ສືບຕໍ່ຈັດຕັ້ງປະຕິບັດສ້າງຕົວເມືອງວຽງຈັນໃຫ້ສະອາດ

ປຊຊ. ໃນໄລຍະກະກຽມໃຫ້ແກ່ການສະເຫຼີມສະຫຼອງນະຄອນຫຼວງວຽງຈັນ ຄົບຮອບ 450 ປີ (1560 - 2010) ຄະນະ ກຳມະການສະເຫຼີມສະຫຼອງວຽງຈັນ 450 ປີ ໄດ້ຮັບຮອງເອົາ ໂຄງການພັດທະນານະຄອນຫຼວງວຽງຈັນໃຫ້ບັນລຸຄາດໝາຍ 6 ສໍ ຄື: ສະຫງົບສຸກ, ສະອາດ, ສີຂຽວ, ສະຫວ່າງ, ສະເໜ ແລະ ສີວິໄລ. ເວົ້າໄດ້ວ່າ 6 ສໍ ແມ່ນກົນໄກ ແລະ ແມ່ນສິລະປະໃນ ການຂົນຂວາຍປະຊາຊົນ ເພື່ອປະຕິບັດທິດທາງໜ້າທີ່ໃຫຍ່ຂອງພັກ, ແຜນງານ - ໂຄງການຈຸດສຸມ ທີ່ອົງການປົກຄອງນະຄອນຫຼວງວຽງຈັນວາງອອກໂດຍແນໃສ່ສຶກສາອົບຮົມບົ່ມເພາະຈິດ ໃຈຂອງຊາວເມືອງຊັ້ນຄົນ ຕ່າງໆໃຫ້ມີ ສ່ວນຮ່ວມ ແລະ ມີພັນທະປະກອບສ່ວນສ້າງເມືອງວຽງຈັນ ໃຫ້ເປັນເມືອງໜ້າຢູ່, ມີຄວາມຈະເລີນວັດທະນາຍິ່ງຂຶ້ນ ແລະ ຍືນຍົງຕະຫຼອດໄປ.


ເວົ້າສະເພາະໃນມາດຖານສໍສະອາດໃນການສ້າງນະ ຄອນຫຼວງວຽງຈັນກໍໄດ້ກຳນົດເອົາໄວ້ວ່າ ຕ້ອງເຮັດໃຫ້ຖະໜົນ ຫົນທາງສະອາດໃນທຸກເສັ້ນ, ບໍ່ມີຂີ້ເຫຍື້ອ, ບໍ່ມີຝຸ່ນ, ບໍ່ມີສິ່ງ ເສດເຫຼືອຮົກເຮື້ອ, ບໍ່ມີຕູບ ແລະ ສິ່ງຕໍ່ເຕີມຕາມແຄມທາງ. ດ້ານເຄຫາສະຖານ ບໍ່ວ່າຈະເປັນສຳນັກງານ ຫ້ອງການ, ໂຮງຮຽນ, ໂຮງໝໍ, ໂຮງແຮມ, ເຮືອນຢູ່... ນັບທັງກຳ ແພງຮົ້ວໃນເຂດຕົວເມືອງ ແລະ ຊານເມືອງ ກໍຕ້ອງສະອາດ, ສີເຮືອນ ຖ້າເກົ່າກໍທາສີໃໝ່. ດ້ານນ້ຳ ບໍ່ວ່າຈະເປັນນ້ຳດື່ມ ກໍຕ້ອງ ສະອາດ, ນ້ຳຮ່ອງຕາມແຄມຖະໜົນ, ໜອງນ້ຳທຸກໜອງ ຕ້ອງບໍ່ ມີກິ່ນເໝັນ, ບໍ່ຖ້ວມຂັງ, ບໍ່ເປັນບ່ອນເພາະເຊື້ອພະຍາດ, ຍານ ພາຫະນະກໍເຊັ່ນດຽວກັນ ນັບທັງລົດຈັກ, ລົດໃຫຍ່ຂອງລັດ ແລະ ສ່ວນຕົວ ຕ້ອງບໍ່ມີຄວັນຫຼາຍເກີນກຳນົດ, ນັບທັງໂຮງຈັກໂຮງງານ ກໍບໍ່ສົ່ງມົນລະພິດ, ບໍ່ມີສານເຄມີຕົກຄ້າງ, ບໍ່ມີກິ່ນ, ບໍ່ສົ່ງຄວັນ ແລະ ບໍ່ມີສຽງດັງເກີນກຳນົດ. ນອກນັ້ນ ຢູ່ສວນສາທາລະນະ, ສວນອາຫານ, ສະຖານີລົດເມ, ສະຖານທີ່ຈອດລົດປະຈຳທາງ, ໂຮງສາຍຮູບເງົາ, ໂຮງລະຄອນ, ສະໂມສອນຫໍວັດທະນະທຳ, ສະໜາມບິນ ກໍຕ້ອງສະອາດຈົບງາມບັນລຸຕາມມາດຖານທີ່ທາງ ການກຳນົດໄວ້ ແລະ ການບໍລິໂພກອາຫານທຸກຊະນິດກໍຕ້ອງ ສະອາດ.
ຜ່ານການຈັດຕັ້ງປະຕິບັດຕົວຈິງເຫັນວ່າ ຕົວເມືອງວຽງຈັນ ໄດ້ຮັບການພັດທະນາໄປຕາມ 6 ສໍ ເປັນຢ່າງດີ ໂດຍສະເພາະ ສໍ ສະອາດ ກໍບັນລຸໄດ້ຕາມຄາດໝາຍທີ່ວາງໄວ້. ຢ່າງໃດກໍຕາມ ທຽບໃສ່ຄວາມຮຽກຮ້ອງຕ້ອງການຂອງການພັດທະນາ ໃນສະຕະ ວັດທີ 21 ແລະ ສົມທຽບໃສ່ນະຄອນຫຼວງຂອງປະເທດອື່ນ, ພວກເຮົາຍັງພົບວ່າ ຍັງປະກົດມີຫຼາຍອັນຍັງເຮັດບໍ່ທັນໄດ້ດີ ໃນການ ສ້າງຕົວເມືອງໃຫ້ສະອາດ ສະແດງອອກມີລົດເກັບຂີ້ເຫຍື້ອທຸກວັນ ແຕ່ບາງຄັນກໍບໍ່ມີແພປົກ ເຮັດໃຫ້ ຂີ້ເຫຍື້ອຕົກເຮ່ຍເປິເປື້ອນ ໃສ່ຖະໜົນຫົນທາງ ນັບທັງລົດຂົນດິນຂົນຊາຍຈຳນວນໜຶ່ງ ກໍ ເຊັ່ນດຽວກັນ. ການນຳ ໃຊ້ທາງຍ່າງເປັນບ່ອນຈອດລົດ, ຂາຍ ເຄື່ອງກໍແມ່ນສ່ວນໜຶ່ງ ພາໃຫ້ຕົວເມືອງບໍ່ສະອາດ ບໍ່ມີຄວາມ ເປັນລະບຽບຮຽບຮ້ອຍ ເຖິງແມ່ນວ່າເຈົ້າໜ້າທີ່ໄດ້ຕັກເຕືອນແລ້ວ ກໍຍັງດື້ດ້ານ ບໍ່ປະຕິບັດຕາມ. ນອກນັ້ນ ບ່ອນເກັບຂີ້ເຫຍື້ອຂອງ ບາງຕະຫຼາດ ກໍບໍ່ໄດ້ມາດຖານ ຍັງສົ່ງກິ່ນເໝັນຢູ່ ແລະ ບັນດາ ເຮືອນ ກໍຄືສຳນັກງານຫ້ອງການ ທີ່ມີທີ່ຕັ້ງຢູ່ແຄມທາງໃຫຍ່ກໍຍັງ ບໍ່ທັນເປັນເຈົ້າການ ໃນການອະນາໄມແຄມທາງໃຫ້ສະອາດ, ຍັງ ມີລັກສະນະລໍຖ້າໃຫ້ພາກສ່ວນອະນາໄມເທດສະບານ ມາເຮັດ ໃຫ້ຢູ່. ເຫດຜົນດັ່ງກ່າວ ແມ່ນຍ້ອນຂອດຄວາມຮັບຜິດຊອບ ແລະ ຄວາມເປັນເຈົ້າການ ຂອງການມີສ່ວນຮ່ວມຂອງແຕ່ລະຄົນ ໃນ ການຮັກສາຄວາມສະອາດຢ່າງຈິງຈັງ.
ປະຈຸບັນ ພວກເຮົາພວມຢືນຢູ່ປີ 2014 ແລະ ພວມກ້າວໄປ ສູ່ປີ 2015 ທີ່ເປັນປີແຫ່ງການກ້າວສູ່ປະຊາຄົມອາຊຽນ ແລະ ກະກຽມໃຫ້ແກ່ການສ້າງຂະບວນການ ຄຳນັບຮັບຕ້ອນວັນສ້າງ ຕັ້ງພັກ ປປ ລາວ ຄົບຮອບ 60 ປີ ແລະ ວັນສະຖາປະນາ ສປປ ລາວ ຄົບຮອບ 40 ປີ ແລະ ກອງປະຊຸມໃຫຍ່ຂອງພັກ ຄັ້ງທີ X ທີ່ຈະມາເຖິງ. ດັ່ງນັ້ນ ຄະນະພັກ ແລະ ອຳນາດການປົກ ຄອງທຸກຂັ້ນ ຕ້ອງໄດ້ສືບຕໍ່ສຶກສາອົບຮົມພະນັກງານ ສະມາຊິກ ພັກ ແລະ ປະຊາຊົນໃນຂອບເຂດຕົນຮັບຜິດຊອບ ໃຫ້ມີນ້ຳ ໃຈຮັກຊາດຮັກນະຄອນຫຼວງ, ເຊື່ອມຊຶມແນວຄິດ 6 ສໍ ໃຫ້ເປັນ ຂະບວນກ້ວາງຂວາງ ແລະ ໃຫ້ຖືວ່າ 6 ສໍກໍຄື: ສໍ ສະອາດ ແມ່ນ ພັນທະ; ຄວາມຮັບຜິດຊອບຂອງແຕ່ລະຄົນ. ຫາກ 6 ສໍ ຖືກປະ ຕິບັດໄດ້ດີ ກໍຈະເຮັດໃຫ້ໂສມໜ້າຂອງຕົວເມືອງວຽງຈັນ ມີການ ປ່ຽນແປງໃໝ່ໄປສູ່ຄວາມຈະເລີນສີວິໄລ, ໃນນັ້ນ ສໍ ສະອາດ ຈະເປັນຈຸດໜຶ່ງ ເຮັດໃຫ້ທ້ອງຟ້ານະຄອນຫຼວງສົດໃສ, ປາສະ ຈາກມົນລະພິດ ມີສິ່ງແວດລ້ອມທີ່ດີ ແລະ ຈະຫຼຸຸດຜ່ອນຈາກໂລກ ຮ້ອນໄດ້ຕື່ມອີກ.