ວັນປ່ອຍປາ, ອະນຸລັກສັດນ້ຳ ແລະ ສັດປ່າແຫ່ງຊາດ ປີນີ້ຈະປ່ອຍປາ 50 ລ້ານໂຕ

ຂປລ. ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້ ກ່າວໃນພິທີປ່ອຍປາທ່ີຈັດຂຶ້ນຢູ່ອ່າງນ້ໍງຊ່ວງເມືອງ ນາຊາຍທອງ ນະຄອນຫລວງວຽງຈັນໂດຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ບັນດາທູຕານຸທູດ ແລະ ປະຊາຊົນ ເຂົ້າຮ່ວມໃນວັນທີ 13 ກໍລະກົດ 2019 ນີ້ວ່າ:

 

ຊຸມປີຜ່ານມາ,ກະຊວງກະສິກໍາ ແລະ ປ່າໄມ້ ກໍຄືຂະແໜງການກ່ຽວຂ້ອງໄດ້ສົມທົບກັບອົງການປົກຄອງທ້ອງຖິ່ນເປັນເຈົ້າການ ປ່ອຍປາ, ອະນຸລັກສັດນ້ຳ ແລະ ສັດປ່າ ສົ່ງຜົນໃຫ້ຂະຫຍາຍເພິ່ມຂຶ້້ນແຕ່ລະປີເຊິ່ງເລີ່ມແຕ່ປີ 2015 ເປັນຕົ້ນມາ, ປ່ອຍລູກປາ 35 ລ້ານໂຕ, ປີ 2016 ປ່ອຍລູກປາ 40 ລ້ານໂຕ, ປີ 2017 ຈໍານວນ 43 ລ້ານໂຕ  ແລະ  ປີ 2018 ກວ່າ 45 ລ້ານໂຕ.ຂະນະດຽວກັນກໍ ສ້າງວັງສະຫງວນໄດ້ຫລາຍກວ່າ 1.000 ແຫ່ງ, ເນື້ອທີ່ຫຼາຍກວ່າ 60 ພັນເຮັກຕາ ທັງໄດ້ມີລະບຽບຄຸ້ມຄອງວັງທ່ີໄດ້ເຊັນຮັບຮອງ ຈາກການຈັດຕັ້ງຂອງພາກລັດທ່ີກ່ຽວຂ້ອງແລ້ວ 638 ແຫ່ງ. ຮອງລັດຖະມົນຕີກະຊວງກະສິກຳ ແລະ ປ່າໄມ້ ກ່າວຕື່ມວ່າ: ປີນີ້ໃນ ທົ່ວປະເທດຈະປ່ອຍປາຄືນສູ່່ທຳມະຊາດ 50 ລ້ານໂຕ, ສະເພາະນະຄອນຫລວງວຽງຈັນ ຈະປ່ອຍປາ 580.000 ໂຕ ແລະ ສຳລັບມື້ນີ້ ປ່ອຍປາ 250.000 ໂຕໂດຍມີປາປາກ, ປາເຂັງ, ປາເກັດແລບ, ປານິນ ແລະ  ປາໄນ ລວມທັງໄດ້ປ່ອຍພໍ່ພັນ ແລະ  ແມ່ພັນປາທໍາ ມະຊາດ  550 ໂຕ ເປັນຕົ້ນ ປາກົດ, ປາໝູ, ປາເຂັງ, ປາເພ້ຍ, ປາຊວາຍໝາກໄມ້, ປາເໝັ້ນ ແລະ ລູກປາຝາ 99 ໂຕ. ການປ່ອຍ ປາລົງສູ່ທໍາມະຊາດໃນໂອກາດວັນປ່ອຍປາ,ວັນອະນຸລັກສັດນໍ້າ ແລະ ສັດປ່າແຫ່ງຊາດ ເພື່ອເປັນການປູກຈິດສຳນຶກອະນຸຊົນ, ເຍົາ ວະຊົນ ກໍຄືລູກຫລານຜູ້ເກີດໃໝ່ໃຫຍ່ລຸນໃຫ້ຮັກຫວງແຫນສັດນ້ໍາ ແລະ  ສັດປ່າ ທັງເປັນການປຸກລະດົມທົ່ວປວງຊົນ ເຂົ້າຮ່ວມ ຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ສັດນ້ໍາ  ແລະ  ສັດປ່າເພື່ອເຮັດໃຫ້ປະຊາກອນສັດນ້ໍາສັດປ່ານັບມື້ອຸດົມສົມບູນ ກາຍເປັນທ່າແຮງຄາ້ໍປະກັນສະບຽງອາຫານ, ໂພຊະນາການກໍຄືການປັບປຸງຊີວິດການເປັນຢູ່ຂອງປະຊາຊົນລາວໃຫ້ນັບມື້ດີຂຶ້ນ ແລະ ເປັນການປະຕິບັດຕາມຮີດຄອງປະເພນີໃນວັນເຂົ້າພັນສາທີ່ຫ້າມບໍ່ໃຫ້ຂ້າສັດຕັດຊີວິດ.
(ແຫຼ່ງຂໍ້ມູນຈາກ: ປະເທດລາວ)