ສະຫຼຸບຖອດຖອນບົດຮຽນກ່ຽວກັບການກະກຽມ ແລະ ການ ດຳເນີນກອງປະຊຸມ ໃຫຍ່ອົງຄະນະພັກຂັ້ນເມືອງທົ່ວປະເທດ

ປຊຊ. ວັນທີ 12 ແລະ 13 ສິງຫານີ້, ຄະນະຈັດຕັ້ງສູນກາງພັກ ໄດ້ເຊີນບັນດາຫົວໜ້າຄະນະຈັດຕັ້ງແຂວງ, ຫົວໜ້າຂະ ແໜງກໍ່ສ້າງພັກຂອງ ແຂວງໃນທົ່ວປະເທດມາປະຊຸມຢູ່ທີ່ນະຄອນຫຼວງວຽງຈັນ ເພື່ອສະຫຼຸບຖອດຖອນບົດຮຽນກ່ຽວກັບການກະກຽມ ແລະ ການ ດຳເນີນກອງປະຊຸມ ໃຫຍ່ອົງຄະນະພັກຂັ້ນເມືອງໃນໄລຍະຜ່ານມາ ໂດຍການເປັນປະທານຂອງສະຫາຍ ຈັນສີ ໂພສີຄຳ ເລຂາທິການສູນກາງພັກ ຫົວໜ້າຄະນະ ຈັດຕັ້ງສູນກາງພັກ.

ໂດຍປະຕິບັດຕາມຄຳສັ່ງ ເລກທີ 07 ຂອງຄະນະເລຂາທິ ການສູນກາງພັກ ບົດແນະນຳ ຂອງຄະນະຈັດຕັ້ງ, ຄະນະ ກວດກາ, ຫ້ອງວ່າການສູນກາງຄະນະໂຄສະນາອົບຮົມສູນກາງພັກ ແລະ ຂະແໜງການທີ່ ກ່ຽວຂ້ອງອື່ນໆ ນັບແຕ່ເດືອນ ກຸມພາ 2014 ມາເຖິງປະຈຸບັນ ໄດ້ສຳເລັດການດຳເນີນກອງປະຊຸມໃຫຍ່ຂັ້ນເມືອງໄປແລ້ວ 57 ເມືອງ ຫຼືເທົ່າກັບເກືອບ 40% ຂອງຈຳນວນເມືອງທັງໝົດ ໃນທົ່ວປະເທດ.ຜ່ານຜົນສຳເລັດດັ່ງກ່າວສັງເກດເຫັນວ່າບັນດາເມືອງລ້ວນແຕ່ໄດ້ປະຕິບັດຕາມຂັ້ນຕອນກະກຽມດ້ານ ຕ່າງໆຢ່າງຖືກຕ້ອງຕາມ ການແນະນຳຕ່າງໆ, ກຳແໜ້ນເນື້ອໃນຈິດໃຈຊີ້ນຳຂອງຂັ້ນເທິງ, ສຶກສາອົບຮົມການເມືອງ-ແນວຄິດໃຫ້ພະນັກງານ-ສະມາຊິກພັກ ເຊື່ອມຊຶມ ກຳແໜ້ນແນວທາງນະໂຍບາຍຂອງພັກ, ເປີດຂະບວນການແຂ່ງຂັນຮັກຊາດ-ພັດທະນາ, ຂະບວນ ການຫັນພະນັກງານລົງຊ່ວຍ ເຫຼືອປະຊາ ຊົນຢູ່ຮາກຖານ, ຂະບວນການຜະລິດເປັນສິນຄ້າ ເພື່ອສ້າງຄວາມຮັ່ງມີເຂັ້ມແຂງທາງດ້ານເສດຖະກິດ, ຊີວິດການເປັນຢູ່ຂອງປະຊາຊົນ ບັນດາເຜົ່າ ແລະ ອື່ນໆ.
