ປະທານສະພາແຫ່ງຊາດ ຕ້ອນຮັບຜູ້ຕາງໜ້າ ອົງການສະຫະປະຊາຊາດເພື່ອການພັດທະນາປະຈຳ ສປປ ລາວ

ຂປລ. ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງທ່ານ ນາງ ກາລີນາ ອິມໂມເນນ ຜູ້ຕາງໜ້າອົງການສະຫະປະຊາ ຊາດເພື່ອການພັດທະນາ (ສປຊ) ປະຈຳ ສປປ ລາວ ຄົນໃໝ່ ໃນວັນທີ 20 ເດືອນສິງຫາປີ 2014 ຢູ່ຫໍສະພາ ແຫ່ງຊາດ

ໃນໂອກາດທີ່ມາດຳລົງຕຳແໜ່ງເປັນຜູ້ຕາງໜ້າອົງການສະຫະ ປະຊາຊາດຄົນໃໝ່ປະຈຳ ສປປ ລາວ
ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ທ່ານ ກາລີນາ ອິມໂມເນນ ທີ່ໄດ້ຖືກແຕ່ງຕັ້ງໃຫ້ມາດຳລົງ ຕຳແໜ່ງເປັນຜູ້ຕາງໜ້າອົງການສະຫະປະຊາຊາດ ເພື່ອການພັດທະນາປະຈຳ ສປປ ລາວ ເຊິ່ງເປັນການປະກອບສ່ວນອັນສຳຄັນເຂົ້າໃນການເສີມ ຂະຫຍາຍການພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ອົງການສະຫະປະຊາຊາດ ເພື່ອການພັດທະນາ ໃຫ້ນັບມື້ນັບເລິກເຊິ່ງຍິ່ງຂຶ້ນ ໂດຍສະ ເພາະແມ່ນການພົວພັນຮ່ວມມືທາງດ້ານການພັດທະນາ, ການສ້າງຄວາມເຂັ້ມແຂງໃນດ້ານການຍົກລະດັບບຸກຄະລາກອນຂອງສະພາແຫ່ງຊາດ ແລະ ອື່ນໆ ທີ່ ສປຊ ໄດ້ໃຫ້ທຶນຊ່ວຍເຫລືອໃນໄລຍະຜ່ານມາ.
ທ່ານ ນາງ ກາລີນາ ອິມໂມເນນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບ ອຸ່ນຂອງປະທານສະພາແຫ່ງຊາດລາວໃນຄັ້ງນີ້ ພ້ອມທັງຢືນ ຢັນຈະສືບຕໍ່ໃຫ້ການຮ່ວມມືຊ່ວຍເຫລືອ ດ້ານການພັດທະນາໃຫ້ລັດຖະບານລາວ ໂດຍສະເພາະການການສະໜັບສະໜູນ ການສ້າງຄວາມເຂັ້ມແຂງ ການຍົກລະດັບບຸກຄະລາກອນ, ການປັບປຸງນິຕິກຳ ແລະ ອື່ນໆໃຫ້ສະພາແຫ່ງຊາດໃນຂັ້ນຕໍ່ໄປ./.