ທົ່ງໄຫຫີນ ແຂວງຊຽງຂວາງ ຖືກຮັບຮອງເປັນມໍລະດົກໂລກ ຢ່າງເປັນທາງການ

ຂປລ. ໃນວັນທີ 6 ກໍລະກົດ ທີ່ນະຄອນຫລວງ ບາກູ ປະເທດ ອາແຊັກໄບຊານ ໄດ້ຈັດກອງປະຊຸມຄັ້ງທີ 43 ຂອງຄະນະກຳມະການມໍລະດົກໂລກ (UNESCO) ໂດຍການເຂົ້າຮ່ວມຂອງຄະນະຜູ້ແທນລາວນຳໂດຍ ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ. ໃນກອງປະຊຸມດັ່ງກ່າວ, ໄດ້ຮັບຮອງເອົາທົ່ງໄຫຫີນ ແຂວງຊຽງຂວາງ ເຂົ້າເປັນມໍລະດົກໂລກຢ່າງເປັນທາງການແລ້ວ ແລະ ຖືວ່າເປັນມໍລະດົກໂລກແຫ່ງ ທີ 3 ຂອງ ສປປ ລາວ.

ສປປ ລາວ ໄດ້ສະເໜີທົ່ງໄຫຫີນແຂວງຊຽງຂວາງ 11 ແຫ່ງຈາກທັງໝົດເກືອບ 20 ແຫ່ງທີ່ຄົ້ນພົບ ແລະ ບັນທຶກຢ່າງເປັນທາງການເຂົ້າເປັນມໍລະດົກໂລກ, ທົ່ງໄຫຫີນແຂວງຊຽງຂວາງ, ໄດ້ຖືກສະເໜີຂຶ້ນເປັນມໍລະດົກໂລກມາຕັ້ງແຕ່ວັນທີ 25 ມີນາ 1992 ໃນປະເພດມໍລະດົກໂລກທາງວັດທະນະທຳດ້ວຍຂໍ້ກຳນົດ ແລະ ຫລັກເກນທີ 01 ແລະ 03 ຈາກທັງໝົດ 06 ຫລັກເກນໃນປະເພດມໍລະດົກໂລກທາງວັດທະນະທຳ ຂອງອົງການUNESCO ທີ່ລະບຸວ່າ: ເປັນຕົວແທນໃນການສະແດງຜົນງານເອກທີ່ສ້າງຂຶ້ນດ້ວຍຫົວຄິດປະດິດສ້າງອັນສະຫລຽວສະຫລາດຂອງມະນຸດ ແລະ ເປັນສິ່ງທີ່ຢືນຢັນເຖິງຫລັກຖານຂອງວັດທະນະທຳ ແລະ ອະລິຍະທຳ ທີ່ປະກົດໃຫ້ເຫັນຢູ່ໃນປັດຈຸບັນ ຫລື ວ່າໄດ້ສາບສູນໄປແລ້ວ. ມາເຖິງປັດຈຸບັນ, ມໍລະດົກໂລກໃນ ສປປ ລາວ ປະກອບມີ 3 ແຫ່ງຄື: ເມືອງ ຫລວງພະບາງ (ນະຄອນຫລວງພະບາງ) ແຂວງ ຫລວງພະບາງ ທີ່ຖືຮັບຮອງ ໃນປີ 1995, ວັດພູ ແຂວງ ຈຳປາສັກ ຖືກຮັບຮອງໃນ ປີ 2001 ແລະ ທົ່ງໄຫຫິນ ແຂວງ ຊຽງຂວາງ ຖືກຮັບຮອງໃນປີ 2019 ນີ້, ເຊິ່ງທັງໝົດນອນຢູ່ໃນປະເພດ ມໍລະດົກໂລກທາງວັດທະນະທຳ.