ສະເພາະການສະຫຼຸບຕົວເລກຂອງ 43 ເມືອງຈາກ 57 ເມືອງທີ່ໄດ້ຮັບລາຍງານຕົວເລກລະອຽດນັ້ນມີຜູ້ອອກສະໝັກຮັບເລືອກຕັ້ງ 1.154 ສະຫາຍ ໃນນີ້ມີເລຂາໜ່ວຍພັກທີ່ບໍ່ແມ່ນລັດຖະກອນ 111 ສະຫາຍ, ຍິງ 8 ສະຫາຍ. ຜ່ານການປ່ອນບັດເລືອກຕັ້ງຕົວຈິງ ເລືອກ ໄດ້ຄະນະບໍລິຫານງານພັກເມືອງຊຸດໃໝ່ໄດ້ 959 ສະຫາຍ, ຍິງ 128 ສະຫາຍ. ໃນນີ້ມີຄະນະພັກຊຸດເກົ່າໄດ້ຄືນໃໝ່ 541 ສະຫາຍ ເທົ່າກັບ 94,25% ຂອງຜູ້ສືບຕໍ່ສະໝັກໃໝ່, ຜູ້ສະ ໝັກໃໝ່ໄດ້ 418 ສະຫາຍ, ເທົ່າກັບ 72,06% ຂອງຈຳ ນວນຜູ້ສະໝັກໃໝ່. ໃນນັ້ນ, ຍິງ 61 ສະຫາຍ, ເລຂາໜ່ວຍພັກທີ່ບໍ່ແມ່ນລັດຖະກອນມີ 62 ສະຫາຍ, ຍິງ 3 ສະຫາຍ. ກຳມະການພັກເມືອງຂອງ 43 ເມືອງທີ່ ສະຫຼຸບໄດ້ນັ້ນມີອາຍຸສະເລ່ຍ 46 ປີ, ໃນນັ້ນຮຸ່ນໜຸ່ມ 44 ປີລົງມາກວມ 33,16%, ຮຸ່ນກາງ 45 ຫາ 54 ປີກວມ 56,3% ສະແດງ ໃຫ້ເຫັນວ່າຄະນະນຳພາຂັ້ນເມືອງໃນຊຸມປີຕໍ່ໜ້າແມ່ນໄດ້ຜ່ານການຄັດ ເລືອກຢ່າງມີປະຊາທິປະໄຕ ກວ້າງຂວາງເປັນຜູ້ທີ່ມີປະສົບ ການ ແລະ ມີຄວາມໜຸ່ມແໜ້ນກວ່າຜ່ານມາ ແລະ ຈະເຮັດໃຫ້ວຽກງານມີປະສິດທິຜົນດີກວ່າເກົ່າແຕ່ຄຽງຄູ່ກັບຜົນສຳເລັດ ດັ່ງກ່າວ ກໍຍັງສັງເກດເຫັນບາງ ຈຸດອ່ອນ ແລະ ຂໍ້ຄົງຄ້າງຈຳນວນໜຶ່ງທີ່ຈະຕ້ອງໄດ້ແກ້ໄຂ ໃຫ້ລຸລ່ວງໄປດ້ວຍດີ.
ໃນກອງປະຊຸມສະຫາຍ ຈັນສີ ໂພສີຄຳ ເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກກໍໄດ້ມີຄວາມ ເຫັນຊີ້ນຳຕໍ່ກອງ ປະຊຸມໂດຍ ທ່ານໄດ້ເນັ້ນບັນຫາການຊີ້ນຳວຽກງານໃນຕໍ່ໜ້າແກ່ຄະນະຈັດຕັ້ງແຂວງຕະຫຼອດຮອດບັນດາກົມອ້ອມຂ້າງຄະນະຈັດຕັ້ງສູນກາງ ພັກແນໃສ່ເຮັດໃຫ້ ການຈັດຕັ້ງດຳເນີນກອງປະຊຸມໃຫຍ່ອົງຄະນະພັກຂັ້ນເມືອງໃນທົ່ວປະເທດໃຫ້ສຳເລັດໃນທ້າຍປີ 2014.