ຮັບຮອງການອອກແບບໂຄງການກໍ່ສ້າງສວນໄຊຊະນະ ແລະ ໂຄງການກໍ່ສ້າງສວນສາທາລະນະຖໍ້າເຈົ້າອານຸວົງ.

ສມຊ. ໃນຕອນບ່າຍວັນທີ 25 ສິງຫາປີ 2014 ນີ້ຢູ່ທີ່ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ມີກອງປະຊຸມຄົ້ນຄ້ວາ ແລະ ຮັບຮອງການອອກແບບໂຄງການກໍ່ສ້າງສວນໄຊຊະນະ ແລະ ໂຄງການກໍ່ສ້າງສວນສາທາລະນະຖໍ້າເຈົ້າອານຸວົງ ຢູ່ແຂວງ ໄຊສົມບູນ ເພື່ອຄວາມເປັນເອກະພາບກັນກ່ຽວກັບແນວຄວາມຄິດໃນການອອກແບບກໍ່ສ້າງສວນດັ່ງກ່າວ ໃຫ້ເປັນສະຖານທີ່ທ່ອງທ່ຽວ ແລະ ເປັນບ່ອນສຶກສາດ້ານປະຫວັດສາດໃນອານາຄົດ.


    ເຂົ້າຮ່ວມກອງປະຊຸມດັ່ງກ່າວມີ ທ່ານ ສະຫວັນຄອນ ຣາຊມົນຕີ ລັດຖະມົນຕີຊ່ວຍວ່າການ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ເລຂາພັກແຂວງ ເຈົ້າແຂວງໆໄຊສົມບູນ ພ້ອມດ້ວຍພະນັກງານທີ່ກ່ຽວຂ້ອງຈຳນວນໜຶ່ງ.
    ທ່ານລັດຖະມົນຕີຊ່ວຍວ່າການ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ກ່າວຕໍ່ກອງປະຊຸມວ່າ: ທັງສອງໂຄງການດັ່ງກ່າວໄດ້ຜ່ານການຄົ້ນຄ້ວາປຶກສາຫາລືໃນກອງປະຊຸມຄະນະປະຈຳພັກແຂວງໄຊສົມບູນ ແລະ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຫຼາຍຄັ້ງແລ້ວ ເພື່ອໃຫ້ໄດ້ຂໍ້ສະຫລຸບທີ່ເປັນເອກະພາບ ແລະ ສາມາດນຳໄປຈັດຕັ້ງປະຕິບັດຕົວຈິງ.
    ໂຄງການກໍ່ສ້າງສວນທັງສອງແຫ່ງດັ່ງກ່າວຕັ້ງຢູ່ຫ່າງຈາກເທສະບານແຂວງໄຊສົມບູນໄປທາງທິດເໜືອປະມານ 4 ກິໂລແມັດ, ມີເນື້ອທີ່ 6,9 ເຮັກຕາກວມເອົາສອງຟາກທາງຂື້ນພູເບ້ຍ ເຊີ່ງຈະປະກອບດ້ວຍສວນໄມ້ປະດັບ, ສວນຕົ້ນໄມ້ເມືອງໜາວ, ຮ້ານຂາຍເຄື່ອງກະສິກຳ, ມີສະຖານທີ່ຈັດກິດຈະກຳບຸນປະເພນີສອງແຫ່ງ, ຫ້ອງປີ່ນປົວສຸກເສີນ ແລະ ປະກອບມີລະບົບສາທາລະນຸປະໂພກຕ່າງໆເຊັ່ນ: ໄຟຟ້າ, ນໍ້າປະປາ, ສະຖານທີ່ຈອດລົດ, ລະບົບໄຟເຍືອງທາງ ແລະ ອື່ນໆ.
    ໃນໂອກາດນີ້ທ່ານ  ສະຫວັນຄອນ ຣາຊມົນຕີ ລັດຖະມົນຕີຊ່ວຍວ່າການ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກໍ່ໄດ້ຕາງໜ້າ ກະຊວງ ມອບອຸປະກອນຈຳນວນໜຶ່ງປະກອບມີລົດຈັກເວບ 100 ແລະ ໂທລະໂຄ່ງພ້ອມດ້ວຍອຸປະກອນໃຫ້ ທ່ານ ດຣ. ສົມບັດ ເຢຍລີເຮີ ເລຂາພັກແຂວງ ເຈົ້າແຂວງໆໄຊສົມບູນ ເພື່ອນຳໃຊ້ເຂົ້າໃນວຽກງານໂຄງການດັ່ງກ່າວໃຫ້ມີປະສິດທິຜົນ.