ມນັກສຶກສາ ແລະ ໄວໜຸ່ມໃຫ້ສູງຂຶ້ນ, ປຶກສາຫາລືຮ່ວມກັນ ໃນການຈັດລຽງບູລິມະສິດເພື່ອສ້າງແຜນ 5 ປີ 2016-2020 ຮ່ວມກັນໃຫ້ສຳໍເລັດ. ນອກນັ້ນ ກອງປະຊຸມ ໃນຄັ້ງນີ້ ຍັງເປັນເວທີ ປຶກສາຫາລືຮ່ວມກັນ ເພື່ອກຳໍນົດວິໄສທັດ ແລະ ທິດທາງການພັດທະນາ ຂະແໜງການສຶກສາ ໃນຂອບຮ່ວມມືອາຊຽນພາຍຫລັງປີ 2015 ໃນຕໍ່ໜ້າ ເພື່ອຫລຸດຜ່ອນຄວາມແຕກໂຕນດ້ານການພັດທະນາການສຶກສາ ກໍ່ຄື ການພັດທະນາຊັບພະຍາກອນມະນຸດລະຫວ່າງບັນດາປະເທດສະມາຊິກດ້ວຍກັນ, ທັງເປັນການຍົກສູງບົດບາດຂອງ ສປປ ລາວທີ່ໄດ້ຮັບຄວາມໄວ້ວາງໃຈຈາກບັນດາປະເທດສະມາຊິກໃຫ້ມີຄວາມສຳຄັນຍິ່ງໃນລະດັບພາກພື້ນພ້ອມທັງດຳລົງຕຳແໜ່ງເປັນປະທານອາຊຽນໃນໄລຍະ 2 ປີຕໍ່ໜ້າ.
ທ່ານ ນາງ ແສງເດືອນ ຫລ້າຈັນທະບູນ ຍັງໄດ້ກ່າວຕື່ມອີກວ່າ: ໃນກອງປະຊຸມລັດຖະມົນຕີສຶກສາອາຊຽນ ຄັ້ງທີ VIII ຈະມີຜູ້ເຂົ້າຮ່ວມ 18 ປະເທດ ແລະ 4 ພາກສ່ວນຄື: 10 ປະເທດ ສະມາຊິກອາຊຽນ, ປະເທດສະມາຊິກອາຊຽນ ບວກ 3 (ສປ ຈີນ, ສ ເກົາຫລີ ແລະ ຍີ່ປຸ່ນ) ແລະ ປະເທດສະມາຊິກອາຊຽນ ໃນຂອບອາຊີຕາເວັນອອກ ອົດສະຕາລີ, ສປ ຈີນ, ອິນເດຍ, ຍີ່ປຸ່ນ, ສ ເກົາຫລີ, ນູແວນເຊລັງ, ຣັດເຊຍ ແລະ ສະຫະລັດອາເມລິກາ, ກອງເລຂາອາຊຽນ, ກອງເລຂາລັດຖະມົນຕີສຶກສາອາຊຽນ, ສູນອາຊຽນ-ຈີນ ແລະ ມະຫາວິທະຍາໄລເຄືອຂ່າຍ ອາຊຽນ.