ສື່ມວນຊົນລາວ ສຸມໃສ່ລາຍງານສະພາບການໄພພິບັດນ້ຳຖ້ວມ ຢ່າງຕໍ່ເນື່ອງ

ຂປລ. ໃນໄລຍະເກີດໄພພິບັດນ້ຳຖ້ວມ ຢູ່ບັນດາແຂວງພາກກາງ ແລະ ພາກໃຕ້ຂອງປະເທດລາວ ສື່ມວນຊົນລາວ ໄດ້ເປັນເຈົ້າການໃນການປະຕິບັດໜ້າທີ່ ຕາມພາລະບົດບາດ ແລະ ຈັນຍາບັນຂອງຕົນດ້ວຍຄວາມຮັບຜິດຊອບສູງ ໃນການນຳສະເໜີຂໍ້ມູນຂ່າວສານ, ສະພາບການ ແລະ ບັນຫາຕ່າງໆ ທີ່ເກີດຂຶ້ນໃຫ້ຖືກຕ້ອງຕາມຄວາມເປັນຈິງ ໃຫ້ທົ່ວສັງຄົມໄດ້ຮັບຮູ້ ແລະ ເຂົ້າໃຈ.

ໃນວັນທີ 19 ກັນຍາ 2019 ທີ່ນະຄອນຫລວງວຽງຈັນ, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເປັນຜູ້ຊີ້ນຳວຽກງານຖະແຫລງຂ່າວ, ທັງເປັນຄະນະກຳມະການ ຕ້ານໄພພິບັດລະດັບຊາດ ໄດ້ໃຫ້ສຳພາດຕໍ່ສື່ມວນຊົນ ກ່ຽວກັບພາລະບົດບາດ ໃນການໂຄສະນາເຜີຍແຜ່ຂໍ້ມູນຂ່າວສານ ໃນໄລຍະເກີດໄພພິບັດໃນຄັ້ງນີ້ ມີບາງຕອນສຳຄັນວ່າ: ໃນການຮັບມືຕໍ່ໄພພິບັດ ກໍຄື ນ້ຳຖ້ວມທີ່ເກີດຂຶ້ນໃນພາກກາງ ແລະ ພາກໃຕ້ ຂອງປະເທດເຮົາ ສື່ມວນຊົນລາວໄດ້ມີຄວາມເປັນເຈົ້າການ ໃນການປະຕິບັດໜ້າທີ່ຂອງຕົນ ທີ່ຂັ້ນເທິງໄດ້ມອບໝາຍໃຫ້ ຕາມພາລະບົດບາດຂອງສື່ມວນຊົນ, ໂດຍອີງໃສ່ການຊີ້ນຳ ຂອງຄະນະນຳກະຊວງ ໄດ້ເຮັດວຽກຮ່ວມກັບ ສື່ມວນຊົນທັງໝົດ ຢູ່ສູນກາງ ແລະ ທ້ອງຖິ່ນ ເພື່ອຮັບໃຊ້ໜ້າທີ່ ຕາມການມອບໝາຍ ຕາມການຊີ້ນຳຂອງລັດຖະບານ, ນັບແຕ່ມື້ຝົນຕົກ ແລະ ເກີດໄພນ້ຳຖ້ວມ ບັນດາສື່ມວນຊົນ ກໍໄດ້ມີຄວາມພ້ອມ ໃນການລົງຕິດຕາມສົມທົບ ກັບນັກຂ່າວແຕ່ລະແຂວງ ທີ່ມີໄພພິບັດເກີດຂຶ້ນ ແລະ ໄດ້ລາຍງານຂ່າວຢ່າງຕໍ່ເນື່ອງ. ສິ່ງສໍາຄັນໃນຄັ້ງນີ້, ພວກເຮົາສາມາດລາຍງານຂ່າວ ກ່ຽວກັບໄພພິບັດໄພນ້ຳຖ້ວມ ໂດຍຜ່ານຊ່ອງທາງດິຈິຕອນ, ຜ່ານທາງສື່ສັງຄົມອອນລາຍ, ຜ່ານທາງໂທລະພາບ, ວິທະຍຸກະຈາຍສຽງ, ໜັງສືພິມຕ່າງໆ ທີ່ເປັນສື່ຫລັກ ແລະ ສື່ທາງການຂອງລາວ, ເຊິ່ງລ້ວນແຕ່ໄດ້ສ່ອງແສງສະພາບການເຄື່ອນໄຫວ, ການຕອບໂຕ້, ການແກ້ໄຂຜົນຮ້າຍຂອງໄພພິບັດ ຕາມພາລະໜ້າທີ່ຂອງຕົນໃນແຕ່ລະດ້ານ.