ຄະນະກຸ່ມແມ່ຍິງອາຊຽນນະຄອນຫຼວງວຽງຈັນ ເດີນທາງໄປຢ້ຽມຢາມປະເທດໄທ

ຂປລ. ໃນວັນທີ 5 -7 ກໍລະກົດ 2019 ຄະນະກຸ່ມແມ່ຍິງອາຊຽນ ທີ່ນະຄອນຫລວງວຽງຈັນ (ກອຍວ)ນຳໂດຍທ່ານນາງ ອາລຸນີ ກົມມະສິດ ພັນລະຍາລັດຖະມົນຕີປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ, ປະທານກິດຕິມະສັກກຸ່ມແມ່ຍິງອາຊຽນ ທ່ີນະຄອນຫລວງວຽງຈັນ, ມີເອກອັກຄະລັດຖະທູດອາຊຽນ, ບັນດາພັນລະຍາທູດ, ນັກການທູດຍິງ ແລະ ພັນລະຍານັກການທູດຈາກບັນດາສະຖານເອກອັກຄະລັດຖະທູດປະເທດອາຊຽນ ປະຈຳ ສປປ ລາວ, ພ້ອມດ້ວຍນັກການທູດຍິງຂອງກະຊວງການຕ່າງປະເທດ ແຫ່ງ ສປປ ລາວ 22ທ່ານໄດ້ເດີນທາງຢ້ຽມຢາມ ແລະ ທັດສະນະສຶກສາຢູ່ແຂວງໜອງຄາຍ ແລະ ແຂວງອຸດອນທານີ ລາຊະອານາຈັກໄທ, ຕາມການເຊື້ອເຊີນຂອງທ່ານ ກຽດຕິຄຸນ ຊາດປຣະເສີດ ເອກອັກຄະຣາຊະທູດໄທ ປະຈຳສປປ ລາວ, ໂດຍໄດ້ຮັບກຽດໃຫ້ການຕ້ອນຮັບຢ່າງອົບອຸ່ນຈາກທ່ານ ຣົນນະໄຊ ຈິດວິເສດ ຜູ້ວ່າລາຊະການແຂວງໜອງຄາຍ ແລະ ທ່ານ ວັດທະນາ ພຸດທິຊາດ ຜູ້ວ່າລາຊະ ການແຂວງອຸດອນທານີ.

ໃນລະຫວ່າງການຢ້ຽມຢາມ, ທາງຄະນະໄດ້ໄປຢ້ຽມຢາມ ແລະ ຢ້ຽມຊົມສະຖານທ່ີສຳຄັນທາງດ້ານປະຫວັດສາດ ແລະ ວັດທະນະທຳຂອງທັງສອງແຂວງເຊ່ັນ: ລານວັດທະນະທຳ ແລະ ຟາມເພາະພັນປາຝາທ່ີສວຍງາມຂອງແຂວງໜອງຄາຍ, ສນູການຮຽນຮູ້ກຸ່ມຕຳ່ຜ້າບູຮານບ້ານໂນນກອກ, ພິພິທະພັນຂອງແຂວງອຸດອນທານີ, ວັດຜາຕາກເສື້ອ ແລະ ວັດຄຳສະໂນດ. ນອກນ້ັນ, ຍັງໄດ້ຮັບຊົມການສະແດງສິລະປະພື້ນເມືອງທີ່ສວຍງາມຈາກກຸ່ມສິລະປະປະຈຳທ້ອງຖ່ິນຂອງທັງສອງແຂວງອີກດ້ວຍ.
ໃນໂອກາດນີ້, ທ່ານນາງ ອາລຸນີ ກົມມະສິດ ໄດ້ສະແດງຄວາມຂອບໃຈມາຍັງທ່ານເອກອັກຄະລາຊະທູດໄທ ປະຈຳ ສປປ ລາວ, ພ້ອມດ້ວຍພັນລະຍາ, ຜູ້ວ່າລາຊະການແຂວງໜອງຄາຍ ພ້ອມດ້ວຍພັນລະຍາ ແລະ ຜູ້ວ່າລາຊະການ ແຂວງອຸດອນທານີພ້ອມດ້ວຍຄະນະຮັບຜິດຊອບທ່ີໄດ້ອຳນວຍຄວາມສະດວກ ແລະ ຈັດແຜນການເຄ່ືອນໄຫວຕ່າງໆໃຫ້ແກ່ຄະນະໄດ້ເປັນຢ່າງດີ, ເຊິ່ງນອກຈາກຈະໄດ້ທ່ຽວຊົມສະຖານທ່ີຕ່າງໆແລ້ວຍັງເປັນການຮັດແໜ້ນການພົວພັນຮ່ວມມື ແລະ ສ້າງຄວາມຮັກແພງສາມັກຄີລະຫວ່າງກຸ່ມແມ່ຍິງອາຊຽນ ທ່ີນະຄອນຫລວງວຽງຈັນ ກັບ ແຂວງໜອງຄາຍ, ອຸດອນທານີ ແລະ ສະຖານທູດໄທ ທີ່ນະຄອນຫລວງວຽງຈັນຕື່ມອີກ. ການຢ້ຽມຢາມສອງແຂວງຂອງປະເທດໄທ ໃນຄັ້ງນີ້, ແມ່ນໜຶ່ງໃນກິດຈະກຳປະຈຳປີຂອງກຸ່ມແມ່ຍິງອາຊຽນ ທ່ີນະຄອນຫລວງວຽງຈັນເພື່ອພົບປະແລກປ່ຽນບົດຮຽນທາງດ້ານວັດທະນະທຳ ແລະ ປະຫວັດສາດລະຫວ່າງບັນດາປະເທດສະມາຊິກອາຊຽນ ແລະ ສິ່ງສຳຄັນທີ່ສຸດແມ່ນເປັນໂອກາດອັນດີໃນການເສີມຂະຫຍາຍມິດຕະພາບ ແລະ ສ້າງຄວາມລຶ້ງເຄີຍລະຫວ່າງເອື້ອຍນ້ອງແມ່ຍິງອາຊຽນດ້ວຍກັນ.