ເປີດນໍາໃຊ້ຂົວເບຕົງເສີມເຫລັກ ບ້ານນາທູ້ ເມືອງພີນ

ຂປລ. ເມື່ອບໍ່ດົນມານີ້, ໄດ້ພິທີມອບ-ຮັບ ແລະ ເປີດນໍາໃຊ້ຂົວເບຕົງເສີມເຫລັກ ຢູ່ບ້ານນາທູ້ ເມືອງພີນ ແຂວງສະຫວັນນະເຂດ ພາຍຫລັງ ດຳເນີນການກໍ່ສ້າງ ມາແຕ່ວັນທີ 8 ເມສາ 2019 ແລະ ສໍາເລັດ 100% ໃນວັນທີ 2 ກໍລະກົດ 2019, ຂົວດັ່ງກ່າວ ມີຄວາມຍາວ 23 ແມັດ, ກວ້າງ 03 ແມັດ, ລວມມູນຄ່າ ການກໍ່ສ້າງທັງໝົດ 445ລ້ານກວ່າກີບ ໃນນັ້ນ ທຶນສະໜັບ ສະໜູນຈາກ ທລຍ ເມືອງພີນ 420ລ້ານກວ່າກີບ ແລະ ທຶນຈາກ ການປະກອບສ່ວນ ຂອງຊຸມຊົນຈຳນວນ 24ລ້ານກວ່າກີບ ໂດຍແມ່ນບໍລິສັດ ລິດຈະເລີນໄຊ ກໍ່ສ້າງ ເປັນຜູ້ຮັບເໝົາກໍ່ສ້າງ.

ໃນພິທີເປີດນຳໃຊ້ ຂົວໃນຄັ້ງນີ້ ມີ ທ່ານ ສະແຫວງ ນັນທະວົງ ຮອງເຈົ້າເມືອງໆພີນ, ມີຫົວໜ້າ ການໂຍທາທິການ ແລະ ຂົນສົ່ງເມືອງ, ຫົວໜ້າຫ້ອງການ ທລຍ ປະຈຳເມືອງ, ຫົວໜ້າຫ້ອງການແຜນ ການ ແລະ ການລົງທຶນເມືອງ, ຫົວໜ້າບໍລິສັດ ລິດຈະເລີນໄຊ ກໍ່ສ້າງ, ອຳນາດການປົກຄອງ ແລະ ພໍ່ແມ່ປະຊາຊົນ ພາຍໃນບ້ານ ດັ່ງກ່າວ ເຂົ້າຮ່ວມ.