ນັບແຕ່ທ່ານນາຍົກລັດຖະມົນຕີ ເປີດກອງປະຊຸມສຸກເສີນ ທຸກກຳລັງຢູ່ສູນກາງ ກໍໄດ້ຈັດຕັ້ງກັນລົງໄປປະຕິບັດໜ້າທີ່ໂດຍທັນທີ, ລະດົມທັງໝົດທັງກຳລັງຊັບ ແລະ ກຳລັງພົນ, ວັດຖຸສິ່ງຂອງເພື່ອລົງໄປຊ່ວຍເຫລືອ, ກອບກູ້ເອົາຊັບສິນ, ຊີວິດຂອງປະຊາຊົນ ທີ່ຢູ່ໃນເຂດໄພພິບັດ, ເຊິ່ງສື່ມວນຊົນໄດ້ປະຕິບັດ ແລະ ມີຄວາມຮັບຜິດຊອບສູງຕໍ່ໜ້າທີ່ມີຄວາມໄວ ເຮັດໃຫ້ທົ່ວສັງຄົມຢູ່ພາຍໃນ ແລະ ຕ່າງປະເທດໄດ້ຮັບຮູ້ ແລະ ໄດ້ເຫັນວ່າ ພັກ-ລັດຖະບານຂະແໜງການອົງການຈັດຕັ້ງຕ່າງໆ ທຸກພາກ ສ່ວນໄດ້ເປັນເອກະພາບ, ໄດ້ມີຄວາມເອົາໃຈໃສ່ ແລະ ມີຄວາມຮັບຜິດຊອບສູງ ໃນການແກ້ໄຂບັນຫາໄພພິບັດດັ່ງກ່າວ.ທ່ານຮອງລັດຖະມົນຕີ ຍັງໃຫ້ຮູ້ຕື່ມວ່າ: ມາຮອດປັດຈຸບັນນ້ຳໄດ້ບົກແຫ້ງລົງ ແລ້ວໃນແຕ່ລະພື້ນທີ່ ເຊິ່ງທາງຄະນະນຳກະຊວງ ກໍໄດ້ມີການມອບໝາຍ, ຈັດຕັ້ງ ແລະ ສົ່ງທີມຂ່າວລົງໄປພື້ນທີ່, ຜ່ານມາກໍໄດ້ສົ່ງທີມນັກຂ່າວລົງໄປແລ້ວ, ແຕ່ກ່ອນໜ້ານັ້ນ ກໍໄດ້ເຮັດໜ້າທີ່ປົກກະຕິ, ມີສູນຂ່າວປະຈຳຢູ່ກະ ຊວງ ແລະ ໄດ້ມີການປະສານງານກັບພະແນກ ຖວທ ແຕ່ລະແຂວງ ແລະ ທີມນັກຂ່າວທີ່ໄປປະຈຳຢູ່ສະໜາມ ແລະ ຕໍ່ມາໄດ້ມີສະພາບການແຮງຂຶ້ນ, ນ້ຳຖ້ວມໜັກຂຶ້ນ ກໍໄດ້ມີການຈັດທີມນັກຂ່າວ 3 ທີມ ລົງໄປ, ຜ່ານ້ຳລຸຍຕົມເພື່ອຕິດຕາມ ແລະ ລາຍງານຂ່າວ ທຸກການເຄື່ອນໄຫວ, ທຸກບັນຫາທີ່ເກີດຂຶ້ນ ແລະ ທຸກຄວາມພະຍາຍາມ ໃນການແກ້ໄຂບັນຫາຕ່າງໆ ໃນໄລຍະເກີດໄພພິບັດນ້ຳຖ້ວມ.ນອກຈາກນີ້, ກໍຍັງໄດ້ມີການສືບຕໍ່ຈັດຕັ້ງທີມຂ່າວຊຸດໃໝ່ ຂອງທຸກສື່ບັນຈຸເຂົ້າໃນແຕ່ລະທີມ ເພື່ອໄປເຮັດວຽກຮ່ວມກັນ ໃນຂະບວນການຟື້ນຟູຫລັງໄພພິບັດ, ຫລັງນ້ຳຫລຸດລົງ ແລະ ຫາກສະພາບດີຂຶ້ນ, ນ້ຳຫລຸດລົງ, ຝົນບໍ່ແຮງ, ນໍ້າບໍ່ຖ້ວມຕື່ມ ສື່ມວນຊົນເຮົາ ກໍຈະໄດ້ສຸມໃສ່ເຮັດຂ່າວ, ລາຍງານຂ່າວ ໃນການເຄື່ອນໄຫວ ປະຕິບັດໜ້າທີ່ຂອງທຸກຂະແໜງການ ຕາມການຕົກລົງ ແລະ ມອບໝາຍຂອງລັດຖະບານ.

ຂ່າວ: ສົມຫວັງ ພາບ: ເກດສະໜາ