ປະທານ​ສະພາແຫ່ງຊາດລາວ ຕ້ອນຮັບ​ ຮອງ​ປະທານ​ສະພາສູງ ແຫ່ງ​ປະເທດ​ຍີ່ປຸ່ນ

ຂປລ. ຕອນເຊົ້າວັນທີ 25 ເດືອນສິງຫາ ປີ 2014 ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ອະຊິມະ ໂຄະຊິອິຊິ ຮອງປະທານສະພາສູງ ແຫ່ງປະເທດຍີ່ປຸ່ນ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 24-28 ເດືອນສິງຫາ ປີ 2014.


ໂອກາດດັ່ງກ່າວ ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບຊົມເຊີຍ ແລະ ຕີລາຄາສູງ ຕໍ່ການເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງທ່ານ ອະຊິມະ ໂຄະຊິອິຊິ ພ້ອມຄະນະ ໃນຄັ້ງນີ້ ເຊິ່ງເປັນການປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີລະຫວ່າງສອງປະເທດ ລາວ-ຍີ່ປຸ່ນ ເວົ້າລວມ-ເວົ້າສະເພາະ ແມ່ນຮັດແໜ້ນສາຍພົວພັນ  ແລະ ການຮ່ວມມືລະຫວ່າງ ສອງອົງການນິຕິບັນຍັດຂອງສອງປະເທດ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.
ທ່ານ ອະຊິມະ ໂຄະຊິອິຊິ ກໍໄດ້ສະແດງຄວາມຂອບອົກຂອບໃຈ ຕໍ່ທ່ານ ນາງ ປານີ ຢາທໍ່ຕູ້ ທີ່ໄດ້ສະລະເວລາອັນມີຄ່າໃຫ້ກຽດຕ້ອນຮັບໃນຄັ້ງນີ້ ພ້ອມທັງແຈ້ງກ່ຽວກັບຈຸດປະສົງຂອງການເດີນ ທາງມາເຮັດວຽກ ຢູ່ ສປປ ລາວ ໃນຄັ້ງນີ້ ໃຫ້ທ່ານປະທານສະພາແຫ່ງຊາດລາວ ໄດ້ຊາບ.