ການກະກຽມຮັບໃຊ້ກອງປະຊຸມໄອປາຄັ້ງທີ 35 ສາໍເລັດໂດຍພື້ນຖານ

ຂປລ. ມາຮອດປະຈຸບັນການກະກຽມເງື່ອນໄຂຕ່າງໆຂອງແຕ່ລະ ອະນຸກຳມະການໄດ້ສຳເລັດໂດຍພື້ນຖານເປັນຕົ້ນແມ່ນເນື້ອໃນຂົງເຂດດ້ານເສດຖະກິດ ແລະ ເນື້ອໃນຂົງເຂດວັດທະນະທຳສັງຄົມ, ກະກຽມແຜນວຽກ, ເນື້ອໃນ, ການແບ່ງງານ ແລະ ການແບ່ງຄວາມຮັບຜິດຊອບ ແລະ ອື່ນໆ.


ໃນວັນທີ 26 ເດືອນສິງຫາປີ 2014 ຢູ່ທີ່ຫໍສະພາແຫ່ງຊາດ ບັນດາຄະນະອະນຸກຳມາການດ້ານເນື້ອໃນຮັບໃຊ້ກອງປະຊຸມສະມັດຊາລັດຖະສະພາ ລະຫວ່າງຊາດອາຊຽນ (AIPA) ຄັ້ງທີ 35 ທີ່ ສປປ ລາວ ໄດ້ຮັບກຽດເປັນເຈົ້າພາບ ເຊິ່ງມີກຳນົດຈັດຂຶ້ນແຕ່ວັນທີ 14-20 ເດືອນກັນຍາປີ 2014 ໄດ້ພ້ອມກັນຄົ້ນຄ້ວາປຶກສາຫາລືລົງເລິກເນື້ອໃນດ້ານຕ່າງໆ ເປັນຕົ້ນ ເນື້ອໃນຂົງເຂດດ້ານເສດຖະກິດ ແລະ ເນື້ອໃນຂົງເຂດວັດທະນະທຳສັງຄົມ, ເນື້ອໃນຂອງ ກອງປະຊຸມຄະນະສະມາຊິກສະພາແຫ່ງຊາດເພດຍິງ ແລະ ເນື້ອໃນຂົງເຂດວຽກງານຈັດຕັ້ງ ພາຍໃນກອງປະຊຸມໄອປາ ເພື່ອກະກຽມໃຫ້ ແກ່ກອງປະຊຸມດັ່ງກ່າວ.
ທ່ານ ດຣ. ໄຊສົມພອນ ພົມວິຫານ ຮອງປະທານສະພາແຫ່ງຊາດໃນຖານະປະທານ  ຍັງໄດ້ເນັ້ນໃຫ້ແຕ່ລະອະນຸກຳມະການກຳແໜ້ນ ຈຸດປະສົງລະດັບ ຄາດໝາຍຂອງກອງປະຊຸມໃນຄັ້ງນີ້ໂດຍສະເພາະແນວທາງນະໂຍບາຍຂອງພັກ-ລັດ, ແນວທາງການຕ່າງປະເທດ ໃນການເຊື່ອມໂຍງກັບພາກພື້ນ ແລະ ສາກົນ ບົນພື້ນຖານຮັບປະກັນຜົນປະໂຫຍດສູງສຸດຂອງປະເທດຊາດ, ການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ກໍຄື ການ ນຳໃຊ້ກຳລັງແຮງສັງລວມທາງດ້ານຄວາມຮູ້, ຄວາມສາມາດ, ປະສົບການຈາກທຸກພາກສ່ວນເພື່ອຮັບປະກັນເຮັດໃຫ້ການຈັດກອງປະຊຸມໄອປາ ໄດ້ຮັບຜົນສຳເລັດເປັນຢ່າງດີ ພ້ອມກັນນັ້ນ ແຕ່ລະກຳມະການຕ້ອງໄດ້ກວດຄືນແຜນວຽກທີ່ຍັງບໍ່ທັນຈະແຈ້ງ, ບໍ່ທັນລະອຽດຮອບດ້ານເພື່ອສືບຕໍ່ກະກຽມ ພ້ອມທັງ ຄາດຄະເນບາງບັນຫາທີ່ອາດຈະເກີດຂຶ້ນໃນເວລາດຳເນີນກອງປະຊຸມ ເພື່ອມີມາດຕະການ, ວິທີການຮັບມື ແລະ ແກ້ໄຂຢ່າງທັນການ ເປັນຕົ້ນ ບາງຫົວຂໍ້ອາດຈະຖືກຍົກຂຶ້ນຈາກປະເທດສະມາຊິກອາຊຽນດ້ວຍກັນ ຫລື ປະເທດຄູ່ເຈລະຈາ ແລະ ອື່ນໆ. ທ່ານຮອງປະທານສະພາແຫ່ງຊາດຍັງໄດ້ແນະນຳໃຫ້ມີການແບ່ງວຽກງານ, ແບ່ງຄວາມຮັບຜິດຊອບພາຍໃນຄະນະດ້ວຍກັນໃຫ້ລະອຽດ ພ້ອມທັງມອບໝາຍໃຫ້ຫົວໜ້າຄະນະລົງເລິກຊີ້ນຳ ແລະ ກວດກາຄວາມຄືບໜ້າ ໃນການກະກຽມວຽກງານຂອງແຕ່ລະໜ່ວຍງານຊ່ວຍວຽກທີ່ຂຶ້ນກັບລວມທັງການເປັນເຈົ້າ ການກະກຽມ, ສຸມທຸກກຳລັງ ເຫື່ອແຮງ, ສະຕິປັນຍາ, ຄວາມຮູ້ຄວາມສາມາດ, ມີລະບຽບວິໄນ ແລະ ມີຄວາມຮັບຜິດຊອບຕໍ່ໜ້າທີ່ການເມືອງສູງໃນການປະຕິບັດວຽກງານທີ່ຖືກມອບໝາຍໃຫ້.