ປະທານສະພາແຫ່ງຊາດຕ້ອນຮັບຜູ້ຕາງໜ້າອົງການ ສປຊ ກອງທຶນສຳລັບປະຊາກອນປະຈຳ ສປປ ລາວຄົນໃໝ່

ຂປລ. ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບຂອງທ່ານ ຫັດຊັນ ໂມຕາຊາມິ ຜູ້ ຕາງໜ້າອົງການສະຫະປະຊາຊາດ ກອງທຶນສຳລັບປະຊາກອນປະຈຳ ສປປ ລາວຄົນໃໝ່ ໃນວັນທີ 20 ເດືອນສິງຫາປີ 2014ນີ້ ໃນໂອກາດ ທີ່ມາ ດຳລົງຕຳແໜ່ງເປັນຜູ້ຕາງໜ້າອົງການ (UNFPPA) ປະຈຳ ສປປ ລາວ.


ທ່ານ ນາງ ປານີ ຢາທໍ່ຕູ້ ໄດ້ສະແດງການຕ້ອນຮັບ, ຊົມເຊີຍ ພ້ອມທັງຕີລາຄາສູງຕໍ່ ທ່ານ ຫັດຊັນ ໂມຕາຊາມິ ທີ່ໄດ້ຖືກມາດຳລົງຕຳແໜ່ງເປັນ ຜູ້ຕາງໜ້າອົງການສະຫະປະຊາຊາດ ກອງທຶນສຳລັບປະຊາກອນ ປະຈຳ ສປປ ລາວ ເຊິ່ງເປັນການປະກອບສ່ວນອັນສຳຄັນເຂົ້າ ໃນການເສີມຂະຫຍາຍ ສາຍພົວພັນ ແລະ ການຮ່ວມມື ລະຫວ່າງ  ສປປ ລາວ ແລະ ອົງການ ສປຊ ກອງທຶນສຳລັບປະຊາກອນ ໃຫ້ນັບມື້ນັບເລິ່ງເຊິ່ງຍິ່ງຂຶ້ນ ໂດຍສະ ເພາະແມ່ນການ ພົວພັນຮ່ວມມືທາງດ້ານການພັດທະນາບຸກຄະລາກອນແພດຜະດຸງຄັນ, ການສຳຫລວດປະຊາກອນ ແລະ ການພັດທະນາຄວາມ ອາດສາມາດຂອງໄວໝຸ່ມລາວທີ່ອົງການ ສປຊ ກອງທຶນສຳລັບປະຊາກອນໄດ້ໃຫ້ການສະໜັບສະໜູນໃນໄລຍະຜ່ານມາໃຫ້ມີຄວາມແໜ້ນແຟ້ນຍິ່ງໆຂຶ້ນ.
ທ່ານ ຫັດຊັນ ໂມຕາຊາມິ ໄດ້ສະແດງຄວາມຂອບໃຈຕໍ່ທ່ານປະທານສະພາແຫ່ງຊາດລາວ ທີ່ໄດ້ເສຍສະຫລະເວລາ ອັນມີຄ່າໃຫ້ກຽດຕ້ອນຮັບອັນອົບ ອຸ່ນໃນຄັ້ງນີ້ ພ້ອມທັງ ຢືນຢັນຈະສືບຕໍ່ໃຫ້ການສະໜັບສະໜູນ ສປປ ລາວ ໃນການພັດທະນາດ້ານບຸກຄະລາກອນເເພດຜະດຸງຄັນ, ການສ້າງຄວາມ ອາດສາມາດ, ສ້າງຄວາມເຂັ້ມແຂງໃຫ້ໄວໜຸ່ມ, ການສຳຫລວດປະຊາກອນ ແລະ ອື່ນໆຕື່ມອີກ./.