ສາລະ​ວັນ​ສ້າງວາລະສານ ແລະ ວີດີໂອຂອງແຂວງສົ່ງ​ເສີມ​ການ​ລົງທຶນ

ຂປລ. ແຂວງສາລະວັນ ອະຍຸມັດໃຫ້ ບໍລິສັດເມໂຄຊັບ ວາລະສານອັບເດດລາວ ສ້າງປື້ມວາລະ ສານ ແລະ ວີດີໂອ ຂອງແຂວງ ໃນມູນຄ່າ 130 ລ້ານກີບ ເພື່ອເປັນການ ໂຄສະນາ ສົ່ງເສີມ ການລົງທຶນ ແລະ ການທ່ອງທ່ຽວ ພາຍໃນ ແຂວງສາລະວັນ ແລະ ໃນວັນທີ 5 ກໍລະກົດ 2019 ນີ້, ໄດ້ມີພິທີເຊັນສັນຍາສ້າງປຶ້ມດັ່ງກ່າວ ລະຫວ່າງ ທ່ານ ບຸນກອງ ເກດທອງຄໍາ ຮອງຫົວໜ້າພະແນກຖະແຫລງຂ່າວ,ວັດທະນະທຳ ແລະ ທ່ອງທ່ຽວ(ຖວທ) ແຂວງສາລະວັນ ແລະ ທ່ານ ມານະ ສຸດທິຈັກ ອຳນວຍການບໍລິສັດເມໂຄຊັບ ວາລະສານອັບເດດລາວ.

ໂອກາດນິ້, ທ່ານ ສີສຸວັນ ແອຈັນນະນຸວົງ ຮອງຫົວໜ້າ ຫ້ອງການບໍລິຫານ ພະແນກ ຖວທ ແຂວງ ໄດ້ໃຫ້ຮູ້ວ່າ: ໃນສັນຍາດັ່ງກ່າວ ຝ່າຍເຈົ້າຂອງໂຄງການ ກໍຄື ແຂວງສາລະວັນ ມີສິດໃນການນຳພາບໍລິສັດລົງເກັບກຳຂໍ້ມູນ, ສະພາບ ເສດຖະກິດ-ສັງຄົມໃນ 8 ຕົວເມືອງ, ທົ່ວແຂວງ ແລະ ພະແນກ ການຕ່າງໆ, ພ້ອມດ້ວຍຫົວໜ່ວຍ ທຸກລະກິດ, ການຜະລິດ ແລະ ສະຖານທີ່ ທ່ອງທ່ຽວຕ່າງໆ ທີ່ມີໃນແຂວງສາລະວັນ, ທັງນີ້ ກໍເພື່ອເປັນການ ຕອບສະໜອງ ຂໍ້ມູນຕ່າງໆຂອງແຂວງ ໃຫ້ກັບບໍລິສັດ ຕາມຄວາມຕ້ອງ ການ. ສ່ວນຝ່າຍບໍລິສັດ ແມ່ນມີສິດ ໃນການລົງເກັບກໍາຂໍ້ມູນ ເພື່ອມາຜະລິດວາລະສານ ແລະ ສາລະຄະດີວິດີໂອໃຫ້ຄົບຖ້ວນ ແລະ ຖືກຕ້ອງ, ພ້ອມທັງຂຽນຂໍ້ມູນຕ່າງໆ ຮັບປະກັນ ໃນການສ້າງວາລະສານ ແລະ ວິດີໂອຂອງແຂວງ ໃຫ້ເປັນໜ້າສົນໃຈ ແລະ ດຶງດູດນັກລົງທຶນ, ນັກທ່ອງທ່ຽວທັງພາຍໃນ ແລະ ຕ່າງປະ ເທດໃຫ້ໄດ້ດີທີ່ສຸດ.