ສປປ ລາວ ໄດ້ຮັບຜົນປະໂຫຍດຫລາຍຈາກການເຂົ້າ ເປັນສະມາຊິກອາຊຽນ

ຂປລ. ສປປ ລາວ ໄດ້ຮັບຜົນປະໂຫຍດຈາກການ ເຂົ້າເປັນສະມາຊິກອາຊຽນ ໃນຫລາຍດ້ານເປັນຕົ້ນ ແມ່ນດ້ານເສດຖະກິດ, ດ້ານວັດທະນະທຳ-ສັງຄົມ ແລະ ອື່ນໆ ເຊິ່ງພາຍຫລັງທີ່  ສປປ  ລາວ  ໄດ້ເຂົ້າເປັນສະມາຊິກອາຊຽນ ຖານະບົດບາດຂອງ ສປປ ລາວ ນັບມື້ນັບພົ້ນເດັ່ນໃນພາກພື້ນ ແລະ ສາກົນພ້ອມນັ້ນ ຍັງໄດ້ປະກອບສ່ວນອັນສຳຄັນ ເຂົ້າໃນການ ຜັນຂະຫຍາຍນະໂຍບາຍເປີດກວ້າງ ການພົວພັນຮ່ວມມືກັບພາຍນອກຫລາຍຂຶ້ນ.

ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ໄດ້ກ່າວໃນວັນທີ 22 ເດືອນສິງຫາປີ 2014ນີ້ ທີ່ຄະນະໂຄສະນາອົບຮົມສູນກາງພັກໃນໂອກາດປາຖະກະຖາວັນສ້າງຕັ້ງອາຊຽນຄົບຮອບ 47 ປີ (8/8/1967-8/8/2014) ແລະ ວັນ ສປປ ລາວ ເຂົ້າເປັນສະມາຊິກອາຊຽນ  ຄົບຮອບ 17 ປີ (23/7/199 7-23/7/20 14) ທ່ານໄດ້ຍົກໃຫ້ເຫັນວ່າ: ຕະຫລອດໄລຍະ 17 ປີ  ທີ່ ສປປ ລາວ  ເຂົ້າເປັນສະມາຊິກອາຊຽນ ເຮັດໃຫ້ຖານະບົດບາດຂອງຕົນນັບມື້ນັບພົ້ນເດັ່ນໃນເວທີພາກພື້ນ  ແລະ ສາກົນ ພ້ອມນັ້ນ ສປປ ລາວ ຍັງໄດ້ປະກອບສ່ວນອັນສຳຄັນເຂົ້າໃນການຜັນຂະຫຍາຍນະໂຍບາຍເປີດກວ້າງການພົວພັນກັບພາຍນອກຂອງພັກ-ລັດ. ການຮ່ວມມືໃນດ້ານການເມືອງ-ຄວາມໝັ້ນຄົງ ລະຫວ່າງ ບັນດາປະເທດສະມາຊິກອາຊຽນ ແລະ ລະຫວ່າງອາຊຽນກັບປະເທດ ໃນພາກພື້ນ ລວມທັງບັນດາປະເທດ ມະຫາອຳນາດອັນໄດ້ປະກອບສ່ວນອັນສຳຄັນເຂົ້າໃນການປົກປັກຮັກສາສັນຕິພາບ,  ສະຖຽນລະພາບ ແລະ  ຄວາມໝັ້ນຄົງຂອງພາກພື້ນ ກໍຄື ແຕ່ລະປະເທດສະມາຊິກອາຊຽນ ລວມທັງ ສປປ ລາວ ເຊິ່ງ ປະກອບສ່ວນເຂົ້າໃນການສ້າງສະພາບແວດລ້ອມທີ່ອຳນວຍໃຫ້ແກ່ການຮ່ວມມື  ເພື່ອການພັດທະນາ ຂອງບັນດາປະເທດໃນພາກພື້ນ, ນອກນັ້ນການເຂົ້າຮ່ວມປະຊາຄົມເສດຖະກິດອາຊຽນ ຈະຊ່ວຍເປີດໂອກາດອັນດີໃຫ້ແກ່ ສປປ ລາວ ມີບົດບາດສຳຄັນໃນເວທີສາກົນ ຫລາຍຂຶ້ນທາງດ້ານການຄ້າ ແລະ ການລົງທຶນລວມທັງການສ້າງຄວາມໝັ້ນໃຈໃຫ້ແກ່ນັກລົງທຶນຕ່າງປະເທດ, ຄວາມເຂັ້ມແຂງໃນການລວມກຸ່ມທາງເສດຖະກິດຂອງອາຊຽນເຊັ່ນ: ການກຳຈັດອຸປະສັກ ທາງດ້ານການຄ້າ,ການລົງທຶນ ແລະການມີໂຄງສ້າງພື້ນຖານທີ່ຈຳເປັນ ເພື່ອສະໜັບສະໜູນການເປີດເສລີການຄ້າທີ່ນຳໄປສູ່ການພັດທະນາ ແລະ ມີສະຖຽນລະພາບທາງດ້ານເສດຖະກິດຂອງອາຊຽນ  ກໍຄື ສປປ ລາວ ເຊິ່ງທັງໝົດນັ້ນຈະນຳເອົາເສດຖະກິດຂອງ  ສປປ ລາວ ເຊື່ອມໂຍງກັບພາກພື້ນ ແລະ ສາກົນ ເທື່ອລະກ້າວທັງເປັນການດຶງດູດ ການລົງທຶນຂອງຕ່າງປະເທດ ແລະ ນັກທ່ອງທ່ຽວເຂົ້າມາລາວ
ຫລາຍຂຶ້ນ.ທ່ານຮອງນາຍົກລັດຖະມົນຕີ ຍັງໃຫ້ຮູ້ຕື່ມອີກວ່າ: ອາຊຽນ  ມີທີ່ຕັ້ງຍຸດທະສາດທີ່ສຳຄັນ ໃນລະບົບຄວາມໝັ້ນຄົງຂອງໂລກ ເພາະເປັນທາງຜ່ານຄົມມະນາຄົມທີ່ມີຄວາມສຳຄັນຕໍ່ເສດຖະກີດ  ພ້ອມກັນນັ້ນ ອາຊຽນ ຍັງເປັນຄູ່ຄ້າທີ່ສຳຄັນ ແລະ ເປັນບ່ອນລົງທຶນຂອງປະເທດໃຫຍ່. ສຳລັບ ສປປ ລາວ ການເຂົ້າເປັນ ສະມາຊິກ ອາຊຽນ ມີ 4 ເຫດຜົນ ເພື່ອຮັບປະກັນການຄົງຕົວ ແລະ ການຂະຫຍາຍຕົວເປັນຕົ້ນແມ່ນ ການຮັບປະກັນຄວາມໝັ້ນຄົງຂອງລະບອບໃໝ່, ຫລີກລ່ຽງການໂດດດ່ຽວ ແລະ ເພື່ອຕໍ່ສູ້ຈາກໃນອອກນອກ ແນໃສ່ຫັນຄວາມເປັນປໍລະປັກຂອງສັງຄົມນິຍົມຂອງການສ້າງບັນດາລະບຽບຫລັກການ-ການຮ່ວມມື ພາຍໃນອາຊຽນ ແລະ ລະຫວ່າງອາຊຽນ ກັບພາຍນອກໃຫ້ຮັດກຸມ ແລະ ຮອບຄອບ, ນຳໃຊ້ບົດຮຽນ, ທຶນຮອນຂອງອາຊຽນ ມາຊ່ວຍສ້າງສາພັດທະນາເສດຖະກິດ-ສັງຄົມຂອງປະເທດ. ໃນໂອກາດດຽວກັນນີ້  ທ່ານ ຮອງນາຍົກລັດຖະມົນຕີ ຍັງໄດ້ຍົກ
ໃຫ້ເຫັນເຖິງບາງຈຸດທີ່ ສປປ ລາວ ຈະຕ້ອງໄດ້ເສີມຂະຫຍາຍ ແລະ ເອົາໃຈໃສ່ໃນການສ້າງປະຊາຄົມອາຊຽນ ໂດຍສືບຕໍ່ສ້າງສະຖຽນລະພາບທາງດ້ານການເມືອງສັງຄົມມີຄວາມສະຫງົບສຸກພາຍໃຕ້ການນຳພາອັນຖືກຕ້ອງຂອງ ພັກ-ລັດ  ເພື່ອເປັນການສ້າງສະພາບແວດລ້ອມເອື້ອອຳນວຍໃຫ້ແກ່ການພັດທະນາປະເທດ, ສືບຕໍ່ຮັກສາບັນດາຫລັກການພື້ນຖານຕ່າງໆ ທີ່ຮັບປະກັນການດຳລົງຄົງຕົວ  ແລະ ການຂະຫຍາຍຕົວຂອງ ສປປ ລາວ, ເປັນເຈົ້າການເອົາໃຈໃສ່ ແລະ ສະກັດກັ້ນບໍ່ໃຫ້ມີການສວຍໃຊ້ບັນຫາ ຫລໍ່ແຫລມ ແລະ ລະອຽດອ່ອນມາໂຈມຕີປະເທດເຮົາ, ຕ້ອງກຳແໜ້ນ ແລະ ມີສະຕິເປັນເຈົ້າຖືເອົາບັນດາຫລັກການພື້ນຖານທີ່ກຳນົດໄວ້ໃນກົດບັດອາຊຽນບວກ ກັບນະໂຍບາຍ ເປີດກວ້າງຂອງ  ສ ປປ ລາວ ເປັນເຄື່ອງມືໃນການເຄື່ອນໄຫວ ເພື່ອຮັບປະກັນຜົນປະໂຫຍດ ທາງການເມືອງ-ຄວາມໝັ້ນຄົງ ສ້າງທ່າແຮງໃນການປົກປັກຮັກສາ ແລະ ພັດທະນາປະເທດຊາດ.