ນາຍົກລັດຖະມົນຕີ ຕ້ອນຮັບ​ ຮອງ​ປະທານ​ສະພາສູງ​ແຫ່ງ​ປະເທດ​ຍີ່ປຸ່ນ

ຂປລ. ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ຄະນະຜູ້ແທນສະພາສູງແຫ່ງປະເທດຍີ່ປຸ່ນ ນຳໂດຍທ່ານ ອະຊິມະ ໂຄະຊິອິຊິ ຮອງປະທານສະພາສູງ ແຫ່ງປະເທດຍີ່ປຸ່ນ ໃນຕອນບ່າຍວັນທີ 25 ເດືອນສິງຫາ ປີ 2014 ທີ່ຫ້ອງວ່າການລັດຖະບານ ໃນໂອກາດທີ່ທ່ານ ແລະ ຄະນະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 24-28 ເດືອນສິງຫາ ປີ 2014.


ທ່ານນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບຄະນະຜູ້ແທນສະພາສູງແຫ່ງປະເທດຍີ່ປຸ່ນ ແລະ ຕີລາຄາສູງຕໍ່ ທ່ານ ອະຊິມະ ໂຄະຊິອິຊິ ທີ່ໄດ້ນຳພາຄະນະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນສຳຄັນເຂົ້າໃນການເສີມຂະຫຍາຍສາຍ ພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດ ລາວ-ຍີ່ປຸ່ນ ເວົ້າລວມ, ເວົ້າສະເພາະແມ່ນຮັດແໜ້ນສາຍພົວພັນ ແລະ ການຮ່ວມມື ລະຫວ່າງ ສອງອົງການນິຕິບັນຍັດຂອງສອງປະເທດ ລາວ ແລະ ຍີ່ປຸ່ນ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.
ໃນໂອກາດດຽວກັນນີ້, ທ່ານ ອະຊິມະ ໂຄະຊິອິຊິ ໄດ້ສະແດງຄວາມຂອບອົກຂອບໃຈຕໍ່ ທ່ານນາຍົກລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນພ້ອມທັງແຈ້ງກ່ຽວກັບຈຸດປະສົງຂອງການເດີນທາງມາເຮັດວຽກ ຢູ່ ສປປ ລາວ ໃນຄັ້ງນີ້ ໂດຍສະເພາະກໍແມ່ນຜົນການພົບປະສອງຝ່າຍກັບ ຄະນະຜູ້ແທນສະພາແຫ່ງຊາດລາວ ນຳໂດຍ ທ່ານ ດຣ. ໄຊສົມພອນ ພົມວິຫານ ຮອງປະທານສະພາແຫ່ງຊາດ ເຊິ່ງມີຂຶ້ນໃນຕອນເຊົ້າວັນດຽວກັນນີ້.