ລັດຖະມົນຕີກະຊວງ ຖວທ ຢ້ຽມຢາມຄົນເຈັບຈາກອຸບັດຕິເຫດລົດບັສ ຕົກເຫວເສັ້ນທາງ ກາສີ-ເມືອງນານ

ໃນຕອນບ່າຍວັນທີ 21 ສິງຫາ 2019, ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍຄະນະ ໄດ້ລົງຢ້ຽມຢາມຄົນເຈັບຈາກອຸບັດຕິເຫດລົດບັສ (ລົດເມທ່ອງທ່ຽວ) ຕົກເຫວເສັ້ນທາງ ກາສີ-ເມືອງນານ ໃນຕອນບ່າຍເວລາປະມານ 15 ໂມງ 30 ນາທີ ຂອງວັນທີ 19 ສິງຫາ 2019 ທີ່ກໍາລັງປີ່ນປົວ ແລະ ຮັກສາຢູ່ໂຮງໝໍ 103 ນະຄອນຫລວງວຽງຈັນ.

ການມາລົງຢ້ຽມຄັ້ງນີ້ ແມ່ນເພື່ອເປັນການຕິດຕາມອາການ, ທັງເປັນການໃຫ້ກຳລັງໃຈຜູ້ທີ່ໄດ້ຮັບບາດເຈັບ ແລະ ຄອບຄົວຂອງພວກກ່ຽວ.
ໂອກາດນີ້, ທ່ານ ພັນເອກ ຈັນທະພອນ ອຸດົມສຸກ ຮອງອຳນວຍການໂຮງໝໍ 103 ລາຍງານໃຫ້ຮູ້ວ່າ: ໃນເບື້ອງຕົ້ນ (ວັນທີ 20 ສິງຫາ 2019) ໄດ້ມີຄົນເຈັບທັງໝົດ 22 ຄົນເຂົ້າມາປິ່ນປົວ ແລະ ຮັກສາຢູ່ໂຮງໝໍແຫ່ງນີ້, ແຕ່ມາຮອດວັນທີ 21 ສິງຫາ 2019 ຍັງມີຄົນເຈັບກຳລັງປິ່ນປົວ 20 ຄົນ, ໃນນັ້ນ ຢູ່ພະແນກກະທົບກະດູກມີ 12 ຄົນ, ພະແນກໂຜ້ງເອິກ 5 ຄົນ, ພະແນກໂຜ້ງທ້ອງ 2 ຄົນ ແລະ ພະແນກໄອຊີຢູ (ICU) 1 ຄົນ. ສ່ວນຄົນເຈັບອີກ 2 ຄົນ ແມ່ນອາການບາດເຈັບບໍ່ຮ້າຍແຮງ ແລະ ສາມາດກັບບ້ານໄດ້.